Jesu 'kpɩara 'ɔa 'wʋnyɛrɛnyüü 'dʋgba 'wli
5
1 Jesu 'jäa' 'sɩrɩ nyüü ‑sümlöa' nɩ, 'ɔnya 'jra 'dʋgba 'wli 'ɔnya kʋwälɩ. 'Ɔa 'wʋnyɛrɛnyüü nya jijrö 'ɔɔn ‑gba. 2 'Ɔnya ‑tʋ 'lɩ 'üa 'kpɩkpɩakʋ, 'ɔ nɩnɩa:'Cɩca dɔrʋ
3 «Abɩa dɔrʋ 'bla nyüülü kä bobowli bäa' 'pʋa 'lɩ,
'üü kä Cɛɩɩa 'kamaplä!
4 Abɩa dɔrʋ 'bla nyüülü 'wuöa',
Nyɔsʋa nya 'üün plɛmlɩpaa.
5 Abɩa dɔrʋ 'bla nyüülü 'wlaa' 'lɩkä.
'Üü Nyɔsʋa nëmä 'plä jaa 'lɩ ‑nyrɛɛlɛ!
6 Abɩa dɔrʋ 'bla nyüülü 'klɩgägäkʋa ‑gbëka nyra 'mamlatʋ 'blaaa',
'be wiili 'ü 'bataa' nya nröröa!
7 Abɩa dɔrʋ 'bla nyüülü käa' nyatɛplɛ,
'be Nyɔsʋaa nya 'üa nyatɛrɩ 'jäa.
8 Abɩa dɔrʋ 'bla nyüülü kä plɛ ‑gälɩ 'pɔlɔa',
'be 'ünya Nyɔsʋa 'jäa.
9 Abɩa dɔrʋ 'bla nyüülü 'bataa' 'wlinönrökʋ,
'üü 'ü nëmä Nyɔsʋaa 'jü were!
10 Abɩa dɔrʋ 'bla nyüülü 'ü nöa' ‑gbigba,
'klɩgägbili 'ü nöa' 'ia ‑gʋ; 'üü kä Cɛɩɩa 'kamaplä!
11 «Abɩa dɔrʋ 'bla 'amɩ nyüü ma ‑jejre 'amɩ, üma nʋ 'amɩ ‑gbi ‑gba, üma 'pa 'ana ‑gʋ bʋbɔwii nyra üma ‑tʋ bɩa 'amɩ ‑gbagblɛ ‑gälɩ 'na ‑gʋ. 12 'Ba 'bri ‑bɛ abɩa dɔrʋ 'bla 'amɩ, 'be 'ana 'pɛɛ nya 'bʋaa cɛlɩ! 'Asɩ 'ü nʋ, 'ünya nʋ kä nyɔsʋaamlɩpalanyüü ‑gbi ‑gba, 'a ‑kaaŋlʋa' ji.
‑Tʋtʋ ‑gälɩa taŋlʋ nyra 'pläa 'napɛ
13 «'Amɔ bä ‑tʋtʋ ‑gälɩa taŋlʋ; ‑maa taŋlʋ ma ‑kanyɩ 'ua mɛ ‑a kä, ‑asɩ 'ünya 'sɔɔwʋ 'uun 'ua mɛ ‑nyɩ le? 'U ‑kanyɩ 'nɩmɩ 'na ‑a 'na dɩjɔ 'dooa ‑gʋ. ‑Fälɩ 'ü be 'uun, 'kä nyüü 'nyɛɛ 'uun ‑gälɩ.
14 «'Amɔ bä 'pläa 'napɛ. Bätälä 'palaa' 'dʋgba 'wli 'nyɩ ‑sisiesa ‑a bä. 15 ‑Bɛ 'ü 'nɩ ‑gölö 'napɛ ‑a 'ümä 'ɛɛn ‑soru ‑gälɩ 'kägbri. 'Napua tii ‑gälɩ 'ü 'sree 'ɛɛn 'kä, 'kä 'ɛ ŋʋala nyüüa 'fɩɔ ‑gälɩ. 16 'Asɩ 'ana 'napɛ kä 'ɛmä bɩa nyüü ‑gälɩ ŋʋala, 'ümä 'mʋfa ‑gbili 'a nöa' 'jä, ‑bɛ 'ümä 'ana Tʋlɔ bäa cɛɩɩa 'mlɩ 'bʋala.
