'Sɩrɩ Jesu ‑glooroa'
Matiö 1.18-25; Misee 5.1-2; Esaii 7.14; 9.5
2
1 'A 'ia 'taɩn 'lɩa mlɩ 'kɩɩ kpakölɔ 'ü 'daraa' Sesaa Ogusë† ‑jɩjra ‑pɔɔkʋ ü ‑jɩjra nyüülü kä 'fɩɔ bäa' Rɔmëa ‑tʋtʋ ‑gälɩa 'nyrɩ. 2 'Iibä nyüüa ‑täsäkʋa 'klɩsadɛɛ. ‑Bɛ 'ia 'taɩn 'lɩ nɩ, nyɔɔlɔ 'ü 'daraa' Kiriniisë 'ɔɔ bä Siriia 'pläa 'wliklɩanyɔɔ. 3 'Üa 'fɩɔ, ‑moloo ma bälɩ 'ɔa bätä 'ɔ mö 'ɔa 'nyrɩ ‑jɩjrakalɩ. 4 Josɛɛfëa 'mʋgbɛ nya sɔ Nasarɛɛtë, Galileea ‑tʋtʋ ‑gälɩ. 'Ɔnya mi Judeea ‑tʋtʋ ‑gälɩ Daviidëa† bätälä 'ü 'daraa' Bɛtëlɛɛmë, 'äa 'mlɩ, 'be Daviidëa ‑glügbö 'klɩa nyɔɔ 'ɔ bä. 5 'Ii 'ɔ mi 'ɔa 'nyrɩ ‑jɩjra, 'ɔɔ ‑bɛ Mariilɔ 'ɔ nëmäa' kä. 'Ɔ bä nʋgbla 'lɩ.6 'A 'i 'ü ‑ka bä Mariia ‑gugutaɩn nya jrälɩ, 7 'ɔnya ‑gu nyɩbɛjʋ, 'ɔa ‑kätɩjʋ. 'Ɔnya ‑fifra 'ɔɔn dɔʋ, 'ɔnya 'pie 'ɔɔn mlaa 'lɩtaradɛɛa 'mlɩ†, 'be 'ünyɩ nyuku ‑wälɩ 'crʋgba ‑a 'järä.
Bɛtëlɛɛmëa ‑bablëëgbanyɛrɛnyüü nyra 'aanjë
Matiö 2.1-15; Daniɛɛlë 9.21-26; Esaii 41.27
8 ‑Bablëëgbanyɛrɛnyüü bä ɩ bätäläa ‑gba; 'üa mlaa 'ü ‑glaara ‑gba ‑gbiara. 9 'Pläkänyɔɔa 'aanjë nya 'tɔrɔ 'üün 'klɩ; 'Pläkänyɔɔa 'napɛ nya ŋʋala 'üün ‑gälɩ. Ŋalɛ nya 'bla 'üün ‑gböösa. 10 'Ɔnya ‑gbala 'üün: «Ŋalɛ 'nyɩ 'bla 'amɩ, 'mʋfagogolä 'n jaa' nɩ, 'änya nyüüa 'fɩɔa dɔrʋ kpaku nʋa. 11 ‑Plɩɩlɩ a 'palaa' wii nɩ, Daviidëa bätä 'lee, 'Lɩmlɩbanyɔɔ 'doo 'a ‑glooro 'ana ‑gʋ. 'Ɔɔ bä 'Kriisë, 'Pläkänyɔɔ. 12 ‑Jäsɩ 'amäa' 'ɔɔn jre: 'ama mi nɩ, 'anya 'jʋ mlaa 'lɩtaradɛɛa 'mlɩ jräa; 'ü ‑fifra 'ɔɔn dɔʋ.» 13 ‑Bɛ fɩɩɩn, cɛlɩa 'sʋgɩa 'kɔkɔmlɛ nya ji; 'ünya blö 'aanjë ‑mɔlɔ ‑gälɩ, ‑bɛ 'üa 'fɩɔ 'bʋala Nyɔsʋaa 'nyrɩ 'dʋa 'mlɩ; ‑bɛ 'ü nö:
14 «Abɩa Nyɔsʋa 'bʋawliklɩ cɛɩɩa 'mlɩ,
abɩa 'ɔa plɛgälɩflɛrɛkʋ nyra 'ɔa ‑gbinanakʋ ‑nyrɛrɛ nyüülü bäa' ‑tʋtʋ ‑gälɩ†.»
