Jerusalɛɛmëa ‑gbogblookʋ
24
1 Jesu 'ciea' Nyɔsʋaanyuku kpaku ‑wälɩ nɩ, mö 'ɔ mö ɩ ‑bɛ 'ɔa 'wʋnyɛrɛnyüü jijrö 'ɔɔn ‑gba 'ümä 'ɔɔn Nyɔsʋaanyuku kpakua ‑gböööa 'mlɩa nyëka srara. 2 'Ɔnya ‑gbala 'üün ‑maa: «'A 'jää diili kä 'fɩɔ kʋa' ‑pɩ 'wʋ? 'Cɩcasa 'n ‑gbala 'amɩ, 'ia nyukupatäkä 'döö ‑nëmä 'döö ‑gälɩ ‑a tɩɔ; 'üa 'fɩɔ nya ‑gbloooa.»3 Jesu nya mi Oliivëa 'dʋgba 'wli kʋ, 'ɔa 'wʋnyɛrɛnyüü nya mi 'ɔɔn 'bete 'üa 'kpɔa ‑tɔrʋpɩɔ: «‑Gbala amɩ, 'taɩn 'plɛɛ 'lɩ 'ia 'fɩɔlʋ 'mä 'lɩjrä le? ‑Asɩ anya ‑na jijijrüü nyra 'pläa bɩara 'taɩn jre le?»
Wiili 'mäa' amɩ ‑gbala 'sɩrɩ 'pläa bɩabɩataɩn nyaa' 'lɩjrä
4 Jesu nya ‑gbala 'üün: «'Ba ‑tre 'ana nyüfë! Nyɔɔ 'nyɩ 'pa 'amɩ mlüülɩ. 5 Nyüü 'kɔkɔmlɛ nya 'na 'nyrɩ jaa 'kä 'ünya ji 'kä 'ünya 'daa: ‹'Mɔɔ bä 'Kriisë,› 'kä 'ünya nyüü 'kɔkɔmlɛ 'nyʋfɔ 'wʋ 'ba. 6 'Anya toulu 'nyɩa' 'amɩ 'lɩdɛrɩtʋŋlɔ nyra ‑mulu tʋŋlɔa' 'amɩ 'lɩdɛrɩa wii 'wlinua ‑maa 'ana plɛ 'nyɩ ‑taaralɩ; 'ia 'fɩɔlʋ kä 'imä 'lɩjrä. ‑Maa ‑mää bɩarataɩn ‑kaaŋlʋ 'saabä. 7 ‑Glügbö ‑bɛ ‑glügbö nya 'wlitotroa, 'kɩɩ ‑bɛ 'kɩɩ nya 'wlitotroa; ‑gbëka nyra ‑wusu† nya ‑pɩɔa 'fɩɔ paa; ‑tʋtʋ nya tɩtrɛa. 8 'Ia 'fɩɔlʋ nya ‑beere 'ŋlʋʋa ‑gälɩsɔsrɔkʋa 'klɩsa mɩmɩakʋ.
9 «'A ‑plɩɩ 'ümä 'amɩ nyüü kälɩ 'sara 'amä 'üü ‑sʋɩ kälɩ 'järä 'kä 'ünya 'amɩ 'babla. Nyüülü kä 'fɩɔ 'nyɩa' Nyɔsʋa jre nya 'amɩ 'nyüamlɩjraraa 'na 'nyrɩa ‑gʋ. 10 'Ia 'taɩn 'lɩ nɩ, nyüü 'kɔkɔmlɛ nya Nyɔsʋa dɛrɩ sɔa; 'ünya dɛrɩ sɔsrɔa 'kä 'ünya 'nyüamlɩjajra. 11 ‑Gbagblɛ nyɔsʋaamlɩpalanyüü 'kɔkɔmlɛ nya jia 'kä 'ünya nyüü 'kɔkɔmlɛ mlüülɩpa. 12 ‑Balʋa ‑gälɩpaplakʋa ‑gʋ nɩ, ‑wawlakʋlʋ bä ɩa' nyüüa ‑tɔrʋpɩɔ nya sɩɔ paa. 13 ‑Maa nyɔɔlɔ nëmäa' 'wʋsɔɔrɔ ‑sɔrɔ, ‑bɛ 'imäa' bɩa nɩ, 'ɔnya 'lɩmlɩwʋa. 14 ‑Taa 'Kamapläa 'Mʋfagogolä kʋa' ‑pɩ nya 'blɩa 'fɩɔa 'mlɩ 'saraa, 'fɩɔwʋ 'kä 'plä nya bɩa.
