Ɨkalata jya
Yakobo
Ʉlʉpembetso lwa Yakobo
1
1 Ɨkalata ɨjɨ jɨhʉmile kwane ʉne ndɨ Yakobo,
ndɨ ndɨlɨ mbombi va Ngʉlʉve,
nʉ va Ntwa ʉYɨɨsʉ Kɨlɨsiti.
Ndikʉvasaamusa ʉnyie nyɨ Vayahudi nyɨ vooni nyɨ va sivʉmbʉkʉ kɨtsigo na sivɨlɨ (12),
nyɨ muhambile mu silʉnga isi niisi.
Ʉkwʉmɨɨlɨla mu lwɨdɨko pa nsɨkɨ gwa ngelo
2 Vɨɨdɨkivajyango,
ʉnsɨkɨ ʉpwʉ tsikʉviitsila ingelo itsilɨ pongosu,
muhekelage siitso,
3 manya mulʉmanyile ʉkʉta ʉkʉgelwa kwa lwɨdɨko lwinyo,
kukʉvapelela ʉnyie ʉkʉnywilila mu ngelo.
4 Mugendelelage ʉkʉkangala ndavʉle,
manya ʉkwa kwʉ kwene kukʉvavɨɨka mudʉlʉke mu lwɨdɨko nʉ kʉnogelanila,
kɨtsila kʉkeepa kɨninie mu Vʉkɨlɨsiti wiinyo.
5 Ɨngave poonu kʉlɨ mpamato viinyo ʉvɨ nakɨmanyili ʉmwa kʉvombela itso,
anogye adoove kwa Ngʉlʉve,
pwʉ ʉNgʉlʉve ikʉmpeetsaga,
manya ʉNgʉlʉve ikʉvapa avaanu vooni isiinu isilɨ pongosu kʉ numbula ɨmbalasu,
na kɨtsila kʉtana.
6 Napeene,
ʉnsɨkɨ ʉgwʉ ikʉnʼdoova ʉNgʉlʉve,
amwɨdɨke,
aleke ʉkʉganaania mu numbula,
manya ʉmuunu ʉvɨ iganaania mu numbula iiva ilɨngʼaana na majɨga ʉgwʉ ɨmepo jikʉgalahɨɨla ʉkwa nʉʉkwa mu nyanza.
7 Ʉmuunu ʉvɨ alɨwo,
aleke ʉkʉhʉʉvɨla ʉkʉta ʉNtwa ʉNgʉlʉve jiikʉmpa ɨkyʉ akadoovile ɨkɨveetsaga,
8 ʉlwakʉva ibiite amasaago gavɨlɨ,
napapali ʉpwʉ ɨmile.
Avagatsu na vamosu
9 Ʉmwɨdɨkinʼjiitu ʉnʼgatsu ʉvaveetsaga,
anogye ahekelage ʉlwakʉva ɨmɨkiiwe nʉ Ngʉlʉve.
10 Napeene,
ʉkʉhekela kʉ muunu ʉmmosu ʉvaveetsaga,
kʉve ʉlwakʉva ʉNgʉlʉve amwisiitse.
Ʉmmosu ʉjʉ jiilʉta ndʉ vʉlʉva wa mwinyasi,
11 manya ʉnsɨkɨ ɨlitsʉva wʉ lɨvalile,
ʉlʉsuke lwa lwene lujogotola ɨmipɨɨni,
ʉvʉlʉva wiigwa,
ʉvʉnonu wa weene wisila.
Vʉle vʉle najyʉ mmosu namwene,
ʉnsɨkɨ wʉ apitsiige ihangajɨka mu mbombo tsa mwene,
muumwa ʉmwa,
mwʉ iswɨla.
ɄNgʉlʉve nikʉviingitsa avaanu mu ngelo
12 Inʼgatalʉsu,
ʉmuunu ʉlya ʉvɨ ikwʉmɨɨlɨla mu lwɨdɨko ʉnsɨkɨ gwa ngelo,
ʉlwakʉva wʉ amalile ʉkʉlesa ingelo,
ʉNgʉlʉve alampa ʉwʉʉmi wa sikutsooni.
Ʉwʉʉmi ʉwa vʉlaava lwʉ lʉdingʼulilo lwa mwene,
ndʉwʉ ʉNgʉlʉve aamalile ʉkʉvahʉʉvɨtsa vooni avanʼganile.
13 Ʉnsɨkɨ ʉgwʉ ʉmuunu igelwa ʉkʉta avombe imbiivi,
aleke ʉkʉta,
“Ingelo tsyango itsi tsihʉma kwa Ngʉlʉve,”
ʉlwakʉva ʉNgʉlʉve nigelwa ni mbiivi.
Kange ʉNgʉlʉve nikʉnʼgela ewo ʉmuunu ʉvaveetsaga.
14 Apeene ʉmuunu ʉvaveetsaga alɨ nʉ vʉnogwe wa kʉvomba imbiivi,
apo iweesa ʉkʉgelwa avombe.
Ʉnsɨkɨ ʉvʉnogwe wa mwene ʉwa vunkʉkwega ʉkʉvomba imbiivi,
15 vuhwanana nʉ nya vʉtsito,
ʉlwakʉva wiiva ʉta vʉpelile ʉvʉtsito mu nʼgati mu mwene.
