JESUA JÄJÄKƲ NYRA 'ƆA 'KUAABREA SƆSƆKƲ
26–28
Jesua 'kpɛɛlɛ 'ü plaa'
26
1 Jesu bɩaa' wiipapakʋ nɩ, 'ɔnya ‑gbala 'ɔa 'wʋnyɛrɛnyüü: 2 'Be a jre 'iin anya 'Paakë 'jäa jrüü 'sɔɔa 'mlɩ, 'a ‑plɩɩ 'ümä Nyɔɔa 'Jʋ 'saa 'kä 'ünya 'ɔɔn krʋa ‑gälɩ kolo.3 'Ii känyrɩ ‑gbɔsapɛrɩnyüü kpakü, nyra ‑dɔkpɩanyüü†, nyra tagbü nya trara ‑gbɔsapɛrɩnyɔɔ kpakölɔ 'üü 'daraa' Kaiifë, 'ɔa ‑gbööli. 4 'Ünya 'nönröwli 'ümä Jesu 'kpla yrʋsa ‑bɛ 'ümä 'ɔɔn 'bla. 5 'Ü ‑nëma: «Anyɩ kä ‑a kä amä 'iin nʋ ‑glɩsɩglɩsɩa ‑srɩ 'lɩ, nyüü ‑pɩ ‑gbata.»
'Ŋlʋʋlɔ ‑gblɔɔa' Jesua 'wli ‑daŋlʋɩnɩ 'kä
6 Jesu bä ɩ Betanii 'jrʋklanyɔɔ Simɔɔa nyuku ‑wälɩ. 7 Jesu jö ɩ dɛɛ, 'ŋlʋʋ 'doo nya pa, 'ɔa kälɩa alebatrëa† 'kpala, 'äa 'mlɩa ‑daŋlʋɩnɩlɩ kä 'peru 'bʋaa'. 'Ɔnya ‑gbäträ 'iin Jesua 'wli 'kä. 8 'Ɔa 'wʋnyɛrɛnyüü 'jäa' 'iin nɩ, 'i kä 'üün 'crɛ 'wʋ; 'ü ‑nëma: «Dɛplɛɛ kä ‑plɩɩ ‑daŋlʋɩnɩlɩa bʋblɔkʋ le? 9 ‑Taa daŋlʋɩnɩlɩ kä 'peru 'bʋa, ɔma ‑nyɩ amɩ 'iin anya 'iin 'peru 'paa 'kä anya 'pʋablanyüü ‑gbaji!» 10 ‑Maa Jesu jrea' 'iin, 'ɔnya ‑gbala 'üün: «Dɛplɛɛ kä ‑gʋ 'a ‑taara 'ŋlʋʋlɔ plɛ 'lɩ le? 'Mʋfagbi 'ɔ nʋ 'mɩ ‑gba. 11 'Be 'mɔɔlɔ nɩ, 'nyɩ 'ana ‑tɔrʋpɩɔ ‑a bä 'plɔʋplɔʋa ‑gʋ; ‑maa 'pʋablanyüü bä 'ana ‑tɔrʋpɩɔ 'plɔʋplɔʋ. 12 ‑Daŋlʋɩnɩlɩ 'ɔ ‑gbäträa' 'mɩ 'wli 'wʋ kä nɩ, 'na ‑tʋtʋtaɩn a ‑gʋ 'ɔ nʋ 'imɩ. 13 'Cɩcasa 'n ‑gbala 'amɩ, ‑pɩɔ o ‑pɩɔ ‑taa 'mʋfagogolä 'mäa' 'sara 'pläa 'fɩɔa 'mlɩ nɩ, wiili 'ŋlʋʋlɔ nʋa', nyüü nya 'ia ‑gä 'paa ‑bɛ 'ünya 'ɔa ‑gä plɛ 'pa.»
