'Ü faa' Jesu Pilatëa ‑nyɛɛ
27
1 ‑Suwla ‑ŋʋɩsɩɩ ‑gbɔsapɛrɩnyüü kpakü nyra juifënyüüa tagbüa 'fɩɔ nya 'plasraa 'sɩrɩ 'ümä Jesu 'bla. 2 'Ü kpasaa' 'ɔɔn nɩ, 'ünya fa 'ɔɔn 'ünya ‑nyɩ 'ɔɔn ‑gʋmla kpakö Pɔɔsë† Pilatë kälɩ.Judaa 'blaa' 'ɔa nyufa
3 Judaalɔ 'saa' Jesu, 'nua' 'sɩrɩ 'ü 'paa 'ɔɔn 'bablajie 'lɩ nɩ, 'ii 'pa 'ɔɔn ‑gba. 'Ɔnya 'blöö ‑gbɔsapɛrɩnyüü kpakü nyra juifëa tagbü möliili bei 'wʋ dɛrɩ. 4 'Ɔnya ‑gbala 'üün ‑maa: «‑Balʋ 'n nʋ, 'nyaa 'sara nyɔɔlɔ 'nyɩa' dɛɛ nʋ jäjä kälɩ!» 'Iibäa' nyüülü nɩ: «‑Mää ana ‑gbʋʋ ‑a. ‑Na wii bäsaa!» 5 Judaa nya be möliili Nyɔsʋaanyuku kpaku ‑wälɩ 'ɔnya 'cie; 'ɔnya mi 'ɔa nyufa 'bʋblʋ 'pa.
6 ‑Gbɔsapɛrɩnyüü kpakü nya dɔdrɔ mölii 'wʋ 'ü ‑nëma: «Anyɩ 'mrɛɛ ‑a 'mrɛɛ amä 'iin Nyɔsʋaanyuku kpakua mölii 'cakla, 'be ‑torua mölii bäsaa.» 7 'Ü 'nönröa' 'wli nɩ, 'ünya nʋ möliili 'ünya ‑su putulu 'ü 'daraa' Bëtëmanyɔɔa Putu 'ümä 'lɩ nyɔtugbanyüü ‑träärä. 8 'A 'ia ‑gʋ 'ü ‑ka 'dara 'saarɩ putulu: «‑Torua putu». 9 'Asɩ nyɔsʋaamlɩpalanyɔɔ Jeremiia mlɩa wii nʋ 'inya nrörö 'kasa; ‑jäsɩ 'ɔ ‑gba käa': «'Ü 'ba 'üa möliia 'mlɩ mölii ‑glʋ ‑bɛ ‑pʋ, 'iibä 'ɔa 'perulu Israɛɛlënyüü ‑nyɩa'. 10 'Ünya nʋ 'iin 'ünya ‑su Bëtëmanyɔɔa Putu. 'A wiili 'Pläkänyɔɔ 'daaa' ‑a 'saarɩ†.»
‑Gofɩanëmalɔ 'ü 'daraa' Pilatë 'bete Jesu
11 'Ünya ja Jesu ‑gofɩanëma kpakö Pilatëa 'klʋɩ, 'ɔnya 'bete 'ɔɔn: «Juifëa 'kɩɩ bä?» Jesu ‑nëma: «‑Na mlɩ 'i ja.» 12 'Ii ‑sia' ‑gbɔsapɛrɩnyüü kpakü nyra Juifëa tagbü ‑tʋa' 'ɔɔn ‑gbagblɛ ‑gälɩ; 'ɔnyɩ mɛ ‑a cɛ. 13 Pilatë nya 'bete 'ɔɔn: «Wii 'kɔkɔmlɛlɛ 'ü ‑tʋa' ‑mɩ ‑gälɩ nɩ, ‑nëmä mɛ ‑a cɛ?» 14 ‑Maa Jesu 'nyɩ 'nɩmɩ waklöö 'döö ‑a 'pa, 'inya kala ‑gʋmla kpakö plɛklɩ ‑gböösa.
