NYƆSƲAWIILI JAAN BATIISË 'PAA'
3.1-20
Jaan Batiisëa Nyɔsʋaajrʋpa
3
1 Nyɔɔlɔ 'ü 'daraa' Tibɛrë Sesaa 'ɔa 'kama ‑sɩ ‑pʋ ‑sɩ ‑gbööa ‑sʋa 'mlɩ nɩ, Pɔɔsë Pilatë bä kä Judeea ‑gʋmla, Erɔɔdë 'kama Galilee, 'ɔa ‑wlajʋ Filipë 'kama Ituree nyra Trakoni, Lisania 'kama Abilɛɛnë. 2 Aanë nyra Kaiifë bä kä ‑gbɔsapɛrɩnyüü kpakü. 'A 'ia 'taɩnlɩa 'mlɩ, Nyɔsʋa ‑tʋ Sakariia 'jʋ Jaan wii mlɩ, ‑aaga 'lɩ. 3 ‑Bɛ 'ɔ ma ‑piie Jurëdɛɛn a ‑tʋtʋa 'fɩɔ ‑gälɩ. ‑Bɛ 'ɔ ‑gbala nyüü ü toro 'lɩ ‑balʋ ‑gälɩ 'ümä 'nɩwlipa Nyɔsʋa 'mä 'üa ‑balʋ cere, 4 'sɩrɩ 'i ‑jɩjra käa' nyɔsʋaamlɩpalanyɔɔ Esaiia ‑pɔɔkʋ 'lɩ:Nyɔɔa wewewii ja ‑aaga 'lɩ:
'Ba ‑nyɩgla 'Pläkänyɔɔa 'trii 'kä;
'ba ‑gägä 'ɔa 'nyifi 'klɩ!
5 'Bütügbëa 'fɩɔ nya kalaa,
'dʋgbëa 'fɩɔ nya 'wʋciea,
dɛɛlɛ 'kpɩaa' 'ɛnya 'klɩgääläa,
bʋbɔnyifi nya 'känyɩglaa.
6 'Kä nyüüa 'fɩɔ nya Nyɔsʋaa 'lɩmlɩbanyɔɔlɔ Nyɔsʋa jaa' 'jä†.
Nyɔsʋawiili Jaan Batiisë 'paa'
7 'Ia ‑gʋ nyüü 'kɔkɔmlɛ ma jö Jaan a ‑nyɛɛ 'ɔmä 'üün 'nɩwlipa. 'Ɔnya ‑gbala 'üün: «'Mëmlɛtapaa 'jü 'amɩ, nyɔɔ 'plɛɛ srara 'amɩ Nyɔsʋaa 'crɛlɛ jöa', 'ɛa 'klɩfɔlɔkʋ le? 8 'Ba srara nʋnʋgbili ‑gbalaa' nyüü 'sɩrɩ 'anya 'a ‑balʋ 'pie. 'Anyɩ 'daa 'ana plɛklɩ ‑maa: ‹Abraamë bä ana tʋ†!› 'Amɔ 'n ‑gbala, Nyɔsʋa 'mrɛɛ ɔ nrörö ‑taa 'täkëlë kʋa' ‑pɩ Abraamëa 'jü 'lɩ. 9 ‑Bɛ ‑tɛ 'a 'nɩmɩ tiia tigblii 'lɩ 'pala: tuulu 'nyɩ tʋa' 'cɩca 'bü nɩ, 'unya 'kalaa 'kä 'unya kapu 'lɩ bere.»
10 'Ünya 'bete 'ɔɔn: «‑Bɛ ‑asɩ amä nʋ le?» 11 'Ɔnya ‑gbala 'üün: «‑Moloo ma 'klaa 'koti 'sɔɔ, 'ɔ ‑nyɩ ‑mɔlɔ 'nyɩa' dɛɛ 'klaa, kä ‑mɔlɔ 'klaaa' jijri nö bɩa dɛɛ 'dee.» 12 Dapookälɩpɛrɛnyüü nya ji bɩa, Jaan 'mä 'üün 'nɩwlipa. 'Ünya 'bete 'ɔɔn: «'Kpɩkpɩanyɔɔ, ‑asɩ anya nʋ le?» 13 'Ɔnya ‑gbala 'üün: «'Anyɩ 'papla dɛɛlɛ 'ü 'daaa' 'ba 'kplaa' ‑gälɩ.» 14 'Sʋgɩaa 'mʋgbɛ nya 'bete 'ɔɔn: «‑Bɛ amɔ le, ‑asɩ amä nʋ le?» 'Ɔnya ‑gbala 'üün: «'Anyɩ 'ba nyɔɔ mölii kälɩ, 'klüsa 'aiɛ yrʋsa. Möliili 'ü 'pɛɛa' 'amɩ 'ia 'doo 'ba fa.» 15 'Be 'Kriisë Israɛɛlë ‑glaaa ɩ, 'a 'ia ‑gʋ 'ü 'bete 'üa nyüfë Jaan ma 'nyɩ 'ɔɔn bä ‑a bä. 16 'Ɔnya ‑gbala 'üa 'fɩɔ: «'Mɔɔlɔ nɩ, 'nɩ 'n 'paa 'amɩ 'wli; ‑maa nyɔɔlɔ ‑sɔɔrɔa' 'wʋ ɔ ‑sia' 'mɩ 'wʋ nya jia, 'nyɩ 'lɩ ‑a bɩa 'mä 'ɔa 'siia pɩa ‑jie. 'Ɔnya 'amɩ 'Nyüna ‑Susu nyra kapu 'wlipaa. 17 'Ɔ 'klaa 'ɔa papɛɛ kälɩ; 'ɔmä ‑bleeejaju nyra 'ɛa frɩ ‑gbasasra, 'ɔmä 'ɛɛn nyiklili 'jrara, ‑maa 'ɔnya 'ɛa frɩ kapulu 'nyɩ bɩaraa' a mlɩ 'pütröa.»
