Jesua 'kpɛɛ 'ü pla
14
1 Jrüü 'sɔɔa 'mlɩ 'ünya 'Paakë nyra 'flɔɔlʋ kä 'mlɩ 'ünyɩ 'paa' levurëa ‑glɩsɩglɩsɩ 'jäa†. ‑Gbɔsapɛrɩnyüü kpakü nyra ‑dɔkpɩanyüü 'bata 'sɩrɩ 'ümä Jesu 'kpla yrʋsa 'ümä 'ɔɔn 'bla. 2 'Üa 'kpɔa ‑tɔrʋpɩɔ 'ü 'paa wii ɔ: «'I 'nɩ bä ‑glɩsɩglɩsɩa ‑srɩ 'lɩ, nyüü ‑pɩ 'crɛ ‑tʋ.»'Ŋlʋʋlɔ ‑gblɔɔa' Jesua 'wli ‑daŋlʋɩnɩ 'kä
3 Jesu bä ɩ Betanii 'jrʋklanyɔɔ Simɔɔa nyuku ‑wälɩ. Jesu jö ɩ dɛɛ, 'ŋlʋʋ 'doo nya pa, 'ɔa kälɩa alebatrëa† 'kpala jɔ, 'äa 'mlɩa 'tasɩrɩa 'naarëa† ‑daŋlʋɩnɩlɩ kä 'peru 'bʋaa'. 'Ɔ waa' 'kpalaläa 'mä 'klɩ nɩ, 'ɔnya ‑gbäträ 'iin Jesua 'wli 'kä. 4 'I käa' ‑gʋ ‑mülü bä ɩa' ‑plɩɩ 'crɛ 'wʋ nɩ; ‑wälɩ 'ü ‑ŋuŋlo: «Dɛplɛɛ kä ‑plɩɩ ‑daŋlʋɩnɩlɩa bʋblɔkʋ le? 5 A 'mrɛɛ amä 'iin 'peru 'pa deniea ‑glʋɩtää†, 'kä anya 'iin 'pʋablanyüü ‑nyɩ.» 'Ünya 'daa 'ŋlʋʋlɔ. 6 'Iibäa' Jesu nɩ: «'Ba sɔ 'ɔɔn ‑gba. Dɛplɛɛ kä ‑gʋ 'a ‑taara 'ɔɔn plɛ 'lɩ le? 'Mʋfagbi 'ɔ nʋ 'mɩ ‑gba. 7 'Pʋablanyüü bä 'ana ‑tɔrʋpɩɔ 'plɔʋplɔʋ†, 'taɩnlɩ kä 'mlɩ 'a ‑waa' 'anya 'üün ‑gbajia. ‑Maa 'mɔɔlɔ nɩ, 'nyɩ 'ana ‑tɔrʋpɩɔ ‑a bä 'plɔʋplɔʋa ‑gʋ. 8 Dɛɛlɛ 'ɔ 'mrɛɛa' mlɩ 'ɛɛ 'ɔ nʋ; ‑srɩ 'ɔ tɩ dɛrɩ 'ɔnya 'pa 'mɩ ‑daŋlʋɩnɩ 'na tʋtʋtaɩnlɩa ‑gʋ†. 9 'Cɩcasa 'n ‑gbala 'amɩ, ‑pɩɔ o ‑pɩɔ ‑taa 'mʋfagogolä 'mäa' 'sara 'pläa 'fɩɔa 'mlɩ nɩ, wiili 'ŋlʋʋlɔ nʋa', nyüü nya 'ia ‑gä 'paa ‑bɛ 'ünya 'ɔa ‑gä plɛ 'pa.»
10 Judaa Isëkario, Jesua nyüüpʋnyüüsɔɔa ‑tɔrʋpɩɔa nyɔɔ 'doo, nya ‑sɔ 'wʋ, 'ɔnya mi ‑gbɔsapɛrɩnyüü kpakü 'jä 'ɔmä Jesu 'sa. 11 Wiili 'ɔ jaa', 'i kä 'ümɩ dɔrɔ 'wʋ, 'ü ‑nëma 'ünya 'ɔɔn mölii ‑nyɩa. 'Bala 'lɩ ‑gälɩ 'sɩrɩ Judaa 'mäa' nʋ ‑bɛ 'ɔmäa' Jesu 'sa, 'ia 'nyʋfɔ 'ɔ 'bata.
