Isa Al Masih katahona dou ma made ^binci rima d̄i ainaina Sabat
3:1-6
3
Isa lao walina aka uma sambea ro ibadakai. Ta ede wara sab̄ua dou ma made ^binci sa^bae rimana. 2 Ta ede rau wara dou-dou ma ne'e ngupa rawi ncara Isa, loakud̄u da'awana Sia. Ndad̄i siad̄oho tio kab̄ae ncauna Isa sab̄ua Sia nakatahoku dou d̄i ainaina Sabat. 3 Isa nggahina d̄i dou ma made ^binci sa^bae rimana ede, <<Mai ki^dipu ta d̄ei tando ake.>> 4 Edempara Sia sod̄ina d̄i dou-dou ma wara ta ede, <<D̄i ade atoran agama, ndai loa karawi au d̄i ainaina Sabat? Karawi ma taho atao karawi ma iha? Kasalama dou atao hade dou?>>Pala siad̄oho namidi mpa. 5 Kai mbanina Isa tiona d̄i kompe ro pei-Na, pala Sia ncoki ade rauna, b̄ara siad̄oho nawancuku tera tutana. Edempara Sia nggahina d̄i dou ma made ^binci sa^bae rimana ede, <<^Dalapu rimamu.>> Dou ede ^dalana rimana, ro rima dou ede ndad̄i taho. 6 Sawa'u b̄a ede dou-dou Farisi tu'u wi'ina uma sambea ro ibadakai ede, edempara mafakana lab̄o kalompo dou-dou ma b̄atu Herodes loakud̄u hadena Isa.
Isa Al Masih katahona mboto dou ma supu
3:7-12
7 Isa lab̄o anamorid̄oho-Na lao pesona weki aka Ndano Galilea. Edempara mboto poda dou d̄i Galilea ma lao b̄atu Isa. Mboto rau ma ramai ra d̄i Yudea, 8 Yerusalem, dou dana ro rasa Idumea, ro dou dana ro rasa ele mai b̄a Yordan, ro dou-dou d̄i kompe ro pei kota Tirus ro Sidon. Siad̄oho sara'a maina d̄i Isa, b̄a one siad̄oho wa'ura ringana lampa rawi-lampa rawi ra wa'u karawi b̄a Sia. 9 Dou-dou ede nawancuku mbotona, ndad̄ina Isa kauna anamorid̄oho-Na sadia sampa d̄i ru'u b̄a Sia, loakud̄u Sia aina cici b̄a dou-dou mamboto ede. 10 Sia katahona mboto dou ma supu, ndad̄ina sara'a dou masupu naciciku angina b̄a ne'ena ^deni lab̄o Isa loakud̄u rakana ^dama Sia. 11 Ro dou-dou ra lu'ukai b̄a roh setan, sanikina edana Isa, siad̄oho sujuna d̄i tando Sia ro kanggicana <<Nggomiku Ana Allah!>>2
12 Pala Isa kanta kapodana roh-roh setan ede ngoa d̄i dou-dou couku sapodakaina Sia ede.
Isa Al Masih kad̄alena sampuru d̄ua dou ndad̄i anamori-Na
3:13-19
(Mat. 10:1-4; Luk 6:12-16)
13 Edempara Isa tekana ese wawo sab̄ua doro to'i, ro ouna dou-dou ra kane'ekai b̄a Sia. Dou-dou ede maina, 14 edempara kad̄ale b̄a Sia 12 dou ade weki doud̄oho ede. Nggahi-Na, <<Nahu ka^daleku nggomid̄oho, loakud̄u nggomid̄oho ^dimalab̄ona Nahu, ro Nahu d̄imanggadu nggomid̄oho ^dimangoa ro kahaba Haba Mataho ma ramai ra d̄i Allah Ta'ala, 15 ro nggomid̄oho d̄imaraka kuasa ^dikatesakaimu roh-roh setan.>>
16 Akeku ngara sampuru d̄ua dou ede: la Simon ^di'ou raukai b̄a Isa la Petrus, 17 la Yakub ro la Yahya arina, eded̄u ana la Zebedeus, siad̄oho ake tangarakai b̄a Sia Boanerges aona <<tenggona b̄une karece ai>>, 18 la Andreas, Filipus, Bartolomeus, Matius, Tomas, Yakub ana la Alfeus, la Tadeus, Simon dou Zelot, 19 ro la Yudas Iskariot ma d̄onggo Isa d̄i dou-dou ma musu-Na.
Isa Al Masih ro Beelzebul
3:20-30
20 Edempara Isa lu'una d̄i ade sab̄ua uma. Pala dou mamboto mai kab̄oro walina weki, sampe Isa ro anamorid̄oho-Na wati kone loana ngaha. 21 Ro wakatu ringa b̄a iwa ro weki-Na mab̄oha lampa rawi ede, siad̄oho lao weha aona Sia b̄ara nggahi b̄a dou-dou b̄a one Sia nawa'ura ringu.
22 Ahli-ahli Taurat ma ramai ra d̄i Yerusalem manggahi, <<Sia ralu'ukai b̄a Beelzebul! Mana'ekaina roh-roh setan edeku ma rambeina kuasa d̄i Sia ^dikatesakaina roh setan.>>
23 Edempara Isa ouna dou mamboto ede, ro caritana d̄i siad̄oho pila-pila mbua conto ro ibara. <<^Buneku loana roh setan makatesa roh setan,>> nggahi Isa. 24 <<Nggara sab̄ua negara nacua mususi angina, negara ede wati ^dimantoi. 25 Ro nggara ade sab̄ua uma ro salaja nacua mususi angina ro wati kasab̄uana nggahi ro rawi ade weki kaluarga, kaluarga ede ^dimaleli. 26 Nggara d̄i ade karaja'an Iblis nacua mususi angina, karaja'an ede wati ntoina ro tantu d̄imambora.
27 Wati wara kone sab̄ua dou marampo ma loa lu'u d̄i ade uma dou ma tenggo ro weha rampa ntau ro warana, nggara watisi d̄iki ro leto ulu wa'una dou ma tenggo ede. Sawa'u b̄a ede, ampona loa weha rampa ntau ro warana.
28 D̄i ^bademu! Nggara dou nakarawisi dosa ro nakab̄awa ro katunasi,g dou ede loa ^dikangampu wea. 29 Pala sia nggara nakasungge-sunggesi Roh Allah, sia wati loa ^dikangampu! B̄a one rakatuna ro ka^bawana ede eded̄u dosa ma wati loa ^dikangampu.>> 30 Isa nggahi ndedekaina b̄a one wara dou ma nggahi Sia ralu'ukai b̄a roh setan.
Isa Al Masih, Ina lab̄o ari^doho-Na
3:31-35
31 Sawa'u b̄a ede ina Isa ro ari^doho-Na maina. Siad̄oho ngenana ta ari lua ro kauna dou lao ou Isa. 32 Wakatu ede mboto dou ma wunga doho heko Isa. Nggahi siad̄oho d̄i Sia, <<Ruma, ina ro ari-ari Ita wara ta ari lua. Siad̄oho ngupana Ita.>>