Judaa Isëkariolɔ ‑trɔɔrɔa' Jesu
14 'Ii ‑sia' nɩ, nyüüpʋnyüüsɔɔlüa ‑tɔrʋpɩɔa nyɔɔ 'doo 'ü 'daraa' Judaa Isëkario nya mi ‑gbɔsapɛrɩnyüü kpaküa ‑nyɛɛ. 15 'Ɔnya 'bete 'üün: «Ama 'sara 'amɩ Jesu kälɩ, dɛplɛɛ 'a nëmä 'mɩ ‑nyɩ le?» 'Ünya ‑nyɩ 'ɔɔn möliia ‑glʋ ‑bɛ ‑pʋ†. 16 'Bala 'lɩ ‑gälɩ 'sɩrɩ 'ɔmäa' nʋ ‑bɛ 'ɔmäa' Jesu 'sa, 'ia 'nyʋfɔ 'ɔ 'bata.
Jesu nyra 'ɔa 'wʋnyɛrɛnyüü 'järä 'Paakë ‑pɩɔ 'doo 'wʋ
17 'Flɔɔlʋ kä 'mlɩ 'nyɩa' levurë bä 'ua ‑glɩsɩglɩsɩa 'klɩsa jrüü 'lɩ nɩ, Jesua 'wʋnyɛrɛnyüü nya ji 'ɔɔn 'bete: «‑Pëplɛɛ ‑baata amä 'Paakëa jijri 'klɩkäsesre ‑bɛ ‑mä dɛɛji le?» 18 'Iibä 'ɔɔn nɩ: «'Ba mi bätälä kʋa' ‑pɩa 'mlɩ ‑taa nyɔɔlɔa ‑nyɛɛ, 'ba ‑gbala 'ɔɔn ‑maa: ‹'Kpɩkpɩanyɔɔ nɩnɩa: 'Na 'taɩn 'a 'lɩjijrö, ‑na ‑nyɛɛ 'nyraa 'na 'wʋnyɛrɛnyüü 'mä 'Paakë 'järä.› » 19 'Ünya nʋ wiili Jesu ‑gbalaa' 'üün; 'ünya 'sesre 'Paakëa jijri 'kä.
20 ‑Gbiajrʋ mia' 'ɔɔ ‑bɛ nyüüpʋnyüüsɔɔ nya 'kʋwälɩ 'ümä dɛɛji.
21 'A dɛɛ 'ü jö ɩ, Jesu ‑nëma: «'Cɩcasa 'n ‑gbala 'amɩ, 'ana ‑tɔrʋpɩɔa nyɔɔ 'doo nya 'mɩ 'saa.» 22 'Üa 'fɩɔ 'kpɔɔ ‑gböösa; ‑moloo ma bälɩ: «'Mɔɔ ‑ale, 'Pläkänyɔɔ?» 23 'Iibäa' Jesu nɩ: «Nyɔɔlɔ 'nyraa 'ɔɔn paplaa' 'darʋ 'lɩtarapö 'lɩ nɩ, 'a nyɔɔlɔ nëmäa' 'mɩ 'saa'. 24 Mö Nyɔɔa 'Jʋ mö, 'sɩrɩ 'i ‑jɩjraa' nyɔsʋapɔɔkʋ 'lɩ†. ‑Maa nyɔɔlɔ 'saa' 'ɔɔn, 'inya bʋbɔa 'ɔa ‑gʋ. 'I ‑si 'wʋ 'kä 'ünyɩ ‑gu ɩ 'ɔmɩ!» 25 Judaalɔ nëmäa' 'ɔɔn 'sa ‑nëma: «Rabii†, 'mɔɔ ‑ale?» 'Iibäa' Jesu: «‑Na mlɩ 'i ja.»
Jesua 'täpajijrɛ 'ɔ jia'
26 'Ü ‑ka jö ɩ dɛɛ Jesu nya dɔrɔ 'flɔɔ 'wʋ; 'ɔ bɩaa' Nyɔsʋa 'tɛtrɛɛkʋ, 'ɔnya 'böblö 'uun ‑tɩa 'ɔnya ‑nyɩ 'ümɩ 'uun; 'ɔ ‑nëma: «'Ba dɔrɔ 'uun 'wʋ, 'ba ji 'uun, 'na fugba bäsaa.» 27 'Ɔnya dɔrɔ ‑köwö 'wʋ, 'ɔ bɩaa' Nyɔsʋa 'tɛtrɛɛkʋ, 'ɔnya ‑nyɩ 'ümɩ 'uun; 'ɔ ‑nëma: «'Ana 'fɩɔ 'ba 'mla. 28 'Be 'na ‑toru bäsaa, kuö dëdräa† ‑toru, 'uu ‑gblɔɔkä nyüü 'kɔkɔmlɛa ‑gʋ, 'üa ‑balʋ 'mä cere. 29 'N ‑gbala 'amɩ, 'n ‑ka ‑nëmä viinyënʋ† ‑a 'mla 'plɔʋ ima 'nyɩ 'Na Tʋa 'kamapläa 'mlɩ ‑a bä; 'a ‑nyɛɛ 'nyraa 'amɔ 'mä 'sɔɔwʋ 'uun 'mlala.»