Jesua ‑gälɩblörö 'Paakë
12 'Flɔɔlʋ kä 'mlɩ 'nyɩa' levurë bä, 'ua ‑glɩsɩglɩsɩa 'klɩsa jrüü 'lɩ nɩ, ibäa' 'Paakëa ‑bablëëjüa 'bablasrɩ nɩ, Jesua 'wʋnyɛrɛnyüü nya 'bete 'ɔɔn: «‑Pëplɛɛ ‑baata amä 'Paakëa jijri 'klɩkäsesre ‑bɛ ‑mä dɛɛji le?» 13 'Ɔnya blɔ 'ɔa 'wʋnyɛrɛnyüüa ‑tɔrʋpɩɔa nyüü 'sɔɔ, 'ɔnya ‑gbala 'üün: «'Ba mi bätä, nyɔɔ 'doo nya 'nɩ 'wlitroa; 'a nyra 'ɔɔn nya 'klɩtraraa. 'Ba ‑mɛ 'ɔɔn ‑gälɩ. 14 ‑Plɩɩlɩ 'ɔ nëmäa' pa, 'ba ‑gbala nyukukänyɔɔ ‑maa: ‹'Kpɩkpɩanyɔɔ 'bete: ‑Pëplɛɛ 'mɔɔ ‑bɛ 'na 'wʋnyɛrɛnyüü 'mäa' 'Paakë 'wʋ jrörö le?› 15 'Ɔnya 'amɩ nyëka klöö kpakö sraraa ‑nyɛɛ nyuku ‑gälɩ, 'äa ‑wälɩ diia 'fɩɔ 'sesre 'klɩ 'kä. 'A ‑nyɛɛ 'amä 'känyɩgla.» 16 'Ɔa 'wʋnyɛrɛnyüü nya mi bätäläa 'mlɩ, 'sɩrɩ 'ɔ ‑gbalaa' 'üün ‑tɛɛ, 'asɩ 'i nrörö. 'Ünya 'sesre 'Paakëa jijri 'kä.
17 ‑Gbiajrʋ mia' 'ɔɔ ‑bɛ nyüüpʋnyüüsɔɔ nya ji. 18 'Ü jö ɩ dɛɛ, Jesu ‑nëma: «'Cɩcasa 'n ‑gbala 'amɩ, 'ana ‑tɔrʋpɩɔa nyɔɔ 'doo, 'nyraa 'ɔɔn tara 'wʋ, 'ɔnya 'mɩ 'saa†.» 19 'Üa 'fɩɔ 'kpɔɔ ɔ, ‑moloo ma bälɩ: «'Mɔɔ ‑ale?» 20 'Ɔnya ‑gbala 'üün: «'Ana nyüüpʋnyüüsɔɔa ‑tɔrʋpɩɔa nyɔɔ 'doo bäsaa, nyɔɔlɔ 'nyraa 'ɔɔn paplaa' 'darʋ 'lɩtarapö 'lɩ. 21 Mö Nyɔɔa 'Jʋ mö, 'sɩrɩ 'i ‑jɩjraa' nyɔsʋapɔɔkʋ 'lɩ†. ‑Maa nyɔɔlɔ 'saa' 'ɔɔn, 'inya bʋbɔa 'ɔa ‑gʋ; 'i ‑si 'nanakʋ 'kä 'ünyɩ ‑gu ɩ 'ɔmɩ!»
