Ʉkʉtaama mu wʉʉmi ʉvʉpya kʉ maka ga Yɨɨsʉ Kɨlɨsiti
3
1 Lɨno ʉlwakʉva ʉNgʉlʉve avatsʉʉsiitse paninie nʉ Kɨlɨsiti,
londagi isya kʉkyanya,
ʉkwʉ ʉKɨlɨsiti ataamile kʉ kɨvoko ɨkya kʉndyo kya Ngʉlʉve,
apoonu pa wɨɨmɨkiwa ʉvʉlʉti.
2 Ʉnsɨkɨ gwoni musaagage isiinu sya kʉkyanya.
Kwʉ baako ʉkʉtsiga musaaga isiinu sya mu kɨlʉnga ʉmʉ,
3 manya ʉvʉmuunu wiinyo wa katale vʉsilile.
Lɨno mutaama paninie nʉ Kɨlɨsiti pamiiho ga Ngʉlʉve.
Napeene,
ʉvʉtaamo ʉwa paninie nʉ mwene navʉlɨ pavʉvalasu.a
4 Ʉwʉʉmi wiinyo vuhʉmana nʉ Kɨlɨsiti.
Ʉnsɨkɨ ʉpwʉ alavoneka,
pwʉ najyʉnyie mulavoneka paninie nʉ mwene mu wɨɨmɨkiwa wa mwene.
5 Lɨno mwɨlekelwe ʉkʉvombela ɨmihana giinyo imbombo tsa kɨlʉnga,
ndʉ vʉligu,
ʉvʉkolelanie,
ʉvʉnogwe ʉvʉviivi wa mmana,
amasaago amaviivi nʉ mwojo ʉgwʉ gwene gʉlɨ ndʉ kwɨsaja kʉ mingʉlʉve.
6 Pa kulongwi itso,
ʉlʉvʉngʉ lwa lʉviipo lwa Ngʉlʉve lukʉviitsila avaanu ʉwʉ navikʉmwɨdɨkɨla.
7 Nʉʉnyie kʉnsana ʉkwa mwavombaga ago mu vʉtaamo wiinyo ʉpwʉ mwalongotsiwaagwa naago.
8 Lɨno mwɨlekelwe lwoni ʉkʉva vaanu avanya lʉviipo,
avanya ligoga,
avanya kɨsilaani,
avanya kɨvini na vanya madʉsi.
9 Ikange muleke ʉkʉvʉʉlana ʉvʉnuasi,
ʉlwakʉva ʉnyie lɨno mupokilwe ʉkʉhʉma mu vʉmuunu wa katale wa vʉtulanongwa ni mbombo tsa weene,
10 muswalile ʉvʉmuunu ʉvʉpya.
b ɄNgʉlʉve avɨɨkile ʉvʉmuunu ʉvʉpya ʉwa mu nʼgati mwanyie,
nʉ kʉvapelela muve ndʉ mwene,
pakʉta mummanye vʉnonu ʉvɨ ʉmwene vɨ Mpeli viinyo.
11 Pwʉ lɨno nakʉkʉli ʉkʉleka ʉkʉhwanana kʉ Nʼyahudi nʉ vɨ atava Nʼyahudi,
kʉ vɨ atahiliiwe nʉ vɨ natahiliiwi,
kʉ mpooma,
kʉ muunu va vʉvʉle,
kʉ mbanda na kʉ mbopolwa.
Apeene ʉKɨlɨsiti vɨ ndʉti kʉ vooni,
ikange vɨ alɨ mu nʼgati mu vooni.
12 Lɨno ʉlwakʉva mulɨ vahalwa va Ngʉlʉve,
ikange vavalatse ʉwʉ avaganile,
muveetsage vaanu viipa,
avanya kɨsa,
avanya lwɨjiso,
avadeke nʉ wʉ visipilanila.
13 Ɨngave muvipitsiinie,
musipilanilage nʉ kʉsyɨkɨlanila.
Musyɨkɨlanilage ndʉwʉ ʉNtwa aavasyɨkye ʉnyie.
14 Ɨlivaha ʉkʉlʉtɨɨlɨla mwago gooni mugananage,
manya ʉlʉgano lwʉ lwipela ʉvʉhange ʉvʉkwɨlanie.
15 Ʉlʉnotsehetso lwa Kɨlɨsiti lʉvalongotsaage mu numbula tsiinyo,
ʉlwa lwʉ mwɨlangɨliilwe ʉkʉva mmana mpamato.
Ikange muve vaanu avikʉnsaana ʉNgʉlʉve.
16 Ɨlimenyu lya Kɨlɨsiti lɨtaamage mu nʼgati mwanyie kʉ wongosu.
c Mumanyiisaniage,
nʉ kʉvʉngana mu lʉhala lwoni.
Munsaanage ʉNgʉlʉve mu numbula tsiinyo nʉ kʉmwɨmbɨla.
Mumwɨmbɨlage izabuli,
inyɨmbo tsa mu sitabu ni nyɨmbo inyagʉlano.
17 Agaveetsaga ʉgwʉ mwitsova,
evo ʉkʉvomba,
gooni ago gave gikʉmwɨmɨka ʉNtwa ʉYɨɨsʉ,
ikange munsaanage ʉDaada ʉNgʉlʉve ʉkʉgendela mu mwene.
Ʉgwʉ ganogye ʉkʉvombwa mu mpelela gwa Vakɨlɨsiti
18 Ʉnyie nyɨ vadala,
vapʉlɨkagi avagoosi viinyo ndʉwʉ jinogela kʉ vaanu ʉwʉ vikʉmwɨdɨka ʉNtwa ʉYɨɨsʉ.
19 Nʉʉnyie nyɨ vagoosi,
vaganagi avadala viinyo,
mulekage ʉkʉva vakali kʉ veene.
20 Nʉʉnyie nyɨ vaana,
vapʉlɨkagi avahotsi viinyo mu gooni,
ʉlwakʉva ʉkʉvomba ndavʉle kukʉmmovosa ʉNtwa ʉYɨɨsʉ.
21 Nʉʉnyie nyɨ vahotsi,
mulekage ʉkʉvaviipitsa avaana viinyo,
pakʉta valeke ʉkʉkiliitala inumbula.
22 Nʉʉnyie nyɨ vavanda,
vapʉlɨkagi avatwa viinyo va mu kɨlʉnga mu mbombo tsyoni,
mulekage ʉkʉvomba ndavʉle peene wʉ vikʉvavona,
pakʉta mwɨvonie ʉkʉta mukʉvɨɨdɨkɨla.
Apeene muvɨɨmɨkage sikutsooni kʉ numbula jyoni pa kulongwi jya kʉmwɨmɨka ʉNtwa ʉYɨɨsʉ.
23 Ɨkɨveetsaga ɨkyʉ muvomba,
vombagi kʉ numbula jyoni,
ndʉ kʉmbombela ʉNtwa,
mulekage ʉkʉvomba pa kulongwi jya muunu.
24 Mukʉmbʉkage ʉkʉta alavapa ʉvʉhaale,
manya ʉKɨlɨsiti ʉvɨ mukʉmbombela vɨ Ntwa va jɨlweli.
25 Lɨno ʉvaveetsaga ʉvɨ ivomba ʉvʉtulanongwa alʉʉpɨlɨla ʉkʉkongana nʉ vʉtulanongwa wa mwene,
ʉlwakʉva ʉNgʉlʉve nitengelela ʉmuunu ʉvaveetsaga.