Ʉkʉmanyila ʉlwɨjiso ʉkʉhʉma kwa Yɨɨsʉ Kɨlɨsiti
2
1 Ndeeti,
mwikava amaka mu numbula tsiinyo ʉkʉkongana nʉ kʉva vaanu va Kɨlɨsiti?
Ndeeti,
mutseesiwa nʉ lʉgano lwa mwene?
Ndeeti,
mulɨ kɨɨnu kɨpamato nʉ Mepo ʉMbalatse?
Ndeeti,
muganilwe nʉ kʉkolelwa ɨkɨsa nʉ Kɨlɨsiti?
2 Ɨngave wʉ jɨlɨwo,
pwʉ mummelele ndɨve nʉ lʉhekelo ʉlʉlʉti ʉnyie mungave mwiva nʉ lʉpʉlɨngʼano jyʉnyie kwa jyʉnyie.
Mugananage jyʉnyie kwa jyʉnyie nʉ kʉva kɨɨnu kɨpamato mu numbula tsiinyo,
ikange mwɨdɨngʼanage amasaago.
3 Muleke ʉkʉva nʉ mwojo pange amatingo.
Apeene nʉ jyʉnge ɨjisaage kʉ vanine nʉ kʉvavona ʉkʉta wʉ va kwɨmɨkiwa ʉkʉlʉtɨɨlɨla ʉmwene.
4 Nʉ jyʉnge aleke ʉkʉsaagɨlɨla itsa mwene tsyene,
apeene aveetsage va kʉsaagɨlɨla ni tsa kʉvatanga avange.
5 Ʉvʉsumbe wiinyo vʉhwananage nʉ vʉsumbe ʉwʉ aale nawo ʉMesiya ʉYɨɨsʉ.
6 Nʉpwʉ jɨngave ʉmwene aalɨngʼiine nʉ Ngʉlʉve,
naavone lʉnonu atsige ibatɨlɨlye ɨlyo.
7 Ʉmwene akalɨleka ɨlyo,
akaholwa ndʉ muunu,
akava muunu.
Akɨjisa akava ndʉ mbanda,
8 ikange akɨjisa siitso,
akava mwɨdɨhɨtsi kwa Ngʉlʉve,
akɨɨdɨkɨla ʉkʉswa,
nakʉ kʉswa kʉ nzɨla jya kʉtovelelwa pa kɨdamingʼanie!
9 Pwʉ ʉNgʉlʉve akamwɨmɨka ʉYɨɨsʉ ʉkʉlʉtɨɨlɨla isiinu syoni,
akampa ɨlitaawa ɨlɨlʉtɨɨlye amataawa gooni,
10 pakʉta pa wɨɨmɨkiwa wa litaawa lya Yɨɨsʉ,
isipeliwa syoni sisugamage kʉ mwene,
isya kʉkyanya,
isya kɨlʉnga ni sya kʉ vʉtsʉʉka.
11 Kange ʉmuunu ʉvaveetsaga ɨdɨkage ʉkʉta ʉYɨɨsʉ Kɨlɨsiti vɨ Ntwa,
pa wɨɨmɨkiwa wa Ngʉlʉve ʉDaada.
Avɨɨdɨki vaveetsage ndʉ lʉmuli mu kɨlʉnga
12 Mwe vagane vango,
wʉ pwʉndɨle kwanyie,
mukankongaga ʉNgʉlʉve isigono syoni.
Vʉvʉle vʉle,
nalɨ lɨno wʉ ndɨlɨ kʉvʉtale nʉʉnyie mwɨkupilage ʉkʉvomba itsinogelanie kʉ vaanu ʉwʉ ʉNgʉlʉve avapokile.
Muvombage itso mu lʉtetemo ʉlwihʉma mu kʉnʼdwada ʉNgʉlʉve.
13 Muvombage ewo ʉlwakʉva ʉNgʉlʉve vɨ mwene ivomba ɨmbombo mu nʼgati mwanyie,
pakʉta munogwagwe nʉ kʉvomba ʉgwʉ inogwa gavombekage.
14 Agaveetsaga ʉgwʉ muvomba,
mugavombage kɨtsila kwɨngʼuula pange kʉkaningʼana.
15 Muveetsage vaana va Ngʉlʉve ʉwʉ vagolosu kange vatsila vʉviivi.
Ikange muveetsage vaanu avanavitsowa ʉvʉviivi wʉ mutaama pagati pa vaanu va lɨno avadɨgile ʉvʉtulanongwa nʉ vʉlami.
Pagati pa vaanu avo,
ʉnyie muvonekage ndi sinya lʉmuli isimulika mu kɨlʉnga.
16 Kange muvavʉʉlage avaanu ɨlimenyu lya Ngʉlʉve ɨlikʉvapa ʉwʉʉmi wa sikutsooni.
a Muvombage ewo pakʉta pa kɨgono kɨlya ɨkya kwitsa kwa Kɨlɨsiti ʉlwa vɨɨlɨ,
ndiitse ndyɨginihitsaage ɨmbombo ɨjyʉ ndyatiigaga ʉkʉjɨvomba pagati paanyie,
wʉ ndivona najyale jya vʉvʉle.
