'Ü fa Jesu Rɔmënyüüa 'kamanyɔɔ Pilatëa ‑nyɛɛ
15
1 ‑Srɩkägbalawlaa, ‑gbɔsapɛrɩnyüü kpakü, tagbü ‑dɔkpɩanyüü nyra juifëa tropina 'lɩa nyüüa 'fɩɔ nya 'plasraa. 'Ü kpasaa' Jesu nɩ, 'ünya fa 'ɔɔn 'ünya ‑nyɩ 'ɔɔn Pilatëa kälɩ. 2 Pilatë nya 'bete 'ɔɔn: «Juifëa 'kɩɩ bä?» Jesu ‑nëma: «‑Na mlɩ 'i ja.» 3 ‑Gbɔsapɛrɩnyüü kpakü ‑tʋ 'ɔɔn wii 'kɔkɔmlɛ ‑gälɩ. 4 Pilatë nya 'patä 'ɔnya 'bete 'ɔɔn: «'Ɛɛ ‑nyɩ cɛ mɛ le? Wii 'kɔkɔmlɛlɛ 'ü ‑tʋa' ‑mɩ ‑gälɩ, ‑nyɩ 'nu 'iin 'wli ‑a?» 5 ‑Maa Jesu ‑kanyɩ mɛ ‑a cɛ, 'i kala Pilatë plɛklɩ.‑Gäa 'böbökʋ
6 'Asɩ ‑glɩsɩglɩsɩlɛ 'ü 'daraa' 'Paakë jräa' 'lɩ nɩ, 'asɩ 'ɔ 'cɛrɛ ‑jienyɔɔ 'doo ‑wälɩ, ɔ nyüüa 'fɩɔ ‑gaaa' 'nyrʋ. 7 Nyɔɔ 'doo bä ɩ ‑jie 'lɩ 'ɔɔ 'ü 'dara Barabasë, 'ɔɔ ‑bɛ 'ɔa ‑mölöö. 'Ü 'bla nyɔɔ 'taɩn 'lɩ 'ü jaa' ‑gʋmlanyüü tou. 8 Nyüü nya ‑gbolomlɩ, 'ünya ‑gbala Pilatë† ɔ nʋ 'sɩrɩ 'ɔ nöa' ‑glɩsɩglɩsɩ 'lɩa 'doo. 9 'Iibäa' Pilatë nɩ: «'A 'bata ‑a 'cɛrɛ juifëa 'kɩɩ ‑wälɩ?» 10 Pilatë jre 'iin 'sɩrɩ ‑gbɔsapɛrɩnyüü kpakü 'saa' 'ɔɔn wasäsa. 11 ‑Maa ‑gbɔsapɛrɩnyüü kpakü nya 'tutro nyüü 'wli 'ɔmä Barabasë ‑wälɩ 'cɛrɛ. 12 Pilatë nya 'patä 'ɔnya ‑gbala 'üün: «‑Asɩ 'a 'bata ‑a nʋ ‑mɔlɔ 'a 'daraa' juifëa 'kɩɩ le?» 13 'Ünya 'klerewʋ 'sɔɔwʋ: «Kolo 'ɔɔn krʋa ‑gälɩ!» 14 Pilatë nya 'bete 'üün: «Bʋbɔgbi 'plɛɛ 'ɔ nʋ le?» 'Ünya 'klere 'sɔɔwʋ 'wʋ, 'ünya ‑gbolomlɩ ‑gböösa: «Kolo 'ɔɔn krʋa ‑gälɩ!» 15 Pilatëlɔ nɩ, nyüülü 'mä ‑gʋ 'ɔɔn ‑wa nɩ, 'ɔnya 'cɛrɛ Barabasë ‑wälɩ. Pilatëa nyüü bɩaa' Jesu ‑gbalɛfi ‑gälɩgbagbakʋ nɩ, 'ɔnya 'sa 'ɔɔn 'ümä 'ɔɔn krʋa ‑gälɩ kolo.
