JESU SƆA' 'KUAABRE
24.1-12
Jesu sɔa' 'kuaabre
24
1 'Sɔrɛa ‑suwla ‑ŋʋɩsɩɩa 'jrʋfla ‑gölöfa 'wʋ 'ŋlëgëlü nyra 'ŋlëgë ‑mölöö† nya dɔrɔ 'nɔnʋpakpɩlɩ 'ü pia' 'wʋ, 'ünya mi 'kuyu 'lɩ. 2 'Ümä 'tɔkalɩ mi nɩ, 'täkälä bä ɩa' 'kuyulua 'mäklɩ 'a 'kousɔ. 3 'Ü paa' 'lɩ nɩ, 'ünyɩ 'lɩ 'Pläkänyɔɔ Jesua 'ku ‑a jrä. 4 'Ünyɩa' wiili ‑sröa' 'lɩa 'mlɩ 'wli 'nu nɩ, ‑jää 'üün nyüü 'sɔɔ 'tɔrɔklɩ. 'Kotili 'ü paa' 'lɩ plö. 5 Ŋalɛ nya 'bla 'ŋlëgëlü, 'ünya ‑ŋäwlikä. Nyüülü nya ‑gbala 'üün: «Dɛplɛɛ kä ‑gʋ 'a 'batra 'lɩbänyɔɔ jäjänyüüa ‑tɔrʋpɩɔ le? 6 'Ɔnyɩ ‑tɛ ‑a bä, 'ɔ 'a 'kuaabre sɔ! 'Ba 'pa wiili 'ɔ ‑gbala käa' 'amɩ plɛ 'taɩn 'lɩ 'ɔ bä käa' Galilee. 7 'Ɔ nɩnɩa kä: ‹'Ünya Nyɔɔa 'Jʋ ‑balʋnyüü kälɩ 'saraa, 'ümä 'ɔɔn krʋaa ‑gälɩ kolo, ‑bɛ jrüü tääa ‑srɩ 'lɩ 'ɔmä 'kuaabre sɔ†.› » 8 'Ünya 'pa plɛ 'sɩrɩ Jesu ‑gba käa' 'imɩ. 9 'Ü sɔa' 'dasi 'lɩ nɩ, 'ünya mi 'ünya 'saralɩ 'ia 'fɩɔ nyüü ‑pʋ ‑bɛ 'doo nyra 'ɔa 'wʋnyɛrɛnyüü ‑mölööa 'fɩɔ. 10 'Ŋlëgëlü 'jäa' wiili ‑bɛ 'ü 'saraa' 'lɩ 'iin apotrë nɩ, ‑jää: Magëdalayria Marii, Jaanë nyra Marii Jaakëa 'yio, nyra 'ŋlëgë ‑mülü 'ü nyra 'üün mia'. 11 ‑Maa apotrë 'nyɩ wiili 'ŋlëgëlü 'saalɩ wii 'wʋ ‑a 'ba, 'üa plɛ nɩnɩa sa kla 'üün. 12 ‑Maa Piɛɛrë nya sɔwʋ, 'ɔnya fɔ 'ɔnya mi 'kuyu 'lɩ. 'Ɔ ‑ŋäa' 'kä, deia 'kpɔ 'ɔ 'järä ‑tʋtʋ 'wʋ. 'Ɔa plɛklɩa 'fɩɔ kala, wiili jräa' 'lɩ 'ia ‑gʋ 'ɔnya 'blöö 'ɔa ‑nyɛɛ dɛrɩ.JESU SRARA 'ƆA NYUFA 'ƆA 'WƲNYƐRƐNYÜÜ 'KLƖ 'ƆNYA 'JRA CƐLƖ
24.13-53
Emausëa 'nyʋfɔ mlɩ
