‑Wusublanyɔɔlɔ Jesu 'pʋɔa' Bɛtɛsëdaa 'nie 'dee ‑gba
5
1 'I ‑sia' nɩ, juifëa ‑glɩsɩglɩsɩ bä ɩ Jerusalɛɛmë, Jesu nya mi 'lɩ. 2 ‑Bɛ ‑nyɛɛ Jerusalɛɛmë 'lee nɩ, 'nie 'dee bä ‑plɩɩ, ‑bablëëa palafawʋa ‑gba, 'ɛɛ 'ü 'dara Bɛtɛsëdaa† Ebrööwii 'lɩ. 'Ɛa ‑gba bä papu ‑gböö. 3 ‑Wusublanyüü 'kɔkɔmlɛ 'pepe 'lɩ ‑wälɩ: 'nɔnɔnyüü, kpakpanyüü, nyüülü kä ‑gbaa dii jäa'. 'Niea 'kädögödɛɛ 'ü ‑glaaa†, 4 'be 'aanjë 'cecrie 'nielɛa 'mlɩ 'kä 'ɔ 'dögö 'ɛɛn 'kä, ‑mɔlɔ ‑kätɩ 'cerea' 'lɩ, 'ɔ 'pʋɔ, 'sɩmɩ 'ɔa ‑wusu ma bä†. 5 Nyɔɔ 'doo bä ɩ 'lɩ, ‑wusu 'blaa' 'ɔɔn 'ia ‑sɩ ‑glʋ ‑sɩ ‑pʋ ‑sɩ ‑uuntää. 6 Jesu 'jäa' 'ɔɔn 'ɔ 'pia' ‑plɩɩ nɩ, ‑bɛ 'ɔ jrea' 'saa ‑wusu nyaa' 'ɔɔn ‑gba ‑wlɛ nɩ, 'ɔnya 'bete 'ɔɔn: «‑Baata ‑mä 'pʋ?» 7 'Iibäa' ‑wusublanyɔɔlɔ nɩ: «'Pläkänyɔɔ o, 'nyɩ nyɔɔ ‑a kä 'ɔmä 'mɩ 'nie 'lɩ bere ɛma 'dögökä, ‑bɛ 'asɩ 'n mö 'nie 'lɩ blö, 'kä nyɔɔ ‑moloo 'bösrö 'mɩ.» 8 'Iibäa' Jesu nɩ: «Sɔwʋ, dɔrɔ ‑na ‑gbitɛɛ 'wʋ, 'kä ‑nyɛɛɛ!» 9 'Köklesa nyɔɔlɔ nya 'pʋ; 'ɔnya dɔrɔ 'ɔa ‑gbitɛɛ 'wʋ, 'ɔnya 'nyɛ. 'Ia ‑srɩlɩ bä kä ‑fʋflʋpasrɩ†. 10 'A 'ia ‑gʋ juifë nya ‑gbala nyɔɔlɔ Jesu 'pʋɔa': «'Saarɩ bä ‑fʋflʋpasrɩ, ‑nyɩ kä ‑a kä ‑mä ‑na ‑gbitɛɛ ‑gbötö!» 11 Nyɔɔlɔ nya ‑gbala 'üün: «Nyɔɔlɔ 'pʋɔa' 'mɩ, 'ɔɔ ‑gbala 'mɩ: ‹Dɔrɔ ‑na ‑gbitɛɛ 'wʋ, 'kä ‑nyɛɛ.› » 12 'Ünya 'bete 'ɔɔn: «Nyɔɔ 'plɛɛ bäsaa, ɔ ‑gbala ‑mɩ ‑maa: ‹Dɔrɔ ‑na ‑gbitɛɛ 'wʋ, 'kä ‑nyɛɛ› le?» 13 ‑Maa 'ɔ ‑kanyɩ nyɔɔlɔ 'pʋɔa' 'ɔmɩ ‑a jre, 'be Jesu sakla ‑jria 'lɩ. 14 'I ‑sia' nɩ, Jesu nya jrä 'ɔɔn Nyɔsʋaanyuku kpaku ‑wälɩ; 'ɔnya ‑gbala 'ɔɔn: «‑Jää ‑mɔ, ‑nya 'pʋ; ‑kanyɩ nʋ ‑balʋ, ‑mɩlɩ 'mäa' ‑mɩ ‑gälɩjrä ‑pɩ 'wʋsi.» 15 Nyɔɔlɔ nya mi, 'ɔnya ‑gbala juifënyüü ‑ma Jesu 'pʋɔ 'ɔɔn. 16 'A 'ia ‑gʋ juifënyüü prɛ Jesu 'ümä 'ɔɔn 'bla†, 'be i 'ɔ nʋa' nɩ, ‑fʋflʋpasrɩ 'lɩ bäsaa.'Sɩrɩ Jesu 'saa juifënyüü ‑gälɩ