‑Sʋɩ kpakü
15 «'Ii känyrɩ 'ama 'jä Nyɔsʋa jraradɛɛlɛ† kä ‑gä nyɔsʋaamlɩpalanyɔɔ Daniɛɛlë 'pa käa', ɛma pa Nyɔsʋaanyukua 'nyüna ‑pɩɔ nɩ, abɩa nyɔɔlɔ ‑täsäa' 'nu! 16 ‑Mülü 'mäa' Judee bä 'ia ‑srɩ 'lɩ nɩ, ü fɔlɔ 'dʋgbë 'lɩ. 17 ‑Mɔlɔ nëmäa' nyuku ‑gälɩ bä, 'ɔnyɩ 'cie, 'ɔnyɩ mi dɛɛa 'klɛɛ nyüköli. 18 ‑Mɔlɔ nëmäa' 'klʋɛɛ bä, 'ɔnyɩ 'blöö 'ɔnyɩ ji 'kotua 'klɛɛ. 19 'Ia ‑srɩ 'lɩ ‑nëmä nʋgblaŋlëgë nyra ü 'nyaaa' 'jü kälɩ ‑a 'nara.
20 «'Ba bibie Nyɔsʋa 'ana fɔfɔtaɩn ‑pɩ 'lɩjrä sɩɔpataɩn 'lɩ, 'aiɛ ‑fʋflʋpasrɩ 'lɩ. 21 'Be 'ia jrüülüa 'mlɩ, ‑sʋɩ kpakülü nëmäa' 'lɩjrä, 'ia 'samaa ‑sʋɩ ‑kaapɩɔ 'lɩjrä 'bala 'pläa 'käkolofa 'wʋ, 'ɛ ‑ka ‑nëmä bɩa 'lɩ ‑a jrä 'plɔʋ. 22 Nyɔsʋa ma 'nyɩ ɩ 'ia jrüülü 'klɩ ‑a 'bö, nyɔɔ 'doo ‑nëmä 'lɩmlɩ ‑a 'wʋ; ‑maa 'ɔa nyüülü 'ɔ 'baa' 'lɩ, 'üa ‑gʋ 'ɔ 'bö jrüü 'klɩ.
23 «'Ii känyrɩ nyɔɔ ma ‑gbala 'amɩ: ‹‑Tɛ 'Kriisë bä› 'aiɛ: ‹‑Nyɛɛ 'ɔ bä› 'anyɩ 'dara 'iin wii. 24 'N 'paa' 'iin nɩ, ‑gbagblɛ 'kriisë nyra ‑gbagblɛ nyɔsʋaamlɩpalanyüü nya ‑srɩɩ 'lɩbäa. 'Ünya ‑saragbi kpakü nyra plɛklɩkalawii nʋa, 'ünya 'nɩmɩ nyüülü Nyɔsʋa 'baa' 'lɩ mlüü 'lɩpaa ima bä 'ia 'sa. 25 'N tɩ ‑srɩ dɛrɩ 'nyaa ‑gbala 'amɩ 'iin.
26 «Üma ‑gbala 'amɩ: ‹‑Jää ‑nyɛɛ ‑aaga 'lɩ 'ɔ bä› 'anyɩ mi 'lɩ. Üma 'daa: ‹‑Jää ‑tɛ nyüköli 'ɔ ‑sisre› 'anyɩ 'dara 'iin wii. 27 'Be Nyɔɔa 'Jʋa jijitaɩn nya ‑beere ‑mamɛɛa 'bɩbɩ sɔa' 'jrʋa 'wʋsɔrɔfa 'wʋ ‑bɛ 'ɛ 'cerea' 'jrʋa 'pifa 'wʋ. 28 'Be ‑plɩɩlɩ jäjädɛɛ bäa' nɩ, 'ii ‑kɔkëpanë† trara†.
