Tuu klöö kpakö nyra ‑napusragbʋ
7
1 «'Anyɩ 'bölö 'ana ‑mölöö ‑gä ‑gälɩ, ‑gä ‑pɩ bɩa 'amɩ ‑gälɩ 'bölö. 2 'Be 'sɩrɩ 'a 'bölöa' 'ana ‑mölöö ‑gä ‑gälɩ, 'asɩ Nyɔsʋa 'mä 'amɩ ‑gä ‑gälɩ 'bölö. Dɛɛlɛ 'a nöa' ‑bɛ 'a nyakaa' 'ana ‑mölöö, 'ɛɛ Nyɔsʋa 'mä nʋ 'ɔmä bɩa 'amɩ nyaka. 3 Dɛplɛɛ kä ‑gʋ ‑jäää ‑napusragbʋlʋ bäa' ‑na ‑wlajʋa 'nyüa 'mlɩ, ‑bɛ ‑nyɩ ‑tʋ tuu klöö kpakölä bäa' ‑na 'mʋgbɛa 'nyiöa 'mlɩ 'nyügba le? 4 Dɛplɛɛ kä ‑gʋ ‑gbala ‑na ‑wlajʋ ‑maa: ‹Ji ‑a 'balɩ ‑napusragbʋlʋ bäa' ‑na 'nyiöa 'mlɩ›, ‑bɛ tɩɛ ‑plɩɩ tuu klöö kpakölä bä ‑na 'nyiöa 'mlɩ le? 5 ‑Glagälɩsrörönyɔɔ! 'Balɩ tuu klöö kpakölä bäa' ‑kätɩ ‑na 'nyiöa 'mlɩ 'fɩɔwʋ, ‑bɛ ‑mä 'käjä ‑mä 'lɩ ‑napusragbʋlʋ bäa' ‑na ‑wlajʋa 'nyiöa 'mlɩ 'ba!'Nyünadiia 'lɩsasakʋ
6 «'Anyɩ ‑nyɩ dɛɛlɛ berea' 'klɩ Nyɔsʋaa ‑gʋ ‑fä, 'ü ‑pɩ 'ana 'pɛlɩ kälɩ ‑sie 'ü ‑pɩ 'amɩ 'ŋaŋla; 'anyɩ be 'ana 'peru 'bʋa 'wle 'bösaru, 'u ‑pɩ 'ɛɛn ‑gälɩ 'nyɛ.
Nyɔsʋabibiekʋ
7 «'Ba ‑sɛ, ‑bɛ Nyɔsʋa 'mä 'amɩ ‑nyɩ; 'ba 'bata, 'anya 'ɛɛn 'jäa; 'ba bɔtɔ tatu, 'ɔnya 'amɩ tatu 'klɩ 'saa. 8 'Be nyɔɔ o nyɔɔ ‑sɛa' Nyɔsʋa ‑nyɛɛ 'ɔɔn; nyɔɔlɔ 'bataa' 'ɔ 'jää dɛɛlɛ 'ɔ 'bataa'; 'kä nyɔɔlɔ bɔtɔa' tatu, 'ɔ 'saa 'ɔɔn tatu 'klɩ. 9 ‑Bɛ nyɔɔ 'plɛɛ bä 'ana ‑tɔrʋpɩɔ, ɔ 'ɔa 'jʋ ma ‑sɛ 'flɔɔ, 'ɔmä 'ɔɔn 'täkä ‑nyɩ le? 10 'Aiɛ 'ɔa 'jʋ ma ‑sɛ 'ɔɔn ‑sre, ‑bɛ 'ɔmä 'ɔɔn trɔɔ ‑nyɩ le? 11 'Amɔ kä plɛ bʋbɔa', 'a jre 'ana 'jüa 'mʋfadiia ‑nyɩnyɩkʋ. ‑Maa 'ana Tʋlɔ bäa' cɛlɩ 'ɔɔ ‑nëmä 'mʋfadii nyüülü ‑sɛɛɛa' 'ɔmɩ 'iin ‑nyɩ?
‑Mölööa ‑wawakʋ
12 «Wiili 'a 'bataa' ‑mölöö 'mäa' 'amɩ ‑gba nʋ nɩ, 'ba nʋ bɩa 'saa 'üün. 'A wiili Moisëa ‑Dɔ nyra nyɔsʋaamlɩpalanyüüa 'fɩɔ 'kpɩaa'.
