Wiijrenyüülü jia' 'jʋ 'jä
2
1 Jesu ‑glooro Bɛtëlɛɛmë, Judeea ‑tʋtʋ ‑gälɩ 'taɩn 'lɩ Erɔɔdë ‑ka bä käa' 'kɩɩ. 'Ia 'taɩn 'lɩ nɩ, ‑jää wiijrenyüülü tɛa' ‑särë 'klɩ ‑bɛ ü dɛtɛa' sɔ 'jrʋa 'wʋsɔrɔfaa 'pɛlɩ ü ji Jerusalɛɛmë. 2 'Ünya 'bete: «‑A 'jää juifëa 'kɩɩlɔ ‑glooroa' ‑plɩɩ le? A 'järä 'ɔa ‑särëeji cɛlɩ, 'ia ‑gʋ a ji 'ɔɔn ‑pʋpʋa†.» 3 'Kɩɩ Erɔɔdë 'nua' 'iin 'wli nɩ, 'ɔa plɛ 'caklalɩ, 'palɩ Jerusalɛɛmëa 'fɩɔ. 4 'Ɔnya 'papla juifënyüüa ‑gbɔsapɛrɩnyüü kpakü nyra 'üa ‑dɔkpɩanyüüa 'fɩɔ ‑gba, 'ɔnya 'bete 'üün ‑plɩɩlɩ 'Kriisëlɔ 'mä ɩa' ‑glooro. 5 'Ü ‑nëma: «Bɛtëlɛɛmë bäsaa, Judeea ‑tʋtʋ ‑gälɩ; 'be 'i ‑jɩjra nyɔsʋaamlɩpalanyɔɔa ‑pɔɔkʋ 'lɩ, ‑maa:6 ‑Mɔ, Judeea ‑tʋtʋ ‑gälɩa Bɛtëlɛɛmë,
'n jresaa ‑mää ‑mɔ 'nyɩ Judeea bätë kpaküa dɛrɩblöö bätä bä.
‑Na ‑nyɛɛ 'kamanyɔɔ 'doo 'mä sɔ,
'ɔmä 'na ‑glügbö Israɛɛlë 'nyiöli ‑gäälä†.»
7 'Ii känyrɩ Erɔɔdë nya we wiijrenyüülü 'ɔ nyra 'üa 'kpɔ 'mä 'sraa 'pla; 'ɔnya 'bete 'üün 'taɩn 'plɛɛ 'lɩ ‑tɛɛ ‑särëejilɛ 'cie le. 8 'Ɔnya blɔ 'ümɩ Bɛtëlɛɛmë, 'ɔ ‑nëma: «'Ba mi 'ba 'bete nyɩbɛjʋlɔa ‑gʋ ‑gböösa, 'ama 'jä 'ia 'cɩcasa nɩ, 'ba ji 'ba ‑gbala 'mɩ, 'na 'mʋgbɛ 'mä mi 'mä 'ɔɔn ‑pʋpʋa.»
9 'Kɩɩ bɩaa' 'lɩsasakʋ 'ünya mi. ‑Särëejilɛ 'ü 'jä ɩa' 'jrʋa 'wʋsɔrɔfa 'wʋ nɩ, 'ɛnya 'tiere 'üün 'tiere 'ünya 'tɔ ‑plɩɩlɩ 'jʋlɔ bäa'. 10 'Ü 'jäa' ‑plɩɩ ‑särëejilɛ 'nyüglöa' nɩ, dɔrʋ nya 'bla 'üün ‑gböösa. 11 'Ü paa' nyukulua ‑wälɩ, ‑bɛ 'ü jäa' 'jʋlɔ ‑bɛ 'ɔa 'yio Marii nɩ, 'ünya 'pakotifli 'ünya ‑pʋpʋa 'jʋlɔ. 'Ünya ‑jeje 'üa ‑pööti 'ünya 'crɛrɛ 'jʋlɔ ‑sika nyra 'kɩna, nyra 'nɔnʋpafʋfʋʋlʋ 'ü 'daraa' 'miirë. 12 'I ‑sia' nɩ, Nyɔsʋa nya ‑gbala nyüülü sanyü 'lɩ ‑maa 'ü ‑kanyɩ 'blöö Erɔɔdëa ‑nyɛɛ dɛrɩ; 'ia ‑gʋ 'ünya fa ‑pasa 'nyʋfɔ 'ünya mi 'üa 'bre.
