Ɨnzɨla jya kʉmmovosa ʉNgʉlʉve
13
1 Pwʉ lɨno mugendelelage ʉkʉvagana avɨɨdɨkivajiinyo.
2 Ikange mugendelelage ʉkʉvambɨlɨla avahenza mu nyumba tsiinyo,
manya avaanu avange mu kʉvomba ewo,
vaavambɨlye avasuungʼwa kɨtsila kʉlʉmanya.
3 Muvakʉmbʉkage avaanu avalɨ mu kɨkʉngwa,
mwɨvonage ʉngata najyʉnyie mukʉngilwe paninie navo.
Musʉsʉvalage paninie na vaanu avikʉvɨlwa,
mwɨvonage ʉngata mukʉvɨlwa paninie navo.
4 Ʉvʉtegʉlanie wɨɨmɨkiwaagwe na vaanu vooni.
Ɨnyongeletsa jyɨlyo,
ʉmuunu nʉ muunu aveetsage nswihu kʉ nnine mu vʉtegʉlanie wa veene.
Aleke ʉkʉvepwo ʉmuunu ʉndigu,
manya ʉNgʉlʉve nalaleke ʉkʉvahɨga avaanu avaligu.
5 Mulekage ʉkʉva nʉ vʉnogwe ʉvʉviivi wa kyʉma,
apeene mukwɨlanile ni syʉ mulɨ nasyo,
manya ʉNgʉlʉve vɨ aavahʉʉviitse palya ʉpwʉ aatye,
“Nandɨlakʉleke pange kʉkʉtaaga.”a
6 Ɨkɨ kyʉ mene tuweesa ʉkʉtsova kɨtsila lʉdwado ʉkʉta,
“ɄNtwa vɨ lʉtangɨlo lwango,
nandidwada kɨɨnu.
Ʉmuunu jiikʉmbomba kɨki ʉne?”b
7 Muleke ʉkʉvasaamwa avalongotsi viinyo ʉwʉ vaavamanyiise ʉnyie ɨlimenyu lya Ngʉlʉve.
Ikange mukʉmbʉkage ʉvʉtaamo nʉ lʉgendo lwa veene ʉmwʉ lwaveelye,
pwʉ najyʉnyie muvɨɨgage,
mumwɨdɨkage ʉNgʉlʉve nda veene.
8 Mulʉmanyage ʉkʉta ʉYɨɨsʉ Kɨlɨsiti nikwandʉka,
wʉ akaale igolo,
wʉ alɨwo ɨleelo,
ikange wʉ iveetsaga sikutsooni.
9 Muleke ʉkʉkwegwa nʉ kʉjatsiwa ni manyiiso inyenza itsi niitsi.
Mulʉmanyage ʉkʉta amaka ga mu numbula tsiinyo gihʉmana nʉ lʉhʉngʉ lwa Ngʉlʉve,
nagihʉma mu kʉgʉngʉla isyakʉlya.
Lola,
indagɨlo itso natsivapiili ʉlʉvʉmbʉlɨlo ʉlʉveetsaga avaanu avikʉtsikonga.
10 Tʉlɨ nakyo ɨkɨteekelelo ɨkyʉ avateeketsi va mu liheema lya kwɨsajɨla navitavʉlɨlwa ʉkʉlya ineekelo itsihʉmɨtsiiwe apo.
11 Ʉkʉkongana ni ndagɨlo tsa Kɨyahudi,
ʉnteeketsi ʉmbaha itoola ʉnkisa,
itsivɨɨka Pavʉvalatse gʉveetsage neekelo jya kʉvahetsehetsa avaanu imbiivi tsa veene.
Lɨno isipimbiga sisyene isya sidɨɨmo isyo sitoolwa nʉ kʉnyianywa kʉnzi kʉvʉtale nɨ likambi.
12 Ɨkɨ kyʉ mene ʉYɨɨsʉ namwene aakʉviilwe nʉ kʉbudwa kʉnzi,
kʉvʉtale nʉ vʉtsenge pakʉta avavalatse avaanu va mwene imbiivi tsa veene kʉ nzɨla jya nkisa gwa mwene.
13 Pwʉ najyʉwe twɨ vooni tʉnkonge ʉkʉ kʉnzi kʉ vʉtsenge,
tʉkatsisipilile isoni ndʉwʉ ʉmwene aatsisipilye.
