Jerusalɛɛmëa ‑gbogblookʋ nyra Nyɔɔa 'Jʋa dɛrɩböblöökʋ
13
1 Jesu 'ciea' Nyɔsʋaanyuku kpaku ‑wälɩ nɩ, 'ɔa 'wʋnyɛrɛnyɔɔ 'doo nya ‑gbala 'ɔɔn: «'Kpɩkpɩanyɔɔ, tɛ 'lɩ! Abɩa nyukupatäkë 'na; 'tasɩrɩa 'mʋfa nyuku!» 2 Jesu nya 'sa 'ɔɔn ‑gälɩ: «‑Jäää nyëka kpakülü kɔkɔa' ‑pɩ 'wʋ? Nyukupatäkä 'döö ‑nëmä 'döö ‑gälɩ ‑a tɩɔ; 'üa 'fɩɔ nya ‑gbloooa.»3 'Ɔnya 'prɛrɛ Oliivëa 'dʋgba 'wli 'ii 'ɔ kʋ ‑bɛ 'ɔ 'jä Nyɔsʋaanyuku 'wʋ. Piɛɛrë, Jaakë, Jaan ‑bɛ Andree tɩɔa' 'ɔɔn ‑gba nɩ, 'ünya 'bete 'ɔɔn: 4 «‑Gbala amɩ, 'taɩn 'plɛɛ 'lɩ 'imä 'lɩjrä le? ‑Asɩ anya 'iin jre 'sɩrɩ 'ia 'fɩɔ 'mäa' nrörö le?» 5 Jesu nya ‑gbala 'üün ɔ: «'Ba ‑tre 'ana nyüfë! Nyɔɔ 'nyɩ 'pa 'amɩ mlüülɩ. 6 'Be 'kɔkɔmlɛ nya 'na 'nyrɩ jaa 'kä 'ünya ji, 'ünya 'daa: ‹'Mɔɔ bä 'ɔɔn,› 'kä 'ünya nyüü 'kɔkɔmlɛ mlüülɩpa. 7 ‑Srɩ 'lɩ 'amäa' toua 'nyrɩ 'wli 'nu, nyra 'sɩrɩ 'u ‑flooroa' 'plä ‑gälɩ nɩ, 'ana plɛ 'nyɩ ‑gbakä; 'i kä 'imä 'lɩjrä. ‑Maa ‑mää 'pläa bɩarataɩn ‑kaaŋlʋ 'saabä. 8 ‑Glügbö ‑bɛ ‑glügbö nya 'wlitotroa, 'kɩɩɩ ‑bɛ 'kɩɩɩ nya 'wlitotroa; ‑tʋtʋ nya ‑pɩɔ 'kɔkɔmlɛ tɩtrɛa, ‑gbëka nyra ‑sʋɩ nya paa. 'A 'ŋlʋʋ ‑gälɩsɔsrɔkʋa 'klɩsa mɩmɩakʋ.
9 «'Amɔlɔ nɩ, 'ba kä 'ia plɛ. 'Ünya 'amɩ tropina 'lɩ faa, 'ünya 'amɩ ‑gbalɛfi ‑gälɩ ‑gbagbaa juifëa 'sraaplanyuku ‑wälɩ. 'Na ‑gʋ, 'ünya 'amɩ 'cifu nyra 'kɩɩɩ 'klɩ faa, wiili 'a jrea' 'amä 'iin 'lɩsa. 10 ‑Maa abɩa 'mʋfagogo 'sara ‑kätɩ ‑tʋtʋ ‑gälɩa ‑glügbüa 'fɩɔa 'mlɩ. 11 'Taɩn 'lɩ 'ümäa' 'amɩ 'sakalɩ fa nɩ, 'ana plɛ 'nyɩ ‑taaralɩ wiili 'a nëmäa' 'pa, 'ia ‑gʋ; ‑maa 'ia ‑srɩ 'lɩ nɩ, 'ba 'salɩ wiili nëmäa' 'ana 'wlia 'mlɩ ji. ‑Mää 'ana 'mʋgbɛ ‑nëmä 'iin 'pa, ‑maa 'Nyüna ‑Susu nëmä 'iin 'pa. 12 ‑Wlajʋ nya ‑wlajʋ ‑moloo jäjä mlɩ 'saraa, tʋ nya 'ɔa 'jʋ 'saa; 'jü nyra 'üa tʋɩɩ nya 'wlitotroa, 'kä 'ünya 'üün 'bla†. 13 Nyüüa 'fɩɔ nëmä 'amɩ 'nyüamlɩjraa 'na 'nyrɩa ‑gʋ; ‑maa nyɔɔlɔ ‑nëmäa' 'iin 'klɩfɔlɔ, ɔmäa' 'ia bɩarafa 'wʋ 'tɔ nɩ, 'ɔnya 'lɩmlɩwʋa.»
