Dɛɛ 'mɔlɔa' ‑bɛ 'ɛ 'järäa'
15
1 Dapookälɩpɛrɛnyüüa 'fɩɔ nyra ‑balʋnyüü ‑mülü jijrö ɩ Jesu ‑gba 'ümä 'ɔɔn 'nyaklipo. 2 ‑Bɛ Farisinyüü nyra ‑dɔkpɩanyüü ‑ŋuŋlowälɩ 'ü nö: «‑Taa nyɔɔlɔ kʋa' ‑pɩ 'kʋɛɛlɩ ‑balʋnyüü ‑bɛ 'ɔ nyra 'üün tara 'wʋ†!» 3 'Ia ‑gʋ, 'ɔnya 'pala 'üün tapönänä kʋa' ‑pɩ 'klɩ: 4 «'Ana ‑tɔrʋpɩɔa nyɔɔ ma kä ‑bablëëa ‑glʋɩgböö (100), ‑bɛ 'üa ‑tɔrʋpɩɔa 'dee ma 'mɔlɔ nɩ, ‑asɩ 'ɔmä nʋ le? ‑Mää ‑plɩɩ tarafa 'wʋ 'ɔ ‑nëmä ‑glʋɩmlɔɔ ‑bɛ ‑pʋ ‑bɛ ‑uunmlɔɔlë (99) tɩ, ‑bɛ 'ɔ ‑nëmä ɛ 'mɔlɔa' 'batakalɩ mi 'ɔmä 'ɛɛn 'jä? ‑Mää 'sɩ 'ɔ ‑nëmä nʋ? 5 'Ɔma 'jä 'ɛmɩ nɩ, dɔrʋ nya 'ɔɔn 'blaa 'kä 'ɔnya 'ɛɛn ‑plɩ ‑gälɩ 'pie. 6 'Ɔma 'tɔ ‑gbööli, 'kä 'ɔnya 'ɔa ‑mölöö nyra nyüülü 'ɔ nyra 'üün kɔklɔa' ‑gba we; 'kä 'ɔnya 'üün ‑gbala ‑maa: ‹'Ba ji 'nyraa 'amɩ 'mä dɔrʋ nʋ! 'Nyaa 'na ‑bablɛɛlɛ 'mɔlɔ ɩa' 'jä!› 7 'Amɔ 'n ‑gbala, 'asɩ dɔrʋ nëmä bɩa cɛa 'mlɩ 'si 'taɩn 'lɩ ‑balʋnyɔɔ 'doo 'doo 'mäa' 'ɔa ‑balʋ 'klɩ 'nyiere ‑bɛ 'ɔmäa' 'ua ‑gʋ fio. Dɔrʋlʋ nya 'bʋaa ‑gböösa 'kä 'unya 'klɩgänyüüa ‑glʋɩmlɔɔ ‑bɛ ‑pʋ ‑bɛ ‑uunmlɔɔlü (99) 'nyɩa' ‑balʋa 'lɩgälɩtorokʋa ‑gä 'lɩbä.8 «'Aiɛ, 'ŋlʋʋ 'doo ma 'klaa mölii sʋsʋa ‑pʋ kälɩ, ‑bɛ 'dee ma 'mɔlɔ nɩ, ‑mää 'napɛ 'ɔ ‑nëmä ‑gölö ‑bɛ 'ɔ ‑nëmä nyuku ‑wälɩ wɔpɔ, ‑bɛ 'ɔ ‑nëmä plɛblö 'ɔmä 'ɛɛn 'bata 'bata ‑a ji 'ɔmä 'ɛɛn 'jä? 9 'Ɔma 'jä 'ɛmɩ nɩ, 'kä 'ɔnya 'ɔa ‑mölöö nyra nyüülü 'ɔ nyra 'üün kɔklɔa' ‑gba we; 'kä 'ɔnya 'üün ‑gbala ‑maa: ‹'Ba ji 'nyraa 'amɔ 'mä dɔrʋ nʋ! 'Nyaa 'na möliiejilɛ 'mɔlɔ ɩa' 'jä!› 10 'Amɔ 'n ‑gbala, 'asɩ dɔrʋ nëmä bɩa Nyɔsʋaa 'aanjë 'bla 'taɩn 'lɩ ‑balʋnyɔɔ 'doo 'doo 'mäa' ‑balʋa 'pie ‑bɛ 'ɔmäa' 'uun 'lɩgälɩtoro.»
