Ʉkʉkonga ɨkɨhwananitso kya Yɨɨsʉ
12
1 Lola,
ʉlwakʉva ʉwe tʉtsʉngʉtiilwe nɨ lipʉga ɨlivaha ɨlya vaanu avanya lwɨdɨko,
tʉhetse ɨkɨveetsaga ɨkikʉtʉvinika.
Tʉtsileke imbombo tsa vʉtulanongwa itsʉ natsihaava ʉkʉtʉpɨnza tʉgwe.
Ikange twɨkupilage ʉkʉnyila pa lʉgelanilo lwa mbɨlo ʉlʉvɨɨkilwe kʉvʉlongolo kwawe,
tʉveetsage vanya lʉsipililo.
2 Tʉndolage ʉYɨɨsʉ ʉvɨ aatengʉliitse mwawe ʉlwɨdɨko lwa kʉmwɨdɨka ʉNgʉlʉve,
ikange vɨ ikʉlʉpelela lʉnogelanile.
Ʉmwene aasipile ʉvʉkʉvɨlwa wa pa kɨdamingʼanie kɨtsila kʉvona soni ʉlwakʉva aalʉmanyile ʉlʉhekelo ʉlwampʉlɨkɨlaga kʉvʉlongolo.
Lɨno ataamile ʉlʉvasu lwa kʉndyo lwa Ngʉlʉve pa kɨnyalwangʉla kya vʉtwa,
apoonu pa wɨɨmɨkiwa ʉvʉlʉti.
3 Apo musaagage ikulongwi tsa lʉsipililo lwa Yɨɨsʉ ʉpwʉ avatulanongwa vaapɨganaga nave.
Musaagage ɨlyo pakʉta muleke ʉkʉswa inumbula nʉ kʉnyongʼonyoka amaka.
4 Lola,
nakwene ʉkwɨkupila kwinyo pa kʉtsilema ingelo tsa kʉvomba ʉvʉtulanongwa,
namusikiili pa kɨgelelo kya kʉjatsa ʉwʉʉmi wiinyo.
5 Ndeeti,
musaamilwe amamenyu galya ʉgwʉ ʉNgʉlʉve aatsovile pa vʉsumbe wa kʉvapa amaka,
ʉpwʉ aatye ʉnyie mulɨ vaana va mwene?
Lola ʉNgʉlʉve aatsovile akata,
“Mwana vango,
ʉNtwa angakʉpe ʉlʉvʉngʉ pakʉta akʉlongotse vʉnonu,
ʉlavonaga kɨɨnu kɨdebe.
Ikange angabeetse ʉpwʉ wihena,
kwʉ baako ʉkʉnyongʼonyoka amaka.
6 Manya ʉNgʉlʉve ikʉmpa ʉlʉvʉngʉ ʉmuunu ʉvaveetsaga ʉvɨ ʉmwene anʼganile,
pakʉta andongotse vʉnonu.
Ikange ikʉmpa ʉlʉvʉngʉ ʉmuunu ʉvaveetsaga ʉvɨ ʉpɨliilwe ave mwana va mwene.”a
7 Pwʉ musipage wʉ muvʉngwa ʉlwakʉva ʉNgʉlʉve ikʉvavombela ɨlyo ʉnyie nda vaana va mwene.
Lola,
nakʉli ʉmwana ʉvɨ nivʉngwa nʉ dadaaje.
8 ɄNgʉlʉve ikʉvapa avaana va mwene ʉlʉvʉngʉ pakʉta avalongotse vʉnonu.
Lɨno,
ʉNgʉlʉve angave nikʉvapa ʉnyie ʉlʉvʉngʉ,
pwʉ mulʉmanyage ʉkʉta mulɨ vaana vitsanagongo,
namulɨ vaana va mwene jɨlweli.
9 Ikange avadadajiitu va mu kɨlʉnga ʉmʉ vaatʉpeetsaga ʉlʉvʉngʉ,
napeene tʉlɨkʉtsiga tukʉvɨɨmɨka.
Pwʉ lɨno patʉnogye ʉkʉleva kwa Daada va numbula tsiitu,
pakʉta tʉve nʉ wʉʉmi wa sikutsooni.
