'Pʋablanyɔɔa dɛɛ ‑nyɩnyɩkʋ
6
1 «'Ba ‑tre 'ana nyüfë, 'anyɩ nʋ 'ana nyɔsʋaajrʋpa 'kä nyüü 'mä ‑gʋ 'amɩ 'jäjrä. 'Ama nʋ 'saa nɩ, 'ana Nyɔsʋalɔ bäa' cɛlɩ ‑ka ‑nëmä 'amɩ dɛɛlɛ 'ɔmä ɩa' 'amɩ ‑nyɩ ‑a ‑nyɩ. 2 'Ii känyrɩ, ‑ama ‑nyɩ 'pʋablanyɔɔ dɛɛ nɩ, ‑nyɩ 'fɛrɛ 'iin 'kä, ‑beere 'sɩrɩ ‑glagälɩsrörönyüü nöa' juifëa 'sraaplanyëka ‑wälɩ nyra 'nyifi 'wʋ. Nyüü 'mä 'üün 'bʋala, 'a 'ia ‑gʋ 'ü nö 'iin. 'Cɩcasa 'n ‑gbala 'amɩ, 'ü 'a 'üa 'pɛɛ 'jä! 3 ‑Maa ‑mɔ ‑ama ‑nyɩ 'pʋablanyɔɔ dɛɛ nɩ, nʋ 'iin 'sɩrɩ ‑na kʋmla 'darʋ ‑pɩa' wiili ‑na 'dupa 'darʋ nöa' 'jä. 4 'Asɩ dɛɛlɛ ‑nyɛɛa' 'pʋablanyüü kä 'imä ‑sisie. 'Ia 'taɩn 'lɩ ‑na Tʋlɔ 'jääa' wiili nöa' ‑sisiedii 'lɩ 'mä ‑mɩ ‑jria 'klɩ† 'pɛrɛ.'Sɩrɩ nyɔɔ 'mäa' Nyɔsʋa bibie
5 «‑Ama bibie Nyɔsʋa nɩ, ‑nyɩ nʋ† ‑glagälɩsrörönyüüa 'sa. 'Üü ‑wa 'nyüglökʋ üma bibie Nyɔsʋa juifëa 'sraaplanyëka ‑wälɩ nyra 'nyifi ‑gba; 'üü ‑wa nyüü 'mä 'üün 'jäjrä. 'Cɩcasa 'n ‑gbala 'amɩ, 'ü 'a 'üa 'pɛɛ 'jä! 6 ‑Maa ‑mɔ ‑ama 'mä Nyɔsʋa bibie nɩ, pa ‑na nyüköli, 'pa ‑na tatu 'kä bibie ‑na Tʋlɔ bäa' ‑plɩɩlɩ ‑sisrea'. 'Ia 'taɩn 'lɩ ‑na Tʋlɔ 'jääa' diili ‑nöa' ‑sisredii 'lɩ 'mä ‑mɩ ‑jria 'klɩ† 'pɛrɛ.
7 «'Ama bibie Nyɔsʋa nɩ, 'anyɩ 'salɩ wii 'kɔkɔmlɛ ‑beere nyüülü 'nyɩa' Nyɔsʋa jre. 'Üa plɛɛ, üma 'pawii 'kɔkɔmlɛ, 'a ‑plɩɩ Nyɔsʋa 'mä 'üün 'nyaklipo. 8 'Anyɩ nʋ 'üa 'sa; 'be 'ana Tʋ jre sököö dɛɛlɛ 'a 'bataa', 'fɩɔwʋ 'kä 'a ‑sɛɛɛ 'ɔmɩ 'ɛɛn.
Ana Tʋ Nyɔsʋa
9 «'Ii känyrɩ ‑jäsɩ 'a käa' 'amäa' Nyɔsʋa bibie:
Ana Tʋ, ɔ bäa' cɛa 'mlɩ,
abɩa ‑na 'nyünanyrɩ 'bʋala.
10 Abɩa ‑na 'kamadɛɛ 'tɔ ‑tʋtʋ ‑gälɩ.
Wiili ‑baataa', i nrörö ‑tʋtʋ ‑gälɩ 'sɩrɩ 'i nröröa' cɛa 'mlɩ.