13 'A 'ia ‑srɩ 'dooa 'mlɩ, 'wʋnyɛrɛnyüüa ‑tɔrʋpɩɔa nyüü 'sɔɔ mö ɩ bätälä 'ü 'daraa' Emausë, 'äa 'mlɩ; kilomɛtrë ‑pʋ ‑bɛ 'deea 'samaa dɛɛ† bä 'ään ‑bɛ Jerusalɛɛmëa ‑tɔrʋpɩɔ. 14 Wiili kä 'fɩɔ ‑sia' 'ii 'ü 'paa ɩ ‑bɛ 'ü 'nyɛɛ. 15 'Ii 'ü ‑ka 'paa ɩ Jesua 'mʋgbɛ nya jijrö 'üün ‑gba, ‑bɛ 'ü 'nyɛrɛ 'wʋ 'ü mö. 16 ‑Maa 'üa 'nyü kala 'klɩ 'ü ‑pɩ 'ɔɔn jre. 17 'Ɔnya ‑gbala 'üün ‑maa: «Wii 'plɛɛ pala 'amɩ sɩɔ, i 'a dɛtɛ ‑bɛ 'a 'nyɛɛ le†?» 18 ‑Mɔlɔ 'ü 'daraa' Kleopasë nya 'bete 'ɔmɩ: «‑Na 'doo ‑mɔ bä ‑sisinyɔɔ Jerusalɛɛmë ɔnyɩ wiili ‑sröröa' 'lɩ ‑taa jrüülüa 'mlɩ jre?» 19 'Ɔnya 'bete 'üün: «Wii 'plɛɛ le?» 'Ü ‑nëma: «Nasarɛɛtënyɔɔ Jesua wii ɔ bä käa' nyɔsʋaamlɩpalanyɔɔ, Nyɔsʋaa 'klü bä käa' 'ɔa 'papawii nyra 'ɔa 'jrʋpaa 'mlɩ nyüüa 'klʋɩ. 20 ‑Gbɔsapɛrɩnyüü kpakü nyra ana 'wliklɩnyüü 'sa 'ɔmɩ 'ümä 'ɔɔn 'bla 'ümä 'ɔɔn krʋa ‑gälɩ kolo. 21 Amɔlɔ nɩ, a toro ɩ 'ɔɔn plɛ 'ɔmä ɩ 'lɩ Israɛɛlë mlɩba. ‑Bɛ 'sɔɔwʋ nɩ, 'ia 'fɩɔ nröröa' 'ia jrüü tää 'saarɩ. 22 'Ŋlëgëlü bäa' ana ‑tɔrʋpɩɔ, ‑mölöö nya kala amɩ plɛklɩ. ‑Suwla ‑ŋʋɩsɩɩ 'ü mia' 'kuyua 'mlɩ nɩ, 23 'ünyɩ 'lɩ 'ɔa 'ku ‑a jrä. 'Ünya ji 'ü ‑nëma 'aanjë ja 'üün wii 'nyü ‑gälɩ; 'ünya ‑gbala 'üün 'sɩrɩ 'ɔ bäa' 'lɩ. 24 Ana ‑tɔrʋpɩɔa nyüü ‑mölöö nya mi 'kuyu 'lɩ. 'Ü mia' nɩ, 'sɩrɩ 'ŋlëgëlü 'saalɩ nɩ, 'asɩ 'i bä. 'Ünyɩ 'ɔɔn 'jä ‑a 'jä.»
25 'Ɔnya ‑gbala 'üün: «Abɩa 'amɔ 'nyɩ 'lɩgla! Wiili kä 'fɩɔ nyɔsʋaamlɩpalanyüü 'paa' 'anyɩ 'iin plɛ ‑a toro. Abɩa 'ana 'nunukʋ klalɩ! 26 'Kriisëlɔ nɩ, 'ɔ ‑nëmä ɩ 'ia ‑sʋɛlɛ ‑a jä, ‑bɛ 'ɔmä 'ɔa 'wliklɩbʋabʋakʋa 'fɩɔ srara†?» 27 'Bala Moisëa ‑pɔɔkɩ ‑gälɩ ‑a mi nyɔsʋaamlɩpalanyüüa ‑pɔɔkɩa 'fɩɔ ‑gälɩ nɩ, wiili 'paaa' 'ɔa ‑gä nyɔsʋapɔɔkʋa 'fɩɔa 'mlɩ nɩ, 'ii 'ɔ srara 'üün.
