Jesua 'kpɛɛlɛ 'ü plaa'
22
1 'Flɔɔlʋ kä 'mlɩ 'ünyɩ 'paa' levurëa ‑glɩsɩglɩsɩ 'cicrewälɩ; 'ɛɛ 'ü 'dara bɩa 'Paakë†. 2 ‑Gbɔsapɛrɩnyüü kpakü nyra ‑dɔkpɩanyüü 'bata 'sɩrɩ 'ümä 'a nʋ ‑bɛ 'ümäa' Jesu 'kpla 'ümäa' 'ɔɔn 'bla, ‑maa ‑jria kä 'üün ŋalɛ 'wʋ. 3 Sataan nya 'cere Judaalɔ 'ü 'daraa' Isëkario ‑gälɩ, nyüüpʋnyüüsɔɔa ‑tɔrʋpɩɔa nyɔɔ 'ɔ bä. 4 'Ɔnya mi ‑gbɔsapɛrɩnyüü kpakü nyra nyüülü ‑glaaraa' Nyɔsʋaanyuku kpaku ‑gälɩa 'kamanyüü 'jä, 'ümä 'wli 'nönrö 'sɩrɩ 'ɔmäa' 'ümɩ Jesu kälɩ 'sara. 5 'I kä 'ümɩ dɔrɔ 'wʋ, 'ünya ‑gbala 'ɔɔn 'sɩrɩ 'ümäa' 'ɔɔn mölii ‑nyɩ. 6 'Ɔnya 'nyie. 'Bala 'lɩ ‑gälɩ 'sɩrɩ 'ɔmäa' nʋ ‑bɛ 'ɔmäa' ‑jria ‑mina 'nyügälɩ 'pa, ‑bɛ 'ɔmäa' Jesu 'sa, 'ia 'nyʋfɔ 'ɔ 'bata.'Paakëa ‑ëlerekʋ
7 'Flɔɔlʋ kä 'mlɩ 'nyɩa' levurë bä, 'ua ‑glɩsɩglɩsɩa ‑srɩ nya jrälɩ. ‑Srɩ 'lɩ kä 'mlɩ 'ümäa' 'Paakëa ‑bablëëjü 'bla nɩ†, 8 Jesu nya blɔ Piɛɛrë nyra Jaan, 'ɔnya ‑gbala 'üün ‑maa: «'Ba mi 'amä 'Paakëa jijri 'klɩkäsesre amä 'wʋtara.» 9 'Ünya 'bete 'ɔɔn: «‑Pëplɛɛ ‑baata amä 'iin 'klɩ 'käsesre?» 10 'Iibä: «'Ama mi bätä nɩ, 'a nyra nyɔɔ 'doo nya 'klɩtraraa, 'ɔ ‑gbötö 'nɩ bëtä 'lɩ. 'Ba ‑mɛ 'ɔɔn ‑gälɩ, 'kä 'a pa nyukulu kä ‑wälɩ 'ɔmäa' pa. 11 'Kä 'a ‑gbala nyukukänyɔɔ: ‹'Kpɩkpɩanyɔɔ 'bete: ‑Pëplɛɛ 'mɔɔ ‑bɛ 'na 'wʋnyɛrɛnyüü 'mäa' 'Paakë 'wʋ jrörö le?› 12 'Ɔnya 'amɩ nyëka klöö kpakö sraraa ‑nyɛɛ nyuku ‑gälɩ, diia 'fɩɔ bälɩ 'lee. 'A ‑nyɛɛ 'amä 'känyɩgla.» 13 'Ü 'tɔa' nɩ, 'sɩrɩ 'ɔ ‑gbalaa' 'üün ‑tɛɛ, 'asɩ 'i nrörö. 'Ünya 'sesre 'Paakëa jijri 'kä.
