4
1 Nʉʉnyie nyɨ vatwa,
muvavombelage avavanda viinyo vʉnonu na kʉ lʉvaatɨko ʉlʉnogelanie.
Mukʉmbʉkage ʉkʉta najyʉnyie vʉvʉle vʉle mulɨ nave ʉNtwa va kʉkyanya.
Ikulongwi itsinge itsilagɨliilwe
2 Munʼdoovage ʉNgʉlʉve isigono syoni,
mutaamage miiho mwɨlyo nʉ kʉnsaana ʉmwene.
3 Mutʉdoovelage najyʉwe pakʉta ʉNgʉlʉve atʉdɨndʉlɨle ɨnzɨla jya kʉlʉmbɨlɨla ɨlimenyu lya mwene,
ɨlyʉ tsʉ kulongwi tsa Kɨlɨsiti itsisihiime.
a Nʉʉne ndɨkʉngilwe pa kulongwi jya kʉlʉmbɨlɨla ikulongwi itso.
4 Mundoovelage ʉkʉta ndɨve na maka ga kʉlʉmbɨlɨla pavʉvalasu ndʉwʉ jɨnogelanie ʉkʉvombwa.
5 Wʉ mulɨ paninie na vaanu ʉwʉ navamwɨdiiki ʉYɨɨsʉ,
mutaamage navo kɨlʉhala ikange muvɨɨke ʉnsɨkɨ ʉgwa gʉve gwʉ vɨ nsɨkɨ gwa kʉlʉmbɨlɨla ɨLivangɨli kʉ vaanu avo.
6 Amamenyu giinyo gave gihovosa ikange gave ganogelanie,
mulʉmanye ʉkʉmwanda vʉnonu ʉmuunu nʉ muunu.
Amamenyu ga Paulo ga kʉ vʉmalɨlo
7 Ʉmwɨdɨkinʼjiitu ʉTikiko ʉnʼgane,
ʉmbombinʼjiitu ʉmmʉʉgʉ,
ʉvɨ tuvomba paninie ɨmbombo jya Ntwa ʉYɨɨsʉ,
ʉjwa vɨ jiikʉvavʉʉla ikulongwi tsyango tsyoni.
8 Ʉvʉsumbe wa kʉnsuungʼa ʉTikiko kwanyie ndinogwa avavʉʉle ʉnyie ikulongwi tsiitu nʉ kʉvanywilitsa ʉnyie mu numbula.
9 Ndikʉnsuungʼa kwanyie paninie nʉ Onesimo,
ʉmwɨdɨkinʼjiitu ʉnʼgane ikange ʉmmʉʉgʉ,
ʉvɨ muunu va kwanyie.
Avo wʉ jʉvikʉvavʉʉla gooni ʉgwʉ givombeka paawe apa.
10 ɄAlisitaliko,
ʉnkʉngwanʼjyango,
ikʉvasaamusa.
Namwene ʉMaliko,
ʉmɨtsive va Balinaba ikʉvasaamusa.
Mumalile ʉkwʉpɨlɨla itsilagɨliilwe itsʉ tsikʉntsova ʉMaliko,
ʉkʉta alaava ikwitsa kwanyie mwitse mumwʉpɨlɨle vʉnonu.
11 Namwene ʉYoshua ʉvitambʉlwa Yusito,
ikʉvasaamusa.
Mulʉmanye ʉkʉta avaanu vaninie mu Vayahudi ʉwʉ vʉpɨlye ʉlwɨdɨko,
ava veene wʉ vivomba ɨmbombo jya Lʉdeeva lwa Ngʉlʉve paninie nʉʉne.
Avo vikʉnnanga siitso ʉne.
12 Ikange ʉEpafula,
ʉmuunu va kwanyie,
ʉmbombi va Mesiya ʉYɨɨsʉ,
ikʉvasaamusa.
Ɨkɨgono nɨ kɨgono ikɨkupila ʉkʉvadoovela ʉnyie ʉkʉta munywilile,
ikange muve vakangasu nʉ kʉleka ʉkʉva vadwatsi kʉ gooni ʉgwʉ ʉNgʉlʉve inogwa ʉnyie muvombage.
13 Ndikʉmbona igaha ʉlwʉtsi ʉkʉvatanga ʉnyie na vaanu va vʉtsenge wa Laodikiya na va vʉtsenge wa Hielapoli.
14 ɄLuuka ʉntʉngʼania viitu ʉnʼgane,
nʉ Dema vikʉvasaamusa.
15 Muvasaamuse avalʉkololwitu mu lwɨdɨko ava kʉ Laodikiya.
Ikange musaamuse ʉNimufa ʉmmaatsa viitu mu lwɨdɨko nʉ mpelela ʉgwʉ gulʉndamana mu nyumba jya mwene.
16 Wʉ jyɨmbilwe ɨkalata ɨjɨ kwanyie,
mwɨmɨɨlɨle pakʉta nagwene ʉmpelela gwa Laodikiya gwɨmbe ɨjyo.
Nʉʉnyie ikange mulonde ɨnzɨla jya kwɨmba ɨkalata ɨjyʉ vʉpɨlye aveene.
17 Mumbʉʉle ʉAlikipo ʉkʉta amale vʉnonu ɨmbombo ɨjyʉ ʉNtwa aampye mu Vʉkɨlɨsiti wa mwene.
18 Ʉlʉsaamuso ʉlʉkonga ndɨvɨgile nɨ kɨvoko kyango jyʉne:
Ndikʉvasaamusa ʉne ndɨ Paulo.
Mukʉmbʉkage ʉkʉta ndɨkʉngilwe mu kɨkʉngwa.
Ʉlʉhʉngʉ lwa Ngʉlʉve lʉve paninie nʉʉnyie.