28 'Ü 'tɔa' bätälä kä 'mlɩ 'ü mö ɩa' a ‑gba nɩ, Jesu nya nʋ 'sɩrɩ 'ɔ ‑sööa'. 29 ‑Maa 'ünya kʋ 'ɔɔn 'klɩ 'ünya bibie 'ɔɔn: «Pala ana ‑nyɛɛ, 'be ‑gbiajrʋ 'a mi ‑bɛ ‑gbia 'a ka ‑o.» 'Ɔnya pala 'üa ‑nyɛɛ. 30 'Ü bä ɩ 'töwlö ‑gälɩ 'ümä dɛɛji ɔ, 'ɔnya dɔrɔ 'flɔɔbö 'wʋ, 'ɔnya 'trɛɛ Nyɔsʋa; 'ɔnya 'böblö 'uun ‑tɩa, 'ɔnya ‑nyɩ 'ümɩ 'uun. 31 'Üa 'nyü nya ‑jieroklɩ, 'ünya ‑tʋ 'ɔɔn 'nyügba; ‑maa 'ɔnya sakla 'üün 'nyü ‑gälɩ. 32 'Ü ‑nëma 'üa 'kpɔa ‑tɔrʋpɩɔ: «'Ɔ ‑fɛɛɛ ana polu ‑gba 'taɩn 'lɩ 'ɔ dɛtrɛ ɩa' amɩ ‑gba 'nyʋfɔ 'wʋ, ‑bɛ 'ɔ ‑jiea' ana bobowli 'klɩ nyɔsʋaawiia 'pɛlɩ!» 33 'Wʋ 'ü sɔ dotro 'ünya mi Jerusalɛɛmë. 'Ü jrä ‑plɩɩ 'wʋnyɛrɛnyüü ‑pʋ ‑bɛ 'doo nyra 'wʋnyɛrɛnyüü nyra ‑mölöö prɛ ɩa' bɩa Jesu dɛrɩ. 'Üa 'fɩɔ trara, 34 ‑bɛ 'ü nö: «'Kasa, 'Pläkänyɔɔ 'a 'kuaabre sɔ. 'Ɔ srara 'ɔa nyufa Simɔɔ 'klɩ!» 35 Nyüü 'sɔɔlüa 'mʋgbɛ nya ‑gbala 'üün wiili jräa' 'üün ‑gälɩ 'nyʋfɔ mlɩ, ‑bɛ 'sɩrɩ 'ü ‑tʋa' 'ɔɔn 'nyügba 'taɩn 'lɩ 'ɔ ‑päa' 'flɔɔ.