11 ‑Nyɩ amɩ ana ‑srɩa 'mlɩa jijrɛ.
12 Cere amɩ ana ‑balʋ 'sɩrɩ ana 'mʋgbɛ cerea' nyüülü nöa' amɩ ‑balʋ ‑gba, 'üa ‑balʋ.
13 ‑Nyɩ tɛ bɩa amɩ 'klɩ anyɩ mi ‑balʋ 'lɩ, ‑maa 'ba amɩ Plɛbʋbɔsusu† kälɩ,
'be ‑mɔ kä 'pläa 'kamakʋ, 'klü nyra 'bʋalakʋ 'plɔʋplɔʋ. 'Asɩ i bä.
14 «'Be 'ama cere nyüü 'üa ‑balʋ, 'ana Tʋ bäa' cɛa 'mlɩ 'ɔnya 'amɩ 'ana ‑balʋ cerea. 15 ‑Maa 'ama 'nyɩ cere nyüü 'üa ‑balʋ ‑a nɩ, 'ana Tʋ ‑nëmä bɩa 'ana ‑balʋ ‑a cere.
'Sɩrɩ 'ü paa' su
16 «‑Bɛ 'ama pa su nɩ, 'anyɩ 'kpɔɔ ‑beere ‑glagälɩsrörönyüü. Üma pa su nɩ, 'ü kpasa 'klɩ nyüü 'mä 'saa jre 'sɩrɩ 'ü paa' su. 'Cɩcasa 'n ‑gbala 'amɩ, 'ü 'a 'üa 'pɛɛ 'jä! 17 ‑Maa ‑mɔlɔ nɩ, ‑ama pa su nɩ, su ‑na 'klʋɩ, 'pa ‑na 'wli ‑daŋlʋɩnɩ 18 nyɔɔ ‑pɩ 'saa jre 'sɩrɩ ‑paa' su, ima 'nyɩ ‑na tʋlɔ bäa' ‑sisrefawʋa 'doo ‑a bä. 'Ia 'taɩn 'lɩ ‑na Tʋlɔ 'jääa' diili nröröa' ‑sisredii 'lɩ nya ‑mɩ ‑jria 'klɩ† 'pɛrɛa.
'Bɩɔlʋ bäa' cɛa 'mlɩ
19 «'Anyɩ 'papla ‑pɩ ‑tʋtʋ ‑gälɩa 'bɩɔ ‑gba; 'be 'nya nyra ‑wlɔsʋ bʋblɔ 'uun, ‑bɛ 'jejienyüü wa wa dii ‑bɛ 'ü 'jie 'iin. 20 ‑Maa 'papla cɛlɩa 'bɩɔ ‑gba, 'be 'nya nyra ‑wlɔsʋ 'nyɩ bʋblɔ 'uun ‑a. 'Jejienyüü 'nyɩ wawla 'lɩ dii ‑a, ‑bɛ 'ünyɩ 'jiere 'lɩ ‑a. 21 'Be ‑plɩɩlɩ 'ana 'bɩɔ bäa', 'ii 'ana plɛ 'pi†.
'Nyiö bä nyɔɔa fugbaa 'napɛ
22 «'Nyiö bä nyɔɔa fugbaa 'napɛ. ‑Na 'nyü ma 'na nɩ, ‑na fugbaa 'fɩɔ bä ‑srɩ 'klɩ. 23 ‑Maa ‑na 'nyü ma 'nyɩ ‑ya ‑a ‑ya nɩ, ‑na fugbaa 'fɩɔ nya 'jöjrüükpü 'lɩ bäa. 'Ii känyrɩ, 'napɛlɛ bäa' ‑mɩ 'lɩ ma bä 'jöjrüükpü nɩ, 'jöjrüükpülü nya 'wlisiea ‑o!
