Isa Al Masih katahona sab̄ua dou ma made ^binci
2:1-12
2
Pila-pila nai sawa'u b̄a ede Isa Al Masih lao mbalina aka Kapernaum. Edempara mbou haba b̄a one Sia wara d̄i uma. 2 Ndad̄i mboto dou ma mai. Siad̄oho kanggudu menana weki ta aka sampe watid̄u wara hid̄i wali. Kone d̄i ta^da ncai rau b̄ini cika b̄a dou. Edempara Isa karonggana nggahi ro eli Allah Ta'ala d̄i siad̄oho. 3 Wakatu Isa wunga nuntu ro nggahina, sab̄ua dou ma made ^binci mai wa'a kalei b̄a upa dou d̄i Isa. 4 Pala b̄ara ipi mboto dou, siad̄oho wati loana lu'u, lao raka Isa. Ndad̄i, siad̄oho henggana b̄utu uma ese mai b̄a dohokai Isa. Sawa'u b̄a ede, kalondo b̄a siad̄oho dou ma made b̄inci ede lab̄o dipina. 5 Wakatu eda b̄a Isa na'e imbi siad̄oho, nggahi Sia d̄i dou ma made b̄inci ede, <<Ana-Ku, dosa-dosamu wa'ura kangampu wea.>>6 Pila-pila dou ahli Taurat ma wunga doho d̄i hid̄i ede tampu'ura nggahi d̄ei adena, 7 <<Disa poda dou ake nggahi ndede! Sia nakatuna ro kab̄awaku Allah Ta'ala. Cou ma loa kangampu wea dosa, selasi ndai Allah Ta'ala?>>
8 D̄i wakatu ede wa'u, Isa Al Masih nab̄adeku fiki ro kananu siad̄oho.Edempara nggahi-Na, <<^Ba^bauku nggomid̄oho nggahi ndedekaimu d̄ei ademu? 9 B̄e ma ncewi mo^da: nggahi, <Dosamu wa'ura kangampu wea>, atao nggahi <Tu'ura, hantapu dipimu ro lampara>? 10 Pala ^di^badekai b̄a nggomid̄oho b̄a one ese wawo dunia ake, Nahu Ana Manusia kantau kuasa ^dimakangampu wea dosa.>> Edempara nggahi Isa d̄i dou ma made ^binci ede, 11 <<Tu'ura, hantapu dipimu ro lao dulara!>>
12 Dou ma supu ede tu'u lalona, wehana dipina edempara losana kai sakasi b̄a siad̄oho sara'ana. Dou-dou ede midi adena edempara roi ro wadina Allah Ta'ala. Nggahi siad̄oho, <<Watipu ra eda b̄a ndai lampa rawi b̄une ake!>>
Isa Al Masih recena la Lewi ndad̄i anamori-Na
2:13-17
13 Isa lao walina aka kengge Ndano Galilea. Mboto dou ma mai raka Sia, ro Sia ngoa ro teina siad̄oho. 14 Wakatu Isa wunga lampana d̄i hid̄i ede, Sia edana sab̄ua dou mataki tagi bea, ngarana la Lewi ana la Alfeus, sia wunga dohona d̄i kanto pajak. <<^Batupu Nahu,>> nggahi Isa d̄i sia. Edempara la Lewi tu'u ki^dina ro lao b̄atuna Isa.
15 Wakatu Isa Al Masih wunga ngahana d̄i uma la Lewi,f mboto dou mataki tagi bea ro dou-dou ra wi'ikai b̄a dou kai dou madosa ma b̄atu ngaha sama lab̄o Isa ro anamori^doho-Na, b̄ara mboto d̄i ade weki siad̄oho mab̄atu Isa. 16 Pila-pila dou ahli Taurat ade kalompo Farisi ma'edana Isa ma ngaha sama-sama lab̄o dou-dou mataki tagi bea ro dou-dou ra wi'ikai b̄a dou kai dou ma dosa ede. Ndad̄i siad̄oho sod̄ina d̄i anamori Isa, <<^Ba^bauku gurumu ngaha samakaina lab̄o dou-dou ma taki tagi bea ro dou-dou ma dosa?>>
17 Isa ringana au ra sod̄i b̄a siad̄oho ede, edempara cambe-Na, <<Dou ma taho wati paraluna sando; pala dou ma supu mpa. Nahu maiku laina ^dima'ou dou ma wi'ikai wekina wa'ura taho, malaisi dou ra wi'ikai wati taho.>>
Mab̄oha puasa
2:18-22
18 D̄i sab̄ua ainaina wakatu anamori nabi Yahya ro dou-dou Farisi wunga puasana, edempara wara dou ma mai d̄i Isa ro sod̄ina, <<^Ba^bauku anamori nabi Yahya ro anamori dou Farisi napuasa, pala anamori Ita wati?>>
19 Cambe b̄a Isa, <<Wunga ndiha nika, sab̄ua soba-soba ^bunti mone napuasa? Nggara ^bunti mone nambuipusi wara sama-samana lab̄o siad̄oho, tantu siad̄oho nangaha. 20 Pala d̄imaraka wakatuna ^bunti mone ^diweha ra d̄i woha siad̄oho.D̄i wakatu edeku siad̄oho ampona puasa.
21 Wati wara dou ma nempa ^baju mpasa kai sato^be kaen ma ^bou. B̄ara kaen ra nempakai ede ^dimafi'i ro nakanci'iku ^baju ede, ndad̄ina nanaha na'e nci'ina. 22 Ndede rau wati wara dou ma wi'i anggo mab̄ou d̄i ade ka^du^du huri ma mpasa. B̄ara anggo ma b̄ou ede nakancipaku ka^du^du ede. Cumpukaina sara'a anggo ro ka^du^du iha mpoa. Anggo ma b̄ou pab̄uaku d̄iwi'i ade ka^du^du ma b̄ou rau!>>
Mab̄oha ainaina Sabat
2:23-28
23 D̄i sab̄ua ainaina Sabat, wakatu Isa lampa saina sab̄ua oma gandum, anamorid̄oho-Na pokena gandum. 24 Edempara dou-dou Farisi nggahina d̄i Isa, <<^Ba^bauku anamori^doho-Mu sapakaina hukum agama ndaita, kai karawina ra kantakai d̄i ainaina Sabat?>>
25-26 Cambe b̄a Isa, <<Sab̄ua watipu ra baca b̄a nggomid̄oho au ra karawi b̄a nabi Daud, wakatu la Abyatar mandad̄i Imam Agung. Wakatu nabi Daud ro anamori^dohona hi^do, ro wati ntauna ngaha ro nono, sia lu'una ade Bait Allah, ro ngahana roti ra wa'u d̄onggo ro mbei d̄i Allah Ta'ala. Ro roti ede mbei rauna d̄i anamori^dohona. Sapodakaina atoran agama ndaita, imam-imam mpoa mpa ma loana ngaha roti ede.>>