'Ŋlëkaplü ‑pʋa tapönänä
25
1 «Cɛɩɩa 'kamaplä ‑beere 'sɩrɩ 'ŋlëkaplü ‑pʋ dɔrɔa' 'üa 'napu 'wʋ ‑bɛ 'ü mia' nyɔɔlɔ 'tiea' ‑glaaa. 2 ‑Gböö bälɩ, 'ü ‑glalɩ ‑bɛ ‑gböö ‑mülü pa mlüü. 3 Mlüüa nülü nɩ, 'ü fa 'üa 'napu ‑maa 'ünyɩ 'kpɩ ‑a fa 'ümä 'üa 'napu 'lɩ 'pa. 4 ‑Maa 'lɩglaa nülü nɩ, 'ü 'pa 'kpɩ 'kpalë 'lɩ 'ünya fa 'iin. 5 ‑Bɛ ɔ 'tiea' ‑wlɛa' dɛrɩ nɩ, 'mʋmʋ nya 'bla 'üün 'ünya 'mʋmɔ. 6 ‑Srɩlɩtʋŋlɔwlaa nyüü 'kpöö ɔ: ‹‑Jää 'titinyɔɔ jö ‑o! 'Ba 'cie 'amä 'ɔɔn 'klɩjrara ‑o!› 7 'Üa 'fɩɔ nya sɔwʋ, 'ünya nʋ 'üa 'napu dɛɛ. 8 ‑Maa mlüüa nülü nya ‑gbala 'lɩglaa nü: ‹'Ba ‑nyɩ amɩ 'kpɩ ana 'napu nëmä 'nyrɔlɔ.› 9 'Iibäa' 'lɩglaa nülü nɩ: ‹'Büa! 'Inyɩ ‑päpäsa ‑a bä. 'Ba mi dotro 'perupanyüüa ‑nyɛɛ 'amä 'ana ni ‑su!› 10 'Ii 'ü mi ‑su ‑bɛ nyɔɔlɔ 'tiea' 'tɔ. ‑Mülü ‑ëlere ɩa' nyra 'ɔɔn nya pa 'titiö nyuku ‑wälɩ, tatu nya 'pala. 11 'Taɩn 'mä ‑sikalɩ mi nɩ, ‑mülü mi ɩa' 'kpɩ ‑su nya ji; 'ü bɔtɔ tatu ‑bɛ 'ü nö: ‹'Pläkänyɔɔ! 'Pläkänyɔɔ! 'Sa amɩ tatu 'klɩ!› 12 ‑Maa 'iibäa' 'ɔɔn nɩ: ‹'Cɩcasa 'n ‑gbala 'amɩ: 'nyɩ 'amɩ ‑a jre!› 13 'Ii känyrɩ 'anyɩ 'mʋmɔ, 'be 'anyɩ 'taɩnlɩ nyra jrüülü kä 'mlɩ Nyɔɔa 'Jʋ 'mäa' ji† ‑a jre.'Jrʋpafɛnyüü tääa tapönänä
14 «Cɛɩɩa 'kamaplä nya ‑beere 'sɩrɩ nyɔɔ möa' nyɔtugbabre, ‑bɛ 'ɔ wea' 'ɔa 'jrʋpafɛnyüü ‑bɛ 'ɔ tɩɛa' 'üün 'ɔa käkädii ‑gba. 15 'Sɩrɩ ‑molooa 'srɛ bäa' 'ɔnya ‑päälä 'üün mölii 'lɩ 'ümä 'jrʋpa ‑fɛ. 'Ɔnya ‑nyɩ ‑moloo talaan† ‑gböö, ‑moloo 'sɔɔ, ‑moloo talaan 'döö. 16 ‑Mɔlɔ 'jäa' talaan ‑gböö nya nʋ 'ɔa ni 'ɔnya ‑fɛ 'jrʋpa, 'ɔnya 'järä 'ia ‑gälɩ talaan ‑gböö ‑mölöö. 17 ‑Mɔlɔ 'jäa' 'sɔɔ nya nʋ dɛɛ 'dee 'ɔnya 'järä 'ia ‑gälɩ talaan 'sɔɔ ‑mölöö. 18 ‑Mɔlɔ 'jäa' talaan 'döö nɩ, 'bütügba 'ɔ ‑go 'äa 'mlɩ 'ɔ ‑sisre 'ɔa 'kamanyɔɔa mölii. 19 'I ‑wlɛa' 'lɩ nɩ, 'jrʋpafɛnyüüa 'kamanyɔɔ nya ji, 'ɔ ‑nëma ü 'sa 'ɔɔn ‑gogo. 20 ‑Mɔlɔ 'jäa' talaan ‑gböö nya jijrö 'ɔɔn ‑gba, 'ɔnya srara 'ɔɔn talaan ‑gböölä blöa' 'lɩgälɩ; 'ɔ ‑nëma: ‹'Pläkänyɔɔ, ‑tɩ 'mɩ talaan ‑gböö ‑gba. 