16 'Sʋgɩa nya fa Jesu 'ünya pa ‑gofɩanëmaa ‑gbööli†, 'ünya we 'üa ‑mölööa 'fɩɔ. 17 'Ünya 'pa 'ɔɔn ‑fɔflɔɔ 'kotu kpaku† ‑gälɩ, 'ünya 'sroo 'ɔɔn. 'Ünya ‑tʋ 'ɔa 'wli nänä 'wlugbölä 'ü daa', 18 ‑bɛ 'ü 'trɛɛ 'ɔɔn: «Juifënyüüa 'kɩɩ, ‑ayoo!» 19 'Kä 'ü ‑gbaaa' 'ɔa 'wli sɩsɛ ‑gälɩ, 'ü ‑gbaaa 'ɔɔn ‑tatʋ 'wʋ, 'kä 'ü 'paa 'ɔa 'klɔɔtrʋ kotifli, 'kä 'ü 'cie 'üa nyüfë 'wʋ 'ɔa 'klɩ ‑beere 'üa 'kɩɩ. 20 'Ü bɩaa' 'ɔɔn srörökʋ nɩ, 'ünya 'ba 'ɔɔn ‑fɔflɔɔ dɔʋlʋ ‑gälɩ, 'ünya 'sroo 'ɔɔn 'ɔa 'mʋgbɛa 'sosroodii, 'ü nyra 'ɔɔn nya 'cere ‑fälɩ 'ümä 'ɔɔn krʋa ‑gälɩ kolo.
Jesua krʋa ‑gälɩa kolokʋ
21 Nyɔɔ 'doo sɔ ɩ 'klʋɛɛ, 'ɔɔ 'ü 'dara Simɔɔ Sirɛɛnëbätäa nyɔɔ†, 'ɔɔ ‑gu Alesandrë nyra Rufusë†. 'Ɔ jia' ‑sikalɩ nɩ, 'sʋgɩa nya 'kpla 'ɔa 'klüa nɔ, ɔ ‑gbötö Jesua krʋa. 22 'Ünya fa Jesu ‑pɩɔ 'doo i 'ü 'daraa' Gɔlëgotaa; 'ia ‑gbaa bä «'wukapɛa ‑gba». 23 'Ünya ‑nyɩ 'ɔɔn ‑duvɛɛnlɛ 'ü 'caklaa' ‑wöserili 'ü 'daraa' 'miirë 'ɔmä 'mla, ‑maa 'ɔnyɩ 'iin 'mla ‑a 'mla. 24 'Ü bɩaa' 'ɔɔn krʋa ‑gälɩ kolokʋ, ‑bɛ 'ümäa' 'ɔa 'koti 'lɩpäälä nɩ, ‑tɔɔo 'ü 'pala 'iin ‑gälɩ†. 25 'Ü ko 'ɔɔn ‑suwlaa 'jrʋpʋwlaa†. 26 ‑Gbaalä kä ‑gʋ 'ü 'blaa' Jesu nɩ, 'ü ‑jɩjra 'iin tuu 'pɛ ‑gälɩ; 'iibä: «Juifënyüüa 'Kɩɩ». 27 'Ɔɔ ‑bɛ 'jejienyüü 'sɔɔ 'ü kolo ‑pɩɔ 'doo 'wʋ krʋë ‑gälɩ; 'doo bä 'ɔa 'dupa 'lɩ, 'doo nya bä 'ɔa kʋmla 'lɩ. 28 'Asɩ wiili ‑jɩjra käa' nyɔsʋapɔɔkʋ 'lɩ ‑gba: «‑Balʋnyüüa ‑tɔrʋpɩɔa nyɔɔ 'ü 'dara 'ɔɔn†.»
29 ‑Sisinyüü ‑gbata 'wli ‑bɛ 'ü ‑jejre 'ɔɔn ‑bɛ 'ü nö: «‑A si ‑a 'jä! ‑Mɔ ‑gbloooa' Nyɔsʋaanyuku kpaku ‑bɛ ɔ 'paa' 'uun jrüü tääa 'mlɩ nɩ†, 30 'balɩ ‑na nyufa mlɩ 'kä ‑ciie krʋa ‑gälɩ 'la!» 31 'Asɩ ‑gbɔsapɛrɩnyüü kpakü nyra ‑dɔkpɩanyüü nö bɩa ‑bɛ 'ü srörö 'ɔɔn: «'Ɔ 'pʋɔ nyüü ‑mölöö, ‑maa 'ɔa nyufa 'ɔnyɩ 'lɩbɩa ɔ 'pʋɔ! 32 A 'Kriisëlɔ bäa' Israɛɛlëa 'kɩɩ sɔ ɔ krʋa ‑gälɩ, 'kä a 'jää 'ɔɔn ɔ, ‑bɛ ana plɛ 'mä ‑si!» Nyüülü 'ü nyra 'ɔɔn 'sɔɔ koloa' ‑pɩɔ 'doo 'wʋ ‑jejre 'ɔɔn bɩa.