‑Gäa 'böbökʋ
15 'Asɩ 'Paakëa ‑glɩsɩglɩsɩ jräa' 'lɩ nɩ, 'asɩ ‑gofɩanëma kpakö 'cɛrɛ ‑jienyɔɔ 'doo ‑wälɩ, ‑maa ɔ nyüüa 'fɩɔ ‑gaaa' 'nyrʋ. 16 ‑Bɛ 'ia 'taɩn 'lɩ nɩ, nyɔɔ 'doo bä ɩ ‑jie 'lɩ, 'ɔɔ 'ü 'dara Barabasë†; nyüüa 'fɩɔ jre 'ɔɔn 'ɔa bʋbɔgbia ‑gʋ. 17 Pilatë nya 'bete ‑jria: «Nyɔɔ 'plɛɛ 'a 'bata ‑a 'cɛrɛ ‑wälɩ le? Barabasë† ‑ale Jesulɔ 'ü 'daraa' 'Kriisë?» 18 'Be 'ɔ jre 'iin 'sɩrɩ 'ü 'saa' 'ɔɔn wasäsa.
19 'Ɔ ‑ka ‑tʋʋä ɩ ‑gä ‑bɛ 'ɔa 'ŋlʋʋ blɔ nyɔɔ 'doo, ɔ ji ɔ ‑gbala 'ɔɔn: «Nyɔɔlɔ kʋa' ‑pɩa ‑gʋ sanyülü 'n saa' sɩara 'mɩ 'saarɩ; 'ii känyrɩ ‑nyɩ blö 'ɔa wii 'lɩ, 'ɔnyɩ dɛɛ ‑a nʋ.»
20 ‑Maa ‑gbɔsapɛrɩnyüü kpakü nyra juifëa tagbü nya 'tuto ‑jriaa nyüü, ü 'daa ɔ 'cɛrɛ Barabasë ‑wälɩ ‑bɛ Jesu 'mä 'blara. 21 ‑Gofɩanëma kpakölɔ nya 'bete 'üün 'sɔɔwʋ: «‑Mɔ 'plɛɛ ‑a 'cɛrɛ ‑wälɩ ‑taa nyüü 'sɔɔlüa ‑tɔrʋpɩɔ le?» 'Ü ‑nëma: «Barabasë!» 22 Pilatë nya ‑gbala 'üün: «‑Bɛ ‑asɩ 'a 'bata ‑a nʋ Jesulɔ 'ü 'daraa' 'Kriisë le?» 'Üa 'fɩɔ ‑nëma: «Kolo 'ɔɔn krʋa ‑gälɩ!» 23 ‑Gofɩanëma kpakö nya 'bete 'üün: «Bʋbɔgbi 'plɛɛ 'ɔ nʋ le?» 'Ünya 'klere 'sɔɔwʋ 'wʋ, 'ünya ‑gbolomlɩ: «Kolo 'ɔɔn krʋa ‑gälɩ!»
24 Pilatë jrea' 'saa 'ɔnyɩ 'lɩ ‑a bɩa ɔ nʋ dɛɛ, ‑bɛ ‑jria nëmäa' 'lɩcakla nɩ, 'ɔnya dɔrɔ 'nɩ 'wʋ 'üa 'klʋɩ 'ɔnya su 'ɔa wlu. 'Ɔnya ‑gbala 'üün ‑maa: «'Klɩgänyɔɔlɔ kʋa' ‑pɩa ‑toru 'nyɩ 'na kälɩ ‑a bä. 'Ana wii 'i bä!» 25 ‑Jriaa 'fɩɔ ‑nëma: «Abɩa 'ɔa ‑toru bä ana wlu nyra ana 'jüa wlu ‑gba!» 26 Pilatë nya 'cɛrɛ Barabasë ‑wälɩ. 'Ɔnya ‑gbala 'ɔa nyüü ü bɔtɔ Jesu; 'ü bɩaa' 'ɔɔn ‑gbalɛfi ‑gälɩgbagbakʋ nɩ, 'ɔnya 'sa 'ɔɔn 'ümä 'ɔɔn krʋa ‑gälɩ kolo.