Jesu 'sasra 'lɩ Moisëa ‑Dɔ
17 «'Ana plɛ 'nyɩ bobo ‑maa Moisëa ‑Dɔ 'aiɛ nyɔsʋaamlɩpalanyüüa 'kpɩkpɩakʋ 'n ji 'lɩgbugblo. 'Nyɩ dɛɛ 'lɩgbugblokalɩ ‑a ji, ‑maa wiili 'palaa', 'imä nrörö 'ia ‑gʋ 'n ji. 18 'Cɩcasa 'n ‑gbala 'amɩ nɩ, cɛɩɩ nyra ‑tʋtʋ ‑ka bäa' ‑plɩɩ nɩ, ‑dɔa ‑pɔɔkʋa 'mlɩa ‑jɩjrajrii, nyra 'nɩmɩ 'ua 'mlɩa 'jrii jɔ ‑nëmä ‑srɩɩ ‑si ‑a ‑si 'plɔʋ 'kä wiia 'fɩɔ nya nrörö. 19 'A 'ia ‑gʋ, ‑bakää nyɔɔ wala ‑dɔa blaadɩɔ, ‑bɛ ɔma 'kpɩa nyüü ü nʋ 'ɔa 'sa nɩ, 'ɔɔ nëmä blaadɩɔ bä Cɛɩɩa 'kamapläa 'mlɩ. ‑Maa nyɔɔlɔ ‑trääräa' 'lɩ ‑dɔ nɩ, ‑bɛ ɔ 'kpɩaa' nyüü ü nʋ 'ɔa 'sa nɩ, 'ɔnya nyɔɔ kpakö bäa Cɛɩɩa 'kamapläa 'mlɩ.
20 «'Amɔ 'n ‑gbala, 'ana 'klɩgägäkʋ ma 'nyɩ Farisinyüü nyra ‑dɔkpɩanyüü 'wʋ ‑a ‑si, 'a ‑nëmä Cɛɩɩa 'kamapläa 'mlɩ ‑a pa 'plɔʋ.
'Wlinönrökʋ
21 «'A 'nu 'sɩrɩ 'ü ‑gbalaa' ana tʋɩɩ ‑maa: ‹‑Nyɩ kä ‑a kä ‑mä nyɔɔ 'bla, ‑bɛ nyɔɔ o nyɔɔ 'blaaa' nyɔɔ nɩ, 'ünya 'ɔɔn ‑gätʋnyüü faa 'ümä 'ɔɔn 'pɔnɩ.› 22 ‑Maa ‑jäsɩ 'n ‑gbalaa' 'amɩ nɩ: Nyɔɔ o nyɔɔ ‑trääräa' 'ɔa ‑moloo 'crɛ ‑gba nɩ, ‑dɔ 'kpla 'ɔɔn. Nyɔɔ ma tɛ 'ɔa ‑moloo 'klɩ: ‹Mlüünyɔɔ›, 'ünya 'ɔɔn juifëa tropina 'lɩ faa 'ümä 'ɔɔn 'pɔnɩ. Nyɔɔlɔ tɛa' 'ɔa ‑moloo 'klɩ ‹Saklanyɔɔ›, 'ünya 'ɔɔn kapulu 'nyɩ 'nyrɔlɔa' 'plɔʋ, 'ua 'mlɩ faa 'ümä 'ɔɔn 'pɔnɩ.
23 «'Ii känyrɩ ‑ama ja ‑gbɔsadɛɛ Nyɔsʋaa ‑gbɔsatöwlö ‑gälɩ, ‑bɛ ‑ama 'pa plɛ 'sɩrɩ ‑na wii bäa' ‑na ‑molooa 'mlɩ nɩ, 24 'pie ‑na ‑gbɔlʋ ‑jaa' ‑plɩɩ 'töwlö ‑gba, 'kä ‑mö ‑nyra ‑na ‑wlajʋ 'mä ‑kätɩ 'wlinönrö 'fɩɔwʋ 'kä ‑jö ‑na ‑gbɔ 'sa.