22 'Ü ‑ka jö ɩ dɛɛ Jesu nya dɔrɔ 'flɔɔ 'wʋ; 'ɔ bɩaa' Nyɔsʋa 'tɛtrɛɛkʋ, 'ɔnya 'böblö 'uun ‑tɩa 'ɔnya ‑nyɩ 'ümɩ 'uun; 'ɔ ‑nëma: «'Ba dɔrɔ 'uun 'wʋ, 'ba ji 'uun†, 'na fugba bäsaa.» 23 'Ɔnya dɔrɔ ‑köwö 'wʋ, 'ɔ bɩaa' Nyɔsʋa 'tɛtrɛɛkʋ, 'ɔnya ‑nyɩ 'ümɩ 'uun, 'üa 'fɩɔ nya 'mla 'uun. 24 'Ɔnya ‑gbala 'üün: «'Na ‑toru bäsaa, kuö dëdräa† ‑toru, 'uu ‑gblɔɔkä nyüü 'kɔkɔmlɛa ‑gʋ. 25 'Cɩcasa 'n ‑gbala 'amɩ, 'n ‑ka ‑nëmä viinyënʋ† ‑a 'mla 'plɔʋ; ima 'nyɩ Nyɔsʋaa 'kamapläa 'mlɩ ‑a bä; 'a ‑nyɛɛ 'nya 'sɔɔwʋ 'uun 'mlala.» 26 'Ü bɩaa' 'Lɩbrɛrɛpɔɔkʋa† 'dʋ 'bɩbrɩkʋ nɩ, 'ünya mi Oliivëa 'dʋgba 'wli.
27 Jesu nya ‑gbala 'üün: «'Ana 'fɩɔ nya 'mɩ ‑gba 'kägbaa, 'i ‑jɩjra: ‹'Nyaa ‑bablëëgbanyɛrɛnyɔɔ 'blaa, 'kä ‑bablëë nya 'kägba ‑gba†.› 28 ‑Maa ama sɔ 'kuaabre nɩ, 'nyaa 'amɩ 'nyʋfɔ 'klɔɔtrʋ ‑taa Galileea ‑tʋtʋ ‑gälɩ.» 29 'Iibäa' Piɛɛrë nɩ: «‑Bakää 'üa 'fɩɔ 'nyɩ ‑gba ‑mɩ ‑gbakä, ‑mää 'mɔɔ ‑a.» 30 Jesu nya ‑gbala 'ɔɔn: «'Cɩcasa 'n ‑gbala ‑mɩ, ‑mɔlɔ nɩ, 'saarɩa ‑gbialä kʋa' ‑pɩ, sapɛ ‑nëmä ‑gbegbekʋa ‑gʋ 'sɔɔ ‑a ka, 'kä ‑nya 'mɩ 'klɩfɔlɔkʋa ‑gʋ tää ka.» 31 Piɛɛrë nya 'patä 'ɔ ‑nëmä: «‑Bakää 'ünya 'daa 'nyraa ‑mɔ 'sɔ 'ümä 'bla, 'nëmä ‑srɩɩ 'daa 'nyɩ ‑mɩ ‑a jre.» 'Üa 'fɩɔ nya 'pa watu 'doo.
Jesu bibriea' Nyɔsʋa Jesëmanee
32 'Ünya mi ‑pɩɔ 'doo, 'ii 'ü 'dara Jesëmanee†. 'Ɔnya ‑gbala 'ɔa 'wʋnyɛrɛnyüü: «'Ba kʋ ‑pɩ, 'mä mi, 'mä Nyɔsʋa bibie.» 33 'Ɔ nëmäa' mi 'ɔ fa Piɛɛrë, Jaakë nyra Jaan. 'Ɔa plɛ ‑taaralɩ dotro ‑bɛ 'ɔa 'koia 'fɩɔ 'jɔklɔ. 34 'Ɔnya ‑gbala 'üün: «'Na ‑susua 'kpɔkpɔɔkʋ nëmä 'mɩ 'bla; 'ba kʋ ‑pɩ, 'anyɩ 'mʋmɔ.» 35 'Ɔ mia' 'klɔɔtrʋ jie nɩ, 'ɔnya be 'ɔa nyufa ‑tʋtʋ 'wʋ, ‑bɛ 'ɔ bibie Nyɔsʋa ima 'wʋ 'iin 'klɩ, abɩa ‑taa 'taɩnlɩ tʋŋlɔlɩ 'ɔɔn dɛrɩ. 36 'Ɔ nɩnɩa: «Aba†, 'na Tʋ, ‑bɩa wiia 'fɩɔ mlɩ, tʋŋlɔ 'mɩ 'lɩ ‑taa ‑sʋɩa ‑köwölä dɛrɩ! 'Ia 'fɩɔlʋ nɩ, 'na ni 'nyɩ tɩɔ 'lɩ, abɩa ‑na ni tɩɔ 'lɩ.»