'N 'järälɩgälɩ ‑gböö ‑mölöö.› 21 'Ɔa 'kamanyɔɔ nya ‑gbala 'ɔɔn: ‹'I 'na 'mʋfasa, 'cɩca 'jrʋpafɛnyɔɔ nyra plɛtoronyɔɔ ‑bä! ‑Sraraa' 'mɩ 'sɩrɩ bäa' plɛtoronyɔɔ diijie 'lɩ 'n ‑nyɩa' ‑mɩa 'mlɩ nɩ, 'nyaa ‑mɩ dii 'kɔkɔmlɛ kälɩ ‑nyɩa. Ji 'nyraa ‑mɔ 'mä dɔrʋ nʋ.› 22 ‑Mɔlɔ 'jäa' talaan 'sɔɔ nya jijrö 'ɔɔn ‑gba, 'ɔ ‑nëma: ‹'Pläkänyɔɔ, ‑tɩ 'mɩ talaan 'sɔɔ ‑gba; 'n 'järälɩgälɩ talaan 'sɔɔ ‑mölöö.› 23 'Ɔnya ‑gbala 'ɔɔn: ‹'I 'na 'mʋfasa, 'cɩca 'jrʋpafɛnyɔɔ nyra plɛtoronyɔɔ bä! ‑Sraraa' 'mɩ 'sɩrɩ bäa' plɛtoronyɔɔ diijiea 'mlɩ nɩ, 'nyaa ‑mɩ dii 'kɔkɔmlɛ kälɩ ‑nyɩa. Ji 'nyraa ‑mɔ 'mä dɔrʋ nʋ.› 24 ‑Mɔlɔ 'jäa' talaan 'döö nya jijrö 'ɔɔn ‑gba, 'ɔ ‑nëma: ‹'Pläkänyɔɔ, 'n jre 'iin 'sɩrɩ ‑klaa' 'lɩ: ‑plɩɩlɩ ‑nyɩa' ‑goolo, 'ii ‑böölö, 'kä ‑saara ‑plɩɩlɩ ‑nyɩa' plala. 25 'Ii kä 'mɩ ŋalɛ 'wʋ. 'Ia ‑gʋ 'nyaa mi nyaa ‑sisre ‑na talaan ‑tʋtʋa 'mlɩ. ‑Jää 'ään kʋ ‑pɩ dɔrɔ ‑na dɛɛ 'wʋ.› 26 'Iibäa' 'ɔa 'kamanyɔɔ: ‹Plɛbʋbɔ ‑fɛfɛjrʋpafɛnyɔɔ! ‑Jre 'imɩ 'sɩrɩ 'n 'bölöa' ‑plɩɩlɩ 'nyɩa' ‑goolo, 'sɩrɩ 'n 'saraa' ‑plɩɩlɩ 'nyɩa' plala! 27 ‑Bɛ ‑tʋ ɩ 'na mölii möliianyüköli 'la! ‑Ama nʋ ɩ 'imɩ nɩ, 'inya ɩ 'lɩ ‑gälɩ 'paplaa, ama ji 'kä 'nyaa 'iin 'lɩbaa! 28 'Ii känyrɩ 'ba 'ba 'ɔmɩ talaanlä kälɩ 'kä 'a ‑nyɛɛ 'ämɩ ‑mɔlɔ 'klaaa' talaan ‑pʋ! 29 'Be nyɔɔlɔ 'klaaa' diijie nɩ, Nyɔsʋa nya 'iin 'wlibɩaa 'ɔmä 'kɔkɔmlɛ kä. ‑Maa nyɔɔlɔ 'nyɩa' dɛɛ 'klaa nɩ, 'ɔnya 'nɩmɩ 'ɔɔn ‑mɛlɛ 'ɔ 'klaaa' kälɩ 'baa, 30 'kä 'a be ‑taa ‑fɛfɛjrʋpafɛnyɔɔlɔ ‑fälɩa 'jöjrüükpü 'lɩ. 'A ‑plɩɩ 'ümä 'wu ‑bɛ 'ümä ‑gla ji.›
‑Gätʋsrɩ ‑susugbee
31 «‑Bɛ 'taɩn 'lɩ Nyɔɔa 'Jʋ 'mäa' ‑srɩ 'ɔa 'wliklɩbʋabʋakʋ ja 'ɔmäa' ji, 'ɔɔ ‑bɛ 'nyüna 'aanjëa 'fɩɔ nɩ, 'ɔa 'wliklɩbʋabʋakʋa 'kɩɩkpata ‑gälɩ 'ɔmä kʋ. 32 ‑Tʋtʋ ‑gälɩa nyüüa 'fɩɔ nya 'ɔa 'klʋɩ traraa, 'kä 'ɔnya nyüü ‑gbasasra ‑beere ‑bablëëgbanyɛrɛnyɔɔ 'sasra ‑bablëë ‑bɛ wluaɩɩ ‑gba. 33 'Ɔnya ‑bablëë 'ɔa 'dupa 'lɩ ‑tʋa, 'kä 'ɔnya wluu 'ɔa kʋmla 'lɩ ‑tʋ. 34 'Kä 'kɩɩ nya nyüülü bäa' 'ɔa 'dupa 'pɛlɩ ‑gbala: ‹'Ba ji, 'amɔ 'na Tʋ 'paa' 'nɩ; 'ba ji 'amä ‑jaalä 'na Tʋ ‑nyɩa' 'amɩ fa, ä bäa' 'kɩɩplälä 'ɔ tɛrɛa' 'amɩ 'pläa 'käkolofa 'wʋ. 35 'Be ‑gbëka 'bla kä 'mɩ, 'anya ‑nyɩ 'mɩ jijrɛ. 