25 «Nyɔɔ ma fa ‑mɩ tropina 'lɩ nɩ, 'sosowʋ 'sɩrɩ 'a ‑ka bäa' 'nyʋfɔ 'wʋ nɩ, ‑nyra 'ɔɔn 'mä 'wlinönrö 'fɩɔwʋ ‑a ji 'amä ‑gätʋnyɔɔa 'klɩ 'tɔ, 'kä ‑gätʋnyɔɔ ‑pɩ ‑mɩ 'sʋgɩa kälɩ ‑nyɩ, ‑bɛ 'ü ‑pɩ ‑mɩ ‑jie 'lɩpa. 26 'Cɩcasa 'n ‑gbala ‑mɩ, ‑ama 'nyɩ 'ɔa 'kpaa 'fɩɔ ‑a 'sa, ‑nëmä ‑srɩɩ 'lɩ ‑a 'cie.
Bätësa
27 «'A 'nu 'sɩrɩ 'ü ‑gbalaa' ana tʋɩɩ: ‹‑Nyɩ kä ‑a kä ‑mä bätësa 'pa†!› 28 ‑Maa ‑jäsɩ 'n ‑gbalaa' 'amɩ: Nyɔɔ o nyɔɔ tɛa' 'ŋlʋʋ 'klɩ ‑bɛ ɔ 'bataa' 'ɔɔn 'ɔa plɛklɩ nɩ, 'ɔ 'a bätësa 'pa. 29 ‑Na 'dupa 'nyiöa ‑gʋ ‑ama nʋ ‑balʋ nɩ, 'balɩ 'ään, be 'ämɩ kpaun 'klʋɛɛ. 'I ‑siwʋ ‑a ‑mɔɔlɔ ‑na fugbaa 'pɛ 'dee 'kä 'ümä ‑na 'fɩɔ kapulu 'nyɩ 'nyrɔlɔa' 'plɔʋa 'mlɩ be. 30 ‑Na 'dupa 'darʋa ‑gʋ ‑a ‑ma nʋ ‑balʋ nɩ, 'bölɩ 'uun. 'I ‑siwʋ ‑a ‑mɔɔlɔ ‑na fugbaa 'pɛ 'dee 'kä 'ümä ‑na 'fɩɔ kapulu 'nyɩ 'nyrɔlɔa' 'plɔʋa 'mlɩ be.
‑Gbasɔsrɔkʋ
31 «'I ‑jɩjra bɩa: ‹Nyɔɔ ma 'cɛrɛ 'ɔa 'ŋlʋʋ ‑wälɩ, ɔ ‑nyɩ 'ɔɔn ‑gbasɔsrɔpɔɔkʋ†.› 32 ‑Maa ‑jäsɩ 'n ‑gbaa' nɩ: Nyɔɔ o nyɔɔ prɛa' 'ɔa 'ŋlʋʋ ima 'nyɩ bätësaa ‑gʋ ‑a bä nɩ, 'ɔɔ 'tutro 'ɔɔn bätësaa 'mlɩ. ‑Bɛ nyɔɔ o nyɔɔ käa' 'ŋlʋʋlɔ 'ɔa dʋɔ prɛa' nɩ, bätësa 'ɔ 'paa bɩa.
'Papawii ‑gälɩa 'sɔrɩkʋ
33 «'A 'nu bɩa 'sɩrɩ 'ü ‑gbalaa' ana tʋɩɩ ‑maa: ‹‑Ama 'sɔrɩ nɩ, ‑nyɩ sɔ 'iin dɛrɩ, nʋ wiili kä ‑gälɩ ‑sɔɔrɩa' *'Pläkänyɔɔa 'klʋɩ, ‑bɛ ‑daaa' ‑nya 'iin nʋa†.› 34 ‑Maa ‑jäsɩ 'n ‑gbalaa' 'amɩ nɩ, 'anyɩ 'sɔrɩ 'plɔʋ! 'Anyɩ 'sɔrɩ cɛa 'nyrɩklɩ, 'be Nyɔsʋaa 'kɩɩkpata bäsaa. 35 'Anyɩ 'sɔrɩ ‑tʋtʋa 'nyrɩklɩ, 'be 'ii 'ɔ ‑tʋʋä 'ɔa bei. 'Anyɩ 'sɔrɩ Jerusalɛɛmëa 'nyrɩklɩ, 'be 'Kɩɩ kpaköa bätä bäsaa. 36 'Anyɩ 'sɔrɩ 'ana 'wlia 'nyrɩklɩ, 'be 'anyɩ 'lɩ ‑a bɩa 'amä 'ana 'wlia 'ŋueieji 'dee 'pɔlɔ 'aiɛ 'amä 'iin ‑kpöörö. 37 'Ba 'daa: ‑Yɛɛ, ima bä ‑yɛɛ, ‑bɛ 'Woo, ima bä 'woo. ‑Mɩlɩ ‑ka jöa' 'lɩgälɩ nɩ, Plɛbʋbɔsusua† ni bäsaa.
