Nyɔɔlɔ ‑sia' 'wʋ cɛɩɩa 'kamapläa 'mlɩ
18
1 'Ia 'taɩn 'lɩ nɩ, 'wʋnyɛrɛnyüü nya jijrö Jesu ‑gba, 'ünya 'bete 'ɔɔn: «Nyɔɔ 'plɛɛ ‑si 'ɔa ‑mölöö 'wʋ cɛɩɩa 'kamaplä 'lɩ le?» 2 Jesu nya we 'jʋjɔ 'doo, 'ɔnya ‑tʋ 'ɔɔn 'üa ‑tɔrʋpɩɔ, 3 'ɔ ‑nëma: «'Cɩcasa 'n ‑gbala 'amɩ, 'ama 'nyɩ 'jüjiea 'saa ‑a bä nɩ, 'a ‑nëmä ‑srɩɩ cɛɩɩa 'kamapläa 'mlɩ ‑a pa. 4 'Ii känyrɩ, nyɔɔ o nyɔɔ 'ciea' 'ɔa nyufa 'wʋ ‑beere 'jʋlɔ kʋa' ‑pɩ nɩ, 'ɔɔ bä 'wʋsia nɔ cɛɩɩa 'kamaplä 'lɩ. 5 ‑Bɛ nyɔɔ o nyɔɔ 'kʋɛɛa' 'lɩ 'jʋ o 'jʋ ‑beerea' ‑taa 'jʋlɔ 'na 'nyrɩklɩ nɩ, 'mɔɔ 'ɔ 'kʋɛɛlɩ.‑Balʋa 'klɩfɔlɔkʋ
6 «‑Maa nyɔɔ ma 'tutro ‑taa 'jülü toroa' 'mɩ plɛ, 'üa ‑tɔrʋpɩɔa 'doo ‑balʋ 'lɩ nɩ, 'i ‑siwʋ ü 'pa 'ia nyɔɔlɔ diisrorotäkä† ‑susugbee 'kä 'ü bere 'ɔɔn 'taniea ‑fli.
7 «Abɩa busukʋ jrä 'plä ‑gälɩ nyüüa 'käkpakpakʋa ‑gʋ. 'Be diili 'kpakpaa' nyüü 'kä ‑nëmä 'üün ‑a wala, ‑maa busukʋ jrä nyɔɔlɔ 'i jaraa' kälɩ ‑gälɩ!
8 «‑Na 'darʋ 'aiɛ ‑na bɔʋa ‑gʋ ‑ama nʋ ‑balʋ nɩ, 'bölɩ 'üün 'kä be 'üün kpaun. Fa 'darʋ 'doo 'aiɛ fa bɔʋ 'doo ‑a mi Nyɔsʋaa 'klɩ ‑siwʋ 'kä ‑mä 'dari 'sɔɔ 'aiɛ bei 'sɔɔ kä ‑bɛ 'ümä ‑mɩ kapulu 'nyɩ 'nyrɔlɔa' 'plɔʋa 'mlɩ bere. 9 ‑Na 'nyiöa ‑gʋ ‑ama nʋ ‑balʋ nɩ, 'balɩ 'ään 'kä be 'ään kpaun. Fa 'nyiö 'döö ‑a mi Nyɔsʋaa 'klɩ ‑siwʋ 'kä ‑mä 'nyü 'sɔɔ kä ‑bɛ 'ümä ‑mɩ kapulu 'nyɩ 'nyrɔlɔa' 'plɔʋa 'mlɩ bere.
10 «'Ba ‑tre 'ana nyüfë ‑bɛ 'anyɩ 'pa 'ia ‑tɔrʋpɩɔa 'jʋ 'doo sawʋ, 'be 'n ‑gbala 'amɩ: 'üa 'aanjëlü bäa' cɛlɩ, 'ü kʋ 'na Tʋlɔ bäa' cɛlɩ, 'ɔa 'klɩ 'plɔʋplɔʋ. 11 'Be Nyɔɔa 'Jʋ ji 'ɔmä nyüülü 'mɔlɔa' 'pʋɔ†.