Piɛɛrë 'daaa' 'ɔnyɩ Jesu ‑a jre
30 'Ü bɩaa' 'Lɩbrɛrɛpɔɔkʋa 'dʋ 'bɩbrɩkʋ nɩ†, 'ünya mi Oliivëa 'dʋgba 'wli.
31 Jesu nya ‑gbala 'ɔa 'wʋnyɛrɛnyüü: «'Ana 'fɩɔ nya 'mɩ ‑gba 'kägbaa ‑taa ‑gbiaralä; 'i ‑jɩjra:
'Nyaa ‑bablëëgbanyɛrɛnyɔɔ 'blaa, 'kä
‑bablëëa 'fɩɔ nya 'kägba ‑gba†.
32 ‑Maa ama sɔ 'kuaabre nɩ, 'nyaa 'amɩ 'nyʋfɔ 'klɔɔtrʋ ‑taa Galileea ‑tʋtʋ ‑gälɩ.» 33 Piɛɛrë dɔrɔa' wii 'wʋ, 'ɔnya ‑gbala 'ɔɔn: «‑Bakää 'üa 'fɩɔ 'nyɩ ‑gba ‑mɩ ‑gbakä, 'mɔɔlɔ nɩ, 'nëmä 'iin nʋ ‑a nʋ 'plɔʋ!» 34 Jesu nya ‑gbala 'ɔɔn: «'Cɩcasa 'n ‑gbala ‑mɩ, ‑taa ‑gbialä nɩ, ‑nya tää kaa 'kä ‑nya 'daa ‑nyɩ 'mɩ ‑a jre 'fɩɔwʋ 'kä sapɛa ‑gbegbetaɩn nya 'lɩjrä.» 35 'Iibäa' Piɛɛrë nɩ: «‑Bakää ana 'sɔɔ nya 'wʋjärä nɩ, 'nëmä ‑srɩɩ 'daa 'nyɩ ‑mɩ ‑a jre.» 'Üa 'fɩɔ nya 'pawii 'doo.
Jesu bibiea' Nyɔsʋa Jesëmanee
36 'Ii ‑sia' nɩ, Jesu nyra 'ɔa 'wʋnyɛrɛnyüü nya 'tɔ ‑pɩɔ 'doo, 'ii 'ü 'dara Jesëmanee†, 'ɔnya ‑gbala 'ɔa 'wʋnyɛrɛnyüü: «'Ba kʋ ‑pɩ, ‑a mi ‑nyɛɛ 'mä Nyɔsʋa bibie.» 37 'Ɔ nëmäa' mi 'ɔ fa Piɛɛrë nyra Sebedeea nyɩbɛjü 'sɔɔ. 'A ‑plɩɩ 'ɔa plɛ 'bala 'lɩ ‑taarakʋ ‑bɛ 'ɔa 'koia 'fɩɔ 'jɔklɔ. 38 'Ɔnya ‑gbala 'üün: «'Na ‑susua 'kpɔkpɔɔkʋ nëmä 'mɩ 'bla; 'ba kʋ ‑pɩ 'a nyra 'mɔɔ anyɩ 'mʋmɔ.» 39 'Ɔ mia' 'klɔɔtrʋ jie nɩ, 'ɔnya be 'ɔa nyufa ‑tʋtʋ 'wʋ ‑bɛ 'ɔ bibie Nyɔsʋa: «'Na Tʋ, ima 'mrɛɛ, tʋŋlɔ 'mɩ 'lɩ ‑taa ‑sʋɩa ‑köwölä dɛrɩ! ‑Maa 'na ni 'nyɩ tɩɔ 'lɩ, abɩa ‑na ni tɩɔ 'lɩ!» 40 'Ɔnya 'blöö 'wʋnyɛrɛnyüüa ‑nyɛɛ dɛrɩ, 'ɔnya jrä 'üün 'mʋmɔ 'lɩ. 