Jesua ‑gälɩblörö 'Paakë
14 'Taɩn jräa' 'lɩ ɔ nɩ, 'ɔnya kʋwälɩ 'ɔmä dɛɛji, 'ɔɔ ‑bɛ 'ɔa apotrë ‑pʋ ‑bɛ 'sɔɔlü†. 15 'Ɔnya ‑gbala 'üün: «'N ‑ka ‑glaaa ‑pɩɔ 'nyraa 'amɩ 'mä ‑taa 'Paakëa jijri ji 'fɩɔwʋ ‑bɛ 'mä ‑sʋɩ 'jä, 16 'be 'n ‑gbala 'amɩ: 'n ‑ka ‑nëmä 'ɛɛn ji ‑a ji 'plɔʋ ima 'nyɩ Nyɔsʋaa 'kamapläa 'mlɩ ‑a bä; ‑nyɛɛ 'lee nɩ, 'ɛnya 'ɛa ‑gbaa käa.» 17 'Ɔnya dɔrɔ ‑köwö 'wʋ, 'ɔ bɩaa' Nyɔsʋa 'tɛtrɛɛkʋ nɩ, 'ɔ ‑nëma: «'Ba blökälɩ, 'ba ‑sie 'uun 'ana ‑tɔrʋpɩɔ. 18 'N ‑gbala 'amɩ: 'n ‑ka ‑nëmä viinyënʋ ‑a 'mamla 'kä Nyɔsʋaa 'kamaplä nya ji.» 19 'Ɔnya dɔrɔ 'flɔɔ 'wʋ; 'ɔ bɩaa' Nyɔsʋa 'tɛtrɛɛkʋ, 'ɔnya 'böblö 'uun ‑tɩa 'ɔnya ‑nyɩ 'ümɩ 'uun; 'ɔ ‑nëma: «'Na fugba bäsaa, ä 'saraa' 'ana ‑gʋ. 'Ba nʋ 'imɩ 'amä 'na ‑gä plɛ 'pa.» 20 'Ü bɩaa' dɛɛjijikʋ nɩ, 'asɩ 'ɔ nʋ bɩa 'ɔnya dɔrɔ ‑köwö 'wʋ 'ɔ ‑nëma: «‑Taa ‑köwölä nɩ, 'ää bä kuö dëdrä 'palaa' 'na ‑toru 'lɩ; 'uu ‑gblɔɔkä 'ana ‑gʋ.
21 «‑Bɛ, nyɔɔlɔ 'saa' 'mɩ 'nyraa 'ɔɔn bä ‑pɩ 'töwlö ‑gälɩ. 22 Mö Nyɔɔa 'Jʋ mö. 'A ‑plɩɩ Nyɔsʋa ‑tʋ 'iin†. ‑Maa nyɔɔlɔ 'saa' 'ɔɔn, 'inya bʋbɔa 'ɔa ‑gʋ!» 23 ‑Bɛ 'ü ‑toplo 'lɩ, nyɔɔ 'plɛɛ bä 'üa ‑tɔrʋpɩɔ ɔ nëmä 'iin nʋ le.
24 'Ünya ‑toplo bɩa 'lɩ nyɔɔlɔ ‑sia' 'wʋ 'üa ‑tɔrʋpɩɔ. 25 Jesu nya ‑gbala 'üün: «‑Tʋtʋ ‑gälɩa 'kɩɩɩ nyra nyüülü bäa' nyüüa 'wli 'klɩ nö ‑gbi ‑beere nyüüa 'pläkänyüü ‑bɛ 'ü 'bata abɩa nyüü 'dara 'üün ‑gbajinyüü. 26 ‑Maa 'inyɩ bä 'ana ‑tɔrʋpɩɔ! Nyɔɔlɔ 'bata 'ɔmäa' 'ana ‑tɔrʋpɩɔa nyɔɔkpakü bä nɩ, ɔ bä 'ana blaaa nɔ; nyɔɔ 'bataa' 'kamakʋ 'ana ‑tɔrʋpɩɔ nɩ, ɔ bä 'ana 'fɩɔa 'jrʋpafɛnyɔɔ. 27 Nyɔɔ 'plɛɛ bä kpakö le? ‑Mɔlɔ bäa' 'töwlö ‑gälɩ, ‑maa ‑mɔlɔ ‑fɛɛɛa' 'jrʋpa? ‑Mää ‑mɔlɔ bäa' 'töwlö ‑gälɩ ‑a? ‑Maa 'mɔɔlɔ nɩ, 'n bä 'ana ‑tɔrʋpɩɔ ‑beere 'ana 'fɩɔa 'jrʋpafɛnyɔɔ. 28 'Amɔlɔ nɩ, 'anyɩ 'mɩ dɛrɩ ‑a sɔ 'na ‑sʋɩa 'taɩn 'lɩ. 29 'Ia ‑gʋ, 'n ‑nyɛɛ 'amɩ 'kamaplä, 'sɩrɩ 'na Tʋ nʋa' bɩa 'mɩ, 30 'kä 'amä 'na 'kamapläa 'mlɩ 'töwlö ‑gälɩ tara ‑bɛ 'amä 'lɩ 'mlara. 'Amä 'kɩɩkpatë ‑gälɩ kɔ kɔ, 'amä Israɛɛlëa ‑glügbü ‑pʋ ‑bɛ 'sɔɔa 'cifu bä.»