37 'Ɔnya 'blöö 'wʋnyɛrɛnyüüa ‑nyɛɛ dɛrɩ, 'ɔnya jrä 'üün 'mʋmʋ 'lɩ, 'ɔnya ‑gbala Piɛɛrë: «Simɔɔ, 'mʋmɔ 'mʋmɔ? ‑Nyɩ ‑kätɩ 'kä ‑a tɛ jie! 38 'Anyɩ 'mʋmɔ, 'ba bibie Nyɔsʋa 'a ‑pɩ ‑balʋ 'lɩ blö. Nyɔɔ 'klaa 'mʋfa bobowli, ‑maa 'ɔa fugba 'nyɩ 'klü ‑a kä.»
39 'Ɔnya 'patä 'ɔnya tʋŋlɔ 'lɩ 'üün dɛrɩ, 'ɔnya 'pa 'sɔɔwʋ watu 'doo, 'ɔnya bibie Nyɔsʋa. 40 'Ɔ mia' ji, 'ɔ jrä 'sɔɔwʋ 'üün 'mʋmɔ 'lɩ; 'üa 'nyü bäkälɩ. Wiili 'ü ‑ka 'mäa' 'ɔɔn ‑gbala 'ünyɩ 'iin jre ‑a jre.
41 Tääa ‑pɩɔ 'ɔ jia' 'ɔnya ‑gbala 'üün: «'A ‑ka 'mʋmɔ, ‑bɛ 'a ‑ka 'paa 'saa ‑fʋflʋ! 'Taɩn 'a 'lɩjrä, ‑jää, Nyɔɔa 'Jʋ, 'ɔ 'a ‑balʋnyüü kälɩ 'sara. 42 'Ba sɔ 'wʋ, amä mi! ‑Jää, nyɔɔlɔ 'saa' 'mɩ 'ɔa 'tɔtɔkʋ bɩa.»
'Ü 'kplaa' Jesu
43 'Ɔ ‑ka 'paa wii dotro ‑bɛ Judaa 'tɔ, nyüüpʋnyüüsɔɔa ‑tɔrʋpɩɔa nyɔɔ 'doo, 'ɔɔ ‑bɛ nyüü 'kɔkɔmlɛ, 'üa kälɩa ‑järë nyra tii. ‑Gbɔsapɛrɩnyüü kpakü nyra ‑dɔkpɩanyüü ‑bɛ juifënyüüa tagbü blɔ 'üün. 44 Nyɔɔlɔ 'saa' 'ɔɔn, ‑jäsɩ 'ɔ ‑gbala käa' 'üün nɩ: «Nyɔɔlɔ 'nëmäa' ka ‑gbere nɩ, 'a 'ɔɔ bäsaa. 'Ba 'kpla 'ɔɔn, 'ba fa 'ɔɔn, ‑maa 'ba ‑gäälä 'ɔɔn 'nyiöli.» 45 Judaalɔ 'tɔa' dotro nɩ ‑gba 'ɔ jijrö 'ɔɔn, 'ɔ ‑nëma: «Rabii†!» 'Ɔnya ‑gbere 'ɔɔn. 46 Nyüülü nya jijrö Jesu ‑gba, 'ünya 'kpla 'ɔɔn. 47 Ü kʋ ɩa' ‑plɩɩ, 'doo 'baa' 'lɩ 'ɔa ‑jɛrɛ, 'ɔnya 'kala ‑gbɔsapɛrɩnyɔɔ kpaköa bʋblɔnyɔɔ dɛɛ, 'ɔnya 'bölɩ 'ɔa 'nyaklu. 48 Jesu dɔrɔa' wii 'wʋ, 'ɔnya ‑gbala 'üün: «Dɛplɛɛ kä ‑gʋ 'a ji 'mɩ 'kpla, ‑bɛ 'a ja ‑järë nyra tii, ‑beere nyüü ji 'jejienyɔɔ 'kpla le? 49 'Maa bä 'ana ‑tɔrʋpɩɔ ‑srɩ o ‑srɩ; 'n 'kpɩara Nyɔsʋaanyuku kpaku ‑wälɩ, 'anyɩ 'mɩ ‑a 'kpla. ‑Maa nyɔsʋaawiili ‑jɩjraa' 'mä nrörö, 'ia ‑gʋ 'i bäsaa.» 50 'Ɔa 'wʋnyɛrɛnyüüa 'fɩɔ nya ‑gba 'ɔɔn ‑gbakä, 'ünya fɔfɔ†. 51 ‑Sëgbanyʋklɔ 'doo prɛ ɩ 'ɔɔn dɛrɩ, 'ɔa ‑gälɩa 'papadɔʋ. 'Ünya 'kpla 'ɔɔn, 52 ‑maa 'ɔnya ‑gba 'üün 'papadɔʋ kälɩ 'kä 'ɔa 'kpɔ nya fɔ.