'Sʋgɩa srörö Jesu
27 ‑Gofɩanëma kpaköa 'sʋgɩa nya fa Jesu 'ünya pa ‑gofɩanëmaa ‑gbööli†, 'üü ‑bɛ 'üa ‑mölööa 'fɩɔ nya trara Jesu 'klɩ. 28 'Ünya 'balɩ 'ɔa 'koti, 'ünya 'pla 'ɔɔn ‑fɔflɔɔ ‑pana† 'lɩ. 29 'Ünya da 'kɩɩ ‑tapa wlugböa nänëa nä 'ünya ‑tʋ 'ɔmɩ 'ään 'wli. 'Ünya ‑nyɩ 'ɔɔn sɩsɛ 'ɔa 'dupa 'lɩ ‑beere 'kɩɩ. 'Ünya 'paa 'ɔa 'klɔɔtrʋ kotifli ‑bɛ 'ü nö: «Juifënyüüa 'kɩɩ ‑ayoo!» 30 'Ü 'papa 'ɔɔn ‑tatʋ 'wʋ 'kä 'ü 'sɛprɛ 'ɔa 'wli sɩsɛlɛ. 31 'Ü bɩaa' 'ɔɔn srörökʋ nɩ, 'ünya 'ba 'ɔɔn ‑panalä 'lɩ 'ünya 'sroo 'ɔɔn 'ɔa 'mʋgbɛa 'sosroodii, 'ünya fa 'ɔɔn 'ümä 'ɔɔn krʋa ‑gälɩ kolo.
Jesua krʋa ‑gälɩa kolokʋ
32 'Ü 'ciea' bätä nɩ, 'ünya 'jä Sirɛɛnëbätäa nyɔɔ 'doo 'ü 'daraa' Simɔɔ. 'Ünya kʋ 'ɔɔn 'klɩ 'ɔmä Jesua krʋa ‑gbötö.
33 'Ünya 'tɔ ‑pɩɔ 'doo 'ü 'daraa' Gɔlëgotaa; 'ia ‑gbaa bä «'wukapɛa ‑gba.» 34 'Ünya ‑nyɩ 'ɔɔn viinɛgrëlë 'ü 'caklaa' 'cɩcɛ kä dii 'ɔmä 'mla. ‑Maa 'ɔ 'jäa' 'iin mlɩ nɩ, 'ɔnyɩ 'mla ‑a 'mla.
35 'Ü bɩaa' 'ɔɔn krʋa ‑gälɩ kolokʋ, 'ünya 'pa ‑tɔɔo 'ümä 'ɔa 'koti ‑pä. 'Asɩ wiili nyɔsʋaamlɩpalanyɔɔ 'pa käa' 'mä nrörö. 'Ɔ nɩnɩa kä: «'Ü ‑päälä 'na 'koti 'lɩ, 'ünya 'pala 'na 'koti ‑tɔɔo ‑gälɩ†.» 36 'Ünya kʋwälɩ ‑bɛ 'ü ‑gäälä 'ɔɔn 'nyiöli.
37 'Ünya kolo 'ɔa 'wleli tuu 'pɛlɛ kä ‑gälɩ 'ü ‑jɩjraa' wiili kä ‑gʋ 'ü 'pɔnɩa' 'ɔɔn. 'Ü ‑jɩjra 'lɩ: «Nyɔɔlɔ kʋa' ‑pɩ bä Jesu, Juifënyüüa 'Kɩɩ.»
38 'Ünya kolo bɩa Jesua ‑gba 'jejienyüü 'sɔɔ; 'doo bä 'ɔa 'dupa 'lɩ, 'doo nya bä 'ɔa kʋmla 'lɩ.
39 ‑Sisinyüü ‑gbata 'wli ‑bɛ 'ü ‑jejre 'ɔɔn 40 ‑bɛ 'ü nö: «‑Mɔ ‑gbloooa' Nyɔsʋaanyuku kpaku ‑bɛ ɔ 'paa' 'uun jrüü tääa 'mlɩ nɩ†, ‑ama bä Nyɔsʋaa 'Jʋ nɩ, 'balɩ ‑na nyufa mlɩ, 'kä ‑ciie krʋa ‑gälɩ!»
