'MƲFAGOGOLÄ MARËKË ‑JƖJRAA'
MARËKË
JESUA 'JRƲPAA 'KÄKOLOFA
1.1-13
Wiili Jaan Batiisë 'palaa' ‑aaga 'lɩ
1
1 ‑Jää Nyɔsʋaa 'Mʋfagogoa 'käkolofa, ä 'paaa' Nyɔsʋaa 'Jʋ Jesu 'Kriisëa ‑gä, 2 'sɩrɩ 'i ‑jɩjra käa' nyɔsʋaamlɩpalanyɔɔ Esaiia ‑pɔɔkʋ 'lɩ†:‑Jää, 'n ‑taara 'na bɔblɔnyɔɔ 'nyʋfɔ
'ɔmä ‑mɩ 'nyʋfɔ 'klɔɔtrʋ ‑ta,
'ɔmä ‑na 'nyʋfɔ 'känyɩgla†.
3 Nyɔɔa wewewii ja ‑aaga 'lɩ:
'Ba ‑nyɩgla *'Pläkänyɔɔa 'trii 'kä,
'ba ‑gägä 'ɔa 'nyifi 'klɩ†!
4 'Ii 'lɩ Jaan 'tɔrɔ ‑aaga 'lɩ. 'Ɔ ma 'paa nyüü 'nɩwli, ‑bɛ 'ɔ ma ‑gbala 'üün ü toro 'lɩ ‑balʋ ‑gälɩ 'ümä 'nɩwlipa Nyɔsʋa 'mä 'üa ‑balʋ cere. 5 Judeea ‑tʋtʋ ‑gälɩa nyüüa 'fɩɔ nyra Jerusalɛɛmëa 'mʋgbɛa nyüüa 'fɩɔ ma mö 'ɔa 'pɛ 'lɩ; 'ü ma 'saalɩ 'üa ‑balʋa 'fɩɔ, 'kä 'ɔ 'paa 'üün 'nɩwli Jurëdɛɛn a 'mlɩ.
6 Samooa ‑püpliia 'lɩpadɛɛ Jaanlɔ ma 'sroo. Mlaafua ‑pɛɛtʋ 'ɔ ma kpasra 'lɩ ‑gälɩ†. ‑Aaga 'lɩa ‑kpakpëë nyra dʋgbakpɩ 'ɔ ma jö. 7 'Ɔ ma ‑gbala nyüü ‑maa: «Nyɔɔlɔ nëmäa' 'mɩ 'klɩtroro, 'ɔ ‑sɔɔrɔwʋ 'ɔnya ‑si 'mɩ 'wʋ. 'Nyɩ 'nɩmɩ 'lɩ ‑a bɩa ‑a ‑ŋäkä 'mä 'ɔa 'siia pɩa ‑jie. 8 'Nɩ 'n 'pa 'amɩ 'wli, ‑maa 'ɔɔlɔ nɩ, 'Nyüna ‑Susu 'ɔ nëmä 'amɩ 'wlipa.»
Jesua 'nɩwlipa 'taɩn
9 'A 'ia 'taɩn 'lɩ nɩ, Jesu sɔ Nasarɛɛtë, Galileea ‑tʋtʋ ‑gälɩ. Jaan nya 'pala 'ɔɔn 'nielɛ 'ü 'daraa' Jurëdɛɛn, 'ɛa 'mlɩ 'nɩ 'wli. 10 'Ɔmä 'nie 'lɩ 'cie dotro ‑bɛ cɛ ‑jieroklɩ, 'ɔnya 'jä ‑Susu 'unya 'cere 'ɔɔn ‑gälɩ ‑beere ‑sögö. 11 Mlɩa wii nya ja cɛa mlɩ: «‑Mɔ bä 'na plɛ ‑gälɩa 'Jʋ, ‑mɔ bä 'na dɔrʋ ‑gböösa†.»
Sataan 'traɩn Jesu ‑aaga 'lɩ
12 'I 'wlaraa' dotro Nyɔsʋaa ‑Susu fa Jesu ‑aaga 'lɩ. 13 'Ɔ ‑si ‑aaga 'lɩ jrüüa ‑glʋɩsɔɔ; 'ii Sataan 'traɩn 'ɔɔn. 'Klʋɛɛa mlaa ‑tɔrʋpɩɔ 'ɔ ma kʋ. 'Aanjëɩɩ ma kälä 'ɔa wii ‑gba.
'JRƲPALÄ JESU ‑FƐƐƐRƐA' GALILEEA ‑TƲTƲ ‑GÄLƖ
1.14–9.50
'Mʋfagogolä Jesu 'saraa' Galilee
14 'Ü 'kplaa' Jaanlɔ† ‑bɛ 'ü 'paa 'ɔɔn ‑jie 'lɩ nɩ, Jesu nya mi Galilee, 'ii 'ɔ 'sara Nyɔsʋaa 'kamapläa† 'mʋfagogo. 15 'Ɔ nɩnɩa: «'Taɩn 'lɩ Nyɔsʋa 'daaa' 'i 'a 'wlijrä, 'ɔa 'kamaplä 'a 'amɩ ‑gbajijrö. 'Ba toro 'lɩ ‑balʋ ‑gälɩ, 'kä 'a toro Nyɔsʋaa 'Mʋfagogo plɛ.»
