Ɨkalata jya Paulo
kʉ Vafilipi
Ʉlʉpembetso
1
1 Ɨkalata ɨjɨ jɨhʉmile kwawe,
ʉne ndɨ Paulo nʉ Timoti,
twɨ vavombi va Mesiya ʉYɨɨsʉ.
Tukʉvavɨgɨla nyɨ vɨɨdɨki vooni va Mesiya ʉYɨɨsʉ,
nyɨ mutaama mu vʉtsenge wa Filipi,
paninie na nyɨ valoleeli va mpelela na nyɨ vatangɨli.
2 Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu na kʉ Ntwa ʉYɨɨsʉ Kɨlɨsiti,
siveetsage nʉʉnyie.
Itsʉ ʉPaulo ikʉvadoovela aVafilipi
3 Ʉnsɨkɨ gwoni ʉpwʉ ndikʉvakʉmbʉka ʉnyie,
ndikʉnsaana ʉNgʉlʉve vango pa kulongwi tsyanyie.
4 Kange ʉnsɨkɨ gwoni ʉpwʉ ndikʉvadoovela kʉ mwene,
ndikʉvadoovela nyɨ vooni nʉ lʉhekelo,
5 ʉlwakʉva ʉnyie mugendelela ʉkʉtangana nʉʉne pa mbombo jya kwolosa ɨLivangɨli,
ʉkʉhʉma pa kɨgono ɨkyʉ ndyatengwe ʉkʉlʉmbɨlɨla kwanyie,
a ʉkʉsikila ɨleelo.
6 Ʉne ndɨlʉmanyile ʉkʉta ʉNgʉlʉve ʉvɨ aajɨtengwe ɨmbombo ɨnonu mu numbula tsiinyo,
vɨ jiigendelela ʉkʉjɨvomba,
ʉkʉsikila ʉpwʉ alajɨpʉgʉla pa kɨgono kɨlya ɨkya kwitsa ʉMesiya ʉYɨɨsʉ ʉlwa vɨɨlɨ.
7 Pannogye ʉne ʉkʉsaaga ndavʉle pa kulongwi jyanyie nyɨ vooni,
manya ɨnumbula jyango jɨvaganile siitso ʉnyie.
Mukwʉpɨlɨla ʉlʉhʉngʉ lwa Ngʉlʉve paninie nʉʉne wʉ ndɨkʉngilwe mu kɨkʉngwa,
nʉ wʉ ndikʉlyɨmɨla ɨLivangɨli nʉ kʉvonia ʉmwʉ lɨveelye lya jɨlweli.
8 ɄNgʉlʉve vɨ ikʉmbona ʉne ʉkʉta,
ndɨlɨ nawo ʉvʉsʉʉkwa wa kwaganila nʉʉnyie nyɨ vooni.
Ndɨvaganile nʉ lʉgano lʉʉlʉlya ʉlwʉ ʉMesiya ʉYɨɨsʉ avaganile ʉnyie.
9 Aga gwʉ ndikʉvadoovela kwa Ngʉlʉve,
ʉkʉta ʉlʉgano lwinyo lʉgendelelage ʉkwongelela siitso,
muve nʉ lʉhala nʉ vʉmanyi,
10 pakʉta mutsagaalʉle vʉnonu aganogelanie.
Apo pwʉ mwiva vagolosu,
ikange muveetsaga vaanu avanavitsowa ʉvʉviivi ʉvʉveetsaga ʉkʉtsisika pa kɨgono kya kwitsa ʉYɨɨsʉ Kɨlɨsiti ʉlwa vɨɨlɨ.
11 Ndʉwʉ ʉmʼbɨkɨ guhʉʉpa iseke,
najyʉnyie jyʉ muvavombelage avajiinyo imbombo ingolosu ndʉwʉ ʉYɨɨsʉ Kɨlɨsiti ikʉvatanga.
Ago gooni gamwɨmɨkage nʉ kʉnʼginia ʉNgʉlʉve.
Ʉkʉva mwa Kɨlɨsiti nʉ kʉswa pa kulongwi jya mwene
12 Mwe vɨɨdɨkivajyango,
ndinogwa mulʉmanye vʉnonu ʉkʉta gooni agambwene ʉne,
gatangye ʉkwolosa ɨLivangɨli,
13 manya avaloleeli vooni va pa lʉdeeva apa,
paninie na vange vooni,
valʉmanyile ʉkʉta ndɨkʉngilwe pakʉva ndikʉmbombela ʉKɨlɨsiti.
14 Paninie naago,
ndɨlʉmanyile ʉkʉkʉngwa kwane kʉnʉ,
kʉvapelye avɨɨdɨkivajiitu vongosu vakangale inumbula mwa Ntwa,
ʉkʉsikila pa kʉvalʉmbɨlɨla avaanu ɨlimenyu lya Ngʉlʉve kʉ maka gooni,
ikange kɨtsila lʉdwado.
15 Tsa jɨlweli ʉkʉta,
kwʉvale avange avilʉmbɨlɨla ikulongwi tsa Kɨlɨsiti mu kɨvini na mu mbatsa.
b Napeene,
kwʉvale avange avilʉmbɨlɨla kʉ numbula ɨnonu,
16 na mu lʉgano.
