ɄPaulo ikʉmmʉʉvɨla ʉKɨlɨsiti
3
1 Pwʉ lɨno,
mwe vɨɨdɨkivajyango,
hekelagi ʉlwakʉva mulɨ vaanu va Ntwa ʉYɨɨsʉ.
Amamenyu ʉgwʉ ndɨkamalile ʉkʉvavɨgɨla,
nandɨkagatale ʉkʉkilivukila ʉkʉvavɨgɨla,
manya ago lwʉ lwʉvatɨlo lwinyo lwa lwɨdɨko.a
2 Muveetsage miiho na valya avavyʉta vanyapanzi,
avavombambiivi,
avinywilitsa ikulongwi tsa kʉtahili.b
3 Lola,
ʉwe weewe vɨɨdɨki va Ngʉlʉve jɨlwelic nʉ Mepo ʉMbalatse ikʉtʉtanga ʉkwɨsaja kwa Ngʉlʉve.
Ʉwe tukɨginihitsa ʉMesiya ʉYɨɨsʉ nʉ kʉmmʉʉvɨla.
Ʉwe natuhʉʉvɨla imbombo tsiitu tsa mmana pa kʉkava ʉvʉpoki,
4 nʉpwʉ jɨngave ʉne ndɨlɨ nawo ʉwɨɨmɨlo wa kʉhʉʉvɨla itsa mmana.
Lɨno,
angave pwale ʉmuunu ʉvɨ ikɨvona alɨ natso imbombo tsa mmana itsinogelanie ʉkʉtsihʉʉvɨla,
ʉne ndɨkaale va kʉtsihʉʉvɨla ʉkʉlʉtɨɨlɨla ʉmuunu ʉjwa.
5 Ʉne ndyatahiliiwe wʉ ndɨsikiitse isigono innaana (8) ʉkʉhʉma ndɨholwagwe,
ndihʉma mu kɨvʉmbʉkʉ kya Benyamini,
mu vaanu va kɨlʉnga kya Isilahɨli.
Ʉne ndɨlɨ Mwebulaniya jɨlweli.
Pa kʉtsikonga indagɨlo tsa Moose,
ʉne ndyatsiibataga vʉnonu,
manya ndyale Falisayo.
6 Ikange ʉne ndyale nya lwɨkupilo ʉkʉvomba itsʉ ndyasaagaga ʉkʉta tsʉ tsa vʉgolosu kwa Ngʉlʉve.
Ɨkyo kyʉ kyammelye ndɨvapelelage avampelela ʉvʉkʉvɨlwa.
Navʉkʉli ʉvʉnangi ʉwʉ ndyavombile mu ndagɨlo itso.
7 Lɨno,
ago gooni ʉgwʉ ndyavonaga ʉkʉta galɨ nʉ lʉvʉmbʉlɨlo,
lɨno ndivona ga kʉnnyambʉtsa pa kʉnkonga ʉKɨlɨsiti.
8 Nakwʉ kʉta galɨ gaago geene,
apeene ndivona gooni gatsila lʉvʉmbʉlɨlo,
pa kʉlɨngʼaania nʉ lʉvʉmbʉlɨlo ʉlʉlʉti lwa kʉmmanya ʉNtwa vango ʉMesiya ʉYɨɨsʉ.
Lola,
pa vʉsumbe wa kʉnkonga ʉYɨɨsʉ,
ndɨjatsiitse agange gooni.
Ndivalɨla ago nda makooko,
pakʉta ndɨve muunu va Kɨlɨsiti,
9 ikange ndɨbadame kʉ mwene.
Ndɨkʉlekile ʉkʉhʉʉvɨla ʉvʉgolosu wango ʉwihʉma mu kʉkonga indagɨlo,
apeene ʉNgʉlʉve vɨ ikʉmbalɨla ʉne ʉvʉgolosu ʉlwakʉva ndikʉmwɨdɨka ʉKɨlɨsiti.
Ʉvʉgolosu ʉwa,
wihʉma kwa Ngʉlʉve kwene,
ikange tupeewa ʉlwakʉva tukʉmwɨdɨka ʉKɨlɨsiti.
10 Ndinogwa ʉkʉmmanya ʉKɨlɨsiti nʉ kʉva nago amaka agaantsʉʉsiitse ʉmwene kʉ vaswe.
Ndinogwa ndɨhange mu vʉkʉvɨlwa ndʉwʉ aakʉviilwe ʉmwene,
ikange ndinogwa ndɨswe ndʉwʉ aasue ʉmwene.