Nyüü mlɔɔlü ‑kätɩ Jesu wea'
16 Jrüü 'doo 'lɩ, Jesu ‑gblaara ɩ Galileea 'nie 'ɔnya 'jä fɩafɩanyüü 'sɔɔ, Simɔɔ nyra 'ɔa ‑wlajʋ Andree. ‑Tata 'ü be ɩ 'nie 'lɩ. 17 Jesu nya we 'üün: «'Ba ji 'nyraa 'amɩ 'mä 'nyɛ, ‑bɛ 'mä 'amɩ nyüüfɩanyüü 'lɩnrörö.» 18 'Köklesa 'a ‑plɩɩ 'ü ‑gba 'üa ‑tatë 'kä, 'ünya ‑mɛ 'ɔɔn ‑gälɩ. 19 'Ɔ mia' 'klɔɔtrʋ jie nɩ, 'ɔnya 'jä Jaakë nyra 'ɔa ‑wlajʋ Jaan, nyɔɔlɔ 'ü 'daraa' Sebedee 'ɔa 'jü; 'üa ‑gɔlʋ 'lɩ 'ü bä ‑bɛ 'ü ‑nyɩgla 'üa ‑tatë 'kä. 20 'A ‑plɩɩ 'ɔ kʋ 'ɔnya we 'üün. 'Ünya tɩ ‑plɩɩ 'üa tʋ Sebedee nyra 'jrʋpafɛnyüü ‑gɔlʋ 'lɩ, 'ünya mi 'ɔa ‑nyɛɛ 'ü nyra 'ɔɔn 'mä 'nyɛ.
Jesua 'kpɩkpɩakʋlʋ kalaa' nyüü plɛklɩ
21 'Ünya 'jra Kapɛrënaumëbätä. ‑Srɩlɩ bäa' ‑fʋflʋpasrɩ nɩ, Jesu paa' juifëa 'sraaplanyukua ‑wälɩ nɩ, 'kpɩa 'ɔ 'kpɩa 'üün. 22 'Ɔa 'kpɩkpɩakʋ pa 'üün ‑gba. 'Sɩrɩ 'ɔ 'kpɩaa' ‑mää 'sɩ ‑dɔkpɩanyüü 'nyɩ 'kpɩa. 'Ɔɔlɔ nɩ, 'kamasa 'ɔ 'kpɩa†. 23 ‑Jää nyɔɔ 'tɔrɔ juifëa 'sraaplanyukulua ‑wälɩ, ‑frepasusu bä 'ɔmɩ 'lɩ. 'Ɔnya 'kpölɩkä: 24 «‑Yii! Wii 'plɛɛ bä a nyra ‑mɔ kɔsɔa ‑tɔrʋpɩɔ le, Nasarɛɛtënyɔɔ Jesu? Amɔ ‑ji bʋblɔ? 'N jre nyɔɔlɔ bäa': Nyɔsʋaa 'Nyünanyɔɔ, 'ɔɔ ‑bä!» 25 Jesu nya nyrara 'uun 'wli: «'Kpla ‑na 'mä, 'kä ‑ciie nyɔɔlɔ 'lɩ!» 26 ‑Frepasusulu nëmäa' 'cie nɩ, 'u trara nyɔɔlɔ, 'unya 'pa 'popowle. 27 'I prɛ 'üa 'fɩɔa ‑gälɩa ‑susu, ‑bɛ 'ü 'betre 'lɩ 'üa 'kpɔa ‑tɔrʋpɩɔ: «‑Mɩ 'plɛɛ kʋ 'sɔɔwʋ ‑pɩ le? 'Kpɩkpɩakʋ ‑mɩdoo! 'Kamasa 'ɔ 'paa wii, ‑bakää ‑frepasisi, wiili 'ɔ 'saaa' 'lɩ, 'a 'ii 'ü 'nööwli!» 28 'A ‑plɩɩ Jesua 'nyrɩ kʋ 'inya ‑gbaala Galileea 'pläa 'fɩɔ ‑gälɩ 'kä.
