4
1 Pwʉ lɨno,
mwe vɨɨdɨkivajyango,
ndɨlɨ nʉ vʉsʉʉkwa wa kwaganila nʉʉnyie.
Ʉnyie mulɨ lʉhekelo kange mulɨ lwokelo lwango ʉlwʉ ndɨpeevilwe pa mbombo ɨjyʉ ndɨvombile.
Lɨno vagane vango,
mugendelelage vʉle vʉle ʉkʉnywilila pa kʉmmʉʉvɨla ʉNtwa.
Ʉlʉpavɨlo lwa Paulo
2 Ndikʉvadoova siitso ʉEwodiya nʉ Sintike vapʉlɨngʼanage,
manya vooni vikʉnkonga ʉNtwa ʉYɨɨsʉ.
3 Najyʉve vɨ mbombinʼjyango va lweli,
ndikʉkʉdoova ʉvatange avadala vavɨlɨ avo vapʉlɨngʼanage.
Avo wʉ vavɨlɨ vakɨjʉmɨɨliitse siitso pa mbombo paninie nʉʉne,
wʉ tupʉlɨsa ɨLivangɨli lya Yɨɨsʉ Kɨlɨsiti kʉ vaanu.
Ikange avadala avo vakavombaga siitso imbombo paninie nʉ Kilementi na vavombivajyango avange ʉwʉ tʉkatanganaga pa mbombo ɨjyo.
Avaanu avo vooni,
ʉNgʉlʉve avɨgile amataawa ga veene mu kɨtabu kya wʉʉmi.
4 Hekelagi isigono syoni ʉlwakʉva mulɨ vaanu va Ntwa ʉYɨɨsʉ,
ikange ndiita hekelagi!
5 Ʉvʉdeke wiinyo vʉmanyikikage kʉ vaanu vooni.
ɄNtwa ʉYɨɨsʉ alɨ piipi.
6 Muleke ʉkʉtʉngʉtsiima pa kɨɨnu ɨkɨveetsaga,
apeene mu gooni muveetsage vaanu va kʉnʼdoova ʉNgʉlʉve.
Munʼdoovage tsilya itsʉ musumbilwe,
ikange munsaanage pa tsilya itsʉ avombile.
7 Piitso tsyoni,
ʉNgʉlʉve jiikʉvapa ʉlʉnotsehetso ʉlʉvaha siitso,
ʉlʉlʉtɨɨlye ɨkɨgelelo kya kʉlʉmanya.
Ʉlwa jʉlukʉvʉʉvatɨla muleke ʉkʉdwada mu numbula tsiinyo evo ʉkʉtʉngʉtsiima mu masaago giinyo ʉnsɨkɨ gwa vʉpala,
manya ʉnyie mulɨ vaanu va Mesiya ʉYɨɨsʉ.
8 Kʉ vʉmalɨlo,
mwe vɨɨdɨkivajyango,
isiinu isya jɨlweli,
isiinu isinogelanie ʉkwɨmɨkiwa,
isiinu isya vʉgolosu,
isiinu isyʉ nasihangili nʉ vʉtulanongwa,
isiinu isihovosa ikange sitsowa ʉvʉnonu wa syene,
isiinu isyʉ sinonu,
isyo syʉ siveetsage siinu sya kʉsivɨɨka mu masaago giinyo.
9 Mugendelelage ʉkʉvomba tsilya itsʉ mwamanyie nʉ kwʉpɨlɨla ʉkʉhʉma kwane,
tsilya itsʉ mwapʉliike kwane,
ikange mwambwene ndikʉtsivomba.
ɄNgʉlʉve ʉvɨ ikʉvapa ʉlʉnotsehetso jiigendelela ʉkʉva paninie nʉʉnyie.
ɄPaulo ikʉvasaana aVafilipi
10 Ndihekela siitso nʉ kʉnsaana ʉNtwa ʉlwakʉva lɨno,
kʉ vʉmalɨlo,
mutengwe ikange ʉkʉnsaagɨlɨla ʉne.
Jɨlweli,
isigono syoni mukansaagɨlɨlaga,
lɨno mulɨkʉlemwa ɨnzɨla jya kʉsuungʼa ʉlʉtangɨlo lwinyo kwane.