‑Bablëëa tapönänä
12 «Wii 'plɛɛ 'a bobo ‑taa wiili kʋa' ‑pɩa ‑gʋ le? Nyɔɔ ma kä ‑bablëëa ‑glʋɩgböö (100) ‑bɛ 'dee ma 'mɔlɔ nɩ, ‑mää ‑plɩɩ 'dʋgba 'wli 'ɔ ‑nëmä ‑bablëëa ‑glʋɩmlɔɔ ‑bɛ ‑pʋ ‑bɛ ‑uunmlɔɔlë (99) tɩ, 'kä 'ɔ ‑nëmä ɛ 'mɔlɔa' 'batakalɩ mi? 13 Ɔma 'jä 'ɛmɩ nɩ, 'cɩcasa 'n ‑gbala 'amɩ, dɔrʋ nya 'ɔɔn 'blaa. Dɔrʋlʋ nɩ, 'unya 'bʋaa ‑gböösa 'kä 'unya ‑bablëëlëa ‑glʋɩmlɔɔ ‑bɛ ‑pʋ ‑bɛ ‑uunmlɔɔlë (99) 'nyɩa' 'mɔlɔa dɔrʋ 'wʋsi. 14 'Asɩ 'ana Tʋlɔ bäa' cɛlɩ 'nyɩ 'bata 'nɩmɩ 'bata ‑a 'ɔa 'jʋ 'doo 'mä 'mɔlɔ.
‑Wlajʋa 'nyʋfɔ 'wʋa jajakʋ
15 «‑Na ‑wlajʋ ma nʋ ‑mɩ ‑balʋ ‑gba nɩ, mi ‑a ‑jää 'ɔɔn 'ana 'sɔɔ 'kä ‑srara 'ɔɔn wiili 'ɔ nʋa'. Ɔma 'nu ‑mɩ 'wli nɩ, ‑nya 'sɔɔwʋ ‑na ‑wlajʋ 'lɩkʋɛɛ. 16 ‑Maa ɔma 'nyɩ ‑mɩ 'nyakli ‑a po nɩ, dɔrɔ nyɔɔ 'doo 'wʋ, 'aiɛ nyüü 'sɔɔ 'wʋ, 'ba 'blöö 'ɔa ‑nyɛɛ dɛrɩ. 'Asɩ wiia 'fɩɔ ma nëmä 'bölö nɩ, 'i kä 'imä nyüü 'sɔɔ 'aiɛ nyüü tääa mlɩ ja†. 17 Ɔma 'nyɩ bɩa 'üün 'nyakli ‑a po nɩ, ‑gbala 'iin 'cɛcɩnyüü. Ɔma 'nyɩ bɩa 'cɛcɩnyüü 'nyakli ‑a po nɩ, 'ba 'kpla 'ɔɔn 'sɩrɩ nyɔɔlɔ 'nyɩa' Nyɔsʋa jrea 'sa; 'ba 'kpla 'ɔɔn ‑beere dapookälɩpɛrɛnyɔɔ. 18 'Cɩcasa 'n ‑gbala 'amɩ, diili kä 'fɩɔ 'a nëmäa' kpasa ‑pɩ ‑tʋtʋ ‑gälɩ nɩ, 'inya bɩa kpasraa cɛlɩ; ‑bɛ wiili kä 'fɩɔ 'a nëmäa' ‑jejie ‑pɩ ‑tʋtʋ ‑gälɩ nɩ, 'inya ‑jejroa cɛlɩ.
'Wlinönrökʋa dɛɛa Nyɔsʋaa ‑sɛsɛkʋ
19 «'Amɔ 'n ‑gbala, 'pɩrɩgälɩ 'nɩ, 'ana ‑tɔrʋpɩɔa nyüü 'sɔɔ ma 'nönröwli ‑bɛ üma ‑sɛ dɛɛ o dɛɛ nɩ, 'na Tʋlɔ bäa' cɛlɩ nya 'ümɩ 'ɛɛn ‑nyɩa. 20 'Be ‑plɩɩlɩ nyüü 'sɔɔ nyüü tää traraa' 'na ‑gʋ nɩ, 'n bä 'üa ‑tɔrʋpɩɔ.»
‑Wlajüa wii cecrekʋ
21 Piɛɛrë nya jijrö Jesu ‑gba 'ɔnya 'bete 'ɔɔn: «'Pläkänyɔɔ, 'na ‑wlajʋ ma nʋ 'mɩ ‑balʋ ‑gba nɩ, 'wʋ ‑srüplɛɛ 'wʋ 'mä 'ɔmɩ 'iin cere le? 'Wʋ ‑uunsɔɔ 'wʋ?» 22 Jesu ‑nëma «'Woo, 'nëmä 'daa 'wʋ ‑uunsɔɔ 'wʋ, ‑maa ka ‑glʋɩtää ‑bɛ ‑pʋ (70), 'wʋ ‑uunsɔɔ 'wʋ.
