Ɨkalata
kʉ Vaebulaniya
Ikulongwi itsilongola
Ɨkalata jya Vaebulaniya kalata ɨjikʉvakangatsa avaanu inumbula. Jivonia ʉmwʉ ʉYɨɨsʉ aakwɨtsɨhiitse ʉVʉvɨge ʉVʉvalatse wa vanyamalago va Lwɨdɨngʼano ʉLʉlaala. Ʉkʉkongana nɨɨlyo, mu kalata ɨjɨ mulɨ ni sitita sya mamenyu isilʉtɨɨlye pa sitsigo ntanato (60) isihʉma mu Lwɨdɨngʼano ʉLʉlaala. Isitita isyo sikwolela ʉmwʉ ʉYɨɨsʉ aakwɨtsiitse amalago gooni ni mbombo tsa nteeketsi ʉmbaha.
Ʉvʉsumbe wa kʉvɨga ɨkalata ɨjɨ waale wa kʉvakangatsa inumbula aVakɨlɨsiti aVayahudi. AVayahudi avo vaale mu lʉtʉngʉtsiimo manya vaamanyile ʉvʉswe wa Yɨɨsʉ pa kɨdamingʼanie waale vʉsyɨkɨlo wa mbiivi itsa katale tsyene. Pwʉ valɨkʉsaaga ʉmwakʉsyɨkɨlɨlwa ʉvʉtulanongwa wa veene wa lɨno. Vaasaagaga ʉkʉkilivukila ʉkʉvomba ineekelo tsa veene tsa katale.
Wʉ alɨweene ɨlyo, ʉmbɨgi va kalata ɨjɨ ivonia ʉmwʉ ʉYɨɨsʉ akwɨtsiitse indagɨlo tsyoni pakʉta avateeketsi valeke ʉkʉva nɨ kɨɨnu kya kʉvapelela vahʉmyage ikange isiinu sya neekelo. Ikʉvavʉʉla iita ʉYɨɨsʉ vɨ neekelo ɨjyahetsiitse imbiivi tsyoni, ʉkʉhʉma palya ʉpwʉ aasue pa kɨdamingʼanie.
Pa kulongwi tsa mbɨgi va kalata ɨjɨ, namanyikiiki veeni ʉvɨ aavɨgile. Avɨmbi va kulongwi tsa Bibilia vivona ʉmbɨgi iweesa ave vɨ Paulo, evo vɨ Luuka evo vɨ Balinaba. Ikange, nagʉ ʉnsɨkɨ ʉpwʉ jyavɨgilwe ɨkalata ɨjɨ nagwene nagʉmanyikiiki. Avɨmbi vongosu vivona jyavɨgilwe kʉnsana kʉ mwaka gwa sitsigo lekelakʉpamato (70) Waholilwe ʉYɨɨsʉ Kɨlɨsiti. Ɨlɨ livoneka lya lweli ʉlwakʉva ʉmbɨgi va kalata ɨjɨ ivonia ʉkʉta wʉ ivɨga ɨkalata ɨjɨ ʉvʉtsenge wa Yelusalemu waapitsiga pwʉvʉle. Ʉvʉtsenge ʉvʉ waamamwilwe mu mwaka gwa sitsigo lekelakʉpamato Waholilwe ʉYɨɨsʉ Kɨlɨsiti. Ikange avɨmbi vongosu vikwɨdɨngʼana ʉkʉta ʉmbɨgi va kalata ɨjɨ aavɨgile wʉ itaama mu vʉtsenge wa Looma (13:24). Ɨjɨ jyale kalata ɨjyahɨlɨkwagwa kʉnʉ na kʉnʉ pakʉta jɨkɨɨmbwagwe mu mipelela ɨgɨ nɨɨgɨ.