Nyɔsʋaa jraradɛɛ
14 «‑Srɩ 'lɩ 'a 'jäa' Nyɔsʋa jraradɛɛ, dɛɛlɛ kä ‑gä nyɔsʋaamlɩpalanyɔɔ Daniɛɛlë 'pa käa'†, ɛma pa ‑plɩɩ 'ɛ ‑nëmäa' kʋ nɩ, abɩa nyɔɔlɔ ‑täsäa' 'nu! ‑Mülü 'mäa' Judee bä 'ia ‑srɩ 'lɩ nɩ, ü fɔlɔ 'dʋgbë 'lɩ. 15 ‑Mɔlɔ nëmäa' nyuku ‑gälɩ bä, 'ɔnyɩ 'cie, 'ɔnyɩ mi dɛɛa 'klɛɛ nyüköli. 16 ‑Mɔlɔ nëmäa' 'klʋɛɛ bä, 'ɔnyɩ 'blöö 'ɔnyɩ ji 'kotua 'klɛɛ. 17 'Ia ‑srɩ 'lɩ ‑nëmä nʋgblaŋlëgë nyra ü 'nyaaa' 'jü kälɩ ‑a 'nara. 18 'Ba bibie Nyɔsʋa 'i ‑pɩ 'lɩjrä sɩɔpataɩn 'lɩ. 19 'Ia jrüülüa 'mlɩ, ‑sʋɩlɩ nëmäa' 'lɩjrä, 'bala 'pläa 'käkolofa 'wʋ, 'taɩn 'lɩ kä 'mlɩ Nyɔsʋa nʋa' 'plä, 'ia 'samaa ‑sʋɩ ‑kaapɩɔ 'lɩjrä†, 'ɛ ‑ka ‑nëmä bɩa 'lɩ ‑a jrä 'plɔʋ. 20 'Pläkänyɔɔ ma 'nyɩ ɩ 'ia jrüülü 'klɩ ‑a 'bö, nyɔɔ 'doo ‑nëmä 'lɩmlɩ ‑a 'wʋ; ‑maa 'ɔa nyüülü 'ɔ 'baa' 'lɩ, 'üa ‑gʋ 'ɔ 'bö jrüü 'klɩ. 21 Nyɔɔ ma ‑gbala 'amɩ: ‹‑Tɛ 'Kriisë bä› 'aiɛ: ‹‑Pɩ 'ɔ bä› 'anyɩ 'dara 'iin wii. 22 'N 'paa' 'iin nɩ, ‑gbagblɛ 'kriisë nyra ‑gbagblɛ nyɔsʋaamlɩpalanyüü nya ‑srɩɩ 'lɩbäa; 'ünya ‑saragbi nyra plɛklɩkalawii nʋa, 'ünya 'nɩmɩ† nyüülü Nyɔsʋa 'baa' 'lɩ mlüü 'lɩpaa ima bä 'ia 'sa. 23 'Amɔlɔ nɩ, 'ba ‑tre 'ana nyüfë: 'n tɩ ‑srɩ dɛrɩ 'nyaa ‑gbala 'amɩ 'ia 'fɩɔ.
24 ‑Maa ‑sʋɩlɩ ma bɩa ‑taa jrüülüa 'mlɩ nɩ,
'jöjrüükpü nya 'jrʋa 'klɩ 'prɛrɛa,
‑seple ‑ka ‑nëmä 'ɛa plöplönyü ‑a 'klaa,
25 ‑särë nya cɛlɩ sɔsɔa 'kä 'ünya böblö;
'klülü kä 'fɩɔ bäa' cɛa 'mlɩ nya tɩtrɛa†.