15 'Taɩn 'lɩ 'aanjë sɔa' 'üün ‑gba ‑bɛ 'ü 'blööa' cɛlɩ dɛrɩ nɩ, ‑bablëëgbanyɛrɛnyüülü 'pala 'üa ‑tɔrʋpɩɔ wii ɔ: «A mi amä Bɛtëlɛɛmë 'tɔ. Wiili jräa' 'lɩ amä 'iin 'jä, i 'Pläkänyɔɔ sraraa' amɩ.» 16 'Ünya fa ‑jiji 'ünya mi Marii nyra Josɛɛfëa ‑nyɛɛ, ‑bɛ 'jʋjɔlɔ 'pi mlaa 'lɩtaradɛɛa 'mlɩ†. 17 'Ü 'jäa' 'ɔɔn nɩ, 'ünya 'salɩ wiili 'ü ‑gbalaa' 'üün 'jʋjɔlɔa ‑gʋ. 18 Nyüülü kä 'fɩɔ 'nua' wiili ‑bablëëgbanyɛrɛnyüü 'saalɩ 'wli nɩ, 'üa plɛklɩkala. 19 Mariilɔ nɩ, 'ɔ ‑tʋ 'ia 'fɩɔ plɛklɩ, ‑bɛ 'ɔ bobo 'imɩ. 20 ‑Bablëëgbanyɛrɛnyüülü nya 'blöödɛrɩ; 'ü 'bʋala Nyɔsʋaa 'nyrɩ ‑bɛ 'ü brɛrɛ 'ɔɔn 'lɩ, wiili kä 'fɩɔ 'ü 'nua' 'wli nyra wiili 'ü 'jäa' 'ia 'fɩɔa ‑gʋ. 'Ii ‑bɛ wiili kä 'fɩɔ 'ü ‑gbalaa' 'üün bä dɛɛ 'dee.
Jesua nyüüa 'klɩsrarakʋ Nyɔsʋaanyuku kpaku ‑wälɩ
Levitiikë 12; Ɛgësɔɔdë 13.2
21 ‑Srɩlɩ bäa' 'jʋlɔa jrüü ‑uuntääa ‑srɩ, i kä 'mlɩ 'ümäa' 'ɔɔn 'bö nɩ, 'a ‑plɩɩ 'ü ‑nyɩ 'ɔɔn Jesu 'nyrɩ. 'A 'nyrɩlɩ 'aanjë ‑nyɩ käa' 'ɔɔn 'fɩɔwʋ ‑bɛ 'ɔa 'yio 'mäa' 'ɔa nʋgbla 'lɩ bä.
22 ‑Bɛ 'taɩn 'lɩ Moisëa ‑dɔ ‑tʋa' 'lɩ ‑gbafutokʋa ‑gʋ† jräa' 'lɩ nɩ, Josɛɛfë nyra Marii nya fa 'ɔɔn Jerusalɛɛmë 'ümä 'ɔɔn Nyɔsʋa 'klɩsrara. 23 'Be 'i ‑jɩjra nyɔsʋapɔɔkʋ 'lɩ 'kä: «Nyɔɔa ‑kätɩjʋ ma bä nyɩbɛjʋ nɩ, 'ɔ kä 'ɔmä 'ɔɔn Nyɔsʋa ‑nyɩ†» 24 'kä 'ünya «'klʋɛɛa ‑sögü 'sɔɔ 'aiɛ bätäa nü 'sɔɔ»† nʋ 'ümä ‑gbɔ 'sa. 'Asɩ 'i ‑jɩjra Nyɔsʋaa ‑dɔa 'mlɩ.
