Ɨkalata jya Paulo
kʉ Vakolosai
Ikulongwi itsilongola
Ɨkalata jya Vakolosai jyavɨgilwe nʉ mpositili ʉPaulo (1:1). Aavɨgile ɨkalata ɨjɨ wʉ alɨ mu kɨkʉngwa ʉkʉ kʉ Looma. Jivoneka ʉkʉta aavɨgile mu mwaka gwa sitsigo ntanato (60) Waholilwe ʉYɨɨsʉ Kɨlɨsiti. Ʉvʉtsenge wa Kolosai waale mu mpandʉlʉ gwa kʉ Asiya. ɄPaulo jyʉmwene naasike nʉ kʉmanyiisa ʉkʉ kʉ Kolosai, apeene ʉEpafula vɨ aatengʉliitse ʉmpelela ʉgʉ.
Ʉnsɨkɨ ʉPaulo alɨ mu kɨkʉngwa, ʉEpafula akiitsa akaaganila nʉ Paulo. Akambʉʉla ikulongwi tsa vamanyisi va vʉnuasi ʉwʉ vaavahangajɨsaaga avɨɨdɨki va Yɨɨsʉ va kʉ Kolosai. Pagati pa vɨɨdɨki avo, vaalepwo nava Vayunaani nava Vayahudi. Pwʉ ava vaanogwagwa ʉkʉhanzɨlɨngʼania imanyiiso tsa Yɨɨsʉ ni manyiiso tsa mipelela gya veene gya katale.
AVayahudi vɨɨvalɨlaga ʉkʉta aveene wʉ vahalwa va Ngʉlʉve. Pwʉ valɨkʉdaja valɨkʉta, nʉpwʉ jɨngave ʉmuunu nkongi va Yɨɨsʉ, nakaweese ʉkwɨdɨkiwa nʉ Ngʉlʉve kɨtsila kʉtahiliwa nʉ kʉkonga indagɨlo ni nyiiho tsa Kɨyahudi. AVayunaani naveene vaateetsaga, ʉlwakʉva ʉNgʉlʉve mbʉla mbiivi, pwʉ naale iweesa ʉkʉpela ɨkɨlʉnga ɨkyʉ vaakɨvonaga kɨnya mbiivi. Ikange vaateetsaga ʉmmana gwa muunu gʉlɨ ni mbiivi, pwʉ lɨno najɨkaale jiweesekana ʉYɨɨsʉ ave Ngʉlʉve ikange ataamage mu kɨlʉnga, ndʉ muunu.
Ʉkʉkongana nɨɨlyo, ʉPaulo ikwanda imanyiiso itso kʉ nzɨla jya kʉganula ɨkulongwi jya Yɨɨsʉ. Itsova iita ʉYɨɨsʉ Kɨlɨsiti vɨ Ngʉlʉve, vɨ aapelile ɨkɨlʉnga, ikange vɨ Mbaha va sipeliwa syoni. Aataamile mu kɨlʉnga, aale muunu, ikange aasue kʉ nongwa jya mbiivi tsiitu pakʉta tʉsyɨkɨlwe imbiivi itso. Ʉgwavombile ʉYɨɨsʉ gakwɨlye lwoni ʉkʉtʉpoka ʉwe. Ʉmuunu angamwɨdɨke ʉYɨɨsʉ, ʉNgʉlʉve ikʉmwɨdɨkɨla. Kʉtsila lʉvʉmbʉlɨlo ʉlwihʉma mu kʉtahiliwa pange mu kʉkonga indagɨlo evo inyiiho itsiveetsaga.
ɄPaulo ikʉvavʉʉla avakongi iita ndajɨve ndeeti valʉleke ʉlʉgendo ʉlʉviivi lwa vʉmuunu, apeene vataamage ʉvʉtaamo ʉvʉpya ʉwa kʉmmovosa ʉNgʉlʉve. Iganula itsi kʉ nzɨla jya kʉmanyiisa ʉkʉta avagoosi na vadala, avahotsi na vaana, avagatsu na vamosu, vatanganage.