'Ɔnya ‑gbala Piɛɛrë: «'A nyra 'mɔɔ 'nyɩ 'kä ‑a tɛ kplokplo ‑gliii bʋɔ 'doo! 41 'Anyɩ 'mʋmɔ 'ba bibie Nyɔsʋa 'a ‑pɩ ‑balʋ 'lɩ blö. Nyɔɔ 'klaa 'mʋfa bobowli ‑maa 'ɔa fugba 'nyɩ 'klü ‑a kä.» 42 'Ɔ tʋŋlɔa' 'lɩ 'üün dɛrɩ 'sɔɔwʋ nɩ, 'ɔnya bibie Nyɔsʋa: «'Na Tʋ, ‑taa ‑sʋɩa ‑köwölä ma 'nyɩ 'mrɛɛ ‑a 'mrɛɛ 'ämä 'mɩ 'lɩdɛrɩtʋŋlɔ, ‑bɛ ama nya 'ään 'mla nɩ, abɩa wiili ‑baataa nrörö.» 43 'Ɔ mia' ji 'ɔ jrä 'sɔɔwʋ 'üün 'mʋmɔ 'lɩ; 'üa 'nyü bäkälɩ. 44 Jesu nya tɩ ‑plɩɩ 'üün 'ɔnya tʋŋlɔ 'lɩ 'üün dɛrɩ 'sɔɔwʋ. Tääfawʋ 'ɔnya bibie Nyɔsʋa; 'a waklüü 'doolü 'ɔ 'pa 'sɔɔwʋ. 45 'Ɔ 'blööa' ‑bɛ 'ɔ jia' 'wʋnyɛrɛnyüüa ‑gba nɩ, 'ɔ ‑nëma: «'A ‑ka 'mʋmɔ ‑bɛ 'a ‑ka 'paa 'saa ‑fʋflʋ! ‑Jää 'taɩn 'a 'lɩjrä, Nyɔɔa 'Jʋ 'a ‑balʋnyüü kälɩ 'sara. 46 'Ba sɔ 'wʋ amä mi! ‑Jää nyɔɔlɔ 'saa' 'mɩ 'ɔa 'tɔtɔkʋ bɩa.»
'Ü 'kplaa' Jesu
47 'Ɔ ‑ka 'paa wii dotro ‑bɛ Judaa 'tɔ, nyüüpʋnyüüsɔɔa ‑tɔrʋpɩɔa nyɔɔ 'doo, 'ɔɔ ‑bɛ nyüü 'kɔkɔmlɛ, 'üa kälɩa ‑järë nyra tii. ‑Gbɔsapɛrɩnyüü kpakü nyra juifënyüüa tagbü blɔ 'üün. 48 Nyɔɔlɔ 'saa' 'ɔɔn ‑gbala kä 'üün ‑maa: «Nyɔɔlɔ 'nëmäa' ka ‑gbere nɩ, 'a 'ɔɔ bäsaa. 'Ba 'kpla 'ɔɔn.» 49 Judaalɔ 'tɔa', 'ɔ jijröa' Jesu ‑gba dotro 'ɔ ‑nëmä: «Rabii† ‑ayoo!» 'Ɔnya ‑gbere 'ɔɔn. 50 Jesu nya ‑gbala 'ɔɔn: «'Na ‑bei, nʋ wiili kä ‑gʋ jia'!» Nyüülü nya jijrö Jesu ‑gba, 'ünya 'kpla 'ɔɔn.