10 Lola naveene avadadajiitu va pa kɨlʉnga apa vaatʉpeetsaga ʉlʉvʉngʉ kʉ nsɨkɨ nsupi ʉkʉkongana nʉ mwʉ vaavonaga jɨnogelanie.
Lɨno ʉNgʉlʉve ikʉtʉpa ʉlʉvʉngʉ kʉ lʉvʉmbʉlɨlo lwitu ʉwe,
pakʉta najyʉwe tʉhanzwe mu vʉvalatse wa mwene.
11 Nalʉkʉli ʉlʉvʉngʉ ʉlukʉmmovosa ʉmuunu wʉ luvombeka,
apeene lwipela ʉlʉsʉsʉvalo.
Lɨno kʉ vʉmalɨlo lukʉvapelela avaanu avo avavʉngilwe nʉ kʉpʉlɨka vave nʉ lʉnotsehetso nʉ lʉgendo ʉlʉgolosu mu wʉʉmi wa veene.
12 Pwʉ lɨno mukangatse isivoko siinyo isitokile na masugamilo giinyo agasugujwike.b
13 Musinotsehetsaage inzɨla itsigolwike isilʉnde siinyo,
pakʉta ʉmuunu ʉndema aleke ʉkʉgwa,
apeene apone.c
Avɨɨdɨki pavanogye viibatage indagɨlo
14 Valʉkololwango,
mulondage siitso ʉkʉtaama nʉ lʉnotsehetso na vaanu vooni,
ikange mu wʉʉmi wiinyo muveetsage vagolosu.
Lola,
nakʉli ʉmuunu ʉvɨ alaweesa ʉkʉmbona ʉNtwa kɨtsila kʉva nʼgolosu.
15 Mwɨlole vʉnonu pakʉta aleke ʉkʉvepwo ʉmuunu nʉ mpamato ʉvɨ jiikɨlekelwa ʉkʉmmʉʉvɨla ʉNgʉlʉve ʉvɨ ikʉtʉvombela itsa lʉhʉngʉ.
Mwɨlolelage,
valeke ʉkʉvepwo avaanu pagati paanyie avikʉvavombela imbiivi avajyavo,
aviiva ʉngata milela ɨgivava.
Avaanu ndaavo vipela ʉlʉgatatso ikange vilematsa inumbula tsa vaanu vongosu.
16 Ikange pavanogye mwɨlolelage valeke ʉkʉvepwo avaligu evo avaanu avikʉmʼbeela ʉNgʉlʉve ndʉ Esau.
Ʉmwene ʉjwa aagʉtsiitse ʉvʉhaale wa mwene ʉwa kʉva ntatsi va kʉholwa kʉ kyakʉlya kya nsɨkɨ mpamato vʉvʉle.
17 Ʉnyie mulʉmanyile ʉkʉta kʉmbele namwene aanogilwe ʉkʉsajwa nʉ dadaaje ndʉ mwana ʉmbele,
ʉdadaaje akabeela.
Nʉpwʉ jɨngave ʉEsau aadoovile kʉ lwihotsi wʉ inogwa ʉdadaaje ansaje,
naasajwe.
18 Ʉnyie namwitsili kʉ kɨdugala ɨkiweesa ʉkwabaaswa ndʉwʉ kyale ɨkɨdugala ɨkya Sinaid kʉ Vaisilahɨli.
Pa kɨdugala kɨlya gwaviikaga ʉmwoto,
kɨkagubikilwa nɨ livɨngo ɨlitiitu,
jɨkagwa ɨngʼiisi ɨmbaha,
ikange gʉkiitsa ʉnkuluguuto ʉmbaha.
19 Apoonu apo tsyakuutaga ingalape,
ikange lyapʉlɨkiike ɨlimenyu lya Ngʉlʉve ɨlyʉ aVaisilahɨli avo vaadwadile siitso.
Pwʉ vakanʼdoova vakata aleke ʉkʉtsova navo ikange,
20 manya aveene wʉ vapʉliike ʉlʉlagɨlo ʉlwa,
vaalemilwe ʉkʉsipilila.