17 Jesu nya ‑gbala 'üün: «'Na Tʋ ‑ka ‑fɛɛɛ ‑pɩɔ 'jrʋpa, 'na 'mʋgbɛ 'ää 'n ‑fɛɛɛ†.» 18 'Ia ‑gʋ juifënyüü 'bata 'sɔɔwʋ 'ɔa 'bablakʋ, ‑mää ‑fʋflʋpasrɩ 'ɔnyɩ ‑trääräa' 'lɩ, ‑mää 'ia 'dooa ‑gʋ ‑a, ‑maa Nyɔsʋalɔ 'ɔ 'daraa' 'ɔa 'mʋgbɛa Tʋ, ‑bɛ 'ɔ 'paplaa' 'ɔa nyufa Nyɔsʋa 'klɩ. 19 Jesu nya 'patä 'ɔnya ‑gbala 'üün: «'Tasɩrɩa 'cɩcasa 'n ‑gbala 'amɩ, 'Jʋa 'doo 'nyɩ 'lɩ ‑a bɩa 'ɔ nʋ dɛɛ, wiili Tʋ nʋa' 'ɔ 'jäa' 'ii 'ɔ nö: wiili kä 'fɩɔ Tʋ nöa', 'asɩ 'Jʋ nö bɩa 'iin. 20 'Be Tʋ ‑wa 'ɔa 'Jʋ, 'ɔ srara 'ɔɔn i kä 'fɩɔ 'ɔ nöa', 'kä 'ɔnya 'ɔɔn ‑mɩlɩ ‑sia' ‑taa ni 'wʋ srara, 'ana plɛklɩ 'mä kala. 21 'Sɩrɩ Tʋ tɛrɛa' jäjänyüü 'kä ‑bɛ 'ɔ ‑nyɛɛa' 'üün 'klä, 'asɩ 'Jʋ ‑nyɛɛ bɩa 'klä ‑mɔlɔ 'ɔ ‑waa'. 22 Tʋ 'nyɩ ‑tʋ nyɔɔa ‑gä ‑a, ‑maa 'Jʋ 'ɔ ‑nyɩ ‑gäa 'fɩɔ kälɩ, 23 nyüüa 'fɩɔ 'mä 'Jʋ 'bʋala, 'sɩrɩ 'ü 'bʋalaa' Tʋ. Nyɔɔlɔ 'nyɩ 'bʋalaa' 'Jʋlɔ 'nyɩ Tʋlɔ blɔa' 'ɔɔn ‑a 'bʋala.
24 «'Tasɩrɩa 'cɩcasa 'n ‑gbala 'amɩ, nyɔɔlɔ poa' 'na 'papawii 'nyakli ‑bɛ 'ɔ toro nyɔɔlɔ blɔa' 'mɩ plɛ nɩ, 'ɔ kä 'klälä 'nyɩa' blöröfa kä. 'Ɔa ‑gä ‑nëmä ‑träärä ‑a ‑träärä. 'Ia nyɔɔlɔ, 'ɔ 'a jäjä 'lɩ sɔ, 'ɔ 'a 'klä 'lɩ ji. 25 'Tasɩrɩa 'cɩcasa 'n ‑gbala 'amɩ, 'taɩn jö, ‑bɛ 'ia 'tɔtɔkʋ bɩa, jäjänyüü nya Nyɔsʋaa 'Jʋa wii 'wli 'nua; ü nëmäa' 'iin 'wli 'nu, 'ünya 'lɩbäa. 26 'Sɩrɩ 'klä bäa' Tʋ 'lɩ nɩ, 'asɩ 'ɔ ‑nyɩ 'Jʋ 'klä 'ämä 'ɔɔn 'lɩbä. 27 'Ɔnya ‑nyɩ 'ɔɔn 'klü 'ɔmä ‑gä ‑tʋ, 'kä Nyɔɔa 'Jʋ† 'ɔ bäa' 'ia ‑gʋ. 28 'I 'nɩ kala 'amɩ plɛ 'klɩ, 'ia 'taɩn jö nyüülü kä 'fɩɔ bäa' 'kuyi 'lɩ nya 'ɔa wii 'wli 'nua, 29 'kä 'ünya 'lɩ 'cie. ‑Mülü nʋa' 'cɩcasa, 'ünya 'kuaabre sɔa 'kä 'ünya 'klä 'jä, ‑maa ‑mölö nʋa' ‑balʋ, 'ünya 'kuaabre sɔa ‑gäa ‑gʋ†. 30 'Na 'doo 'nyɩ 'lɩ ‑a bɩa ‑a nʋ 'na plɛklɩa wii. 'Sɩrɩ 'n 'nööa', 'asɩ 'n ‑tʋʋä ‑gä; ‑bɛ 'na ‑gä 'n ‑tʋʋäa' 'ä bä 'cɩcasa, 'be ‑mää 'na plɛklɩa wii 'nyɩ nʋ, ‑maa wiili Tʋlɔ blɔa' 'mɩ 'bataa', 'ii 'n nö.
