Conto ro ibara mab̄oha dou-dou ma karawi cengga hasi nggaro anggo
12:1-12
12
Edempara Isa tampu'una nuntu kai conto ro ibara d̄i sara'a dou matuakaina bangsa Yahudi. Nggahi Isa, <<Waraku sab̄ua dou ma nggud̄a anggo d̄i sab̄ua nggaro, nggaro ede kuta heko b̄a sia. Sawa'u b̄a ede sia ngarina kancoa hid̄i ^dipuakaina anggo, sawa'u b̄a ede tu'una sab̄ua lalare ^dijaga ro ^ditonggukaina nggaro ede. Sawa'u b̄a ede sia kauna pila-pila dou ma karawi cengga hasi nggaro anggona, edempara dou ede laona d̄i dana ro rasa makalai. 2 Rakara wakatu pokekai wua anggo, dou ede kauna lao sab̄ua dou adana aka dou-dou ma karawi wea nggaro ede, d̄imatarima ru'una. 3 Pala dou-dou ma karawi wea ede wa'u ro letona ada dou ede. Edempara ^boe b̄a siad̄oho ada dou ede, ro kauna dula kai rima ntaru. 4 Edempara dou mantau nggaro ede kauna lao sab̄ua adana ma kalai. Pala dou-dou ma karawi wea ede ^boena tuta ada dou ede, edempara katesa kalosana ro i'a ro ^ba'ana. 5 Dou ma ntau nggaro ede kauna lao wali sab̄ua dou adana ma kalai. Pala hade rau b̄a siad̄oho.Ro ndede ncau karawi b̄a siad̄oho d̄i ada-ada ma kalai: wara ra ^boe ro wara rau ra hade. 6 D̄i sab̄ua dou mpa ma watipu lao, eded̄u ana ndaina ra meci ro ca'una. Ndad̄i cumpukaina kauna lao anana ede d̄i dou-dou ma karawi ede. <Tantu ana nahu ^dilia ro horoma b̄a sia^doho,> kananu b̄a sia. 7 Pala dou-dou ma karawi nggaro ede nggahina d̄i sab̄ua lab̄o ma kalaina, <Akeku dou ^dimakapasakana. Mai ndai tahadeku sia, loakud̄u raka b̄a ndai pasakana!> 8 Edempara anana ede wa'u ro leto b̄a siad̄oho, sawa'u b̄a ede hadena. Timbana paki b̄a siad̄oho ari mai b̄a nggaro ede.>>9 Edempara sod̄i b̄a Isa Al Masih, <<Auku d̄ikarawi b̄a dou ma ntau nggaro ede? Tantu sia namai hadeku dou-dou ma karawi nggaro ede, edempara nambeiku nggaro anggo ede d̄i dou makalai. 10 Sab̄ua nggomid̄oho watipu ra bacamu ayat ade Kitab Suci,
<Wadu ma wati ^dikani b̄a dou ma taki tu'u uma
nawa'ura ndad̄i wadu ma sarambakaina.
11 Akeku rawi Ruma;
sab̄ua rawi ma b̄isa ro guna d̄i tando mada ndaita!> >>
12 Edempara sara'a dou matuakaina bangsa Yahudi ma ringa conto ro ibara ede, na'usahaku wa'u ro leto Isa, b̄a one siad̄oho nab̄adeku conto ro ibara ede mab̄oha ndai siad̄oho.Pala siad̄oho nadahuku d̄i dou mamboto. Ndad̄i, siad̄oho lao ro tu'u wi'ina Isa.
Mab̄oha cola bea
12:13-17
13 Pila-pila dou Farisi ro pila-pila dou kalompo Herodes kauna sod̄i loakud̄u b̄ab̄una Isa. 14 Siad̄oho maina d̄i Isa ro nggahina, <<Guru, madad̄oho mab̄adeku Ita dou marombo ro wati dahuta d̄i cou-cou rau b̄a one Ita wati ntanda kalaimu dou, Ita matei kantiriku mab̄oha au ra kane'ekai b̄a Allah Ta'ala d̄i ru'u b̄a manusia. Ita, nggahipu d̄i mada^doho, <Nggahi b̄a agama ndaita, sab̄ua loaku cola bea d̄i Kaisar atao wati? Pab̄uaku ndai colata bea ede atao wati?> >>
15 Isa nab̄adeku siad̄oho dou ma munafik. Cambe b̄a Sia, <<^Ba^bauku nggomid̄oho ne'ekaimu b̄ab̄u Nahu? Teipu d̄i Nahu sab̄ua piti salaka.>>
16 Ndad̄i mbei b̄a siad̄oho d̄i Sia sab̄ua piti salaka. Edempara sod̄i b̄a Isa, <<Gamba pahu ro ngara cou ake?>>
<<Kaisar,>> cambe b̄a siad̄oho.
