'Cɩca 'jrʋpafɛnyɔɔ
17
1 Jesu nya ‑gbala 'ɔa 'wʋnyɛrɛnyüü: «Wii nya 'nyrɩkäa 'kä nyüü nya böblö 'plɔʋplɔʋ. ‑Maa busukʋ jrä nyɔɔlɔ 'i jaraa' kälɩ ‑gälɩ! 2 'I ‑siwʋ ɔ kpasra 'ɔa ‑plɩ 'lɩ diisrorotäkä† ‑susugbee, 'kä 'ü be 'ɔɔn 'taniea 'mlɩ, 'kä 'ɔmä 'ia 'jülüa ‑tɔrʋpɩɔa 'doo ‑balʋ 'lɩ 'tutro. 3 'Ii känyrɩ 'ba ‑tre 'ana nyüfë! ‑Bɛ ‑na ‑wlajʋ ma nʋ ‑mɩ ‑balʋ ‑gba nɩ, ‑gbala 'ɔmɩ 'iin. 'Ɔma 'pie 'ɔa ‑balʋ nɩ, cere 'ɔmɩ 'uun. 4 ‑Bɛ 'ɔma nʋ ‑mɩ ‑balʋ ‑gba 'wʋ ‑uunsɔɔ 'wʋ ‑srɩa 'mlɩ, ‑bɛ ‑srɩ 'doolʋa 'mlɩ ɔma ji ‑na ‑nyɛɛ 'wʋ ‑uunsɔɔ 'wʋ ‑bɛ 'ɔma 'daa: ‹'Na nyɔɔ wiili 'n nʋa' 'inyɩ 'na ‑a 'na› ‑kä ‑mä 'ɔmɩ 'iin cere.»5 Apotrë nya ‑gbala 'Pläkänyɔɔ: «'Papla ana nyɔsʋaplɛtorokʋ ‑gälɩ!» 6 'Ɔ ‑nëma: «'Ama kä nyɔsʋaplɛ, ɛma bä dɩjɔ ‑beere mutarëdëeji nɩ, 'anya 'mrɛɛa 'kä 'anya ‑taa tuu kpakulu† kʋa' ‑pɩ ‑gbala u sɔ ‑fli, u mi u blö 'tanie 'lɩ! 'Kä 'unya 'lɩ 'amɩ ‑träärä.
7 «Ü 'daa ‑plɩɩ, 'ana ‑tɔrʋpɩɔa nyɔɔ kä ‑geei, 'ɔ do putu 'aiɛ 'ɔ ‑glara ‑bablëë ‑gba. 'Ɔma sɔ 'klʋɛɛ ɔma ji 'kä 'ɔa 'kamanyɔɔ nya 'ɔɔn ‑gbala: ‹Ji dotro ‑mä dɛɛji?› 8 ‑Mää ‑gbala 'ɔ ‑nëmä ‑geeilɛ ‑gbala ‑maa: ‹'Cici ‑na 'sosroodii, 'kä pie 'na jijrɛ, 'kä ‑nyɛɛ 'mɩ 'na ni. Ama bɩara 'lɩ ‑bɛ ama bɩa 'mamlakʋ nɩ, ‑bɛ ‑mä dɛɛji ‑mä 'mla?› 9 Wiili 'ü 'daaa' ɔ nʋa', ibäa' 'ɔa 'jrʋpa nɩ, 'ia ‑gʋ 'ɔmä ‑geeilɛ 'trɛɛ? ‑Mää 'sɩ 'inyɩ bä? 10 'Asɩ 'a bä bɩa. 'Ama nʋ wiili kä 'fɩɔ Nyɔsʋa 'daaa' 'ba nʋ nɩ, 'ba 'daa: ‹‑Goou a bä; wiili a käa' amäa' nʋ nɩ, 'ii a nʋ.› »
'Jrʋklanyüü ‑pʋlʋ Jesu 'pʋɔa'
