Ɨkalata jya Paulo
kʉ Vakolosai
ɄPaulo ikʉvasaamusa aVakolosai
1
1 Ɨkalata ɨjɨ jɨhʉmile kwawe,
ʉne ndɨ Paulo,
ndɨ ʉNgʉlʉve annyɨlangile pa vʉnogwe wa mwene ndɨve mpositili va Mesiya ʉYɨɨsʉ na kʉ mwɨdɨkinʼjiitu ʉTimoti.
2 Tukʉvavɨgɨla ʉnyie nyɨ vɨɨdɨki va Ngʉlʉve nyɨ mutaama mu vʉtsenge wa Kolosai,
nyɨ vajiitu pa kʉmwɨdɨka ʉYɨɨsʉ Kɨlɨsiti,
ikange nyɨ vahʉʉgʉ.
Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu,
siveetsage nʉʉnyie.
Ʉlʉdoovo nʉ lʉsaano
3 Tukʉnsaana ʉNgʉlʉve ʉDaada va Ntwa viitu ʉYɨɨsʉ Kɨlɨsiti,
isigono syoni,
wʉ tukʉvadoovela kʉ mwene.
4 Tuvomba ewo ʉlwakʉva tʉpʉliike ikulongwi tsa lwɨdɨko lwinyo kwa Mesiya ʉYɨɨsʉ ni tsa lʉgano lwinyo kʉ vaanu vooni va Ngʉlʉve.
5 Ʉlwɨdɨko nʉ lʉgano ʉlwa lwɨmile mu nyʉʉve jya lwokelo ʉlwʉ ʉNgʉlʉve avavɨɨkye kʉkyanya.
Ʉnyie mwapʉliike ikulongwi tsa nyʉʉve ɨjyo ʉkʉhʉma pa vʉtengʉlɨlo ʉpwʉ mwalʉmbɨliilwe ʉwajɨlweli wa Livangɨli.
6 ƗLivangɨli ɨlyo ɨlyasiike kwanyie,
lɨno livaala kʉ vaanu va sivʉmbʉkʉ syoni.
Ligendelela ʉkʉvaandʉla avaanu avo ndʉwʉ lɨgendelye ʉkʉvaandʉla ʉnyie ʉkʉhʉma pa kɨgono kɨlya ɨkyʉ mwapʉliike ɨLivangɨli ɨlyo ɨlya lʉhʉngʉ lwa Ngʉlʉve nʉ kʉlʉmanya ʉwajɨlweli wa lyene ʉmwʉ vʉveelye.
7 Mwamanyie ɨLivangɨli ɨlyo ʉkʉhʉma kʉ mbombinʼjiitu ʉnʼgane ʉEpafula,
ʉvɨ mbombi mmʉʉgʉ va Kɨlɨsiti pa kʉtwɨmɨɨlɨlɨla ʉkʉvomba ɨmbombo ɨjyʉ jivombwa kwanyie.
8 Ʉmwene vɨ atʉvʉʉlile ikulongwi tsa lʉgano lwinyo ʉlwihʉma kwa Mepo ʉMbalatse.
9 Pa kulongwi ɨjyo tukʉvadoovela isigono syoni ʉkʉhʉma ʉnsɨkɨ ʉgwʉ twapʉliike ikulongwi tsyanyie.
Tukʉvadoovela ʉkʉta ʉNgʉlʉve avape ʉvʉmanyi wooni kʉ galya ʉgwʉ inogwa ʉmwene,
nʉ lʉhala lwoni nʉ vʉmangʼanyi ʉkʉhʉma kʉ Mepo ʉMbalatse.
10 Tukʉvadoovela ndavʉle pakʉta mu wʉʉmi wiinyo muweesaage ʉkʉva vaanu avanya lʉgendo ʉlʉnonu ʉlukʉmwɨmɨka ʉNtwa nʉ kʉmmovosa.
Mugendelelage ʉkʉvomba imbombo inonu itsi niitsi nʉ kwongeletsa ʉkʉmmanya ʉNgʉlʉve.
11-12 Ikange tukʉvadoovela ʉkʉta ʉNgʉlʉve avatangage kʉ maka amɨɨmɨkiwa ga mwene muweesaage ʉkʉsipa mu gooni,
kʉnʉ munsaanage ʉDaada kʉ lʉhekelo ʉlʉlʉti.
Ʉmwene avatangile ʉnyie munogele ʉkwingila mu vʉhaale ʉwʉ aavanotsehiitse avaanu va mwene mu Lʉdeeva lwa lʉmuli.
13 ɄNgʉlʉve aatʉpokile ʉkʉhʉma mu lʉdeeva lwa ngʼiisi,
akatʉhaamya nʉ kʉtwingitsa mu Lʉdeeva lwa Mwana va mwene ʉnʼgane.
14 ɄMwana ʉjwa vɨ mwene atʉgombwe,
kwʉ kʉta tʉgombwilwe nʉ kʉsyɨkɨlwa imbiivi tsiitu.
Ɨmbombo nʉ wɨɨmɨkiwa wa Mwana va Ngʉlʉve
15 ɄMwana va Ngʉlʉve vɨ ivonia pavʉvalasu ʉmwʉ aveelye ʉNgʉlʉve ʉvɨ nivoneka.
Ʉjwa ʉMwana va Ngʉlʉve vɨ ndʉti ʉvɨ alɨ nʉ vʉtavʉlɨlwa kʉ sipeliwa syoni.