33 ‑Sopuwlaa nɩ, 'jöjrüükpü nya pala 'ia 'blɩlɩa 'fɩɔ ‑gälɩ pala pala ‑gbiajrʋa ‑gliiibei tää†. 34 ‑Gbiajrʋa ‑gliiibei tää jräa' 'lɩ, Jesu nya 'kpö, 'ɔ ‑nëma: «Eloii, Eloii, lama sabakëtani?» 'Ia ‑gbaa bä: «'Na Nyɔsʋa, 'na Nyɔsʋa, dɛplɛɛ kä ‑gʋ ‑sɔ 'mɩ dɛrɩ le†?» 35 ‑Mülü bä ɩa' ‑plɩɩ 'nua' wiili 'ɔ 'paa' 'wli ‑nëma: «'Ba ponyakli, Elii 'ɔ we!» 36 Nyɔɔ 'doo nya fɔ, 'ɔnya 'ŋʋa dapɛ† viinɛgrë dɛrɩ, 'ɔnya kpasra 'ɛɛn tuu 'klɩ. 'Ɔmä 'ɛɛn Jesua 'mä 'klɩ ‑tʋ 'ɔmä 'nyɔnyɔ, ‑bɛ 'ɔ nö: «'Ba 'nyüglö amä 'iin 'jä, Elii ma nya 'ɔɔ cɛlɩ 'bakalɩ ji.» 37 ‑Maa Jesu 'mäa' 'lɩ ‑fʋflʋ 'ba 'ɔnya 'kpö ‑gböösa.
38 Dɔʋlʋ pösö ɩa'† Nyɔsʋaanyuku kpaku ‑wälɩ, 'unya ‑gaalalɩ ‑plou! Kolo 'ua 'wlugba 'kä ‑a ‑tɔɔ 'lɩ ‑wälɩ. 39 'Sʋgɩakamanyɔɔlɔ bä ɩa' ‑plɩɩ 'jäa' 'sɩrɩ Jesu 'kpöa'† ‑bɛ 'sɩrɩ 'ɔ nʋa' ‑fʋflʋa 'lɩbadɛɛ nɩ, 'ɔ ‑nëma: «Nyɔɔlɔ kʋa' ‑pɩ bä ɩ 'kasa Nyɔsʋaa 'Jʋ!»
40 'Ŋlëgë tʋŋlɔlɩdɛrɩ ‑bɛ 'ü ‑pʋpɔ bɩa. 'Üa ‑tɔrʋpɩɔ bä ɩ Magëdalayria Marii, Salomee nyra Mariilɔ ‑gua' Jaakë jɔ ‑bɛ Josɛɛsë. 41 'Üü nyra Jesu ma 'nyɛrɛ 'wʋ, 'üü ma kälä 'ɔa wii ‑gba 'taɩn 'lɩ 'ɔ ma bä käa' Galilee. 'Ŋlëgë 'kɔkɔmlɛ ‑mölöö nyra 'ɔɔn nya 'jra Jerusalɛɛmë.
Jesua ‑tʋtʋkʋ
42 ‑Gbiajrʋ möa', ‑bɛ 'i bäa' ‑ëlerekʋ, ‑fʋflʋpasrɩa ‑gʋ nɩ, 43 Arimatëbätäa nyɔɔ 'doo 'ü 'daraa' Josɛɛfë; 'ɔ bä juifëa tropina 'lɩa nyɔɔ kpakö; 'ɔa 'mʋgbɛlɔ, Nyɔsʋaa 'kamaplä 'ɔ ‑glaaa; 'ɔɔ 'jä 'klü 'ɔnya mi Pilatë 'klɩ 'nyüglö, 'ɔmä 'ɔɔn Jesua jäjäa nɔ ‑nyɩ. 44 Pilatëa plɛklɩkala 'kä Jesu 'mä jä 'köklesa; ‑jää 'ii we 'sʋgɩakamanyɔɔ, 'ɔnya 'bete 'ɔɔn ima 'daa Jesu jäa' 'i 'a 'lɩwlɛ. 45 'Sʋgɩakamanyɔɔlɔ, 'saa' 'ɔɔn ‑gälɩ nɩ, 'ɔnya ‑nyɩ Jesua jäjäa nɔ Josɛɛfë. 46 'Ɔ ‑sua' 'cɩcrɛɛ, 'ɔ 'ciea' 'ɔɔn 'ɔnya ‑fifra 'ɔmɩ 'ɛɛn, 'ɔnya fa 'ɔɔn 'täkä kpakölä 'ü 'kɔtɔa' 'lɩ 'piekalɩ; 'ɔnya nʋ 'täkä kpakö 'ɔnya kpa 'uun 'klɩ. 47 Magëdalayria Marii ‑bɛ Josɛɛsëa 'yio Marii 'jä ‑tɛ 'lɩ 'ɔ ‑tʋa' Jesu.