25 Nyɔɔ 'doo bä kä Jerusalɛɛmë 'ɔɔ 'ü 'dara Simeɔɔn. Nyɔɔlɔ ‑gäklɩ, 'ɔ ‑träärälɩ Nyɔsʋa. Israɛɛlëa 'klülɩpapakʋ 'ɔ ma ‑glaaa'. 'Nyüna ‑Susu bä kä 'ɔɔn 'lɩ, 26 'unya ‑gbala kä 'ɔmɩ, 'sɩrɩ 'ɔmäa' 'Pläkänyɔɔa 'Kriisë 'jä 'fɩɔwʋ ‑bɛ 'ɔmäa' jä. 27 'Unya 'tuto 'ɔɔn, ‑bɛ 'ɔ jö ɩ Nyɔsʋaanyuku kpaku ‑wälɩ. ‑Bɛ Jesua tʋɩɩ jia' 'lɩ wiili ‑dɔ 'daaa' 'ü nʋa' 'ɔa ‑gʋ nʋkalɩ nɩ, 28 'ɔnya dɔrɔ 'ɔɔn 'wʋ, ‑bɛ 'ɔ 'bʋala Nyɔsʋaa 'nyrɩ. 'Ɔ nɩnɩa:
29 «'Kamanyɔɔ, ‑mrɛɛ ɔ ‑a 'cɛrɛ ‑na 'jrʋpafɛnyɔɔ ‑wälɩ,
'ɔmä ɔ mi ‑pio 'sɩrɩ ‑gbaa'.
30 'Na 'nyü 'a 'lɩmlɩbanyɔɔlɔ ‑jaa' 'jä†,
31 ɔ ‑ëlerea' ‑glügbüa 'fɩɔa 'klɩ†.
32 'Napɛ 'ɔ bä 'ɔmä ‑na ‑glügbüa 'fɩɔ ‑gälɩ ŋʋala†,
‑na ‑glügbö Israɛɛlëa 'wliklɩbʋabʋakʋ 'ɔ bä.»
33 Wiili kä 'fɩɔ nyɔɔlɔ 'paaa' Jesua ‑gʋ nɩ, 'i kala 'ɔa tʋ† nyra 'ɔa 'yio plɛklɩ. 34 Simeɔɔn nya 'pa 'üün 'nɩ, 'ɔnya ‑gbala Marii ‑maa: «‑Na 'jʋ nya Israɛɛlëa ‑tʋtʋ ‑gälɩ nyüü 'kɔkɔmlɛ bea, 'ɔnya 'kɔkɔmlɛ 'jraraa; 'kä 'ɔnya Nyɔsʋaa totolä nyüü ‑nëmäa' 'klɩnyiere bä, 35 'kä wiili polu 'kɔkɔmlɛ boboa' nya ‑fälɩ blö. Marii, ‑na 'mʋgbɛ, ‑jɛrɛ nya ‑na ‑susu 'lɩgöa.»
Nyɔsʋaamlɩpalaŋlʋʋ Aanë
36 Nyɔsʋaamlɩpalaŋlʋʋlɔ ü 'daraa' Aanë bä kä ‑plɩɩ bɩa. 'Ɔa tʋ 'ü 'dara Fanuɛɛlë, Asɛɛrëa ‑glügbö 'klɩa nyɔɔ. Aanëa 'mʋgbɛ bɩaklɩ. 'Ɔɔ ‑bɛ 'ɔa dʋɔ kʋwälɩ ‑sɩ ‑uunsɔɔ, dʋɔ nya jä. 37 'Ɔnya tɩɔrɔ 'kusro 'lɩ. 'Ɔa ‑sɩa ‑glʋɩmlɔɔ ‑sɩ mlɔɔ (84). 'Ɔnyɩ sɔ Nyɔsʋaanyuku kpaku ‑wälɩ ‑a. Nyɔsʋa 'jrʋpa 'ɔ ma ‑fɛɛɛ ‑srɩ ‑bɛ ‑gbia; 'ɔ ma pa su ‑bɛ 'ɔ ma bibie Nyɔsʋa. 38 'A 'ia 'taɩn 'doolʋa 'mlɩ 'ɔa 'mʋgbɛ ji. 'Ɔnya 'bʋala Nyɔsʋaa 'nyrɩ†, ‑bɛ 'ɔ 'paa Jesua ‑gä, 'ɔ ‑gbala nyüülü kä 'fɩɔ ‑glaaa' Jerusalɛɛmëa 'lɩmlɩbanyɔɔ.