29 «‑Taa jrüülüa ‑sʋɩ ma ‑si dotro nɩ,
'jöjrüükpü nya 'jrʋa 'klɩ 'prɛrɛa,
‑seple ‑ka ‑nëmä 'ɛa plöplönyü ‑a 'klaa,
‑särë nya cɛlɩ sɔsɔa 'kä 'ünya böblö;
'klülü kä 'fɩɔ bäa' cɛa 'mlɩ nya tɩtrɛa†.
30 «'A ‑plɩɩ Nyɔɔa 'Jʋa tie 'mä cɛa 'mlɩ 'tɔrɔ†. ‑Tʋtʋ ‑gälɩa ‑glügbüa nyüüa 'fɩɔ nya ‑sɩsraa. 'Ünya Nyɔɔa 'Jʋ 'jäa, 'ɔnya cɛlɩa ‑gbru ‑gälɩ jaraa ‑bɛ 'ɔnya ji, 'ɔ ‑bɛ 'ɔa 'klü nyra 'wliklɩa 'bʋabʋakʋ. 31 Dɛglɛ nya wiimlɩbablaa ‑gböösa, 'kä 'ɔnya 'ɔa 'aanjë jaa 'ümä 'ɔa nyüülü 'ɔ 'baa' 'lɩ, ü bäa' ‑tʋtʋa kotü mlɔɔ 'lɩ, ‑gbapapla, sɔ cɛa 'käkolofa 'wʋ ‑a mi ‑a ‑tɔɔ cɛa blöröfa 'wʋ.»
Figietuua tapönänä
32 «'Ba 'nu ‑tɔɔɔlʋ figietuu† 'paaa' 'wli. 'Ua dawii ma bä 'jɩjarɛ ‑bɛ 'napɩ 'jɩjarɛ ma ‑ga nɩ, 'a jre 'iin 'sɩrɩ 'ua tʋtʋ 'taɩn nyaa' 'lɩjrä. 33 'Asɩ 'ama 'jä 'ia wiilia 'fɩɔ, ima jrälɩ nɩ, 'ba jresaa wiili nëmäa' 'tɔ ‑kanyɩ 'lɩdɛrɩ ‑a tʋŋlɔ. 'I bä nyukumla 'klɩ. 34 'Cɩcasa 'n ‑gbala 'amɩ: ‑taa nyüüglügbölä kʋa' ‑pɩa 'fɩɔ ‑nëmä bɩa ‑a bɩa 'kä 'ia 'fɩɔ nya 'lɩjrä.
35 «Cɛ nyra ‑tʋtʋ nya ‑sia, ‑maa 'na mlɩa wii ‑nëmä ‑si ‑a ‑si 'plɔʋ.»
Nyɔɔ 'nyɩ 'ia jrüü nyra 'ia 'taɩn ‑a jre
36 «Dɛɛlɛ bäa' 'ia jrüü 'aiɛ 'ia 'taɩn nɩ, nyɔɔ 'nyɩ 'iin jre ‑a jre; 'aanjëlü bäa' cɛlɩ 'nyɩ 'iin jre ‑a jre†. Tʋa 'doo 'ɔɔ jre 'iin. 37 'Sɩrɩ wii ‑si käa' Noea 'taɩn 'lɩ† nɩ, 'asɩ Nyɔɔa 'Jʋa jijitaɩn 'mä bɩa bä. 38 Noea 'taɩn 'lɩ nɩ, 'nʋŋlʋ kpaku ‑ka bä käa' dɛrɩ nɩ, nyüü ma jödɛɛ ‑bɛ 'ü ma 'mlaa 'nʋ, 'ü ma 'tie ‑bɛ 'ü ma 'tie 'üa 'ŋlëkayörü. 'Asɩ 'ü kä kä, Noe nya 'jra kä 'mɩɩa 'mlɩ. 39 'Üa ‑gbʋʋ 'nyɩ kä 'lɩ ‑a bä bä, 'nʋŋlʋ kpaku nya ji 'unya fa 'üa 'fɩɔ. 'Asɩ 'i nëmä bɩa bä Nyɔɔa 'Jʋa jijitaɩn 'lɩ. 40 Nyüü 'sɔɔ nya 'klʋɛɛ bäa; 'doo nya falaa, 'kä 'doo nya tɩɔ. 41 'Ŋlëgë 'sɔɔ nya dii 'wʋbrerea; 'doo nya falaa, 'kä 'doo nya tɩɔ.