17 Nggahi Isa, <<Nggara ndedesi, mbeipu d̄i Kaisar au ma ndad̄i ntau Kaisar, ro d̄i Allah Ta'ala au ma ndad̄i ntau Allah Ta'ala.>> Siad̄oho mbora akana ringa nggahi Sia.
Mab̄oha mori mbali sawa'u b̄a made
12:18-27
18 Pila-pila dou d̄i ade kalompo dou Saduki maina d̄i Isa. Siad̄oho eded̄u kalompo dou ma nggahi b̄a one dou ma wa'ura made wati ^dimamori mbali. 19 <<Guru,>> nggahi siad̄oho d̄i Isa, <<Nabi Musa tuntina hukum ake d̄i ru'u b̄a ndaita: <Nggara sab̄ua dou mone namadesi ro wati ntauna ana, ndad̄i arina pab̄uaku nikana lab̄o wei ra tu'u wi'i b̄a sa'ena ede loakud̄u mbeina londo ro mai d̄i ru'u b̄a dou ma wa'ura made ede.> 20 Ntoina waraku pidu dou sa'e ro ari^dohona. Ma sasa'e nikana, edempara madena, kai wati ntauna ana. 21 Edempara ma ka^duakaina nika lab̄o dou siwe mbaru mboha ede, pala sia rau made kai wati ntauna ana. Lampa rawi ma sama ndad̄i rau lab̄o arina ma katolukaina, 22 ndede ncau sampe ma kapidukaina. Cumpukaina ndai dou siwe ede made rau. 23 D̄i ainaina mori mbalikai dou-dou mamade, wei couku dou siwe ede? B̄ara wekina piduna ede nawa'ura nika lab̄o dou siwe ede!>>
24 Cambe b̄a Isa, <<Nggomid̄oho dou ma santuda. B̄ara nggomid̄oho wati loamu ka'ao Kitab Suci ro kuasa Allah Ta'ala. 25 B̄a one nggara dou-dou ma made namori mbalisi, siad̄oho wati d̄imanika ro wati ^dikanika wali, malaisi siad̄oho namori b̄une mala'eka d̄i saroga. 26 Ro mab̄oha dou mamade ^dikamori mbali, sab̄ua watipu rabaca b̄a nggomid̄oho d̄i ade kitab Taurat mab̄oha rompa ma kalea ede? D̄i ade ayat-ayat ede ratunti b̄a one Allah Ta'ala manggahi d̄i la Musa, <Nahuku Allah Ta'ala b̄a la Ibrahim, Ishak ro Allah Ta'ala b̄a la Yakub> 27 Allah Ta'ala ede laina Allah Ta'ala dou mamade. Sia Allah Ta'ala dou mamori. Nggomid̄oho ma ipi podaku santudamu!>>
Parenta ma penti poda
12:28-34
28 Edempara mai sab̄ua dou Ahli Taurat kade'ena nuntu ro nggahi Isa lab̄o dou-dou Saduki ede. Ahli Taurat ede edana b̄a one Isa nawa'ura cambe kai ncihi d̄i dou-dou ede. Ndad̄i sod̄i b̄a sia d̄i Isa, <<Parenta ma b̄eku ma penti poda d̄i samenana parenta?>>
29 Cambe b̄a Isa, <<Parenta ma sarambakaina, eded̄u: <Ringapu, oe bangsa Israel! Allah Ta'ala ndaita eded̄u, Ruma ma kese weki.s 30 Meci ro ca'upu Allah Ta'ala Rumamu kai more ademu, kai samenana nawa ro sarumbumu, kai sara'a fiki ro kananumu ro kai samenana tenggo ro walemu.> 31 Parenta maka^duakaina eded̄u: <Meci ro ca'upu sasamamu manusia, b̄une nggomid̄oho meci ro ca'umu sarumbu ndaimu.> Wati wara walina parenta makalai ma ncewi penti selasi d̄ua mbua parenta ede.>>
32 Edempara ahli Taurat ede nggahina d̄i Isa, <<Ncihi poda, Guru! Napodaku au ra nggahi b̄a Ita: Ruma eded̄u Allah Ta'ala ma kese weki, ro wati wara walina Allah Ta'ala ma kalai. 33 Ro manusia pab̄uaku meci ro ca'una Allah Ta'ala kai more adena, ro kai sara'a fiki ro kananuna ro kai samenana tenggo ro walena. Ro sia rau pab̄uaku meci ro ca'una sasama manusia b̄une meci ro ca'una sarumbu ndaina. Ede nancewi tahopu ntewikaisi lab̄o d̄onggo ro mbei koroba ka'a ro koroba-koroba ma kalai d̄i ru'u b̄a Allah Ta'ala.>>
34 Isa edana b̄a one ahli Taurat ede nawa'ura cambe kai ncihi ro poda. Ro Isa nggahina d̄i sia, <<Nggomi wa'ura ^deni lab̄o Karaja'an Allah.>>
Sawa'u b̄a ede wati wara kone sab̄ua dou rau ma disa wali sod̄i Isa.