Jesu sraraa' 'ɔa nyufa 'ɔa 'wʋnyɛrɛnyüü 'klɩ
36 'A wiili 'ü 'paa ɩ Jesua 'mʋgbɛ nya 'tɔrɔ 'üa ‑tɔrʋpɩɔ, 'ɔnya ‑gbala 'üün: «Abɩa 'ana plɛgälɩ flɛrɛ!» 37 'Üa ‑gälɩa 'ku fɔ, 'be 'üa plɛɛ jäjänyɔɔa ‑susu bäsaa. 38 'Ɔnya 'bete 'üün: «Dɛplɛɛ kä ‑gʋ 'ana polu 'caklalɩ le? Dɛplɛɛ kä ‑gʋ 'a bobo 'sama wii le? 39 'Ba 'jä 'na klʋgbë nyra 'na bei 'wʋ 'la; 'mɔɔ bäsaa! 'Ba ‑fɛ 'mɩ ‑gba 'amä 'iin 'jä. Jäjänyɔɔa ‑susu 'nyɩ 'jajɛ nyra 'koi ‑a kä, 'sɩrɩ 'a 'jääa' 'mɩ 'wʋ.» 40 'Ɔ nʋa' 'saa 'ɔ 'paa' wii nɩ, 'ɔnya srara 'üün 'ɔa klʋgbë nyra 'ɔa bei. 41 ‑Bɛ dɔrʋ nyra plɛklɩkalakʋa ‑gʋ 'ünyɩ 'daraa' 'iin wiia 'doo nɩ, 'ɔnya 'bete 'üün: «'A 'klaa jijrɛ?» 42 'Ünya ‑nyɩ 'ɔɔn drara ‑srea klöö nyra dʋgbakpɩa dete†. 43 'Ɔnya dɔrɔ 'iin 'wʋ, 'ɔnya jidɛɛ 'üa 'klʋɩ.
44 'Ɔnya ‑gbala 'üün: «'A 'ii 'n ‑gbala käa' 'amɩ 'taɩn 'lɩ 'n bä käa' 'ana ‑tɔrʋpɩɔ: wiili 'paaa' 'na ‑gä Moisëa ‑pɔɔkʋ 'lɩ, i 'paaa' 'na ‑gä nyɔsʋaamlɩpalanyüüa ‑pɔɔkɩ 'lɩ nyra Nyɔsʋaa 'lɩbrɛrɛpɔɔkʋa 'mlɩ nɩ, 'ia 'fɩɔ kä 'imä nrörö.» 45 'Ɔnya jie 'üa 'lɩgaglakʋ 'klɩ 'ümä nyɔsʋapɔɔkʋ 'wli 'nu, 46 'ɔnya ‑gbala 'üün: «'Asɩ 'i ‑jɩjra: 'Kriisë kä 'ɔmä ‑sʋɩ 'jä, ‑bɛ jrüü tääa ‑srɩ 'lɩ nɩ, 'ɔmä 'kuaabre sɔ†. 47 ‑Bɛ kolo Jerusalɛɛmë 'kä, 'ümä ‑tʋtʋ ‑gälɩa nyüüa 'fɩɔ ‑gbala ü torolɩ ‑balʋ ‑gälɩ, ‑bɛ Nyɔsʋa 'mä 'ümɩ 'uun cere. 48 Wiili 'a 'jäa' 'amä 'lɩ 'iin 'sa ‑pɩɔa 'fɩɔ. 49 ‑Bɛ 'mɔɔlɔ nɩ, 'mä 'amɩ dɛɛlɛ 'na Tʋ 'daaa' 'ɔmäa' 'amɩ ‑nyɩ. 'Ii känyrɩ 'ba kʋ Jerusalɛɛmë kʋ kʋ 'kä cɛlɩa 'klü 'cere 'amɩ ‑gälɩ†.»
Jesua cɛlɩa 'jajrakʋ
50 'Ɔnya 'cie 'üün bätä, 'ɔnya fa 'üün Betaniibätäa 'pɛ 'lɩ. 'Ɔnya jrara 'ɔa 'dari cɛlɩ 'ɔnya 'pa 'üün 'nɩ. 51 'Ɔ 'paa' 'üün 'nɩ, 'ɔnya sɔ 'üa ‑tɔrʋpɩɔ, 'ɔnya 'jra cɛlɩ†. 52 ‑Bɛ 'üülü nɩ, 'ü 'pala 'ɔa 'klɩ kotifli, 'ünya 'blöö Jerusalɛɛmë dɛrɩ; dɔrʋ 'si 'üün 'klɩ. 53 Nyɔsʋaanyuku kpaku ‑wälɩ 'ü kʋ, ‑bɛ 'ü 'bʋala Nyɔsʋa ‑srɩ ‑o ‑srɩ. 'Asɩ i bä.†