11 Jesu möa' Jerusalɛɛmëa 'pɛlɩ nɩ, Samarii nyra Galileea ‑tɔrʋpɩɔ 'ɔ ‑srörö. 12 Bätä 'dööa 'mlɩ 'ɔ 'jraa ɩ, 'jrʋklanyüü ‑pʋ nya 'jrara 'ɔɔn 'klɩ. 'Ünya 'nyüglö tʋŋlɔ ‑pɩɔ†. 13 'Ünya dɔrɔ wii 'wʋ ‑gböösa, ‑bɛ 'ü 'paa wii: «Jesu, 'Kamanyɔɔ, 'jä ana nyatɛrɩ!» 14 'Ɔ 'jäa' 'üün nɩ, 'ɔ ‑nëma: «'Ba mi 'amä 'ana nyüfë ‑gbɔsapɛrɩnyüü 'klɩsrara†.» Mö 'ü mö ɩ, 'ünya 'plɔrɔ 'nyʋfɔ mlɩ. 15 'Üa ‑tɔrʋpɩɔa 'doo jrea' 'saa 'ɔ 'a 'pʋ nɩ, dɛrɩ 'ɔ 'blöö ‑bɛ 'ɔ ‑gbolomlɩ 'ɔ 'bʋala Nyɔsʋaa 'nyrɩ. 16 'Ɔnya blö Jesua bei 'wʋ, 'ɔa 'klʋɩ tɛ ‑tʋtʋ 'wʋ, ‑bɛ 'ɔ 'trɛɛ 'ɔɔn. ‑Bɛ 'ɔɔlɔ nɩ, Samariinyɔɔ 'ɔ bä. 17 Jesu ‑nëma: «'Üa nyüü ‑pʋlü 'nyɩ 'pʋ ‑a 'pʋ? ‑Bɛ ‑a 'plɛɛ ‑uunmlɔɔ ‑mülü bä le? 18 ‑Bɛ dɛplɛɛ kä ‑gʋ 'ɔɔlɔ bäa' 'üa ‑tɔrʋpɩɔa nyɔtugbanyɔɔ nɩ, 'ɔɔ 'blöö ɔ ji Nyɔsʋa 'trɛɛ le?» 19 'Ɔnya ‑gbala nyɔɔlɔ: «Sɔwʋ ‑mä mi; ‑na nyɔsʋaplɛtorokʋ 'a ‑mɩ 'pʋɔ.»
'Sɩrɩ Nyɔsʋaa 'kamaplä 'mäa' ‑srɩɩ ji
20 Jrüü 'doo 'lɩ nɩ, Farisinyüü 'betre Jesu Nyɔsʋaa 'kamapläa jijitaɩn a wii 'lɩ. 'Ɔnya ‑gbala 'üün: «‑Mää 'sɩrɩ 'a 'jääa' dii 'wʋ nɩ, ‑mää 'sɩ Nyɔsʋaa 'kamaplä ‑nëmä ji. 21 'Ü ‑nëmä 'daa: ‹‑Jää ‑tɛ 'ä bä› 'aiɛ: ‹‑Jää ‑nyɛɛ 'ä bä!› 'Ba jresaa Nyɔsʋaa 'kamaplä bä 'ana ‑tɔrʋpɩɔ.»
22 'Ɔnya ‑gbala 'ɔa 'wʋnyɛrɛnyüü: «'Taɩn nya ‑srɩɩ 'lɩjräa 'kä 'anya Nyɔɔa 'Jʋa 'jäjäkʋ 'bata jrüü 'doo 'doo, ‑maa 'a ‑nëmä 'ɔɔn 'jä ‑a 'jä. 23 'Ünya 'daa: ‹‑Jää ‑tɛ 'ɔ bä› 'aiɛ: ‹‑Jää ‑nyɛɛ 'ɔ bä!› ‑Maa 'anyɩ mi 'lɩ, 'anyɩ prɛ 'üün dɛrɩ! 24 'Be 'sɩrɩ ‑mamɛɛa 'bɩbɩ sɔa' cɛa 'pɛ ‑mɩdee ‑gälɩ ‑bɛ 'ɛ 'cerea' 'pɛ ‑mɩdee ‑gälɩ nɩ, 'asɩ Nyɔɔa 'Jʋa 'taɩn 'mä bɩa bä. 25 ‑Maa 'ɔnya ‑kätɩ ‑sʋɛ kpaki 'jäa, 'kä ‑taa nyüüglügbölä kʋa' nya 'ɔɔn jrara.