26 'Ia 'taɩn 'lɩ, 'ünya Nyɔɔa 'Jʋ ‑gbru ‑gälɩ 'järäa ‑bɛ 'ɔnya ji, 'ɔ ‑bɛ 'ɔa 'klü nyra 'wliklɩa 'bʋabʋakʋ†. 27 'Kä 'ɔnya 'ɔa 'aanjëɩɩ jaa 'ümä 'ɔa nyüülü 'ɔ 'baa' 'lɩ, ü bäa' ‑tʋtʋa kotü mlɔɔ 'lɩ ‑gbapapla, sɔ ‑tʋtʋa 'käkolofa 'wʋ ‑a mi ‑a ‑tɔɔ cɛa blöröfa 'wʋ.»
‑Ëlerekʋ
28 «'Ba 'nu ‑tɔɔɔlʋ figietuu 'paaa' 'wli. 'Ua dawii ma bä 'jɩjarɛ, ‑bɛ 'napɩ 'jɩjarɛ ma ‑ga nɩ, 'a jre 'iin 'sɩrɩ 'ua tʋtʋ 'taɩn nyaa' 'lɩjrä. 29 'Asɩ 'ama 'jä 'ia wiili, ima jrälɩ nɩ, 'ba jresaa wiili nëmäa' 'tɔ ‑kanyɩ 'lɩdɛrɩ ‑a tʋŋlɔ, 'i bä nyukumla 'klɩ. 30 'Cɩcasa 'n ‑gbala 'amɩ, ‑taa nyüüglügbölä kʋa' ‑pɩa 'fɩɔ ‑nëmä bɩa ‑a bɩa 'kä 'ia 'fɩɔ nya 'lɩjrä. 31 Cɛ nyra ‑tʋtʋ nya ‑sia, ‑maa 'na mlɩa wii ‑nëmä ‑si ‑a ‑si 'plɔʋ.
32 «Dɛɛlɛ bäa' 'ia jrüü 'aiɛ 'ia 'taɩn nɩ, nyɔɔ 'nyɩ 'iin jre ‑a jre; 'aanjëlü bäa' cɛlɩ 'nyɩ 'iin jre ‑a jre, 'inya 'nyɩ bɩa 'Jʋ bä. Tʋa 'doo 'ɔɔ jre 'iin. 33 'Anyɩ 'mʋmɔ, 'ba bibie Nyɔsʋa†, 'be 'taɩn 'lɩ kä 'mlɩ 'imäa' 'lɩjrä 'anyɩ 'iin jre ‑a jre. 34 'Inya ‑beere 'sɩrɩ nyɔɔ möa' nyɔtugbabre, ‑bɛ 'ɔ tɩɛa' 'ɔa nyuku nyüülü ‑fɛɛɛrɛa' 'ua ‑wälɩ 'jrʋpa ‑gba; ‑bɛ 'ɔ sraraa' ‑mɔ 'ɔa 'jrʋpa, ‑bɛ 'ɔ ‑gbalaa' nyɔɔlɔ ‑glaaraa' ‑gböööa tatu ‑gba; 'ɔ 'nɩ 'mʋmɔ. 35 'A 'ia ‑gʋ 'anyɩ 'mʋmɔ, 'be 'taɩnlɩ kä 'mlɩ ‑gböööa tʋ 'mäa' ji 'anyɩ 'iin jre ‑a jre; ‑bɛ ‑gbiajrʋ 'lɩ 'ɔmä ji, ‑maa ‑srɩlɩtʋŋlʋwlaa, ‑ale 'taɩn 'lɩ sapë 'mäa' ‑gbe, ‑maa ‑suwla, 'anyɩ 'iin jre ‑a jre; 36 Abɩa ŋalɛ 'bla 'amɩ 'ɔ ‑pɩ 'amɩ ‑wälɩfu ‑bɛ 'ɔ ‑pɩ 'amɩ 'mʋmɔ 'lɩjrä. 37 Wiili 'n ‑gbalaa' 'amɩ, 'ana 'fɩɔ kä 'iin. 'A 'nɩ 'mʋmɔ.»