'Ü faa' Jesu tropina 'lɩ
53 'Ünya fa Jesu ‑gbɔsapɛrɩnyɔɔ kpaköa ‑nyɛɛ; 'ii ‑gbɔsapɛrɩnyüüa 'fɩɔ, tagbü, nyra ‑dɔkpɩanyüüa 'fɩɔ trara. 54 Piɛɛrë tʋŋlɔlɩdɛrɩ ‑bɛ 'ɔ ‑mɛ 'ɔɔn ‑gälɩ, 'ɔnya pa ‑gbɔsapɛrɩnyɔɔ kpaköa ‑gböölia ‑glɔ 'lɩ. 'Ɔnya 'prɛrɛ nyüülü ‑fɛɛɛrɛa' 'lɩ 'jrʋpaa ‑tɔrʋpɩɔ 'ɔnya kʋwälɩ, ‑bɛ 'ɔ 'mlɔɔ kapu.
55 ‑Gbɔsapɛrɩnyüü kpakü nyra juifëa tropinanyüüa 'fɩɔ 'bata nyüülü nëmäa' Jesu wii ‑gälɩ ‑tʋ ‑bɛ 'ümäa' 'ɔɔn 'bla, ‑maa 'ünyɩ 'jä 'ia wii ‑a. 56 'Kɔkɔmlɛ ‑tätä 'ɔɔn ‑gbagblɛ ‑gälɩ, ‑maa 'üa 'papawii 'nyɩ bä dɛɛ 'dee ‑a†. 57 'Doorodoo nya ‑tʋ 'ɔɔn ‑gbagblɛ ‑gälɩ; 'ü ‑nëma: 58 «A 'nu, i ja 'ɔa mlɩ ‑maa: ‹'Nyaa Nyɔsʋaanyukulu kʋa' ‑pɩ u nyɔɔ 'paa' ‑gbloooa, 'kä 'nyaa ‑moloo 'pa jrüü tääa 'mlɩ, u nyɔɔ ‑nëmäa' 'pa†.› » 59 'Ünyɩ 'sɔɔwʋ 'ia nä waklööläa ‑gälɩ 'wli ‑a 'nönrö.
60 'Ia ‑gʋ ‑gbɔsapɛrɩnyɔɔ kpakö nya 'nyüglö ‑jria 'lɩ 'ɔnya 'bete Jesu: «‑Nëmä mɛ ‑a cɛ? ‑Asɩ ‑gba wiili 'ü 'saa' 'lɩa ‑gʋ le?» 61 Jesu 'nyɩ mɛ ‑a cɛ. ‑Gbɔsapɛrɩnyɔɔ kpakö nya 'patä 'ɔnya 'bete 'ɔɔn: «‑Mɔ bä 'Kriisë, Nyɔsʋalɔ 'palaa' 'nɩ, 'ɔa 'jʋ?» 62 'Iibäa' Jesu nɩ: «‑Yɛɛ, 'ɔɔ 'n bä. 'Anya Nyɔɔa 'Jʋ 'Klükä Nyɔsʋa 'dupa 'lɩ 'järäa, 'ɔnya cɛlɩa ‑gbru ‑gälɩ jaraa ‑bɛ 'ɔnya ji†.»