'Mamlatʋ nya 'bla kä 'mɩ 'anya ‑nyɩ 'mɩ 'nɩ. 'N bä kä nyɔtugbanyɔɔ, 'anya 'kʋɛɛ 'lɩ 'mɩ. 36 'N 'pa kä ‑gbagba 'anya 'sroo 'mɩ; ‑wusu 'bla kä 'mɩ, 'anya 'kʋɛrɛ 'mɩ; 'n bä kä ‑jie 'lɩ, 'anya ji 'mɩ 'jäkalɩ.› 37 'Kä nyüülü ‑gäa' 'klɩ nya 'daa: ‹'Pläkänyɔɔ, 'taɩn 'plɛɛ 'lɩ a 'jä ‑na ‑gbëkablaa nɔ le? 'Aiɛ ‑bɛ 'mamlatʋ 'bla ‑mɩ ‑bɛ a ‑nyɩ ‑mɩ 'nɩ le? 38 'Taɩn 'plɛɛ 'lɩ bä nyɔtugbanyɔɔ ‑bɛ a 'kʋɛɛlɩ ‑mɩ le? 'Aiɛ 'taɩn 'plɛɛ 'lɩ ‑paa' ‑gbagba ‑bɛ a 'sroo ‑mɩ le? 39 'Taɩn plɛɛ 'lɩ ‑wusu 'bla ‑mɩ, 'aiɛ bä ‑jie 'lɩ ‑bɛ a ji ‑mɩ 'jä le?› 40 'Kä 'kɩɩlɔ nya 'üün ‑gbalaa ‑maa: ‹'Cɩcasa 'n ‑gbala 'amɩ, 'asɩ a nöa' 'ia samaa wii 'jüplüjielüa ‑tɔrʋpɩɔa 'doo bäa' 'na ‑wlajü ‑gba nɩ, 'mɔɔ 'a nʋ 'iin ‑gba.›
41 «'Kä 'ɔnya nyüülü bäa' 'ɔa kʋmla 'pɛlɩ ‑gbala ‑maa: ‹'Ba tʋŋlɔ 'mɩ 'lɩdɛrɩ, busunyüü! 'Ba mi kapulu 'nyɩ 'nyrɔlɔa' 'plɔʋa 'mlɩ, u Nyɔsʋa ‑ëlerea' Sataan nyra 'ɔa 'aanjëa ‑gʋ! 42 'Be ‑gbëka 'bla 'mɩ, 'anyɩ 'mɩ jijrɛ ‑a ‑nyɩ. 'Mamlatʋ 'bla 'mɩ, 'anyɩ 'mɩ 'nɩ ‑a ‑nyɩ. 43 'N bä kä nyɔtugbanyɔɔ, 'anyɩ 'mɩ 'lɩ ‑a 'kʋɛɛ, 'n 'pa ‑gbagba, 'anyɩ 'mɩ ‑a 'sroo. ‑Wusu 'bla 'mɩ 'nyaa bä ‑jie 'lɩ, 'anyɩ 'mɩ 'jäkalɩ ‑a ji.› 44 'Kä 'üa 'mʋgbɛ nya 'ɔɔn 'bete: ‹'Pläkänyɔɔ, 'taɩn 'plɛɛ 'lɩ a 'jä ‑na ‑gbëkablaa nɔ, ‑bɛ anyɩ ‑mɩ jijrɛ ‑nyɩ le? 'Aiɛ ‑bɛ 'mamlatʋ 'bla ‑mɩ ‑bɛ anyɩ ‑mɩ 'nɩ ‑nyɩ le? 'Taɩn 'plɛɛ 'lɩ ‑bä nyɔtugbanyɔɔ ‑bɛ anyɩ ‑mɩ 'lɩkʋɛɛ le? 'Aiɛ ‑bɛ ‑paa ‑gbagba ‑bɛ anyɩ ‑mɩ 'sroo le? 'Taɩn 'plɛɛ 'lɩ ‑wusu 'bla ‑mɩ, 'aiɛ ‑bɛ ‑bä ‑jie 'lɩ ‑bɛ anyɩ ‑mɩ ‑gbaji le?› 45 'Kä 'ɔnya 'üün ‑gbalaa: ‹'Cɩcasa 'n ‑gbala 'amɩ, 'asɩ 'anyɩ jia' 'jüplüjielüa ‑tɔrʋpɩɔa 'doo ‑gba nɩ, 'mɔɔ 'a nö 'iin ‑gba.› 46 'Üülü nɩ, 'ümä 'pɔnɩkʋ 'jä 'plɔʋplɔʋa ‑gʋ, 'kä 'klɩgänyüü nya 'klälä 'nyɩa' blöröfa kä 'jä.»