Plɛbʋbɔ 'jrʋpafɛnyɔɔa tapönänä
23 «'A 'ia ‑gʋ cɛɩɩa 'kamaplä ‑beere 'sɩrɩ 'kɩɩ 'doo 'daa käa' 'ɔmäa' 'ɔa 'kpëlë 'ɔa 'jrʋpafɛnyüü 'klaa' 'jä. 24 'Ɔ cɛtɛa' dotro nɩ, 'ünya ja 'ɔɔn 'jrʋpafɛnyɔɔ 'doo ɔ 'klaaa' 'ɔa talaan a ‑diiglʋ ‑diigböö† (10 000). 25 ‑Bɛ nyɔɔlɔ 'nyɩa' 'lɩbɩa 'ɔmäa' möliili mlɩsa nɩ, 'kɩɩlɔ ‑nëma 'ü 'pa 'ɔɔn 'peru ‑geeia 'sa, 'palɩ 'ɔa 'ŋlʋʋ, 'ɔa 'jü nyra diili kä 'fɩɔ 'ɔ käa', 'ɔmä 'ɔa 'kpa 'sa. 26 'Jrʋpafɛnyɔɔlɔ nya blö 'ɔɔn bei 'wʋ 'ɔ ‑nëma: ‹'Pläkänyɔɔ†, 'n bibie ‑mɩ blöplɛ 'nyaa 'ia 'fɩɔ 'pɛɛa!› 27 'Jrʋpafɛnyɔɔa nyatɛrɩ nya 'si 'kɩɩlɔ 'klɩ 'ɔnya cere 'ɔmɩ 'kpaläa 'fɩɔ 'ɔnya 'cɛrɛ 'ɔɔn ‑wälɩ. 28 'Jrʋpafɛnyɔɔlɔ mia' nɩ, 'ɔnya 'jä 'ɔa ‑moloo 'jrʋpafɛnyɔɔ 'klaaa' 'ɔa 'kpa; deniea ‑glʋɩgböö† (100). 'Ɔnya 'kpla 'ɔa ‑plɩ, 'ɔ kakla 'ɔɔn ‑fʋflʋ 'klɩ ‑bɛ 'ɔ nö: ‹'Sa 'na 'kpalä ‑klaaa'!› 29 'Ɔa ‑mɔlɔ nya blö 'ɔɔn bei 'wʋ ‑bɛ 'ɔ bibie 'ɔɔn ‑maa: ‹'N bibie ‑mɩ blöplɛ 'nyaa 'ia 'fɩɔ 'saa!› 30 ‑Maa 'ɔ blara, 'ɔnya mi 'ɔnya 'pa nyɔɔlɔ ‑jie 'lɩ ɔma 'sa 'ɔa 'kpa 'fɩɔwʋ ‑bɛ 'ɔmä 'cie. 31 'Jrʋpafɛnyüü ‑mölöö 'jäa' 'iin nɩ, 'i pa 'üün ‑gba ‑gböösa. 'Ünya mi 'ünya ‑gbala 'ia 'fɩɔ 'kɩɩlɔ. 32 'Kɩɩlɔ nya we 'ɔɔn 'ɔ ‑nëma: ‹Plɛbʋbɔ 'jrʋpafɛnyɔɔ! ‑Bibie 'mɩ, 'nyaa cere ‑mɩ 'na 'kpa kpakölä 'klaa ɩa'. 33 ‑Mää ‑mä ɩ bɩa ‑na ‑molooa nyatɛrɩ 'jä ɩ ‑a, 'sɩrɩ 'n 'jäa' ‑na nyatɛrɩ ‑a?› 34 'Ɔa 'kamanyɔɔ ‑tʋa' 'crɛ 'ɔnya 'sara 'ɔɔn nyüülü ‑fɛɛɛrɛa' ‑jienyuku ‑wälɩ kälɩ 'ümä 'ɔɔn ‑gbi ‑gba nʋ nʋ 'ɔmä 'ɔa 'kpalä 'ɔ 'klaaa' mlɩsa.»
35 Jesu ‑nëma: «'Ana ‑tɔrʋpɩɔa nyɔɔ ma 'nyɩ 'ɔa plɛa 'fɩɔ ‑a nʋ ɔma 'nyɩ cere 'ɔa ‑wlajʋ 'ɔa ‑balʋ ‑a nɩ, 'asɩ 'na Tʋlɔ bäa' cɛlɩ 'mä 'amɩ nʋ.»