Ɨkalata jya Paulo
kwa Filimoni
Ikulongwi itsilongola
Ɨkalata kwa Filimoni jyavɨgilwe nʉ mpositili ʉPaulo (1, 19, 21). Jivoneka ʉta ʉFilimoni aataamaga mu vʉtsenge wa Kolosai (Vakolosai 4:9). Ʉmuunu ʉjwa aale immosu, ikange aale na vavanda. Ʉmwene aale Nkɨlɨsiti, na mu nyumba jya mwene mwʉ mwene vaalʉndamanaga aVakɨlɨsiti (1:2). ɄPaulo nʉ Filimoni vaamanyingʼiine vʉnonu.
ɄPaulo aavɨgile ɨkalata ɨjɨ ʉnsɨkɨ ʉpwʉ aale mu kɨkʉngwa ʉkʉ kʉ Looma. Ɨkalata ɨjɨ jivoneka jyavɨgilwe mu mwaka ʉgwa sitsigo ntanato na gɨvɨlɨ (62) Waholilwe ʉYɨɨsʉ Kɨlɨsiti. Aavɨgile ɨkalata ɨjɨ kʉ nongwa jya mbanda va Filimoni, ʉvɨ aatambʉlwagwa Onesimo. Ʉmbanda ʉjwa aammɨɨtsye isiinu sininie ʉFilimoni (18), akakɨmbɨla. Kʉmbele, ʉOnesimo vakaagana nʉ Paulo. Pwʉ ʉPaulo akandʉmbɨlɨla ɨLivangɨli ɨlya Yɨɨsʉ Kɨlɨsiti ʉkʉsikila ʉpwʉ ʉOnesimo ikwingila mu Vʉkɨlɨsiti (10).
Mu myaka ɨgyo ʉmbanda angakɨmbɨle kʉ ntwa va mwene, kʉmbele iibatwe, aahɨgwagwa ʉkʉbudwa. Lɨno ʉPaulo wʉ inogwa ʉkʉnkilivula ʉOnesimo kwa Filimoni, akavɨga ɨkalata ɨjɨ nʉ kʉmpa ʉOnesimo ammɨlɨkɨle ʉFilimoni. Mu kalata ɨjyo, ʉPaulo ikʉnʼdoova ʉFilimoni amwʉpɨlɨle ʉOnesimo ndʉ mwana va mu nyumba jya mwene ʉFilimoni, ikange ndʉ lʉkololwe mwa Kɨlɨsiti (16).