Ava valʉmanyile vʉnonu ʉkʉta ʉNgʉlʉve ambɨɨkile ʉne ndɨve va kʉlyɨmɨla ɨLivangɨli.
17 Lɨno avo avanya mbatsa,
vilʉmbɨlɨla ikulongwi tsa Kɨlɨsiti kʉ mwojo.
Aveene vilonda ʉkwongeletsa ʉvʉkʉvɨlwa waane pa nsɨkɨ ʉgʉ ʉgwʉ ndɨlɨ mu kɨkʉngwa.
18 Napeene,
kɨnangiike kɨki?
Lola,
ikulongwi tsa Kɨlɨsiti tsilʉmbɨlɨlwa,
jɨve kʉ numbula ɨmbiivi,
evo kʉ numbula ɨnonu.
Ɨkɨɨnu ɨkɨ kyʉ kikʉmmelela ʉlʉhekelo.
Kange ndigendelelaga ʉkʉva nʉ lʉhekelo,
19 ʉlwakʉva ndɨlʉmanyile ʉkʉta mu tsyoni itsikʉnnyitsila,
ndɨlapokwa,
ʉlwakʉva mukʉndoovela kwa Ngʉlʉve,
ikange ʉMepo ʉMbalatse va Yɨɨsʉ Kɨlɨsiti ikʉnnanga.
20 Ndihʉʉvɨla siitso ʉkʉta,
natsikʉli itsʉ jʉtsikʉmbɨɨka ndɨve ni soni.
Lɨno ndʉwʉ jɨkaale isigono syoni,
jʉndigendelelaga ʉkwɨkangatsa mu numbula.
Ndikɨkangatsaaga ewo pakʉta ʉKɨlɨsiti aginiwaagwe mu mmana gwango,
c jɨve ʉkʉtsiga mwʉmi,
evo ʉkʉswa.
21 Lɨno ʉne ndɨngave nditsiga mwʉmi,
ʉwʉʉmi wango wiiva wa kʉmmanya,
wa kʉnʼgana,
wa kʉmbombela nʉ kʉmwɨmɨka ʉKɨlɨsiti.
Kange ndɨngave ndiiswa,
ʉkʉswa kwane lʉvʉmbʉlɨlo.
22 Ndɨngave jʉnditsiga mwʉmi,
jʉndigendelela ʉkʉvavona avaanu vongosu avikʉmwʉpɨlɨla nʉ kʉmwɨdɨka ʉYɨɨsʉ ʉkʉhʉma mu mbombo ɨjyʉ ndivomba.
Lɨno pwʉ ndyɨhalɨle lɨlɨku?
Kʉndemile ʉne ʉkwɨhalɨla!
23 Ndilwana pa masaago gavɨlɨ.
Ndinogwa ʉkʉhega apa,
ndɨlʉte ndɨkataamage paninie nʉ Kɨlɨsiti.
Ɨlɨ lyʉ ndivona linonu siitso kwane.
24 Lɨno,
pa kulongwi jya kʉvatanga ʉnyie,
lʉnonu siitso ʉne ndɨgendelele ʉkʉtaama mu kɨlʉnga.
25 Nʉʉne pa kʉlɨvona ɨlɨ,
ndɨlʉmanyile ʉkʉta jʉnditsiga mwʉmi.
Jʉndikwitsa kwanyie ndɨve paninie nʉʉnyie nyɨ vooni,
pakʉta ndɨvatange mukʉle mu lwɨdɨko lwinyo kwa Ngʉlʉve,
ikange mulʉhovokele.
26 Wʉ ndɨlɨ paninie nʉʉnyie jʉmuhekela siitso pakʉva ʉMesiya ʉYɨɨsʉ jiiva annangile ʉne ndɨkilivuke ikange kwanyie.
27 Ɨkɨɨnu ɨkɨvaha muveetsage nʉ lʉgendo ʉlʉnogelanie nɨ Livangɨli lya Yɨɨsʉ Kɨlɨsiti.
Apo ndɨngave jʉndikwitsa kukʉvavona,
evo ndɨngave nandɨkiitse,
jʉndɨpʉlɨkage ikulongwi tsyanyie ʉkʉta mugendelela ʉkʉnywilila nʉ kʉva nɨ numbula mamato,
ikange mulɨ kɨɨnu kɨpamato pa kʉlwɨmɨla ʉlwɨdɨko ʉlwihʉma mu Livangɨli.
28 Kange ndɨpʉlɨkage ʉkʉta mu kɨɨnu ɨkɨveetsaga,
namudwada avaanu avikʉvapelela ʉvʉkʉvɨlwa.
Ɨkyo kyʉ kɨmanyilo kya kʉvavonia ʉkʉta aveene vilotsa kukwongometswa,
lɨno ʉnyie mulotsa kupokwa nʉ Ngʉlʉve,
29 manya namupeevilwi kwene ʉkʉmwɨdɨka ʉKɨlɨsiti,
apeene mupeevilwe nakʉ kʉkʉvɨlwa pa kulongwi jya mwene.
30 Ago ʉgwʉ ʉnyie mwilwa nago,
gwʉ geene najyʉne ndɨlɨkʉlwa nago,
ndʉwʉ mukalolile.
Kange nalɨ lɨno mupʉlɨka ʉkʉta ndigendelela ʉkʉlwa nago.