16 Ʉkʉhʉmana nʉʉjwa ʉMwana va Ngʉlʉve,
ʉNgʉlʉve aapelile isiinu syoni,
isilɨkwo kʉkyanya ni silɨmwo mu kɨlʉnga,
isivoneka ni sitava sivoneka,
ɨngave wʉ vʉtavʉlɨlwa,
evo wʉ vʉtwa,
evo wʉ wɨɨmɨkiwa evo gwʉ maka.
a
ɄNgʉlʉve aapelile syoni ʉkʉhʉmana nʉ mwene ʉMwana va mwene,
ikange kʉ vʉginiwa wa mwene.
17 Ʉmwene aalepwo wʉ syoni sikaanale ʉkʉpelwa,
ʉmwene vɨ ndongotsi va siinu syoni,
ikange vɨ ikʉsyaganitsa paninie isiinu syoni mu vʉlongotsi wa mwene.
18 Ʉmwene vɨ ntwe gwa mmana,
kwʉ kʉta gwa mpelela,
ʉmwene vɨ vʉtengʉlɨlo wa mpelela,
ikange vɨ ntatsi ʉkʉtsʉʉka ʉkʉhʉma kʉ vaswe,
pakʉta ave vɨ ndongotsi ʉndʉti va syoni.
19 Lola waale vʉnogwe wa Ngʉlʉve ʉkʉta,
ʉvʉkwɨlanilo wooni wa mwene ʉNgʉlʉve vʉve mu Mwana va mwene.
20 Ikange kʉ nzɨla jya Mwana va mwene ʉjwa,
ʉNgʉlʉve asisajiinie isiinu syoni nʉ mwene,
isiinu isilɨmwo mu kɨlʉnga ʉmʉ evo isilɨ kʉkyanya.
Kwʉ kʉta aavɨɨkile ʉlʉnotsehetso
kʉ nzɨla jya nkisa gwa Mwana va mwene ʉgwʉ gwaduudiike pa kɨdamingʼanie.
21 Kʉnsana ʉkwa najyʉnyie mwale kʉvʉtale nʉ Ngʉlʉve ikange mwale valʉgʉ va mwene,
kʉ nongwa jya masaago nʉ lʉgendo lwinyo ʉlʉviivi.
22 Lɨno ʉNgʉlʉve aavasajiinie nʉ mwene kʉ nzɨla jya mmana gwa Kɨlɨsiti,
kwʉ kʉta ʉkʉswa kwa mwene.
Aavombile ewo pakʉta avaleete pavʉlongolo pa mwene mulɨ vavalatse,
mutsila vʉviivi ʉvʉveetsaga pange kʉtsowa sivi.
23 Lɨno mugendelelage ʉkʉtaama mu lwɨdɨko,
mukangalage nʉ kʉva na maka.
Muleke ʉkwɨdɨka ʉkʉjɨleka ɨnyʉʉve ɨjyʉ jyaviitsye ʉpwʉ mwapʉliike ɨLivangɨli.
Ɨlɨ lyʉ Livangɨli ɨlyʉ lyalʉmbɨliilwe kʉ vaanu vooni va mu kɨlʉnga,
ikange ɨlyo lyʉ lyene ɨlyʉ ʉne ndɨ Paulo ndɨlɨ ndʉmbɨlɨli va lyene.
Ɨmbombo jya Paulo mu mipelela
24 Lɨno ndɨlɨ nʉ lʉhekelo ʉlwakʉva ndikʉvɨlwa pa kulongwi jya lʉvʉmbʉlɨlo lwanyie.
Kʉlɨ vʉkʉvɨlwa ʉvʉlɨ pongosu ʉwʉ aVakɨlɨsiti vikwagana nawo.
Mu mmana gwango nditangɨla ʉkʉdɨtsɨlɨtsa itsikeepile mu vʉkʉvɨlwa wa Kɨlɨsiti kʉ nongwa jya mmana gwa mwene,
kwʉ kʉta ʉmpelela gwa mwene.
25 ɄNgʉlʉve ambɨɨkile ʉne ndɨve mbombi va mpelela ʉgwa,
pakʉta ndɨvalʉmbɨlɨlage ɨlimenyu lya mwene ndʉwʉ lɨlɨwo.
26 Ɨlimenyu ɨlyo lyasihamiike ʉnsɨkɨ gwoni gwa katale na kʉ vaanu vooni,
apeene lɨno lɨvɨɨkilwe pavʉvalasu kʉ vɨɨdɨki va Ngʉlʉve.
27 ɄNgʉlʉve aanogilwe valʉmanye ʉkʉta ʉvʉmosu nʉ wɨɨmɨkiwa wa Kɨlɨsiti vulotsa nakʉ kʉ vaanu avatava Vayahudi.
Ikulongwi tsa kʉvʉtiitu itso vɨ Kɨlɨsiti ʉvɨ alɨ mu nʼgati mwanyie,
ikange vɨ ikʉvapa ɨnyʉʉve jya kwingila mu vʉtaamo wa mwene ʉvʉdwadwa.
28 ɄKɨlɨsiti ʉjwa vɨ mwene tulʉmbɨlɨla ikulongwi tsa mwene,
tukʉvapa ɨlivʉngʉ nʉ kʉvamanyiisa avaanu vooni kʉ lʉhala lwitu lwoni.
Tuvomba ewo pakʉta tʉvaleete vooni pavʉlongolo pa Ngʉlʉve wʉ vanogelanie ʉkʉkongana na galya ʉgwʉ ʉYɨɨsʉ Kɨlɨsiti avavombye.
29 Pa kulongwi ɨjɨ ndikɨkupila ʉkʉvomba ɨmbombo ʉkʉkongana na maka amalʉti ga Kɨlɨsiti ʉgwʉ amye.