51 Jesua 'wʋnyɛrɛnyüüa ‑tɔrʋpɩɔa nyɔɔ 'doo 'baa' 'lɩ 'ɔa ‑jɛrɛ 'ɔnya 'kala ‑gbɔsapɛrɩnyɔɔ kpaköa 'jrʋpafɛnyɔɔ dɛɛ, 'ɔnya 'bölɩ 'ɔa 'nyaklu. 52 Jesu nya ‑gbala 'ɔɔn: «Pla ‑na ‑jɛrɛ 'ɛa tugba 'lɩ; 'be nyɔɔ ‑flooroa' ‑jɛrɛ nɩ, ‑jɛrɛ nëmä 'ɔɔn 'bla! 53 ‑Nyɩ 'saa ‑a jre 'n 'mrɛɛ ‑a we 'na Tʋ ɔ ja 'aanjëa ‑glügbü ‑pʋ ‑bɛ 'sɔɔ†! 54 ‑Maa ama nʋ 'saa nɩ, ‑asɩ nyɔsʋaawiili ‑jɩjraa' 'mä nrörö le?»
55 Jesu nya ‑gbala ‑jria: «Dɛplɛɛ kä ‑gʋ 'a ji 'mɩ 'kpla, ‑bɛ 'a ja ‑järë nyra tii ‑beere nyüü ji 'jejienyɔɔ 'kpla le? 'Maa bä 'ana ‑tɔrʋpɩɔ ‑srɩ o ‑srɩ; 'n 'kpɩara Nyɔsʋaanyuku kpaku ‑wälɩ, 'anyɩ 'mɩ ‑a 'kpla. 56 ‑Maa nyɔsʋaawiili nyɔsʋaamlɩpalanyüü 'sa käa' 'lɩ 'mä nrörö, 'a 'ia ‑gʋ 'ia 'fɩɔ jrälɩ.»
'Ɔa 'wʋnyɛrɛnyüüa 'fɩɔ nya ‑gba 'ɔɔn ‑gbakä, 'ünya fɔfɔ.
'Ü faa' Jesu ‑gbɔsapɛrɩnyɔɔ kpaköa ‑nyɛɛ
57 Nyüülü 'kplaa' Jesu nya fa 'ɔɔn ‑gbɔsapɛrɩnyɔɔ kpakölɔ 'ü 'daraa' Kaiifëa ‑nyɛɛ; 'ii ‑dɔkpɩanyüü nyra tagbü trara. 58 Piɛɛrë ‑nɛpɛ ‑bɛ 'ɔ ‑mɛɛɛ Jesu ‑gälɩ, 'ɔnya pa ‑gbɔsapɛrɩnyɔɔ kpaköa ‑gböölia ‑glɔ 'lɩ. 'Ɔnya 'prɛrɛ nyüülü ‑fɛɛɛrɛa' 'lɩ 'jrʋpaa ‑tɔrʋpɩɔ 'ɔnya kʋwälɩ, 'ɔmä ‑plɩɩlɩ 'imäa' bɩara 'jä.
59 ‑Gbɔsapɛrɩnyüü kpakü† nyra juifëa tropinanyüüa 'fɩɔ 'bata wiili 'ümäa' Jesu ‑gälɩ ‑tʋ ‑bɛ 'ümäa' 'ɔɔn 'bla†. 60 ‑Maa 'ünyɩ 'jä 'ia wii ‑a, ‑bɛ nyüü 'kɔkɔmlɛ ‑tätä 'ɔɔn ‑gbagblɛ ‑gälɩ 'e! ‑Maa nyüü 'sɔɔ nya ji. 61 'Iibäa' nyüülü nɩ: «‑Taa nyɔɔlɔ ‑gbala nyüü ‑maa: 'N 'mrɛɛ 'mä Nyɔsʋaanyuku kpaku ‑gblooo, ‑bɛ 'mä 'uun 'pa jrüü tääa 'mlɩ.» 62 ‑Gbɔsapɛrɩnyɔɔ kpakö nya 'nyüglö 'ɔnya 'bete Jesu: «‑Nëmä mɛ ‑a cɛ? ‑Asɩ ‑gba wiili 'ü 'saa' 'lɩa ‑gʋ le?» 63 ‑Maa Jesu 'nyɩ mɛ ‑a cɛ. ‑Gbɔsapɛrɩnyɔɔ kpakö nya 'patä 'ɔnya 'bete 'ɔɔn: «'Lɩbä Nyɔsʋaa 'nyrɩklɩa ‑gʋ, ‑gbala 'mɩ! ‑Mɔ bä 'Kriisë, Nyɔsʋaa 'Jʋ?» 64 'Iibäa' Jesu: «‑Na mlɩ 'i ja. ‑Maa 'cɩcasa 'n ‑gbala 'amɩ, 'bala 'saarɩ ‑gälɩ 'anya *Nyɔɔa 'Jʋ 'Klükä Nyɔsʋa 'dupa 'lɩ 'järäa†, 'ɔnya cɛlɩa ‑gbru ‑gälɩ jaraa ‑bɛ 'ɔnya ji†.» 65 'Ia ‑gʋ ‑gbɔsapɛrɩnyɔɔ kpakö 'ŋlara 'ɔa 'mʋgbɛa 'koti, 'ɔ ‑nëma: «'Ɔ 'a Nyɔsʋa ‑jreee! Wii 'plɛɛ a ‑ka 'bata le? Bʋbɔwiili 'ɔ 'paa' Nyɔsʋaa ‑gʋ, 'a 'nu 'iin 'wli. 66 ‑Asɩ 'a 'jää 'iin 'wʋ le?» 'Üa 'fɩɔ nɩnɩa: «'Ɔ kä 'ɔmä jä!»