17 Nʉpwʉ jɨngave ʉwʉʉmi wango jʉvuhʉmɨtsiwa ʉta neekelo ɨjya divaib paninie nʉ vʉvombeli wiinyo mu lwɨdɨko ʉwɨpelile neekeloc kwa Ngʉlʉve,
ʉne ndihovoka,
ikange ndihekela paninie nʉʉnyie nyɨ vooni.
18 Najyʉnyie vʉvʉle vʉle hovokagi,
ikange hekelagi paninie nʉʉne.
Ɨkulongwi jya Timoti nʉ Epafulodito
19 Ndihʉʉvɨla ʉkʉta ʉNtwa ʉYɨɨsʉ angɨgane jʉndikʉnsuungʼa ʉTimoti mu sigono siisi isi,
iitse kwanyie,
pakʉta wʉ akiliwiike kʉnʉ,
najyʉne jʉndɨtseesiwe wʉ ikʉmmangɨla ikulongwi tsyanyie.
20 Lola,
nandɨlɨ nave ʉmuunu ʉjyʉnge ʉvɨ ikʉvasaagɨlɨla ʉnyie ndʉ Timoti.
21 Avange vooni visaagɨlɨla tsi tsa veene,
navisaagɨlɨla itsa Yɨɨsʉ Kɨlɨsiti.
22 Lɨno mulʉmanyile ʉmwʉ ʉTimoti ɨvoniitse ʉkʉva muunu nnonu.
Ndʉ mwana nʉ dadaaje,
atangiine nʉʉne pa mbombo jya kʉlʉmbɨlɨla ɨLivangɨli.
23 Pwʉ lɨno ndihʉʉvɨla ʉkʉta,
jʉndikʉnsuungʼa kwanyie kɨtsila kʉhaava wʉ ndɨlolile ʉmwʉ tsibɨhɨla ikulongwi tsyane apa.
24 Kange ndihʉʉvɨla ʉkʉta ʉNtwa ʉYɨɨsʉ,
mu sigono siisi isi,
jiikʉnavʉla ndiitse najyʉne kwanyie ʉkwa.
25 Lɨno ndivona lʉnonu ndɨtale ʉkʉnsuungʼa kwanyie ʉmwɨdɨkinʼjyango ʉEpafulodito,
ʉvivomba ɨmbombo jya Ngʉlʉve paninie nʉʉne.
Ʉmwene ʉjʉ vɨ tugagala paninie nda vasikali pa kʉlɨlwɨla ɨLivangɨli kʉ valʉgʉ va lyene.
Kange vɨ mwene mukansuungʼile kwane kukʉnnanga mu siinu isyʉ ndidumukilwa.
26 Ndikʉntavʉla ʉlwakʉva ʉmwene lɨno alɨ nʉ vʉsʉʉkwa wa kwaganila nʉʉnyie nyɨ vooni,
ikange ɨnumbula jya mwene jɨsʉsʉvye ʉlwakʉva mupʉliike ʉkʉta akaale ntamu.
27 Tsa jɨlweli akagagiilwe siitso nʉ vʉtamu,
gʉkapʉʉgaga.
Lɨno ʉNgʉlʉve akankolye ɨkɨsa,
akamponiitse.
Nakwʉ kʉta ʉNgʉlʉve akaale nɨ kɨsa kʉkʉ mwene,
apeene akaale nɨ kɨsa nakʉ kwane,
pakʉta ʉlʉsʉsʉvalo lwango lʉleke ʉkwongelela pakyanya pa lʉsʉsʉvalo ʉlʉnge.d
28 Kʉ nongwa jya kulongwi itso,
ndɨnogilwe siitso ʉkʉnsuungʼa iitse kwanyie,
pakʉta wʉ mukʉmbona ikange,
muhovoke.
Kange najyʉne ɨnumbula jyango jɨtyʉjʉke.
29 Pwʉ mumwʉpɨlɨle mwa Ntwa,
kʉ lʉhekelo ʉlʉlʉti ʉmwɨdɨkinʼjiinyo ʉjʉ.
Ʉmuunu ʉvaveetsaga ʉvalɨ ndʉʉjʉ,
mumwɨmɨkage,
30 manya ɨmbombo jya Kɨlɨsiti jyʉ jɨkampelye pasigalɨle padebe ʉkʉswa.
Kʉ nongwa jyane ʉmwene akahegelye ʉkwambʉtsa ʉwʉʉmi wa mwene,
wʉ alɨ nʉ vʉsumbe wa kʉsikitsa kwane ʉlʉtangɨlo ʉlwʉ ʉnyie mukalemilwe ʉkʉlʉsikitsa kwane,
ʉlwakʉva mutaama kʉtale.