ɄNgʉlʉve akalagɨla akata,
“Nasyene isidɨɨmo singɨɨjabaase mu kɨdugala ɨkyo,
sibudwagwe kʉ nzɨla jya kʉtikwa na maganga.”e
21 Ikulongwi itso tsyadwatsaaga siitso,
ʉkʉsikila ʉpwʉ ʉMoose jyʉmwene akata,
“Lʉmbwene ʉne ʉlʉdwado,
nditetema.”f
22 Lɨno ʉnyie musiike pa kɨdugala kya Sayuni,
pa vʉtsenge wa Yelusalemu wa kʉkyanya kwa Ngʉlʉve.
Ʉwa wʉ vʉtsenge wa Ngʉlʉve ʉmwʉmi,
ʉkwa kʉlɨ maelufu na maelufu ga vasuungʼwa avalɨ mu lʉhekelo.
23 Mwɨhanziitse mu lipʉga lya vaana ʉwʉ ʉNgʉlʉve avaganile siitso,
g ikange amataawa ga veene gavɨgilwe kʉkyanya.
Musiike kwa Ngʉlʉve ʉmmɨgi va vaanu vooni.
Musiike ʉkwʉ tsilɨkwo inumbula tsa vaanu avagolosu ʉwʉ vavalatsiiwe.
24 Musiike kwa Yɨɨsʉ,
ʉvɨ ikʉvasajania avaanu nʉ Ngʉlʉve mu lwɨdɨngʼano ʉlʉpya.
Ʉnkisa gwa mwene,
ʉgwaduudiike pa vʉsumbe ʉvʉnonu wa vʉsyɨkɨlo wa mbiivi,
nagʉviili gwa kʉndɨlɨla ʉNgʉlʉve alʉmbɨle ndʉwʉ gwale ʉnkisa gwa Abeli.
25 Mwɨlole vʉnonu,
mulabeelaga ʉkʉmpʉlɨhɨtsa ʉNgʉlʉve ʉvitsova nʉʉnyie.
Lola,
avakʉkʉjiinyo avaabeelaga ʉkʉmpʉlɨhɨtsa ʉMoose ʉvɨ aavabeetsaaga imbiivi pa kɨlʉnga apa,
vaapeevilwe ʉlʉvʉngʉ ʉlʉkali.
Ʉwe najyʉwe tsa jɨlweli tʉlapeewa ʉlʉvʉngʉ ʉlʉkali siitso tʉngabeelage ʉkʉmwɨdɨkɨla ʉlya ʉvɨ iitsile ʉkʉhʉma kʉkyanya,
wʉ itsova nʉʉwe.
26 Ʉnsɨkɨ gʉlya,
ʉpwʉ ʉNgʉlʉve aatsovile pa kɨdugala kya Sinai,
ɨlimenyu lya mwene lyahusaaniitse ɨkɨlʉnga.
Lɨno atsovile atye,
“Ndɨlakilivukila ikange ʉkʉhusaania,
nakwʉ kʉta ndɨlahusaania kɨkɨlʉnga kyene,
apeene nakʉ kʉkyanya.”h
27 Ɨlimenyu ɨlɨ ʉpwʉ iita,
“Ndɨlakilivukila ikange,”
livonia ʉkʉta isiinu syoni isyapelilwe mu kɨlʉnga ʉmʉ silahusaana nʉ kʉhetswa,
pakʉta sisigale silya isyʉ nasiweesa ʉkʉhusaana.
28 Pwʉ lɨno tʉnsaanage ʉNgʉlʉve pa kʉtʉpa ʉLʉdeeva ʉlwʉ nakɨkʉli ɨkɨɨnu ɨkiweesa ʉkʉlʉhusaania.
Ʉkʉhʉmana nɨɨlyo,
twɨsajage kʉ mwene kʉ nzɨla ɨjikʉmmovosa,
kʉ lwɨmɨko nʉ lʉdwado.
29 Lola,
ʉNgʉlʉve viitu alɨ ndʉ mwoto ʉgunyianya nʉ kʉkobosa lwoni!i