41 'Asɩ ‑gbɔsapɛrɩnyüü kpakü, ‑dɔkpɩanyüü nyra juifënyüüa tagbü nö bɩa ‑bɛ 'ü srörö 'ɔɔn, ‑bɛ 'ü nö: 42 «'Ɔ 'pʋɔ nyüü ‑mölöö, ‑maa 'ɔa nyufa 'ɔnyɩ 'lɩbɩa 'ɔmä 'pʋɔ! Israɛɛlëa 'kɩɩ 'ɔ bä, ɔ 'cie krʋa ‑gälɩ ‑bɛ amä 'ɔɔn plɛtoro! 43 'Ɔ ‑nyɩ 'ɔa nyufa Nyɔsʋa kälɩ, abɩa Nyɔsʋa 'balɩ 'ɔɔn mlɩ ɔma ‑wa 'ɔɔn! 'Be 'ɔɔ ma nö: ‹'Mɔɔ bä Nyɔsʋaa 'Jʋ.› »
44 'Jejienyüülü 'ü koloa' 'ɔa ‑gbaa 'mʋgbɛ nya nʋ 'saa 'ünya ‑jejre 'ɔɔn bɩa.
Jesua jäjäkʋ
45 ‑Sopuwlaa nɩ, 'jöjrüükpü nya pala 'ia 'blɩlɩa 'fɩɔ ‑gälɩ palapalaa ‑gbiajrʋa ‑gliiibei tää†. 46 ‑Gbiajrʋa ‑gliiibei tääa' dii 'lɩ nɩ, Jesu nya 'kpö ‑gböösa 'ɔ ‑nëma:
«Eli, Eli lama sabakëtani?»
'Ia ‑gbaa bä: «'Na Nyɔsʋa, 'na Nyɔsʋa, dɛplɛɛ kä ‑gʋ ‑sɔ 'mɩ dɛrɩ le?» 47 Nyüülü bä ɩa' ‑plɩɩa ‑tɔrʋpɩɔa 'doorodoo 'nua' wiili 'ɔ 'paa' 'wli ‑nëma: «Elii† 'ɔ we!» 48 'Köklesa 'üa ‑tɔrʋpɩɔa 'doo nya fɔ 'ɔnya 'ŋʋa dapɛ† viinɛgrë dɛrɩ, 'ɔnya kpasra 'ɛɛn tuu 'klɩ, 'ɔnya ‑nyɩ 'ɛɛn Jesu 'ɔmä 'mla. 49 ‑Maa ‑mölöö ‑nëma: «'Nyüglö amä 'iin 'jä, Elii ma nya 'ɔɔn 'lɩmlɩbakalɩ ji!» 50 Jesu nya 'kpö 'sɔɔwʋ ‑gböösa 'ɔnya 'balɩ ‑fʋflʋ.
51 'A ‑plɩɩ dɔʋlʋ pösö ɩa'† Nyɔsʋaanyuku kpaku ‑wälɩ ‑gaalalɩ ‑plou, kolo 'ua 'wlugba 'kä ‑a ‑tɔɔ 'lɩ ‑wälɩ. ‑Tʋtʋ tɩtrɛ, 'täkë ‑gaglalɩ. 52 'Dasi ‑jejrioklɩ nyɔsʋaanyünanyüü 'kɔkɔmlɛlü jäa' nya sɔ 'kuaabre. 53 'Ü sɔa' 'kuaabre, 'ünya pa 'nyünabätä Jerusalɛɛmëa 'mlɩ, 'taɩn 'lɩ Jesu sɔa' 'kuaabre 'ünya srara 'üa nyüfë nyüü 'kɔkɔmlɛ.