11 Nanditsova ewo ʉlwakʉva lɨno isiinu sikeepile kwane,
baako.
Ʉne ndɨmanyie ʉkwɨdɨngʼana nɨ lɨveetsaga ɨlikʉnnyitsila.
12 Kwʉ kʉta lɨno ndɨmanyie ʉkʉtaama mu vʉgatsu,
ikange ndɨmanyie ʉkʉtaama mu vʉmosu.
Ndɨmanyie ʉkwɨdɨngʼana ni tsyoni itsikʉnnyitsila,
jɨve nsɨkɨ gwa nzala,
evo nsɨkɨ gwa kwiguta,
ʉnsɨkɨ gwa kʉva nasyo isiinu syoni isyʉ ndinogwa,
evo nsɨkɨ gwa kʉkeepa isiinu isyo.
13 Ndiweesa ʉkʉvomba tsyoni itso,
ʉlwakʉva ʉKɨlɨsiti vɨ ikʉʉma amaka.
14 Paninie nɨɨlyo,
mukavombile vʉnonu pa kʉnnanga mu vʉpala ʉwʉ ndɨkaale nawo.
15 Ndʉwʉ mulʉmanyile ʉnyie nyɨ Vafilipi,
palya ʉpwʉ ndyatengwe ʉkʉvalʉmbɨlɨla ʉnyie ɨLivangɨli,
na palya ʉpwʉ ndyahʉmile mu kɨlʉnga kiinyo kya Makedoniya,
ʉnyie nyɨ veene nyienye mwannangaga.
Ʉmpelela gwinyo gwene gwʉ gwale nʉ vʉpamato nʉʉne pa kʉhʉmya nʉ kwʉpɨlɨla isiinu.
16 Nʉpwʉ ndyale mu vʉtsenge wa Tesalonike,
kavɨlɨ kavɨlɨ mwansuungʼilaga ʉne isiinu sya kʉnnanga.
17 Nanditsova ewo pakʉva ndinogwa mugendelelage ʉkʉʉma isiinu,
baako.
Apeene ndinogwa ʉkʉta ndɨlʉvonage ʉlʉsajo ʉlwʉ ʉNgʉlʉve ikʉvapa ʉkʉhʉma mu wiipa wiinyo.
18 Lɨno,
isiinu silya syoni isyʉ mukansuungʼie kʉ nzɨla jya Epafulodito,
ndɨsyʉpɨlye.
Sikwɨlye ʉkʉmala ʉvʉsumbe wango wooni,
ikange isinge sisigye.
Ʉlʉtangɨlo ʉlwa lʉvye ndɨ neekelo ɨjɨnogelanie kwa Ngʉlʉve,
ɨjɨlɨ nʉ lʉnuusi ʉlʉnonu,
ɨjikwʉpɨlɨlwa,
ikange jikʉmmovosa.
19 Lɨno,
kʉ nzɨla jya Mesiya ʉYɨɨsʉ,
ʉNgʉlʉve vango,
jiikʉvapeetsaga gooni ʉgwʉ mulonda ʉkʉva nago,
ʉkʉkongana nʉ wɨɨmɨkiwa ʉvʉlʉti wa mwene.
20 ɄNgʉlʉve,
ʉDadajiitu va kʉkyanya,
aginiwaagwe sikutsooni na sikutsooni!
Ameni!
Amamenyu ga vʉmalɨlo
21 Muvasaamuse avɨɨdɨki vooni va Mesiya ʉYɨɨsʉ avalɨ kʉ Filipi.
Avɨɨdɨki ʉwʉ valɨ paninie nʉʉne apa,
naveene vikʉvasaamusa.
22 Ikange avɨɨdɨki vooni va Ngʉlʉve avitaama mu vʉtsenge ʉvʉ vikʉvasaamusa,
siitso avitaama mu nyumba jya nkʉlʉdeeva ʉKaisali.
23 Ʉlʉhʉngʉ lwa Ntwa ʉYɨɨsʉ Kɨlɨsiti lʉveetsage paninie nʉʉnyie.
Ameni!