63 'Ia ‑gʋ ‑gbɔsapɛrɩnyɔɔ kpakö 'ŋlara 'ɔa 'mʋgbɛa 'koti, 'ɔ ‑nëma: «Wii 'plɛɛ a ‑ka 'bata le? 64 Bʋbɔwiili 'ɔ 'paa' Nyɔsʋaa ‑gʋ, 'a 'nu 'iin 'wli? ‑Asɩ 'a 'jää 'iin 'wʋ le?» 'Üa 'fɩɔ nɩnɩa 'ɔ bä jäjänyɔɔ; 'ɔ kä 'ɔmä jä†. 65 ‑Mölöö ‑gbagba 'ɔa 'klʋɩ ‑tatrii, ‑mölöö ‑gbreee 'ɔa 'wli dɔʋ 'kä, 'ü 'kakla 'ɔɔn ‑kɔtrë, 'kä 'ü 'bete 'ɔɔn: «Nyɔɔlɔ 'kalaa' ‑mɩ dɛɛ, ‑ga 'ɔɔn 'nyrʋ!» 'Jrʋpafɛnyüü nya dɔrʋ 'ɔɔn 'wʋ 'ünya 'papa 'ɔa 'nyakli 'lɩ 'kpë†.
Piɛɛrë nɩnɩa 'ɔnyɩ Jesu ‑a jre
66 Piɛɛrë bä ɩ ‑gböööa bei ‑wälɩ, ‑bɛ ‑gbɔsapɛrɩnyɔɔ kpaköa 'jrʋpafɛŋlʋʋ 'doo ji. 67 'Ɔ 'jäa' Piɛɛrë ‑bɛ 'ɔ 'mlɔɔa' nɩ, 'ɔnya be 'ɔɔn ‑fälɩ: «‑Na 'mʋgbɛ nyra Nasarɛɛtënyɔɔ Jesu ma 'nyɛɛ.» 68 'Ɔnya babla, 'ɔ ‑nëma: «'Nyɩ 'nu wiili ‑saaalɩ 'wli ‑a, 'nyɩ 'iin jre ‑a jre.» 'Ɔnya 'cie 'ɔnya mi ‑glɔa 'palafa 'wʋ. Sapɛ nya ‑gbe. 69 'Ŋlʋʋlɔ 'jäa' 'ɔɔn 'ɔnya 'patä 'ɔnya ‑gbala nyüülü bäa' ‑plɩɩ: «Nyɔɔlɔ kʋa' ‑plɩɩ bä 'lɩ 'mlɩ.» 70 'Ɔnya babla 'sɔɔwʋ. Fɩɩɩn, nyüülü bä ɩa' ‑plɩɩ nya ‑gbala 'sɔɔwʋ Piɛɛrë ‑maa: «‑Nya 'kasa 'lɩ 'mlɩ bäa, Galileenyɔɔ bä. ‑Na 'papawii ‑beere Galileenyɔɔ†.» 71 'Ɔ ‑nyɩ 'iin Nyɔsʋa, 'ɔnya 'sɔrɩ: «Nyɔɔlɔ kä ‑gä 'a 'paaa' 'nyɩ 'ɔɔn jre ‑a jre.» 72 ‑Bɛ dotro sapɛ ka ‑gbegbekʋa ‑gʋ 'sɔɔ. Piɛɛrë nya 'pa wiili Jesu ‑gbala käa' 'ɔɔn plɛ: «Sapɛ 'mä 'daa 'ɛmä 'sɔɔ ka 'ɛmä ‑gbe nɩ, ‑mɔlɔ ‑nya tää kaa 'kä ‑nya nyüü ‑gbala 'sɩrɩ ‑nyɩa' 'mɩ jre†.» 'Ɔ boboa' 'iin, 'ɔa 'dugu.