Mab̄oha Al Masih
12:35-37
35 Wakatu Isa wunga ngoa ro teina d̄i Bait Allah, Isa nggahina, <<^Buneku ahli-ahli Taurat loakaina nggahi b̄a one Al Masih eded̄u Sangaji Makasalama ede londo ro mai la Daud? 36 Sapodakaina ndai la Daud -- kai kuasa Roh Allah – nggahina,
<Allah Ta'ala manggahi d̄i Rumaku: dohopu d̄i sa^bae wana Nahu,t
sampe Nahu makandad̄ina dou-dou ma musu Nggomi, oko ro dahu d̄i Nggomi.>
37 Ndad̄i, nggara ndai la Daud mapehe Sangaji Makasalama ede <Ruma>, b̄uneku loana Sia londo ro mai la Daud?>>
Ngoa ro kawara loakud̄u aina kabare d̄i ahli-ahli Taurat
12:38-40
Dou mamboto ma wara d̄i Bait Allah ede ^dihi adena ringana ngoa ro tei b̄a Isa. 38 Nggahi Sia d̄i dou-dou ede, <<Aina kabare d̄i ahli-ahli Taurat. Siad̄oho naca'u lampa-lampa kai jumba ma ^dondo, ro naca'u ^dilia ro horoma d̄i amba-amba. 39 Siad̄oho naca'u d̄i hid̄i-hid̄i ta d̄ei tando ade uma sambea ro ibadakai ro d̄i hid̄i-hid̄i ndihakai. 40 Siad̄oho natipuku dou-dou siwe mbaru mboha ro narampaku umana. Ro ^di^bontokaina rawi dab̄ae siad̄oho ede, siad̄oho naca'u sambea ma ^dondo-^dondo. Hukuman d̄i ru'u b̄a siad̄oho ede peasi nataniku!>>
^Donggo ro mbei sab̄ua dou siwe mbaru mboha
12:41-44
(Luk. 21:1-4)
41 D̄i sab̄ua ainaina wakatu Isa doho ncao tandona lab̄o peti hid̄i d̄onggo ro mbeikai d̄i Bait Allah, Isa tio kab̄aena dou-dou makalu'u pitina d̄i ade peti hid̄i taukai d̄onggo ro mbei ede. Mboto dou mantau ro wara makalu'u mboto piti; 42 edempara sab̄ua dou siwe mbaru mboha ma ncoki mori mai rauna. Sia kalu'una d̄ua mbua piti romba, eded̄u piti ece ma cumpukai to'i co'ina. 43 Ndad̄i Isa ouna anamori^doho-Na, edempara nggahina d̄i siad̄oho, <<Tio kab̄aepu ake: Dou siwe mbaru mboha ma ncoki poda mori ede kalu'una d̄i ade hid̄i taukai d̄onggo ro mbei ede nancewi mbotopu ntewikaisi lab̄o ra kalu'u b̄a sara'a dou makalaina. 44 B̄a one siad̄oho sara'a mbeina ma rancewi ra d̄i ntau ro warana. Pala dou siwe mbaru mboha ede konena ipi ncoki morina, sia nambei sara'aku ma wara d̄i ndaina -- sapodakaina ede d̄i paralu b̄a sia d̄i ru'u morikaina.>>