67 ‑Mölöö ‑gbagba 'ɔa 'klʋɩ ‑tatrii, ‑bɛ 'ü kakla 'ɔɔn ‑kɔtrë. ‑Mölöö 'papa 'ɔa ‑glagbi ‑gba 'kpë 68 ‑bɛ 'ü nö: «'Kriisë ‑o, nyɔɔlɔ 'kalaa' ‑mɩ dɛɛ, ‑ga 'ɔɔn 'nyrʋ!»
Piɛɛrë babla 'klaa 'sɔɔwʋ
69 Piɛɛrë kʋ ɩ ‑wälɩ ‑fälɩ ‑gbööli, 'jrʋpafɛŋlʋʋ 'doo nya jijrö 'ɔɔn ‑gba 'ɔ ‑nëma: «‑Na 'mʋgbɛ nyra Galileenyɔɔ Jesu ma 'nyɛɛ 'la?» 70 ‑Maa 'ɔnya babla nyüüa 'fɩɔa 'klɩ 'ɔ ‑nëma: «Wiili ‑daaa' 'nyɩ 'iin jre ‑a jre.» 71 'Ɔnya 'cie 'ɔnya mi ‑gböööa 'cerefa 'wʋ. 'Jrʋpafɛŋlʋʋ ‑moloo nya 'jä 'ɔɔn, 'ɔnya ‑gbala nyüülü bäa' ‑plɩɩ ‑maa: «Nyɔɔlɔ kʋa' ‑pɩ nyra Nasarɛɛtënyɔɔ Jesu ma 'nyɛɛ.» 72 'Ɔnya 'sɔrɩ 'ɔnya babla 'sɔɔwʋ; 'ɔ ‑nëma: «'Nyɩ ‑taa nyɔɔlɔ ‑a jre!» 73 Fɩɩɩn, nyüülü bä ɩa' ‑plɩɩ nya jijrö Piɛɛrë ‑gba 'ünya ‑gbala 'ɔɔn: «‑Nya 'kasa 'ɔa nyɔɔ bäa; ‑na 'papawii ‑beere Galileenyɔɔ.» 74 Piɛɛrë ‑nyɩ 'iin Nyɔsʋa 'ɔnya 'sɔrɩ ‑bɛ 'ɔ ‑tapla 'ɔa nyufa: «Nyɔɔlɔ kä ‑gä 'a 'paaa' 'nyɩ 'ɔɔn jre ‑a jre.» 'Ɔ ‑ka babla dotro ‑bɛ sapɛ ‑gbe.
75 Piɛɛrë nya 'pa wiili Jesu ‑gbala käa' 'ɔɔn plɛ: «'Cɩcasa 'n ‑gbala ‑mɩ, ‑taa ‑gbiaralä nɩ, ‑nya tää kaa 'kä ‑nya 'daa ‑nyɩ 'mɩ ‑a jre 'fɩɔwʋ 'kä sapɛa ‑gbegbetaɩn nya 'lɩjrä.» 'Ɔnya 'cie 'ɔnya 'wu ‑gböösa.