Jaan Batiisëa nyɔsʋaajrʋpa
3
1 'A 'ia 'taɩn 'lɩ Jaan Batiisë ji ‑aaga 'lɩ, Judeea ‑tʋtʋ ‑gälɩ. 'Ɔ ma 'paa nyɔsʋaawii ‑bɛ 'ɔ ma ‑gbala nyüü 2 ‑maa: «'Ba toro 'lɩ ‑balʋ ‑gälɩ, 'be Cɛɩɩa 'kamaplä ‑kanyɩ 'lɩdɛrɩ ‑a tʋŋlɔ!» 3 'A Jaanlɔ kä ‑gä nyɔsʋaamlɩpalanyɔɔ Esaii 'pa käa' ‑bɛ 'ɔ 'daaa' ‑maa:Nyɔɔa wewewii ja ‑aaga 'lɩ:
'Ba ‑nyɩgla *'Pläkänyɔɔa 'trii 'kä;
'ba ‑gägä 'ɔa 'nyifi 'klɩ†!
4 Samooa ‑püpliia 'lɩpadɛɛ Jaan ma 'sroo. Mlaafua ‑pɛɛtʋ 'ɔ ma kpasra 'lɩ ‑gälɩ. 'Ɔa jijri ma bä ‑aaga 'lɩa ‑kpakpëë nyra dʋgbakpɩ.
5 Jerusalɛɛmëa nyüü, Judeea ‑tʋtʋ ‑gälɩ nyra Jurëdɛɛn a 'nie ‑gba nyüüa 'fɩɔ ma mö 'ɔa 'pɛ 'lɩ. 6 'Ü ma 'saalɩ 'üa ‑balʋa 'fɩɔ, 'kä 'ɔ 'paa 'üün 'nɩwli Jurëdɛɛn a 'mlɩ.
Nyɔsʋawiili Jaan Batiisë 'paa'
7 Jaan jrea' 'saa Farisinyüü nyra Sadusinyüü 'kɔkɔmlɛ ma jö 'ɔa ‑nyɛɛ 'ɔmä 'üün 'nɩwlipa nɩ, 'ɔnya ‑gbala 'üün: «'Mëmlɛtapaa 'jü 'amɩ, nyɔɔ 'plɛɛ srara 'amɩ Nyɔsʋaa 'crɛlɛ jöa', 'ɛa 'klɩfɔlɔkʋ le? 8 'Ba srara nʋnʋgbili ‑gbalaa' nyüü 'sɩrɩ 'anya 'a ‑balʋ 'pie. 9 'Anyɩ 'daa 'ana plɛklɩ ‑maa: ‹Abraamë bä ana tʋ†!› 'Amɔ 'n ‑gbala, Nyɔsʋa 'mrɛɛ ɔ nrörö ‑taa 'täkëlë kʋa' ‑pɩ Abraamëa 'jü 'lɩ. 10 ‑Bɛ ‑tɛ 'a 'nɩmɩ tiia tigblii 'lɩ 'pala. Tuulu 'nyɩ tʋa' 'cɩca 'bü nɩ, 'unya 'kalaa 'kä 'unya kapu 'lɩ bere.
11 «'Mɔɔlɔ nɩ, 'nɩ 'n 'paa 'amɩ 'wli 'amä ‑balʋ 'pie; ‑maa nyɔɔlɔ nëmäa' 'mɩ 'klɩtroro, 'ɔ ‑sɔɔrɔwʋ 'ɔnya ‑si 'mɩ 'wʋ. 'Nyɩ 'nɩmɩ 'lɩ ‑a bɩa ‑a 'balɩ 'ɔa 'sii. 'Ɔɔlɔ nɩ, 'ɔnya 'amɩ 'Nyüna ‑Susu nyra kapu 'wlipaa. 12 'Ɔ 'klaa 'ɔa papɛɛ kälɩ 'ɔmä ‑bleeejaju nyra 'ɛa frɩ ‑gbasasra, 'ɔmä 'ɛɛn nyiklili 'jrara, ‑maa 'ɔnya 'ɛa frɩ kapulu 'nyɩ bɩaraa' a mlɩ 'pütröa.»
Jesua 'nɩwlipapakʋ
13 Jesu nya sɔ Galileea ‑tʋtʋ ‑gälɩ 'ɔnya ji Jaan a ‑nyɛɛ, Jaan 'mä 'ɔɔn 'nielɛ 'ü 'daraa' Jurëdɛɛn, 'ɛa 'mlɩ 'nɩwlipala. 14 ‑Maa Jaan 'bata 'ɔmä blara, 'ɔ ‑nëma: «‑Mɔ kä ‑mä 'mɩ 'nɩwlipa, ‑bɛ ‑nö 'mɔɔ ‑a 'pa ‑mɩ 'nɩ 'wli?» 15 ‑Maa Jesu nya ‑gbala 'ɔɔn: «A nʋ 'iin 'saa. 'Asɩ anya nʋ 'kä diili kä 'fɩɔ ‑gäa' 'klɩ Nyɔsʋaa 'nyü ‑gälɩ nya nrörö.» Jaan nya 'nyie. 16 Jesu 'palaa' 'nɩ 'wli, 'nie 'lɩ 'ɔ 'cie dotro ‑bɛ cɛɩɩ ‑jieroklɩ. 'Ɔnya 'jä Nyɔsʋaa ‑Susu 'unya 'cere 'ɔɔn ‑gälɩ ‑beere ‑sögö. 17 Mlɩa wii nya ja cɛa mlɩ: «'Na plɛ ‑gälɩa 'Jʋ kʋ ‑pɩ, 'ɔɔ bä 'na dɔrʋ ‑gböösa.»