26 «'Sɩrɩ wii ‑si käa' Noea 'taɩn† 'lɩ nɩ, 'asɩ Nyɔɔa 'Jʋa jijijrüü 'mä bɩa bä. 27 Nyüü ma jödɛɛ ‑bɛ 'ü ma 'mlaa 'nʋ, 'ü ma 'tie ‑bɛ 'ü ma 'tie 'üa 'ŋlëkayörü. 'Asɩ 'ü kä kä, Noe nya 'jra kä 'mɩɩlɛa 'mlɩ. 'Nɩ nya ji 'ia 'fɩɔ ‑gblooo. 28 'A dɛɛ 'dee Lɔɔtëa 'taɩn 'lɩ: nyüü ma jödɛɛ ‑bɛ 'ü ma 'mlaa 'nʋ, 'ü ma ‑suuö dii, 'kä 'ü ma 'paa dii 'peru, 'ü ma pla ‑bɛ 'ü ma 'paa nyëka. 29 ‑Maa ‑srɩlɩ kä 'mlɩ Lɔɔtë 'ciea' Sodɔɔmëbätä nɩ, kapu nyra 'täkäkapu sɔsɔ cɛlɩ ‑beere 'nʋŋlʋ 'unya ‑gblooo 'ia 'fɩɔ†. 30 'Asɩ 'imä bɩa bä ‑srɩlɩ kä 'mlɩ Nyɔɔa 'Jʋ 'mäa' 'ɔa nyufa srara.
31 «'Ia jrüülüa 'mlɩ nɩ, nyɔɔ ma bä ɩ 'ɔa nyuku ‑gälɩ nɩ, 'ɔnyɩ 'cie 'ɔnyɩ ji nyüköli 'ɔa ‑pöötia 'klɛɛ. ‑Mɔlɔ nëmäa' 'klʋɛɛ bä, 'ɔnyɩ 'blöö 'ɔnyɩ ji dɛɛa 'klɛɛ. 32 'Ba 'pa Lɔɔtëa 'ŋlʋʋa ‑gä plɛ†. 33 Nyɔɔ o nyɔɔ 'bataa' 'ɔa 'kläa ‑wälɩtʋtʋkʋ nɩ, 'ɔnya 'ään 'mɔlɔa. ‑Maa nyɔɔ o nyɔɔ 'mɔlɔa' 'ɔa 'klä, 'ɔnya 'ɔa 'klä ‑wälɩtʋa.
34 «'Amɔ 'n ‑gbala: 'ia ‑gbialäa 'mlɩ nɩ, nyüü 'sɔɔ nya ‑bɛrɛ 'dee 'wʋ 'pia', 'doo nya falaa, 'kä 'doo nya tɩɔ. 35 'Ŋlëgë 'sɔɔ nya dii 'wʋbrerea; 'doo nya falaa, 'kä 'doo nya tɩɔ. 36 Nyüü 'sɔɔ nya putu 'doo 'lɩbäa; 'doo nya falaa, 'kä 'doo nya tɩɔ.» 37 'Ünya 'bete 'ɔmɩ: «'Pläkänyɔɔ, ‑a 'plɛɛ 'imä nrörö le?» 'Ɔnya ‑gbala 'üün ‑maa: «‑Plɩɩlɩ jäjädɛɛ bäa' nɩ, 'ii ‑kɔkëpanë† 'mä trara†.»