31 «'Na 'doo ma 'pa 'na ‑gä nɩ, wiili 'mäa' 'lɩsa ‑nëmä wii 'wʋ ‑a 'bala. 32 Nyɔɔ ‑moloo bälɩ 'ɔ 'paa 'na ‑gä, 'n jre 'iin wiili 'ɔ 'saalɩ 'na ‑gʋ, 'cɩcasa bäsaa. 33 'A blɔ nyüü Jaan dɛrɩ†, 'ɔnya 'salɩ 'cɩcasa. 34 'Mɔɔlɔ nɩ, ‑mää 'kä nyɔɔ 'mä 'na ‑gä 'pa, ‑maa 'amä 'lɩmlɩwʋ, 'ia ‑gʋ 'n 'pa 'imɩ. 35 Jaan ‑beere kä 'napɛlɛ 'ü ‑gölöa', ɛ ŋʋaa'. 'Anya nʋ 'ɛa dɔrʋ 'taɩn jie ‑a 'mlɩ. 36 'Mɔɔlɔ nɩ, 'na ‑gä ‑si Jaan a nä 'wʋ. 'Jrʋpalä Tʋ ‑nyɩa' 'mɩ ‑a 'wlaraa', ä 'n ‑fɛɛɛa', 'ää 'saalɩ 'sɩrɩ Tʋ blɔa' 'mɩ. 37 Tʋlɔ blɔa' 'mɩ, 'ɔa 'mʋgbɛ 'pa bɩa 'na ‑gä. 'A ‑kaapɩɔ 'ɔa mlɩa wii 'wli 'nu, 'a ‑kaapɩɔ 'ɔa 'klʋɩ 'jä. 38 'Ɔa 'papawii 'nyɩ 'amɩ 'lɩ ‑a bä, 'be nyɔɔlɔ 'ɔ blɔa' 'anyɩ toro 'ɔɔn plɛ ‑a. 39 'A ‑täsä 'cɩcasa nyɔsʋapɔɔkʋ 'mʋfasa 'ana plɛ nɩnɩa, 'ii 'mä 'amɩ 'klälä 'nyɩa' blöröfa kä ‑nyɩ, ‑bɛ ‑jɩjradiili, 'ii 'paa 'na ‑gä. 40 ‑Bɛ 'anyɩ 'bata 'bata ‑a 'amä 'mɩ ‑gbajijrö 'amä 'klälä 'nyɩa' blöröfa 'kä 'jä. 41 ‑Mää nyüü 'nyɩ 'bʋala 'mɩ. 42 ‑Maa 'n jre 'amɩ, 'anyɩ Nyɔsʋa ‑a ‑wa. 43 'Na Tʋa 'nyrɩklɩ 'n jrörö, ‑bɛ 'anyɩ 'kʋɛɛ 'mɩ 'lɩ. Nyɔɔ ‑moloo ma jrörö 'ɔa 'mʋgbɛa 'nyrɩklɩ, 'anya 'ɔɔn 'lɩ 'kʋɛɛa. 44 'Amɔlɔ nyüüa 'bʋalakʋ käa' 'tʋ, ‑bɛ ünyɩ 'bataa' Nyɔsʋalɔ bäa' 'doo, 'ɔa në 'bʋalakʋ, ‑asɩ 'anya 'mɩ plɛtoro le? 45 'Anyɩ bobo ‑maa 'mɔɔ nëmä ‑srɩ 'lɩ 'ana ‑gbaa' ‑gä 'sa Tʋa 'klɩ. Nyɔɔlɔ 'mäa' 'lɩ 'iin 'sa, 'ɔɔ bä Moisë, ɔ 'a 'piea' plɛ ‑gälɩ. 46 'Ama toro ɩ Moisë plɛ nɩ, 'anya ɩ 'mɩ plɛtoroa bɩa, 'be wiili 'ɔ ‑jɩjraa' 'na ‑gä 'ɔ 'pa†. 47 ‑Bɛ 'ama 'nyɩ 'dara wiili 'ɔ ‑jɩjraa' wii ‑a nɩ, ‑asɩ 'anya 'na 'papawii wii 'dara le?»