'Mëmla jɔ
13 «'Ba ‑srörö 'mëmla jɔa mlɩ; 'be 'mɔlɔ 'mëmla flɛrɛwʋ, ‑bɛ 'nyʋfɔlʋ falaa' 'lɩ nya flɛrɛwʋ ‑gböösa. Nyüülü ‑sröröa' 'ua mlɩ nya ‑sümlö. 14 ‑Maa 'kläa 'mëmla ‑jɩa nyra 'nyʋfɔlʋ falaa' 'lɩ nya 'paplagba. ‑Bɛ nyüülü 'jääa' 'uun 'nyɩ ‑sümlö ‑a ‑sümlö.
Tuua 'bö 'ü nö ‑bɛ 'ü jre 'umɩ
15 «'Ba ‑tre 'ana nyüfë ‑gbagblɛ nyɔsʋaamlɩpalanyüüa ‑gʋ! ‑Bablëëjüa 'fu 'ü 'paa ‑gälɩ ‑bɛ 'ü jö 'ana ‑tɔrʋpɩɔ, ‑maa klaklamlaa 'ü bä. 16 'Üa nʋnʋgbi kälɩ 'a nëmä ‑srörö 'kä 'anya 'üün jre. 'Ü 'sara rɛsɛɛn 'jaju† nänä ‑gälɩ, ‑ale 'ü 'sara figiebö† 'bütütii 'wli? 17 'Cɩca tuu tʋä 'cɩca 'bü; ‑maa tuulu 'nyɩa' 'na tʋä 'bülü 'nyɩa' 'na. 18 'Cɩca tuu 'nyɩ tʋ bʋbɔ 'bü ‑a, ‑bɛ tuulu 'nyɩa' 'na, ‑mää 'uun 'nyɩ tʋ 'cɩca 'bü. 19 Tuulu 'nyɩ tʋa' 'cɩca 'bü nɩ, 'böö 'ü 'böö 'uun 'kä 'ü be 'uun kapu 'lɩ. 20 'Ii känyrɩ, 'üa nʋnʋgbi 'lɩ 'a nëmä ‑gbagblɛ nyɔsʋaamlɩpalanyüü jrere.
Wiia 'papakʋ ‑bɛ 'ia nʋnʋkʋ
21 «‑Mää nyüülü kä 'fɩɔ werea' 'mɩ: ‹'Pläkänyɔɔ, 'Pläkänyɔɔ› nɩ, ‑mää ‑nëmä cɛɩɩa 'kamapläa 'mlɩ pa. Nyɔɔlɔ nöa' wiili 'na Tʋlɔ bäa' cɛlɩ ‑gbala 'ɔɔn nɩ, 'ɔa 'doo nëmä 'lɩ pa. 22 'Ia ‑srɩlɩa 'mlɩ† nyüü 'kɔkɔmlɛ nya 'mɩ ‑gbalaa ‑maa: ‹'Pläkänyɔɔ, 'Pläkänyɔɔ›, ‑na 'nyrɩklɩ 'n 'pala nyɔsʋaawii, ‑na 'nyrɩklɩ a prɛ domüü! 'A ‑na 'nyrɩklɩ a nrörö ‑saragbi 'kɔkɔmlɛ! 23 'Kä 'nyaa 'üün ‑gbala: ‹'Ba tʋŋlɔ 'mɩ 'lɩdɛrɩ, 'amɔlɔ 'pɩɛa' Nyɔsʋaa ‑dɔ ‑gälɩ; 'n ‑kaapɩɔ 'amɩ jre!›
'Papanyëka 'sɔɔa 'klɩpaplakʋ
24 «Nyɔɔ o nyɔɔ ma po ‑taa wiili 'nyakli ‑bɛ ɔma ‑träärälɩ 'imɩ nɩ, 'ɔnya ‑beere nyɔɔlɔ 'paaa' 'ɔa nyuku 'täkä ‑gälɩ. 25 'Nʋŋlʋ dara 'uun, 'nʋŋlʋpati kpakü 'cere 'uun 'wʋ, ‑fʋflʋ nya ji, 'ia 'fɩɔ jrä 'uun ‑gälɩ, 'unyɩ blö ‑a blö 'be 'täkä ‑gälɩ 'u 'pala. 26 ‑Maa nyɔɔ o nyɔɔ 'nööa' 'na 'papawii 'wli ‑bɛ 'ɔnyɩ ‑träärälɩ 'imɩ nɩ, 'ɔ ‑beere mlüünyɔɔlɔ 'paaa' 'ɔa nyuku 'pisiatu 'lɩ. 27 'Nʋŋlʋ dara 'uun, 'nʋŋlʋpati kpakü 'cere 'uun 'wʋ, ‑fʋflʋ nya ji, 'ia 'fɩɔ 'nya jrä 'uun ‑gälɩ, 'unya blö 'unya ‑gblooro.»
Jesu 'kpɩa 'kamasa