Nyɔsʋaa ‑wawakʋ nyra möliia ‑wawakʋ
24 «Nyɔɔ 'nyɩ 'lɩ ‑a bä 'ɔmä 'kamanyüü 'sɔɔa 'jrʋpa 'wʋfɛrɛ. 'Ɔnya 'doo 'nyüamlɩjraraa 'kä 'ɔnya ‑mɔlɔ ‑wa. 'Aiɛ 'ɔnya 'lɩ 'doo ‑trääräa ‑gböösa, 'kä 'ɔnya ‑mɔlɔ sawʋ 'pa. 'Anyɩ 'lɩ ‑a bɩa 'amä Nyɔsʋaa 'jrʋpa nyra möliia 'jrʋpa 'wʋ ‑fɛrɛ.
Plɛlɩtaarakʋ
25 «'A 'ia ‑gʋ 'n ‑gbala 'amɩ, 'ana plɛ 'nyɩ ‑taaralɩ 'ana 'kläa ‑gʋ: 'kä dɛɛlɛ 'amäa' ji, dɛɛlɛ 'amäa' 'mla, 'ana fugba nyra diili 'amäa' 'srooa ‑gʋ. 'Klä ‑si jijri 'wʋ; fugba nya ‑si 'sosroodii 'wʋ. 26 'Ba 'jä nyisie. ‑Mää pla 'inyɩ pla, ‑mää 'üa papladii 'ünyɩ 'sa. ‑Mää nyikli 'lɩ 'ünyɩ 'jrara jijri, ‑maa 'ana Nyɔsʋalɔ bäa' cɛlɩ 'fini 'iin 'klɩ! ‑Bɛ 'a ‑si nyisie 'wʋ ‑gböösa 'e! 27 Nyɔɔ 'plɛɛ bä ‑pɩ 'ana ‑tɔrʋpɩɔ ɔ 'mrɛɛ 'kä plɛlɩtaarakʋa ‑gʋ ɔ 'pa 'ɔa jrüüa ‑gälɩ ‑gliiibɔʋ† le?
28 «‑Bɛ dɛplɛɛ kä ‑gʋ 'ana plɛ ‑taaralɩ 'lɩpadiia ‑gʋ le? 'Ba ‑pʋpɔ 'sɩrɩ pöplösipi ‑gaaa'. 'Inyɩ ‑fɛ 'jrʋpa ‑a, ‑mää 'koti 'inyɩ 'kpla. 29 ‑Maa 'amɔ 'n ‑gbala, 'Kɩɩ Salomɔɔ kä 'mʋgbɛ jia' 'bɩɔ ‑gböösa, 'ɔ ‑kaapɩɔ 'mʋfadii 'sroo ‑beere pöplödiili kʋa' ‑pɩ. 30 ‑Bɛ Nyɔsʋa ma nʋ 'saa ɔma 'sroo 'klʋɛɛa 'sipili nëmäa' ‑pɩ doro 'ümäa' 'pütö nɩ, ‑asɩ 'ɔ ‑nëmä 'amɩ 'sroo le, 'amɔ kä nyɔsʋaplɛ 'nyɩa' 'bʋa?
31 «'Ii känyrɩ, 'ana plɛ 'nyɩ ‑taaralɩ. 'Anyɩ 'daa: ‹Dɛplɛɛ amä ji le, dɛplɛɛ amä 'mla le, dɛplɛɛ a nëmä 'sroo le?› 32 'Be 'ia ‑taa diilia 'fɩɔlʋ nɩ, nyüülü 'nyɩa' Nyɔsʋa jre 'bata 'iin ‑gböösa. 'Be 'ana Tʋlɔ bäa' cɛlɩ, 'ɔ jre diilia 'fɩɔ 'makɩa' 'amɩ. 33 'Ba 'bata ‑kätɩ Nyɔsʋaa 'kamaplä nyra 'ɔa 'klɩgägäkʋ, ‑bɛ 'ɔmä 'lɩ 'amɩ ‑taa diilia 'fɩɔ 'wlibɩa.
34 «'Ii känyrɩ, 'ana plɛ 'nyɩ ‑taaralɩ ‑sraakäpɩa ‑gʋ. ‑Sraakäpɩ nya 'ia 'mʋgbɛa ‑gä 'paa. ‑Srɩ ‑bɛ 'ia wii.