54 'Sʋgɩakamanyɔɔ nyra ‑mülü ‑glaara ɩa' Jesu ‑gälɩ 'jäa' ‑tʋtʋa tɩtrɛdɛɛ nyra wiilia 'fɩɔ ‑sia' nɩ, ŋalɛ nya 'blaa 'üün ‑gböösa. 'Ü ‑nëma: «Nyɔɔlɔ kʋa' ‑pɩ bä ɩ 'kasa Nyɔsʋaa 'Jʋ!»
Jesua ‑tʋtʋkʋ
55 'Ŋlëgë 'kɔkɔmlɛ bä ɩ 'lɩ, 'ü tʋŋlɔlɩdɛrɩ ‑bɛ 'ü ‑pʋpɔ. 'A 'ŋlëgëlü ma jaraa' Jesu, ü ma käläa' 'ɔa wii ‑gba 'bala Galilee. 56 'Üa ‑tɔrʋpɩɔ bä Magëdalayria Marii, Mariilɔ ‑gua' Jaakë ‑bɛ Josɛɛsë, nyra Sebedeea 'jüa 'yio.
57 ‑Gbiajrʋ mia' nɩ, Arimatëbätäa 'bɩɔjinyɔɔ 'doo 'ü 'daraa' Josɛɛfë nya ji. 'Ɔa 'mʋgbɛlɔ 'ɔ bä Jesua 'wʋnyɛrɛnyɔɔ. 58 'Ɔnya mi Pilatë 'jä, 'ɔmä 'ɔɔn Jesua jäjäa nɔ ‑nyɩ. Pilatë nya 'nyie ü ‑nyɩ 'ɔmɩ 'ɔɔn. 59 Josɛɛfë nya dɔrɔ Jesua jäjäa nɔ 'wʋ, 'ɔnya ‑fifra 'ɔɔn 'cɩcrɛɛ dëdrä. 60 'Ɔnya 'pie 'ɔɔn 'kuyu dëdrä 'lɩ, u 'ɔ 'kɔtɔa' 'täkä kpaköa 'mlɩ. 'Ɔnya nʋ 'täkä kpakö 'ɔnya kpa 'uun 'klɩ, 'ɔnya mi. 61 Magëdalayria Marii nyra Marii ‑mɔlɔ bä ɩ ‑plɩɩ, 'ü kʋ 'kuyulua 'mäklɩ.
'Kuyua ‑gälɩ ‑glaarakʋ
62 'Ia ‑srɩ paa' nɩ, ‑srɩlɩ bäa' 'ünya ‑pɩ ‑fʋflʋpasrɩ ‑ëlerea' nɩ, ‑gbɔsapɛrɩnyüü kpakü nyra Farisinyüü nya trara Pilatëa ‑nyɛɛ. 63 'Ünya ‑gbala 'ɔɔn: «'Kamanyɔɔ, ‑taa ‑gbagblɛnyɔɔlɔ nɩ, 'taɩn 'lɩ 'ɔ ‑ka bä ɩa' 'lɩ nɩ, 'ɔ nɩnɩa kä: ‹Tääa në jrüüa ‑srɩlɩ 'nyaa 'kuaabre sɔa.› 64 'Ii känyrɩ, ‑gbala ‑na 'sʋgɩanyüü 'ümä 'kuyu ‑gbaglara ‑gböösa jrüü tääläa ‑srɩ 'lɩ 'ɔa 'wʋnyɛrɛnyüü ‑pɩ ‑gbiara† ji 'ü ‑pɩ 'ɔɔn 'jie ‑bɛ 'ü ‑pɩ nyüü ‑gbala ‑maa: ‹'Ɔ 'a 'kuaabre sɔ.› 'Ia nɛ ‑gbagblɛlɛ nya ‑kätɩa nɛ 'wʋsia.» 65 Pilatë nya ‑gbala 'üün: «‑Jää 'sʋgɩanyüü, 'ba mi! 'Ba ‑glara 'kuyu ‑gba 'sɩrɩ 'a 'bata.» 66 'Ünya mi 'kuyulu ‑gälɩglara. 'Ünya 'ma 'ua ‑gälɩ 'üa tie 'kä, 'ünya tɩ 'lɩ 'ua ‑gälɩglaaranyüü.