'Taɩn 'lɩ Jesu 'daaa' Piɛɛrë nya 'ɔɔn dɛrɩ sɔa
31 'Pläkänyɔɔ ‑nëma†: «Simɔɔ, Simɔɔ, ‑tre ‑na nyufa: Sataan 'a 'nyʋfɔ 'bete 'ɔmä 'amɩ 'kädögökalɩ ji ‑beere ‑bleee 'ü 'sasragba†. 32 ‑Maa 'n bibie ‑na 'wli 'lɩ, 'kä ‑na nyɔsʋaplɛtorokʋ ‑pɩ 'nyüglö. ‑Bɛ ‑ama blö nɩ, 'pa ‑na ‑wlajü 'klü 'lɩ.» 33 'Iibäa' Piɛɛrë nɩ: «'Pläkänyɔɔ, ‑bakää 'ünyɩ 'pa 'mɔɔ ‑bɛ ‑mɔ ‑jie 'lɩ, 'aiɛ ‑bakää 'ünyɩ 'bla ana 'sɔɔ, 'n 'nyie!» 34 'Iibäa' Jesu nɩ: «Piɛɛrë, 'n ‑gbala ‑mɩ: 'saarɩ, ‑kätɩ sapɛ ‑nëmä ‑gbe ‑a ‑gbe 'kä ‑nya 'daa ‑nyɩ 'mɩ ‑a jre 'wʋ tää 'wʋ.»
35 Jesu nya ‑gbala 'üün: «'Taɩn 'lɩ 'n blɔa' 'amɩ ‑bɛ 'n 'daaa' 'anyɩ fa mölii, 'anyɩ fa 'kotu, 'anyɩ fa 'sii nɩ, dɛɛ 'makɩ 'amɩ?» 'Ü ‑nëma: «'Woo, dɛɛ 'nyɩ amɩ ‑a 'makɩ.» 36 'Ɔnya ‑gbala 'üün: «‑Maa 'köklesaplɩɩ ɔ nɩ, ‑moloo ma 'klaa mölii nɩ, 'ɔ dɔrɔ 'iin 'wʋ; nyɔɔlɔ 'klaaa' bɩa sakɔsʋ nɩ, ɔ dɔrɔ 'uun 'wʋ; ‑moloo ma 'nyɩ ‑jɛrɛ ‑a 'klaa nɩ, 'ɔ 'pa 'ɔa 'kotu 'peru, 'ɔmä 'ɛɛn ‑su. 37 'Amɔ 'n ‑gbala, wiili ‑jɩjraa', i 'paaa' 'na ‑gä nɩ, 'i kä 'imä 'lɩjrä: ‹'Ü 'kpla 'ɔɔn ‑beere ‑balʋnyüüa ‑tɔrʋpɩɔa nyɔɔ†.› Wiili käläa' 'mɩ ‑gba kä 'imä nrörö.» 38 'Ü ‑nëma: «'Pläkänyɔɔ, ‑jää ‑järë 'sɔɔ.» 'Ɔnya ‑gbala 'üün: «'I 'a 'na!»