Josɛɛfë nyra Marii fɔa' 'ü mia' Ejiipëtë
13 Wiijrenyüülü mia' nɩ, 'Pläkänyɔɔa 'aanjë nya 'tɔrɔ Josɛɛfë 'nyü ‑gälɩ, 'ɔnya ‑gbala 'ɔɔn ‑maa: «Sɔwʋ dɔrɔ 'jʋlɔ nyra 'ɔa 'yio 'wʋ, 'ba fɔ 'ba mi Ejiipëtë, 'be Erɔɔdë 'bata 'ɔmä 'jʋlɔ 'bla. 'Ii 'ba kʋ kʋ 'kä 'mɔɔ 'n ‑gbala ‑mɩ 'ba 'blöö.» 14 Josɛɛfë sɔa' 'wʋ ‑gbiara nɩ, 'ɔ nyra 'jʋ ‑bɛ 'ɔa 'yio nya mi Ejiipëtëa 'bre. 15 'A ‑nyɛɛ 'ɔ kʋ kʋ Erɔɔdë nya jä. 'I nrörö 'kä 'Pläkänyɔɔa wiili nyɔsʋaamlɩpalanyɔɔ 'sa käa' 'lɩ 'mä nrörö. ‑Jäsɩ 'ɔ ‑gba käa': «'N ‑gbala 'na 'jʋ ɔ sɔ Ejiipëtë†.»
'Jüa 'bablakʋ
16 Erɔɔdë jrea' 'saa ‑maa wiijrenyüülü nya 'ɔɔn ‑wälɩ 'wʋ nɩ, 'ɔ ‑gbaala 'crɛlɩkä. 'Ɔnya blɔ 'ɔa 'sʋgɩa Bɛtëlɛɛmë nyra bätëlë kä 'fɩɔ bäa' 'äa ‑gbaa 'mlɩ, 'ɔnya ‑gbala 'üün, ü 'babla nyɩbɛjülü kä 'fɩɔ ‑kaaŋlʋa' ‑sɩ 'sɔɔ kä. 'Taɩnlɩ kä 'mlɩ 'ɔ ‑glooroa' i wiijrenyüülü ‑gbala käa' 'ɔɔn nɩ, 'ii 'ɔ blɛ 'ɔnya 'daa 'ü ‑kaaŋlʋa' ‑sɩ 'sɔɔ ‑gbasi. 17 'Asɩ nyɔsʋaamlɩpalanyɔɔ Jeremiia mlɩa wii nʋ 'inya nrörö 'kasa; ‑jäsɩ 'ɔ ‑gba käa':
18 Wii 'pala kä Ramabätä, 'dugu, 'kpökpöwii nyra ‑sɩsrakʋ 'kɔkɔmlɛ.
Rasɛɛlë 'wuö 'ɔa 'jü,
'ɔnyɩ 'nyie 'nyie ‑a nyɔɔ 'mä 'ɔɔn bibie,
'be 'ü ‑kanyɩ 'plä 'wʋ ‑a bä†.
Josɛɛfë nyra Marii 'blööa' Israɛɛlëa 'bre dɛrɩ
19 Erɔɔdë jäa' ‑bɛ Josɛɛfë ‑ka bäa' Ejiipëtë nɩ, Josɛɛfë 'järä 'Pläkänyɔɔa 'aanjë sanyü 'lɩ. 20 'Ɔnya ‑gbala 'ɔɔn: «Sɔwʋ, dɔrɔ 'jʋlɔ nyra 'ɔa 'yio 'wʋ, 'ba 'blöö Israɛɛlëa 'bre dɛrɩ; 'be nyüülü 'bata ɩa' 'jʋlɔa 'bablakʋ, 'ü 'a jäjä.» 21 Josɛɛfë nya sɔwʋ 'ɔnya dɔrɔ 'jʋlɔ nyra 'ɔa 'yio 'wʋ 'ünya 'blöö Israɛɛlëa 'bre dɛrɩ.
22 ‑Maa 'ɔ 'nua' ‑maa Arëkelausë 'ɔɔ dɔrɔ 'ɔa tʋ Erɔɔdëa 'kpata 'wʋ Judeea 'bre nɩ, ŋalɛ 'bla 'ɔɔn 'ɔmä 'lɩ dɛrɩblöö. Sanyü 'lɩ 'ü ‑gbala 'ɔɔn, 'ɔnya mi Galileea ‑tʋtʋ ‑gälɩa bätä 'dööa 'mlɩ kʋ. 23 'Ää 'ü 'dara Nasarɛɛtë. 'Asɩ 'i nʋ ‑sisidɛɛ 'kä wiili nyɔsʋaamlɩpalanyüü 'sa käa' 'lɩ 'mä nrörö, 'iibä: «Nasarɛɛtënyɔɔ, 'ü nëmä 'ɔɔn 'dara.»