18 Jaan ma 'paa' nyüü ‑tɔɔ 'kɔkɔmlɛ ‑moloo 'lɩ, 'asɩ 'ɔ ma 'saaralɩ 'üün 'Mʋfagogo. 19 'Ɔnya 'daa kä Erɔɔdë, 'ɔa ‑wlajʋa† 'ŋlʋʋlɔ Erɔdiadëlɔ 'ɔ jre käa', nyra bʋbɔgbili kä 'fɩɔ 'ɔ nʋa' bɩa 'ia ‑gʋ. 20 'Ɔ 'paa' 'sɔɔwʋ Jaan ‑jie 'lɩ nɩ, 'a bʋbɔgbili 'ɔ 'papla ‑gälɩ.
JESUA 'NƖWLIPAPAKƲ NYRA 'SƖRƖ SATAAN 'TRAƖN 'A 'ƆƆN ‑AAGA 'LƖ
3.21–4.13
Jesua 'nɩwlipa 'taɩn
21 Jaan bɩaa' nyüüa 'fɩɔ 'nɩwlipapakʋ nɩ, 'ɔnya 'pa bɩa Jesu 'nɩwli. Jesu bibie Nyɔsʋa, cɛ nya ‑jieroklɩ, 22 'Nyüna ‑Susu nya 'cere 'ɔɔn ‑gälɩ ‑beere ‑sögö. Mlɩa wii nya ja cɛa mlɩ: «‑Mɔ bä 'na plɛ ‑gälɩa 'Jʋ, ‑mɔ bä 'na dɔrʋ ‑gböösa†.»
23 Jesu kä ‑sɩ ‑glʋ ‑sɩ ‑pʋ 'fɩɔwʋ 'ɔnya 'mä 'ɔa 'jrʋpa 'kä ko. Wiili nyüü jrea' nɩ, Josɛɛfëa 'jʋ 'ɔ bä, Eliia Josɛɛfë, 24 Matatëa Elii, Leviia Matatë, Mɛlëkia Levii, Janaa Mɛlëki, Josɛɛfëa Jana, 25 Matatiasëa Josɛɛfë, Amɔɔsëa Matatiasë, Nauumëa Amɔɔsë, Eselia Nauumë, Nagaia Eseli, 26 Maatëa Nagai, Matatiasëa Maatë, Semeia Matatiasë, Josɛɛfëa Semei, Judaa Josɛɛfë†, 27 Joanaa Judaa, Lesaa Joana, Sorobabɛlëa Lesa, Salatɩɛlëa Sorobabɛlë, Nelia Salatɩɛlë, 28 Mɛlëkia Neli, Adia Mɛlëki, Kosamëa Adi, Ɛlëmodamëa Kosamë, Elëa Ɛlëmodamë†, 29 Josea Elë, Eliesɛɛa Jose, Jorimëa Eliesɛɛ, Matatëa Jorimë, Leviia Matatë†, 30 Simeɔɔa Levii, Judaa Simeɔɔn, Josɛɛfëa Judaa, Jonaa Josɛɛfë, Eliakimëa Jona†, 31 Melea Eliakimë, Menamëa Mele, Matataa Menamë, Nataan a Matata, Daviidëa Nataan†, 32 Jɛseea Daviidë, Obɛɛdëa Jɛsee, Boasëa Obɛɛdë, Samɔɔa Boasë, Nasɔɔn a Samɔɔ†, 33 Aminadabëa Nasɔɔn, Aramëa Aminadabë, Ɛsorɔɔmëa Aramë, Farɛsëa Ɛsërɔɔmë, Judaa Pɛrɛsë†, 34 Jakɔɔbëa Judaa, Isaakëa Jakɔɔbë, Abraamëa Isaakë, Taraa Abraamë, Nakɔɔrëa Tara, 35 Salukëa Nakɔɔrë, Lagoa Salukë, Falɛɛkëa Lago, Ebɛɛrëa Falɛɛkë, Salaa Ebɛɛrë, 36 Kainaan a Sala, Afakadëa Kainaan, Sɛmëa Afakadë, Noea Sɛmë, Lamɛɛkëa Noe, 37 Matusalaa Lamɛɛkë, Enɔkëa Matusala, Jarɛɛdëa Enɔkë, Malalelëa Jarɛɛdë, Kaɛɛn a Malalelë, 38 Enosëa Kaɛɛn, Sɛɛtëa Enosë, Adaan a Sɛɛtë, Nyɔsʋaa Adaan.