39 'Ü 'wlaraa' wiili kä 'fɩɔ 'Pläkänyɔɔa ‑dɔ 'daaa' 'ü nʋa' nɩ, Josɛɛfë nyra Marii nya 'blöö 'üa bätä Nasarɛɛtë dɛrɩ, Galileea ‑tʋtʋ ‑gälɩ.
Jesu käa' ‑sɩ ‑pʋ ‑sɩ 'sɔɔ
Deteronɔɔmë 16.1-8,16; Esaii 11.1,2; Tapönänë 20.11
40 'Jʋlɔ nɩ, 'asɩ ‑srɩ ‑sööö ‑bɛ 'ɔ 'bʋa, ‑bɛ 'ɔa bobowli ‑jrɛ†; wiijejrekʋ 'sie 'ɔɔn 'lɩ, ‑bɛ Nyɔsʋaa ‑gbinanakʋ bä 'ɔɔn 'lɩ. 41 'Asɩ ‑sʋ jräa' 'lɩ nɩ, 'ɔa tʋɩɩ mö Jerusalɛɛmë 'Paakëa ‑glɩsɩglɩsɩ 'lɩ. 42 'Ɔ käa' ‑sɩ ‑pʋ ‑sɩ 'sɔɔ nɩ†, 'ünya mi Jerusalɛɛmë† ‑glɩsɩglɩsɩ 'järä 'sɩrɩ 'üa ‑glɩsɩglɩsɩa ‑dɔ ‑gbaa'. 43 ‑Glɩsɩglɩsɩa jrüü blöa', ‑bɛ 'ü 'blööa' dɛrɩ nɩ, Jesu tɩɔ Jerusalɛɛmë. 'Ɔa tʋ nyra 'ɔa 'yio 'nyɩ 'iin 'nyügba ‑a tʋ. 44 'Üa plɛɛ 'ɔ bä 'wʋmlörönyüüa ‑tɔrʋpɩɔ. 'Ünya nʋ 'nyʋfɔ 'wʋ jrüü 'doo 'fɩɔ 'ünya 'mä 'ɔɔn 'üa nyüü nyra 'üa ‑mölöa ‑tɔrʋpɩɔ 'batra. 45 ‑Maa 'ü 'nɩ 'jäa' 'ɔmɩ nɩ, 'ünya 'blöö Jerusalɛɛmë dɛrɩ, 'ünya mi 'ɔɔn 'bata. 46 Jrüü tääa ‑srɩ 'lɩ nɩ, Nyɔsʋaanyuku ‑wälɩ 'ü jrä 'ɔɔn ‑dɔkpɩanyüüa ‑tɔrʋpɩɔ. 'Ɔ po 'üün 'nyakli ‑bɛ 'ɔ 'bete. 47 'Ɔa wiijejrekʋ nyra 'ɔa wiigälɩsasakʋ pa nyüülü kä 'fɩɔ poa' 'nyakli ‑gba. 48 'Ɔa tʋɩɩ 'jäa' 'ɔmɩ nɩ, 'üa plɛklɩkala. 'Ɔa 'yio nya 'bete 'ɔɔn: «'Na 'jʋ, dɛplɛɛ kä ‑gʋ ‑nʋ 'saa amɩ le? 'Mɔɔ ‑bɛ ‑na tʋ kɔsɔ ‑mɔ a ‑piie a 'bata.» 49 'Ɔnya ‑gbala 'üün: «‑Bɛ dɛplɛɛ kä ‑gʋ 'a 'bata ɩ 'mɩ le? 'Anyɩ ɩ 'iin jre ‑a jre 'sɩrɩ 'n käa' 'mäa' 'na Tʋa 'jrʋpa 'klɩtɛ?» 50 ‑Maa wiili 'ɔ 'paa' 'ünyɩ 'ia 'mlɩ 'wli ‑a 'nu. 51 'Ɔ nyra 'üün kɔsɔ nya mi Nasarɛɛtë. 'Ɔ ‑träärälɩ 'ümɩ. 'Ɔa 'yio ‑tʋʋä 'ia 'fɩɔ plɛklɩ.
52 Jesu 'bʋa, 'ɔa wiijejrekʋ 'paplagälɩ, ‑bɛ Nyɔsʋa nyra nyüü ‑waaa 'ɔɔn a 'doo†.