Ɨkalata jya
Yakobo
Ikulongwi itsilongola
Ʉmbɨgi va kalata ɨjɨ vɨ Yakobo ʉvɨ aale mpamato mu vanuuna va Yɨɨsʉ. Ʉnsɨkɨ ʉgwavɨgile, ʉYakobo aale ndongotsi va mpelela ʉgwa Yelusalemu. Ʉkʉkongana nʉ wɨɨmɨɨlɨtsi wa mbombo jya mpelela, ʉPaulo aamwɨlangile ʉYakobo akata vɨ ngʼotsi jya mpelela (Vagalatiya 2:9), kwʉ kʉta ʉmuunu ʉvɨ ʉmpelela gukʉmmʉʉvɨla. Kʉ vʉmalɨlo ʉYakobo aabudilwe pa nongwa jya lwɨdɨko lwa mwene kwa Yɨɨsʉ Kɨlɨsiti. Aabudilwe mu mwaka ʉgwa sitsigo ntanato na gɨvɨlɨ (62) Waholilwe ʉYɨɨsʉ Kɨlɨsiti.
ɄYakobo aavavɨgye ɨkalata ɨjɨ aVakɨlɨsiti aVayahudi avaakɨmbye ʉkʉhʉma kʉ Yelusalemu. Avo vaakɨmbye ʉnsɨkɨ gʉlya ʉpwʉ aabudilwe ʉnʼjyavo ʉSitefano (Mbombo tsa Vapositili 7:54–8:3). AVakɨlɨsiti avo vaahambile mu silʉnga isya Yuuda, Samaliya, Foinike, na kʉ Siliya.
Ʉvʉsumbe wa Yakobo wa kʉvavɨgɨla ɨkalata ɨjɨ waale wa kʉvanywilitsa mu lwɨdɨko nʉ kʉvalʉngɨkɨla itsa kʉvomba pa nsɨkɨ ʉgwʉ vaakʉvɨlwagwa. Isimiilitsa iita ʉlwɨdɨko lwa jɨlweli lʉkongana ni mbombo inonu. Ikʉvabeetsa avɨɨdɨki ʉkʉta vɨlekelwe ʉkʉvatengelela avaanu vaninie, vatsingahɨtsaage vʉnonu itsʉ vitsova, nʉ kʉleka ʉkʉdʉkana. Ikange valaveetsaga nʉ lwɨjɨmɨko, ʉlwɨginio, nʉ vʉsyovi. Kʉ vʉmalɨlo isimiilitsa ʉkʉta vadoovage vave nʉ vʉmanyi nʉ kʉvadoovela avatamu.