Jesu sɔa' 'kuaabre
28
1 ‑Fʋflʋpasrɩ ‑sia' nɩ, 'sɔrɛa ‑srɩkägbalawlaa Magëdalayria Marii nyra 'sɔɔa në Mariilɔ nya mi 'kuyulu 'jäkalɩ. 2 'Ia 'taɩn 'dooa 'mlɩ, ‑tʋtʋ nya tɩtrɛ ‑gböösa; Nyɔsʋaa 'aanjë nya 'sɔ cɛlɩ, 'änya ‑gbugble 'täkälä kʋ ɩa' 'kuyua 'mä 'klɩ; 'änya 'kʋ 'täkä ‑gälɩ. 3 'Aanjëlɔ ‑beere cɛa 'bɩbɩ, ‑bɛ 'ɔa 'koti 'pɔlɔ ‑gböösa ‑beere sɩɔa ‑gbru. 4 Ŋalɛ nya 'bla 'sʋgɩanyüülü 'ünya tɩtrɛ, 'ünya ma ‑beere jäjänyüü. 5 ‑Maa 'aanjë nya ‑gbala 'ŋlëgëlü ‑maa: «Ŋalɛ 'nyɩ 'bla 'amɩ. 'N jre 'iin 'sɩrɩ 'a 'bata Jesulɔ ɔ 'ü koloa' krʋa ‑gälɩ. 6 'Ɔnyɩ ‑tɛ ‑a bä; 'ɔ 'a 'kuaabre sɔ 'sɩrɩ 'ɔ ‑gbala käa' 'amɩ. 'Ba ji 'amä ‑plɩɩlɩ 'Pläkänyɔɔ † ma 'pi käa' 'jä. 7 'Ba 'sosowʋ 'ba mi, 'ba ‑gbala 'ɔa 'wʋnyɛrɛnyüü 'sɩrɩ 'ɔnya 'a 'kuaabre sɔ. 'Ɔ ‑taa 'amɩ 'nyʋfɔ 'klɔɔtrʋ Galilee. 'A ‑nyɛɛ 'amä 'ɔɔn 'järä. Wiili 'n käa' 'mäa' 'amɩ ‑gbala, ‑jää 'iin kʋ ‑pɩ.»8 'Ünya 'sosowʋ 'ünya 'cie 'kuyu 'lɩ. Ŋalɛ nyra dɔrʋ kpaku 'si 'üün 'klɩ ‑bɛ 'ü fɔ 'ümä 'ɔa 'wʋnyɛrɛnyüü ‑gbala. 9 ‑Maa, ‑jää Jesu 'tɔrɔa' 'üün 'klɩ, 'ɔ ‑nëma: «'N 'trɛɛ 'amɩ!» 'Ünya jijrö 'ɔɔn ‑gba, 'ünya 'kpla 'ɔa bei ‑bɛ 'ü ‑pʋpʋa 'ɔɔn. 10 'Iibäa' Jesu nɩ: «Ŋalɛ 'nyɩ 'blaa 'amɩ. 'Ba mi 'ba ‑gbala 'na ‑wlajüa ü ji Galileea 'bre. 'A ‑nyɛɛ 'ü nëmä 'mɩ 'järä.»
Wiili 'sʋgɩa 'saalɩ
11 'Ü ‑ka bä ɩ 'nyʋfɔ 'wʋ ‑bɛ 'sʋgɩanyüülüa ‑tɔrʋpɩɔa nyüü 'doorodoo nya ji bätä, 'ünya ‑gbala wiili kä 'fɩɔ jräa' 'lɩ 'lee ‑gbɔsapɛrɩnyüü kpakü. 12 ‑Gbɔsapɛrɩnyüü kpakü nyra juifëa tagbü nya trara. 'Ü 'nönröa' 'wli nɩ, 'ünya ‑nyɩ 'sʋgɩanyüülü mölii 'kɔkɔmlɛ, 13 'ünya ‑gbala 'üün ‑maa: «'Ba 'daa: ‹A 'mʋmɔ ɩ, 'ɔa 'wʋnyɛrɛnyüü nya ji ‑gbiara 'ünya 'jie 'ɔɔn.› » 14 ‑Gofɩanëma kpakö ma 'nu 'iin 'wli nɩ, a jre 'sɩrɩ amäa' 'ɔɔn ‑gbala 'a ‑pɩ wii 'jä. 15 'Sʋgɩanyüü nya dɔrɔ mölii 'wʋ 'ünya mi wiili 'ü 'daaa' nʋ. 'Asɩ wiili nʋ 'inya ‑gbaala juifënyüüa ‑tɔrʋpɩɔ nyra 'saarɩa 'mʋgbɛ 'kä.
Jesu blɔ 'ɔa 'wʋnyɛrɛnyüü 'ümä nyɔsʋaawii ‑pɩɔa 'fɩɔ 'pala
16 'Wʋnyɛrɛnyüü ‑pʋ ‑bɛ 'doolü nya mi Galileea 'dʋgbalä kä ‑tɔɔ Jesu 'pa käa' 'wli. 17 'Ü 'jäa' 'ɔɔn nɩ, 'ü ‑pʋpʋa 'ɔɔn ‑bɛ ‑mölööa plɛ 'nyɩ ‑sisia. 18 Jesu nya jijrö 'üün ‑gba 'ɔ ‑nëma: «Nyɔsʋa ‑nyɩ 'mɩ ‑tʋtʋ nyra cɛlɩa 'kama 'klüa 'fɩɔ. 19 'Ii känyrɩ, 'ba mi ‑tʋtʋ ‑gälɩa ‑glügbüa 'fɩɔa ‑nyɛɛ, 'ba nrörö 'üün 'na 'wʋnyɛrɛnyüü 'lɩ, 'ba 'pa 'üün 'nɩ 'wli Tʋa 'nyrɩklɩ, 'Jʋa 'nyrɩklɩ nyra 'Nyüna ‑Susua 'nyrɩklɩ, 20 'kä 'a 'kpɩa 'üün wiili kä 'fɩɔ 'n ‑gbala kä 'amɩ, 'ia 'lɩträäräkʋ. 'Mɔɔlɔ nɩ, 'ba jresaa 'n bä 'ana ‑tɔrʋpɩɔ sɔ 'saarɩ ‑gälɩ ‑a 'tɔ 'pläa bɩarafa 'wʋ. 'Asɩ i bä†!»