Jesu bibiea' Nyɔsʋa Jesëmanee
39 Jesu 'ciea' nɩ, 'ɔnya mi Oliivëa 'Dʋgba 'wli 'sɩrɩ 'ɔ nöa' a 'doo, 'ɔɔ ‑bɛ 'ɔa 'wʋnyɛrɛnyüü kɔsɔ. 40 'Ɔ 'tɔa' ‑plɩɩlɩ nɩ, 'ɔnya ‑gbala 'üün: «'Ba bibie Nyɔsʋa 'a ‑pɩ ‑balʋ 'lɩ blö.» 41 'Ɔnya tʋŋlɔlɩ 'üün dɛrɩ 'mɛtrë ‑glʋ ‑bɛ ‑pʋa 'samaa dɛɛ, 'ɔnya 'pakotifli ‑bɛ 'ɔ bibie Nyɔsʋa, 42 ‑maa: «'Na Tʋ, ‑ama ‑wa, tʋŋlɔ 'mɩ 'lɩ ‑taa ‑sʋɩa ‑köwölä dɛrɩ! ‑Maa 'ia 'fɩɔlʋ nɩ, 'na ni 'nyɩ tɩɔ 'lɩ, abɩa ‑na ni tɩɔ 'lɩ.» 43 'Aanjë 'doo nya sɔ cɛlɩ 'ɔnya ji 'ɔɔn 'klülɩpa. 44 'Ɔa plɛ 'jää ‑sʋɩ ‑gböösa, ‑bɛ 'ɔ bibie Nyɔsʋa ‑gböösa. 'Ɔa nyasu nya ‑beere ‑toru tagbë, ‑bɛ 'u böblö ‑tʋtʋ ‑gälɩ. 45 'Ɔ bɩaa' nyɔsʋabibiekʋ nɩ, 'ɔnya sɔwʋ. 'Ɔ 'tɔa' 'ɔa 'wʋnyɛrɛnyüü ‑gba, 'ɔ jrä 'üün 'mʋmɔ 'lɩ 'kpɔkpɔkʋa ‑gʋ. 46 'Ɔnya ‑gbala 'üün: «Dɛplɛɛ kä ‑gʋ 'a 'mʋmɔ le? 'Ba sɔwʋ 'kä 'a bibie Nyɔsʋa, 'a ‑pɩ ‑balʋ 'lɩ blö.»
'Ü 'kplaa' Jesu
47 'Ɔ ‑ka 'paa wii ‑bɛ nyüü 'tɔ. Nyüüpʋnyüüsɔɔlüa ‑tɔrʋpɩɔa nyɔɔ 'doo 'ü 'daraa' Judaa 'ɔ bä 'üa 'wliklɩ. 'Ɔnya jijrö Jesu ‑gba 'ɔmä 'ɔɔn ‑gbere. 48 Jesu nya ‑gbala 'ɔɔn: «Judaa, 'a ‑gberekʋ 'lɩ ‑nëmä ‑srörö ‑bɛ ‑mä Nyɔɔa 'Jʋ 'saa!» 49 Nyüülü nyra Jesu bä ɩa' ‑plɩɩ 'jäa' wiili nëmäa' 'lɩjrä nɩ, 'ünya ‑gbala 'ɔɔn: «'Pläkänyɔɔ, a nʋ ‑järë amä 'üün 'blaa?» 50 'Üa ‑tɔrʋpɩɔa 'doo nya 'kala ‑gbɔsapɛrɩnyɔɔ kpaköa 'jrʋpafɛnyɔɔ dɛɛ, 'ɔnya 'bölɩ 'ɔa 'dupa 'nyaklu. 51 ‑Maa Jesu nya ‑gbala 'ɔɔn: «Fio! 'I 'a 'na!» 'Ɔnya ‑fɛ nyɔɔlɔa 'nyaklu ‑gba, 'ɔnya 'pʋɔ 'ɔɔn. 52 Jesu nya ‑gbala nyüülü jia' 'ɔɔn 'kpla, 'palɩ ‑gbɔsapɛrɩnyüü kpakü, Nyɔsʋaanyukua 'sʋgɩanyüü nyra tagbü, 'ɔnya ‑gbala 'üün: «Dɛplɛɛ kä ‑gʋ 'a ji ‑bɛ 'a ja ‑järë nyra tii, ‑beere nyüü ji 'jejienyɔɔ 'kpla le? 53 ‑Srɩ o ‑srɩ amɔ ma bäa' Nyɔsʋaanyuku kpaku ‑wälɩ, 'anyɩ 'mɩ ‑a 'kpla; ‑maa 'ana 'taɩn kʋ ‑pɩ, ‑bɛ 'jöjrüükpü 'mä 'üa 'jrʋpa ‑fɛ.»