42 «'A 'ia ‑gʋ 'anyɩ 'mʋmɔ, 'be 'taɩn 'lɩ kä 'mlɩ 'ana 'Pläkänyɔɔ 'mäa' ji 'anyɩ 'iin jre ‑a jre.
43 «‑Maa 'ba jresaa: nyukukänyɔɔ ma jre 'taɩn 'lɩ kä 'mlɩ ‑jejienyɔɔ 'mäa' 'ɔɔn ‑gbapa nɩ, 'ɔ ‑nëmä 'mʋmɔ ‑a 'mʋmɔ 'jejienyɔɔ ‑pɩ 'ɔa nyuku ‑wälɩ pa. 44 'A 'ia ‑gʋ, 'ana 'mʋgbɛ 'ba ‑ëlere, Nyɔɔa 'Jʋ nya jia 'taɩnlɩ 'kä 'mlɩ 'anyɩa' 'ɔɔn boblo.
'Jrʋpafɛnyɔɔlɔ bäa' plɛtorosaa tapönänä
45 «'Jrʋpafɛnyɔɔ 'plɛɛ ‑gäklɩ ‑bɛ ɔ ‑glalɩ le, ɔ nyukukänyɔɔ 'mä 'ɔa 'jrʋpafɛnyüüa 'fɩɔ ‑gba tɩ, 'ɔnya 'üün jijri ‑nyɩ 'taɩn ma jräwli le? 46 Nyukukänyɔɔ ma ji ɔma jrä 'jrʋpafɛnyɔɔlɔ 'jrʋpalä 'ɔ tɩa' 'ɔɔn ‑gba ‑gälɩ nɩ, abɩa dɔrʋ 'bla 'ia 'jrʋpafɛnyɔɔlɔ. 47 'Cɩcasa 'n ‑gbala 'amɩ: nyukukänyɔɔ nya 'ɔɔn 'ɔa käkädiia 'fɩɔ ‑gba tɩa. 48 ‑Maa ɔma bä plɛbʋbɔ 'jrʋpafɛnyɔɔ nɩ, 'ɔnya 'daa 'ɔa 'kamanyɔɔ 'a 'lɩwlɛ, 49 ‑bɛ ɔma ‑tʋ 'lɩ 'ɔa ‑mölöö 'jrʋpafɛnyüülüa dii ‑gälɩgbagbakʋ, ‑bɛ 'ɔ nyra 'nʋmlanyüü ma ji jijrili nyra 'nʋlʋ bäa' 'lɩ nɩ, 50 ‑srɩlɩ kä 'mlɩ 'ia 'jrʋpafɛnyɔɔlɔ 'nyɩa' boblo, 'a 'ia 'mlɩ nyukukänyɔɔ 'mä jrörö, ‑gliiilɛ 'ɔa plɛ 'nyɩa' ‑gba bä, 'ɛa 'mlɩ. 51 'Kä 'ɔnya 'ɔmɩ 'pɔnɩ ‑gböösa, ‑bɛ wiili 'ü nöa' ‑glagälɩsrörönyüü ‑gba nɩ, 'kä 'ɔnya 'ɔmɩ 'iin ‑gba nʋ, 'a ‑plɩɩ 'ümä 'wu ‑bɛ 'ümä ‑gla ji.