11 Pwʉ kʉvʉlongolo ndiitse ndɨve inninie va vaanu valya ʉwʉ ʉNgʉlʉve alavatsʉʉsa ʉkʉhʉma kʉ vaswe.
Ʉkwɨjʉmɨɨlɨtsa ʉkʉsika kʉ vʉmalɨlo wa mbombo
12 Ʉne nandiita ndɨmalile ʉkʉkava ago,
evo ʉkʉta ʉne ndɨmalile ʉkʉnotsiwa,
baako,
apeene ndigendelela ʉkwɨjʉmɨɨlɨtsa pakʉta ndɨkakave ago.
Ago gwʉ geene ʉMesiya ʉYɨɨsʉ aannyɨlangye ndɨkave.
13 Mwe vɨɨdɨkivajyango,
nandiita ndɨmalile ʉkwibata ago.
Apeene ndivomba ɨkɨɨnu kɨpamato.
Ndɨkʉlekile ʉkʉsaaga agalʉtɨngʼiinie,
apeene ndikɨkupila ndɨkakave agalɨ kʉvʉlongolo.
14 Lola,
ʉmuunu ʉvɨ ingye mu lʉgelanilo lwa mbɨlo ikɨkupila ʉkʉnyila pakʉta kʉ vʉmalɨlo akʉʉpɨlɨle ʉlwokelo.
Wʉ jɨlɨwo nakʉ kwane,
ndikɨkupila ndɨkasike kʉ vʉmalɨlo,
ndɨkʉʉpɨlɨle ʉlwokelo lwango.
Ʉlwokelo ʉlwa,
jyʉ nyɨlango jya Ngʉlʉve jya kʉnnyingitsa kʉkyanya ʉkʉkongana ni tsʉ ʉMesiya ʉYɨɨsʉ ambombye ʉne.
15 Pwʉ lɨno,
ʉwe twɨ vooni twɨ vadʉlʉsu mu lwɨdɨko patʉnogye ʉkwɨdɨngʼana pa kulongwi itsi.
Ɨngave mulɨ na masaago ʉgwʉ nagahwaniini ni kulongwi itsi,
ʉNgʉlʉve vɨ jiikʉvadɨndʉlɨla mutsimanye ʉmwʉ tsiveelye.
16 Ɨkɨɨnu ɨkɨvaha lɨno,
patʉnogye ʉkʉtsikonga mu wʉʉmi wiitu tsilya itsʉ ʉNgʉlʉve amalile ʉkʉtʉvonia.
Avɨɨdɨki vɨgɨɨlɨle ʉlʉgendo lwa Paulo
17 Mwe vɨɨdɨkivajyango,
nyɨ vooni mwɨgɨlɨle ʉlʉgendo lwane.
Kange mumanyilage kʉ vaanu avikonga ʉlʉgendo lwitu,
pakʉta mwɨgɨlɨle vʉle vʉle ʉlʉgendo lwa veene.
18 Lola,
ndʉwʉ ndɨkavavʉʉliige kakongosu ɨlimenyu ɨlɨ,
lɨno ndikilivukila ikange ʉkʉvavʉʉla kʉnʉ ndilɨla.
Ndiita kʉlɨ vaanu vongosu ʉwʉ mu mitaamile gya veene vipɨnza ɨkulongwi jya vʉpoki wa Kɨlɨsiti ʉwaavoniike pa kɨdamingʼanie.
19 Avaanu avo,
kʉ vʉmalɨlo ʉNgʉlʉve alavoongometsa,
manya ʉvʉnogwe wa mihana gya veene wʉ wɨpelile vɨ ngʉlʉve va veene.
Aveene vikɨginihitsa imbombo tsa soni itsʉ vivomba.
Ikange visaaga kwene ʉkʉva nasyo isiinu isyʉ vinogwa mu wʉʉmi wa veene.
20 Lɨno ʉwe,
kʉ myaviitu kwʉ kʉkyanya kwa Ngʉlʉve.
Ʉkʉhʉma ʉkwa tupʉlɨkɨla nʉ kʉhʉʉvɨla siitso ʉkwitsa kwa Mpoki,
ʉNtwa viitu ʉYɨɨsʉ Kɨlɨsiti.
21 Ʉmwene alɨ nago amaka ga kʉvɨɨka isiinu syoni sive paasi pa vʉlongotsi wa mwene.
Kʉ nzɨla jya maka ago,
alaandʉla ɨmihana giitu ɨmidekedeke,
gɨveetsage nʉ wɨɨmɨkiwa ndʉwʉ gʉlɨwo ʉmmana gwa mwene.