'Ü faa' Jesu ‑gbɔsapɛrɩnyɔɔ kpaköa ‑nyɛɛ; Piɛɛrëa bablakʋ
54 'Ünya 'kpla Jesu, 'ünya fa 'ɔɔn ‑gbɔsapɛrɩnyɔɔ kpaköa nyüköli. Piɛɛrë tʋŋlɔlɩdɛrɩ ‑bɛ 'ɔ ‑mɛ 'üün ‑gälɩ. 55 'Ü ‑gölöa' ‑gböööa ‑saplɛ ‑tɔrʋpɩɔ kapu nɩ, 'ünya kʋwälɩ. Piɛɛrë nya kʋ 'üa ‑tɔrʋpɩɔ. 56 'Jrʋpafɛŋlʋʋ 'doo nya 'järä 'ɔɔn kapu ‑gba. 'Ɔnya ‑tʋ 'ɔɔn 'nyügba, 'ɔ ‑nëma: «Nyɔɔlɔ kʋa' ‑pɩ, nyra 'ɔɔn ma 'nyɛrɛ 'wʋ.» 57 ‑Maa 'ɔnya babla, 'ɔ ‑nëma: «'Ŋlʋʋ, 'nyɩ 'ɔɔn jre ‑a jre.» 58 'Ia ni ‑sia' nɩ, ‑moloo nya 'jä 'ɔɔn, 'ɔ ‑nëma: «‑Mɔ kʋa' ‑pɩ nɩ, ‑bä bɩa 'üa ‑tɔrʋpɩɔa nyɔɔ.» Piɛɛrë ‑nëma: «'Na nyɔɔ, ‑mää 'mɔɔ ‑a!» 59 ‑Gliiibɔʋ 'doo 'mä 'sɔɔwʋ ‑sikalɩ mi nɩ, nyɔɔ 'doo nya 'jä 'ɔɔn, 'ɔ ‑nëma: «'Cɩcasa bäsaa, nyɔɔlɔ kʋa' ‑pɩ bä kä 'üa ‑tɔrʋpɩɔ, 'be Galileenyɔɔ 'ɔ bä bɩa.» 60 ‑Maa Piɛɛrë nya ‑gbala 'ɔɔn: «'Na nyɔɔ, wiili ‑paaa' 'nyɩ 'nu 'iin 'wli ‑a!» 'Ɔ ‑ka 'paa ɩ wii ‑bɛ sapɛ ‑gbe. 61 'Pläkänyɔɔ nya ‑siekälɩ 'ɔnya tɛ Piɛɛrë 'klɩ. Piɛɛrë nya 'pa wiili 'Pläkänyɔɔ ‑gbala käa' 'ɔɔn plɛ: «Sapɛ 'mä 'daa 'ɛmä ‑gbekalɩ mi 'saarɩa ‑srɩ 'lɩ nɩ, ‑nya tää kaa 'kä ‑nya 'daa ‑nyɩ 'mɩ ‑a jre.» 62 Piɛɛrë nya 'cie 'ɔnya 'wu ‑gböösa.
63 Nyüülü blöa' Jesu kälɩ srörö 'ü srörö 'ɔɔn, ‑bɛ 'ü 'kakla 'ɔɔn dii. 64 'Ünya kpasa 'ɔa 'nyü, ‑bɛ 'ü 'kakla 'ɔa 'klʋɩ dii, ‑bɛ† 'ü nö: «Nyɔɔlɔ 'kalaa' ‑mɩ dɛɛ, ‑ga 'ɔɔn 'nyrʋ!» 65 ‑Bɛ 'ü fafa 'ɔɔn ‑jejree 'më 'kɔkɔmlɛ ‑mölöö dɛrɩ.
'Ü faa' Jesu juifëa tropina 'lɩ
66 ‑Srɩ paa' nɩ, juifëa tagbü, ‑gbɔsapɛrɩnyüü kpakü nyra ‑dɔkpɩanyüü nya 'plasraa; 'ünya fa 'ɔɔn 'üa tropina 'lɩ. 67 'Ünya ‑gbala 'ɔɔn: «‑Ama bä 'Kriisë nɩ, ‑gbala amɩ!» 'Iibäa' 'ɔɔ nɩ: «Ama ‑gbala 'amɩ nɩ, 'a ‑nëmä 'iin wii 'wʋ ‑a 'ba. 68 ‑Bɛ ama 'bete bɩa 'amɩ nɩ, 'a ‑nëmä 'mɩ ‑gälɩ ‑a 'sa†.» 69 ‑Maa 'bala 'saarɩ ‑gälɩ Nyɔɔa 'Jʋ nya ‑wälɩkʋa 'Klükä Nyɔsʋa 'dupa 'lɩ†. 70 Nyüüa 'fɩɔ ‑nëma: «‑Mɔ bä Nyɔsʋa 'Jʋ?» 'Ɔ ‑nëma: «'Ana 'mʋgbɛ 'a nɩnɩa, 'ɔɔ 'n bä.» 71 'Ia ‑gʋ 'ü ‑nëma: «Wii 'plɛɛ a ‑ka 'bata le? 'I ja 'ɔa 'mʋgbɛa 'mlɩ, anya 'nu ‑o!»