Ɨkalata jya Paulo
kwa Tito
Ikulongwi itsilongola
Ɨkalata kwa Tito jyavɨgilwe nʉ mpositili ʉPaulo ʉnsɨkɨ ʉpwʉ aale kʉ Makedoniya (1:1, 4). Jivoneka ʉta aavɨgile mu mwaka innie mu myaka ɨgya sitsigo ntanato na gɨhaano (65) ʉkʉsika kʉ sitsigo ntanato na ntanato (66) Waholilwe ʉYɨɨsʉ Kɨlɨsiti. Aambɨgye ʉmuunu ʉvɨ aatambʉlwagwa Tito, ʉmuunu ʉjʉ aale ʉkʉ kʉ Kilete. ɄTito aale Nʼyunaani ʉvɨ iingye ʉVʉkɨlɨsiti (1:4; Vagalatiya 2:3). Aavombile nʉ Paulo ɨmbombo ɨjya Ntwa ʉYɨɨsʉ Kɨlɨsiti isigono syongosu. Ʉnsɨkɨ ʉgʉnge ʉPaulo aansuungʼaga kuvomba ɨmbombo jya Ntwa mu vʉtsenge vʉninie (2 Vakolinto 7:6-15; 8:6, 16-24). Ʉnsɨkɨ ʉgʉnge vaavombaga paninie (Tito 1:5).
Ʉvʉsumbe wa Paulo wa kʉvɨga ɨkalata ɨjɨ, waale wa kʉmbʉʉla ʉTito ʉkʉta amalɨhɨtse ɨmbombo ɨjyʉ vaasigiitse, ʉpwʉ vaale paninie ʉkʉ kʉ Kilete. Ɨmbombo ɨjyo jyale jya kʉhala avandyakoni nʉ kʉvanywilitsa avɨɨdɨki va kʉ Kilete, ʉlwakʉva ʉnsɨkɨ ʉgwa vaahʉmye avamanyisi va vʉnuasi avaalʉsaaga avɨɨdɨki va Yɨɨsʉ Kɨlɨsiti (1:9-16; 3:9-11).