Wiia 'kpaa 'sasakʋ
38 «'A 'nu 'ü ‑nëmä: ‹'Nyiö 'saa 'nyiöa 'kpa; ‑glɛ 'saa ‑glɛa 'kpa†.› 39 ‑Maa ‑jäsɩ 'n ‑gbalaa' 'amɩ nɩ, nyɔɔ ma nʋ ‑mɩ ‑balʋ ‑gba nɩ, ‑nyɩ 'sa 'ia 'kpa. Nyɔɔ ma 'pa ‑na 'dupa ‑glagbʋ ‑gba 'kpa nɩ, to bɩa 'ɔɔn 'sɔɔa nu 'klɩ. 40 Nyɔɔ ma 'daa 'ɔmä ‑mɩ tropina 'lɩ fa 'ɔmä ‑mɩ ‑na 'lɩpakotu kälɩ 'ba nɩ, ‑nyɩ bɩa 'ɔɔn ‑na ‑gälɩpakotu†. 41 Nyɔɔ ma ‑nyɩ ‑mɩ ‑gbötödiia 'klüa ni, ‑bɛ ɔma 'daa ‑a ‑nyɛɛ kilomɛtrë 'dee ‑bɛ klöö† nɩ, ‑gbötö 'iin ‑a nʋ kilomɛtrë tää. 42 Nyɔɔ ma ‑sɛ ‑mɩ, ‑nyɩ 'ɔɔn; ‑bɛ nyɔɔ ma 'betre ‑mɩ 'kpa 'lɩ ‑nyɩ 'blara 'ɔɔn 'klɩ.
'Nyüamlɩjraranyüüa ‑wawakʋ
43 «'A 'nu 'ü ‑nëmä: ‹‑Kä ‑mä ‑na ‑moloo ‑wa, ‑bɛ ‑mä ‑na 'nyüamlɩjraranyɔɔ 'nyüamlɩjrara†.› 44 ‑Maa ‑jäsɩ 'n ‑gbalaa' 'amɩ nɩ, 'ba ‑wa 'ana 'nyüamlɩjraranyüü, nyüülü busua' 'amɩ, 'ba 'pa 'üün 'nɩ, ‑bɛ 'ba nʋ 'ana 'nyüamlɩjraranyüü 'cɩcagbi ‑gba, 'kä 'a bibie nyüülü nöa' 'amɩ ‑gbi ‑gba 'üa 'wli 'lɩ†. 45 'A nöa' 'saa nɩ, nyüü 'a srara 'sɩrɩ 'a bäa' 'ana Tʋlɔ bäa' cɛlɩ, 'ɔa 'jü; 'be 'ɔ ŋʋala 'ɔa 'jrʋ plɛbʋbɔnyüü nyra 'cɩca nyüüa ‑gälɩ; 'ɔa 'nʋŋlʋ 'dara ü ‑gäa' 'klɩ nyra nyüülü 'nyɩa' 'klɩgä ‑gälɩ. 46 'Ama ‑wa nyüülü kä 'doo ‑waa' 'amɩ nɩ, dɛɛ 'plɛɛ 'a 'bata abɩa Nyɔsʋa ‑nyɩ 'amɩ le? Dapookälɩpɛrɛnyüüa 'mʋgbɛ nö 'imɩ! 47 'Ama 'trɛɛ 'ana nyüüa 'doo nɩ, 'ana 'plɛɛ 'anya 'a 'cɩcadɛɛ kpaki nʋ? Nyüülü 'nyɩa' 'nɩmɩ juifë bä, 'asɩ 'ü nö†! 48 'Ii känyrɩ 'ba ‑gäklɩ, 'sɩrɩ 'ana Tʋlɔ bäa' cɛlɩ ‑gäa' 'klɩ.