Jesu 'pʋɔ Simɔɔa ŋʋtayio
29 Jesu, Jaakë, Jaan, Simɔɔ ‑bɛ Andree 'ciea' dotro juifëa 'sraaplanyüköli nɩ, Simɔɔ nyra Andreea ‑gbööli 'ü mi. 30 'Ü mia' nɩ, Simɔɔa ŋʋtayioa fugba fumö; 'ɔ 'pi ‑pɔkɩ ‑gälɩ. 'A ‑plɩɩ 'ü kʋ, 'ünya ‑gbala 'iin Jesu. 31 Jesu nya jijrö 'ɔɔn ‑gba, 'ɔnya 'kpla 'ɔa 'darʋa 'mä 'klɩ, 'ɔnya ‑gä 'ɔɔn 'klɩ. 'A ‑plɩɩ ‑wusulu nya sɔ 'ɔɔn 'lɩ. 'Ɔ sɔa' 'wʋ 'üa ‑gä 'ɔ 'pa.
‑Wusublanyüülü Jesu 'pʋɔa'
32 ‑Gbia kaklaa' 'klɩ nɩ†, 'ünya ja Jesu ‑wusublanyüü nyra nyüülü kä 'fɩɔ domüü bäa' 'lɩ. 33 Bätäa 'fɩɔ trara nyukulua 'mëmla 'klɩ. 34 'Ɔ 'pʋɔ ‑wusublanyüü 'kɔkɔmlɛ ü ‑wusua 'kaɩn 'kaɩn 'blaaa'. 'Ɔ prɛ domüü 'kɔkɔmlɛ. Domüü jrea' ‑gʋ nyɔɔlɔ 'ɔ bäa' nɩ, 'ɔnyɩ ‑nyɩ 'üün 'casɩ ‑a 'ümä wii 'pa†.
Jesu 'cie Kapɛrënaumëbätä
35 ‑Srɩkägbalawlaa, 'jöjrüükpü ‑ka pa, Jesu nya sɔ 'wʋ 'ɔnya 'cie bätä, 'ɔnya bereklɩ ‑aaga 'lɩ ‑bɛ 'ɔ bibie Nyɔsʋa. 36 'I ‑wlɛa' 'lɩ, Simɔɔ nyra 'ɔa ‑mölöö nya mi 'ɔɔn 'bata. 37 'Ü 'jäa' 'ɔɔn nɩ, 'ünya ‑gbala 'ɔɔn: «‑Mɔ nyüüa 'fɩɔ 'bata.» 38 'Iibäa' Jesu nɩ: «A mi bätë ‑mölööa 'mlɩ, 'mä bɩa 'lɩ nyɔsʋaawii 'pala; 'ia ‑gʋ 'n ji.» 39 'Ɔnya mi Galileea 'pläa 'fɩɔa ‑gälɩ, 'ɔ 'pala 'üa 'sraaplanyëka ‑wälɩ nyɔsʋaawii ‑bɛ 'ɔ prɛ domüü.
'Jrʋklanyɔɔlɔ Jesu 'pʋɔa'
40 'I bä jrüü 'doo, 'jrʋklanyɔɔ 'doo nya jijrö Jesu ‑gba, 'ɔnya 'pa 'ɔa 'klɩ kotifli ‑bɛ 'ɔ bibie 'ɔmɩ: «‑Ama 'bata 'na 'pɔpʋɔkʋ, ‑mrɛɛ ‑a ‑futo 'mɩ.» 41 Nyɔɔlɔa nyatɛrɩ nya 'bla Jesu, 'ɔnya to 'darʋ, 'ɔnya ‑fɛ 'ɔɔn ‑gba, 'ɔnya ‑gbala 'ɔɔn: «'N 'bata ‑na 'pɔpʋɔkʋ; 'pʋ!» 42 'A ‑plɩɩ 'jrʋ kʋ dotro 'unya bɩa 'ɔa fugba 'lɩ. 43 Jesu nya ‑flɔɔrɔ nyɔɔlɔ 'nyüa 'mlɩ 'ɔnya prɛ 'ɔɔn. 44 ‑Maa ‑jäsɩ Jesu ‑gbalaa' 'ɔmɩ nɩ: «‑Nyɩ ‑gbala 'iin nyɔɔ, ‑maa mi ‑a ‑srara ‑na nyufa ‑gbɔsapɛrɩnyɔɔ 'klɩ, 'kä ‑saaa ‑gbɔlʋ Moisë 'daaa' 'ba 'saa'; 'uu nëmä 'nyrɩkä, 'kä nyüüa 'fɩɔ nya 'iin jre 'sɩrɩ 'jrʋ ‑kanyɩa' ‑mɩ kla†.» 45 ‑Maa nyɔɔlɔ mia' dotro nyüüa 'fɩɔ 'ɔ 'sara 'iin 'lɩ ‑bɛ 'ɔ ‑piie. 'A 'ia ‑gʋ Jesu ‑kanyɩ 'wlalɩkä 'ɔnyɩ 'jra bätä ‑a. ‑Maa bätë ‑gba, ‑plɩɩlɩ nyüü 'nyɩa' ‑sümlö nɩ, 'ii 'ɔ kʋä, 'asɩɛ nyüü 'jajra ‑gälɩ, 'ü mö ‑tɛ 'lɩ 'ɔ bäa'.