Kʉmbele,
vuholwagwa ʉmwa ʉvʉtulanongwa.
Ʉnsɨkɨ ʉgwʉ ʉvʉtulanongwa ʉwa vʉdʉlwike,
vukʉmpelelaga ʉvʉswe.
16 Vɨɨdɨkivajyango vagane,
muleke ʉkwɨdɨka ʉkʉsyowa.
17 Ɨkɨkʉngɨlwa ɨkɨnonu ɨkɨveetsaga nʉ lwokelo ʉlʉtengamiine ʉlʉveetsaga,
sihʉma kʉkyanya kwa Ngʉlʉve ʉMpeli va syoni isinya lʉmuli kʉkyanya.
Isinya lʉmuli isyo nasimulika ʉnsɨkɨ gwoni,
ʉgʉnge ʉnsɨkɨ sitsiguka.
ɄNgʉlʉve nalɨ ndi sinya lʉmuli isyo,
ʉmwene nigalamukagalamuka,
mwipa ɨmisɨkɨ gyoni.
18 Ʉkʉkongana nʉ mwʉ aanogeliilwe,
aatʉvɨɨkile tʉve vaana va mwene,
mu nzɨla jya ʉkwɨdɨka ʉwe ɨlimenyu lya mwene ɨlya lweli.
Aavombile itso pakʉta tʉve vaanu va mwene avalʉti mu sipeliwa syoni isyʉ aapelile,
tʉlɨngʼaane ni silʉvʉkɨlwa isyʉ sigotolwa kʉ mwene.
Ʉkʉpʉlɨka ɨlimenyu lya Ngʉlʉve nʉ kʉlɨvombela
19 Vɨɨdɨkivajyango vagane,
mummʉlɨhɨtse vʉnonu!
Aleke ʉkʉvepo ʉmuunu pagati paanyie ʉnya nyango jya kʉtsova kɨtsila kʉtala asaage,
apeene aveetsage inogwa ʉkʉpʉlɨhɨtsa taasi.
Ikange aleke ʉkʉviipa ngʼaningʼaani,
20 ʉlwakʉva jisiita ʉkʉta mu lʉviipo,
ʉmuunu ivombaga aganogelanie pamiiho ga Ngʉlʉve.
21 Pwʉ lɨno,
mutsileke lwoni imbiivi itsilɨ mwanyie,
paninie nʉ kʉvasaagɨlɨla avaanu avange amasaago amaviivi agadɨgile mu numbula tsiinyo.
ɄNgʉlʉve amalile ʉkʉvɨɨka ɨlimenyu lya mwene mu numbula tsiinyo.
Lɨno,
mulɨpʉlɨhɨɨtse kʉ lwɨjiso nʉ kʉlyɨdɨka,
ʉlwakʉva lyʉ lɨlɨ na maka ga kʉvapoka.
22 Ikange ʉnyie muleke ʉkwɨsyova pakʉta mupʉlɨkaga kʉkʉpʉlɨka kwene ɨlimenyu lya Ngʉlʉve.
Apeene ʉnyie muveetsage muvomba ndʉwʉ litsova.
23 Ʉmuunu ʉvaveetsaga ʉvɨ ipʉlɨkaga kʉkʉpʉlɨka kwene ɨlimenyu lya Ngʉlʉve,
ileka ʉkʉvomba ndʉwʉ litsova,
ʉjwa iiva ndʉ muunu ʉvɨ ikɨlola mu kɨlolelo.
24 Wʉ amalile ʉkwɨlola,
ʉnsɨkɨ wʉ ihega pa kɨlolelo,
akasɨkɨ kaako isaamwa ʉmwʉ aveelye.
25 Apeene ʉmuunu ʉvisaaga kʉ lwʉtsi indagɨlo tsa Ngʉlʉve,
ʉjwa alɨ vʉnge.
Indagɨlo itso tsitengemiine,
ikange tsilɨ na maka ga kʉtʉvopola ʉwe ʉkʉhʉma mu mbiivi.
Pwʉ angave ʉmuunu isaaga itso,
iita nʉ kʉkonga kɨtsila kʉsaamwa ʉgwʉ apʉliike,
ʉjwa vɨ mwene jiisajwa mu tsilya itsʉ ivomba.
26 Ɨngave ʉmuunu ikɨvona ivomba imbombo itsikʉmmovosa ʉNgʉlʉve,
lɨno nikɨsiga pa kʉtsova itsinatsinogiili,
ikɨsyova mu numbula,
imbombo itso natsikʉmbʉmbʉlɨla kɨɨnu.
27 Imbombo itsʉ ʉNgʉlʉve ʉDaada viitu ilonda ʉmuunu avombage tsʉ itsi:
ʉkʉvatanga avapɨɨna na vadala avaswɨlilwe mu vʉpala wa veene,
nʉ kwɨlolela nʉ lʉgendo ʉlʉviivi lwa vaanu ʉwʉ navikʉmwɨdɨka ʉNgʉlʉve,
pa vʉsumbe wa kʉta valeke ʉkʉnʼjatsa.