Ɨkalata jya Paulo
kwa Filimoni
Ʉlʉpembetso lwa Paulo kwa Filimoni
1
1 Ʉne ndɨ Paulo,
ndɨ ndɨkʉngilwe kʉ nongwa jya kʉlʉmbɨlɨla ɨkulongwi jya Mesiya ʉYɨɨsʉ,
ndikʉkʉvɨgɨla ʉve Filimoni.
Ʉne nʉ mwɨdɨkinʼjiitu ʉTimoti,
tukʉkʉsaamusa ʉve vɨ nʼgane viitu,
vɨ ʉlɨ mbombinʼjiitu.
2 Tukʉnsaamusa nʉ mmaatsa viitu ʉAviya nʉ ntengaligoha ʉnʼjiitu ʉAlikipo,
paninie na vampelela ʉwʉ vilʉndamana mu nyumba jyako.
3 Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu,
na kʉ Ntwa ʉYɨɨsʉ Kɨlɨsiti,
siveetsage nʉʉnyie.
Ʉlʉgano nʉ lwɨdɨko lwa Filimoni
4 Ɨkɨgono ɨkɨveetsaga,
ʉnsɨkɨ ʉgwʉ ndikʉkʉdoovela,
ndikʉnsaana ʉNgʉlʉve,
5 ʉlwakʉva ndipʉlɨka ɨkulongwi jya lwɨdɨko lwako kʉ Ntwa ʉYɨɨsʉ,
nʉ lʉgano lwako kʉ vɨɨdɨki vooni.
6 Ʉlwɨdɨko lwako lʉkʉpelye ʉkʉva nʉ vʉhange na vange.
Lɨno,
ndidoova ʉkʉta,
ʉvʉhange ʉwa vʉvombe ɨmbombo mu nʼgati mwave,
pakʉta ʉweene ʉwa vʉkʉpelele ʉkʉtsimanya inonu tsyoni,
itsʉ tsitʉnogye ʉkʉvomba wʉ tʉlɨ mwa Yɨɨsʉ Kɨlɨsiti.
7 Mwɨdɨkinʼjiitu,
ʉlʉgano lwako lʉvahowiise avɨɨdɨki mu numbula tsa veene.
Ʉlʉgano lwako ʉlwa lʉmmelye ʉlʉhekelo ʉlʉlʉti ikange lʉnnywiliitse.
ɄPaulo ikʉnʼdoova ʉFilimoni ansyɨkɨle ʉOnesimo
8 Lɨno,
ndavɨ jɨve ndɨlɨ nʉ vʉtavʉlɨlwa mwa Kɨlɨsiti ʉkʉkʉlagɨla ɨkyʉ ʉnogye ʉkʉvomba,
nandivombi ewo.
9 Apeene,
kʉ nongwa jya lʉgano,
ndivona lʉnonu ndɨkʉdoove,
ʉne ndɨ Paulo ndʉwʉ ndɨvye nʼgogolo,
ikange ndɨ ndɨlɨ nkʉngwa kʉ nongwa jya Mesiya ʉYɨɨsʉ.
10 Ndikʉkʉdoova pa kulongwi jya Onesimo,
a ʉvɨ alɨ ndʉ mwana vango,
ʉlwakʉva ndɨntangile ʉmwene ʉkʉmwɨdɨka ʉYɨɨsʉ Kɨlɨsiti wʉ ndɨlɨ mu kɨkʉngwa.
11 Ʉjʉ,
ʉpwʉ aanyilile kwave,
naale kɨɨnu kwave.
Lɨno avye muunu va lʉtangɨlo kwave,
ikange lʉtangɨlo kwane.
12 Lɨno ndikʉnsuungʼa kwave,
ʉjʉ ʉvɨ ndɨnʼganile kʉ numbula jyango jyoni.
13 Ikange,
ndɨkanogwagwa ataame nʉʉne ave mbombi vango,
ʉkʉta apyanile paave ʉkʉnnanga ʉnsɨkɨ ʉgʉ ʉgwʉ ndɨlɨ mu kɨkʉngwa kʉ nongwa jya Livangɨli.
14 Ndɨweene nalʉnonu ʉkʉvomba ɨlɨveetsaga kɨtsila vʉnogwe waako,
evo ʉkʉkwʉmɨɨlɨtsa ʉkʉta ʉnnange.
Ʉne ndinogwa ʉvombe kʉ vʉnogwe waako jyʉve.
15 Ipange,
ʉNgʉlʉve aammetsiitse ʉOnesimo kwave ʉnsɨkɨ inʼdebe,
pakʉta kʉmbele ʉveetsage nʉ mwene isigono syoni.
16 Ʉkʉtengʉla lɨno,
ʉmbanda vaako ʉjwa,
nambanda kwene,
apeene imbanda ikange lʉkololwo ʉnʼgane.
Ʉne ndɨnʼganile siitso,
ʉve jʉvukʉnʼgana ʉkʉlʉtɨɨlɨla,
ndʉ mwana va mu nyumba jyako,
ikange lʉkololwo mwa Ntwa.
17 Ʉngave vukʉmbona ʉne ʉkʉta ndɨlɨ paninie nʉʉve,
ʉmwʉpɨlɨle ʉjwa ndʉwʉ ʉkaale vukʉnnyʉpɨlɨla ʉne.
18 Ɨngave akʉnangye,
evo vukʉntsigila kɨɨnu,
ʉnzigilage ʉne.
19 Ndɨ Paulo,
ndɨvɨgile kʉ kɨvoko kyango jyʉne,
ndɨlakʉhomba.
Ikange ʉve,
ʉlʉmanyile ʉkʉta ndikʉkʉtsigila ʉkʉlʉtɨɨlɨla kɨlya ɨkyʉ vukʉntsigila ʉOnesimo,
ʉlwakʉva mu mbombo jyane ɨjya kʉlʉmbɨlɨla,
ʉve waavangilwe.
20 Lɨno,
mwɨdɨkinʼjyango,
ʉmbombele ɨlɨ kʉ nongwa jya litaawa lya Ntwa.
Hovosa ɨnumbula jyango ndʉwʉ kʉnogye kʉ ndɨ mwɨdɨkinnino mwa Kɨlɨsiti.
21 Ndivɨga itsi,
pakʉva ndɨlʉmanyile ʉkʉta jʉvukʉtsikonga,
ikange jʉvuvomba ʉkʉlʉtɨɨlɨla ʉgwʉ ndɨtsovile.
22 Paninie niitso,
ʉnetengʼanihitse apakʉsikila,
ʉlwakʉva ndihʉʉvɨla ʉkʉta kʉ nzɨla jya nyɨsajo tsiinyo,
ʉNgʉlʉve jiikʉnnanga ndiitse kwanyie.
Amamenyu ga vʉmalɨlo