14 Lola,
pa kɨlʉnga apa natʉlɨ nawo ʉvʉtsenge wiitu ʉvʉlaavekwo sikutsooni,
apeene tupʉlɨkɨla ʉkʉbɨha tʉkiingile mu vʉtsenge wa kʉkyanya pa kɨgono ɨkɨliitsa.
15 Lɨno tʉnʼginiage ʉNgʉlʉve ʉkʉgendela mwa Yɨɨsʉ nʉ kʉpʉlɨsa ikulongwi tsa wɨɨmɨkiwa wa mwene ʉnsɨkɨ gwoni,
manya ɨjyo jyʉ nzɨla jya kʉmpa ineekelo tsiitu.
16 Mugendelelage ʉkʉvatanga avajiinyo nʉ kʉhanga navo isiinu siinyo isyʉ mulɨ nasyo.
Lola,
itsi tsʉ neekelo itsikʉmmovosa ʉNgʉlʉve.
17 Muvɨɨdɨkɨlage avalongotsi viinyo kʉ numbula jyoni,
manya avo valɨ nɨ mbombo jya kʉvaloleela ʉnyie.
Kʉ vʉmalɨlo,
aveene valiitsa vigotola ikulongwi tsa mbombo jya veene ɨjyo kwa Ngʉlʉve.
Pwʉ muvɨɨdɨkɨlage pakʉta vavombage ɨmbombo jya veene kʉ lʉhekelo.
Lɨno mungalekage ʉkʉvɨɨdɨkɨla,
aveene vivombaga ɨmbombo ɨjyo kʉ lʉsʉsʉvalo.
Apo ɨmbombo jya veene ɨjyo jiveetsaga jɨtsila lʉvʉmbʉlɨlo kwanyie.
18 Nʉʉwe tʉlʉmanyile jɨlweli ʉkʉta inumbula tsiitu natsikʉtʉhɨga,
ikange tunogwa ɨlɨveetsaga ɨlyʉ tuvomba lɨveetsage lya vʉgolosu kange lya wɨɨmɨkiwa.
Pwʉ mugendelelage ʉkʉtʉdoovela.
19 Ɨkya kwongeletsa pa kulongwi itsi,
ndikʉvadoova siitso mundoovelage ʉkʉta ʉNgʉlʉve,
mu sigono siisi isi,
aame ʉvʉlegeesu wa kʉkilivuka ʉkwa kwanyie.
Amamenyu ga kʉ vʉmalɨlo
20-21 Lɨno ʉNgʉlʉve va lʉnotsehetso ʉvɨ aantsʉʉsiitse ʉNtwa viitu ʉYɨɨsʉ,
avalongolelage ʉnyie mu syoni isinonu pakʉta muvombage itsa vʉnogwe wa mwene.
Ikange avapeetsage amaka ga kʉvomba itsikʉmmovosa ʉkʉkongana nʉʉnyie ʉkʉhanzwa paninie nʉ Yɨɨsʉ Kɨlɨsiti.
Ʉmwene vɨ Nʼdɨɨmi ʉNdʉti va ngʼolo,
ʉlwakʉva ɨɨhʉmiitse ave neekelo,
akaswa pakʉta anywilitse ʉlwɨdɨngʼano ʉlʉvʉla vʉsililo kʉ nzɨla jya nkisa gwa mwene.
Pwʉ lɨno aginiwaagwe sikutsooni na sikutsooni.
Ameni.
22 Lɨno vɨɨdɨkivajyango,
ndikʉvasiima siitso mugiibatage siitso amamenyu aga agikʉvakangatsa inumbula ʉgwʉ ndɨvavɨgye kʉ vʉsupi.
23 Kʉ vʉmalɨlo ndikʉvavʉʉla ʉkʉta ʉmwɨdɨkinʼjiitu ʉTimoti akahʉmile mu kɨkʉngwa.
Pwʉ angave jiikwangʉpa ʉkwitsa apa ʉpwʉ ndɨlɨpwo,
jʉndikwitsa nave ʉkwa pakʉta tʉvasaamuse ʉnyie.
24 Muvasaamuse avalongotsi viinyo vooni na vɨɨdɨki vooni va Ngʉlʉve avalɨ ʉkwa.
Avɨɨdɨki ʉkʉhʉma kʉ Italiya vikʉvasaamusa.
25 Ʉlʉhʉngʉ lwa Ngʉlʉve lʉveetsage nʉʉnyie nyɨ vooni.