11 'Ɔ ‑nëma 'sɔɔwʋ: «Nyɔɔ 'doo kä kä 'jü 'sɔɔ. 12 Blaaadɩɔ nya ‑gbala 'ɔa tʋ: ‹'Na tʋ, ‑nyɩ 'mɩ 'na nä ‑jaaa.› Tʋ nya ‑päälä 'üün 'ɔa käkädii 'lɩ. 13 Jrüü 'mä ‑sikalɩ mi nɩ, blaaadɩɔ nya dɔrɔ 'ɔa diia 'fɩɔwʋ, 'ɔnya mi kpaun 'blɩ ‑gälɩ. 'Ɔ mia' 'lɩ nɩ, 'ɔnyɩ 'cɩcagbi ‑a nʋ, 'ɔnya bʋblɔ 'ɔa möliia 'fɩɔ. 14 'Ɔ bʋblɔa' 'ia 'fɩɔ nɩ, ‑gbëkananie nya pa 'blɩlɩ kä ‑gälɩ 'ɔ mia', ‑maa 'ɔ ‑kanyɩ dɛɛa 'klaa. 15 ‑Jää 'ɔɔ mi nyɔɔ 'dooa ‑nyɛɛ. Nyɔɔlɔ nya fa 'ɔɔn 'ɔmä 'ɔa 'bösaru† ‑gälɩglaara. 16 Tuulu 'ü 'daraa' karubie† u kä 'bü mlaa jöa' nɩ, 'üa jijitʋ nya 'bla 'ɔɔn, ‑maa nyɔɔ 'nyɩ 'ɔmɩ 'üün ‑a ‑nyɩ. 17 'Ɔnya bobo 'ɔa ‑gbaaa ‑gä, 'ɔ ‑nëma: ‹'Na tʋa 'jrʋpafɛnyüü 'jää jijri 'ü jö 'iin, 'kä 'i ‑jɔjrɔkä, ‑bɛ 'mɔɔlɔ nɩ, ‑gbëka 'blaa 'mɩ! 18 'Na tʋa ‑nyɛɛ 'nëmä dɛrɩ 'blöö 'mä 'ɔɔn ‑gbala: 'Na Tʋ, 'n nʋ Nyɔsʋa ‑balʋ ‑gba, 'nyaa nʋ bɩa ‑mɩ ‑balʋ ‑gba. 19 'N ‑kanyɩ ‑na 'jʋ 'klɩ ‑a 'wʋ. Dɔrɔ 'mɩ 'wʋ ‑beere ‑na 'jrʋpafɛnyɔɔ.› 20 'Ɔnya sɔwʋ, 'ɔnya 'blöö 'ɔa tʋa ‑nyɛɛ dɛrɩ. 'Ɔ ‑ka tʋŋlɔlɩ nyuku dɛrɩ, 'ɔa tʋ nya 'jä 'ɔɔn ‑bɛ 'ɔ jö 'lee; 'ɔa nyatɛrɩ nya ‑si 'ɔɔn 'klɩ, 'ɔnya fɔ, 'ɔnya mi 'ɔɔn ‑gbere dɔrʋsa. 21 'Jʋlɔ nya ‑gbala 'ɔɔn: ‹'Na Tʋ, 'n nʋ Nyɔsʋa ‑balʋ ‑gba, 'nyaa nʋ ‑mɩ ‑balʋ ‑gba. 'Nyaa ‑kanyɩ ‑na 'jʋ 'klɩ 'wʋ.› 22 ‑Maa 'ɔa tʋ nya ‑gbala 'ɔa 'jrʋpafɛnyüü: ‹'Ba 'sosowʋ† 'ba ja 'kotulu 'naa' u ‑sia' 'ia 'fɩɔwʋ, 'kä 'a 'sroo 'ɔmɩ 'uun. 'Ba 'pa 'ɔa wli 'lɩ ‑kpatrawee, 'kä 'a pla 'ɔa bökli 'lɩ 'sii! 23 'Kä 'a 'kplaa bruujʋlɔ nɔa', 'kä 'a 'böö 'ɔɔn ‑plɛlɩ amä dɛɛji, amä 'bri! 24 'Na 'jʋlɔ kʋa' ‑pɩ jä ɩ, ‑maa 'ɔ 'a 'wʋsɔ; 'nyaa 'na 'jʋlɔ 'mɔlɔ ɩa' 'jä!› 'Ünya cɛtɛ ‑glɩsɩglɩsɩ.
25 «Kpaköa nɔ bä ɩ 'klʋɛɛ ‑bɛ 'i nrörö. 'Ɔ jijröa' ‑gbööö ‑gba nɩ, 'ɔ 'nöö bibridii nyra yɛyɛnyüüa wii 'wli. 26 'Ɔnya we 'jrʋpafɛnyɔɔ 'doo, 'ɔnya 'bete 'ɔɔn wiili bäa' ‑gbööli. 27 'Ɔnya ‑gbala 'ɔɔn: ‹‑Na ‑wlajʋ ji, ‑na tʋ nya 'bla nɔnɔbruujʋ, 'be 'ɔ 'a 'ɔa 'jʋ 'jä, 'ɔa fugba 'na.› 28 'Jʋlɔ nya ‑tʋ 'crɛ, 'ɔ nɩnɩa 'ɔ ‑nëmä nyukua ‑wälɩ ‑a pa. 'Ia ‑gʋ 'ɔa tʋ nya 'cie ‑bɛ 'ɔ bibie 'ɔɔn. 29 'Ɔnya ‑gbala 'ɔa tʋ ‑maa: ‹'N ‑fɛa' ‑na 'jrʋpa 'ia ‑sɩ ‑srüplɛɛ le, ‑kaapɩɔ 'mɩ wii ‑a ‑gbala ‑bɛ 'mä 'daa 'n blara†. ‑Kaapɩɔ 'mɩ wluua jɔ ‑a ‑nyɩ 'nyraa 'na ‑mölöö 'mä ‑glɩsɩglɩsɩ 'jä. 30 ‑Maa ‑na 'jʋlɔ kʋa' ‑pɩ, ɔ bʋblɔa' ‑na 'bɩɔa 'fɩɔ 'tutuŋlëgë ‑gälɩ nɩ, 'ɔ jia' nɩ, 'ɔa ‑gʋ ‑blaaa' nɔnɔbree!› 31 'Ɔa tʋ nya ‑gbala 'ɔɔn: ‹'Na 'jʋ, ‑mɔlɔ nɩ, 'nyraa ‑mɩ bä ‑plɩɩa 'doo, ‑bɛ diili kä 'fɩɔ 'n käa' nɩ, ‑mɔ kä 'imɩ. 32 ‑Maa a kä amä ‑glɩsɩglɩsɩ nʋ, amä 'bri; ‑na ‑wlajʋ 'a ɩ jä, ‑maa 'ɔ 'a 'wʋsɔ. 'Ɔ 'mɔlɔ ɩ, ‑maa 'ɔ 'a 'järä.› »