Avɨɨdɨki valekage ʉkʉva nʉ lwiho lwa kʉvɨɨmɨka avamosu
2
1 Vɨɨdɨkivajyango,
ʉlwakʉva mumwɨdiike ʉNtwa viitu ʉYɨɨsʉ Kɨlɨsiti ʉMwɨmɨkiwa,
muleke ʉkʉva nʉ lwiho lwa kʉntengelela ʉmuunu ʉvaveetsaga.
2 Tʉte ʉmuunu ikwingila mu lʉlʉndamano lwinyo,
aswalile ɨmisabwa gya lʉtogo,
nɨ pete jya sahabu mu kɨmwana kya kɨvoko,
ikange ikwingila ʉnʼgatsu,
ʉvaswalile ɨmisabwa ɨgɨnyakaswike.
3 Ɨngave ʉnyie,
mukʉmwʉpɨlɨla mu lwɨmɨko ʉvaswalile vʉnonu,
nʉ kʉta,
“Taama pavʉnonu apa,”
ikange kwʉlya ʉnʼgatsu mwita,
“Ʉve,
ʉbɨhe ʉkɨɨme palya,”
evo,
“Taama pa mmanga apa,”
4 ndeeti,
pa kʉvomba ewo,
wʉ namumalili ʉkʉvɨɨmɨka vaninie?
Wʉ namulamwili ʉkʉgava avɨɨmɨkiwa na vatava vɨɨmɨkiwa ʉkʉkongana na masaago giinyo amaviivi?
5 Vɨɨdɨkivajyango vagane,
mummʉlɨhɨtse vʉnonu!
ɄNgʉlʉve amalile ʉkʉvahala avagatsu va mu kɨlʉnga vave vaanu avikʉmwɨdɨka ʉNtwa viitu ʉYɨɨsʉ.
Ʉkwa ʉkʉmwɨdɨka ʉYɨɨsʉ wʉ vʉmosu wa jɨlweli.
Avaanu avo wʉ ʉNgʉlʉve avahalile ʉkʉta vʉʉpɨlɨle ʉLʉdeeva ʉlwʉ aavahʉʉviitse vooni avanʼganile.
6 Napeene,
ʉnyie mukʉvabeda avagatsu!
Ndeeti,
avamosu avo wʉ navikʉvapelela ʉnyie ʉvʉkʉvɨlwa viita nʉ kʉvakwegela kʉ vahɨgi,
7 ikange nʉ kʉdʉka ɨlitaawa ɨlinonu ɨlya Yɨɨsʉ ʉvɨ ʉnyie mulɨ vaanu va mwene?
8 Indagɨlo tsa Kɨlɨsiti ʉNkʉlʉdeeva tsilɨ nda lʉlya ʉlʉvɨgilwe mu Vʉvɨge ʉVʉvalatse,
ʉkʉta,
“Ʉnʼganage ʉnnino ndʉwʉ wɨganile jyʉve.”
a Ɨngave lweli muvomba ewo,
mwiva muvombile vʉnonu.
9 Lɨno,
mungave mukʉvɨɨmɨka avaanu vaninie,
mupitsiige mutaama mu mbiivi.
Pwʉ indagɨlo tsa Ngʉlʉve tsipitsiige tsikʉvahɨga ʉnyie ʉkʉta mulɨ vanangi.
10 Lola,
ɨngave ʉmuunu ikwibata indagɨlo tsyoni,
lɨno ideenya lʉpamato mu tsyene,
pwʉ ivalɨlwagwa ʉkʉta adeenyile tsyoni,
11 manya ʉlya ʉvavɨɨkile ʉlʉlagɨlo ʉlwita,
“Ʉlaligupaga,”
b vɨ jyʉjwa ʉvavɨɨkile nʉ lwita,
“Ʉlabudaga.”
c Kwʉ kʉta,
ndajɨve nʉligwipi,
wʉ kʉnʉ ʉbudile,
pwʉ vuvalɨlwagwa ʉkʉta ʉlɨ nnangi va ndagɨlo.
12 Pwʉ mutsovage nʉ kʉvomba,
kʉnʉ mukʉmbʉhɨtsa ʉkʉta ʉNgʉlʉve jiikʉvahɨga,
ʉkʉkongana ni ndagɨlo tsa mwene,
itsikʉtʉvopola ʉwe ʉkʉhʉma mu mbiivi.
13 Ʉnsɨkɨ gwa vʉhɨgi,
avaanu ʉwʉ navikolelanila ɨkɨsa,
naveene navalakolelwe ɨkɨsa nʉ Ngʉlʉve.
Ɨngave ʉmuunu ikʉvakolela ɨkɨsa avaanu avange,
pwʉ ʉNgʉlʉve alankolela namwene ɨkɨsa pa kɨgono kya vʉhɨgi.
Ʉkʉva nʉ lwɨdɨko paninie ni mbombo inonu
14 Vɨɨdɨkivajyango,
ɨngave ʉmuunu ikɨtsova ʉkʉta alɨ nʉ lwɨdɨko,
kʉnʉ aleke ʉkʉva ni mbombo inonu,
ndeeti ago giiva nʉ lʉvʉmbʉlɨlo?
Ʉlwɨdɨko ʉlʉlɨwo,
nalukʉmpoka.
15 Tʉte ɨngave ʉmwɨdɨkinʼjiitu,
ʉnʼgoosi evo ʉnʼdala,
inʼgatsu ɨmisabwa nɨ kyakʉlya,
16 pwʉ mpamato viinyo ikʉmbʉʉla iita,
“Ʉbɨhage nʉ lʉnotsehetso,
ʉkootage ʉmwoto nʉ kwiguta,”
lɨno aleke ʉkʉntanga kʉ tsilya itsyalɨ vʉvʉle,
ndeeti ago gakaale giiva nʉ lʉvʉmbʉlɨlo?
17 Vʉle vʉle,
ɨngave mwiva mulɨ nʉ lwɨdɨko,
napeene muleke ʉkʉva ni mbombo inonu,
pwʉ ʉlwɨdɨko lwinyo ʉlwa lwiva ndɨ kɨɨnu ɨkɨswe.
18 Apange ʉmuunu jiita,
“Ʉve ʉlɨ nʉ lwɨdɨko lweli?”
Ʉjwa,
ndɨkaale ndikʉmwanda,
“Ʉne ndɨlɨ ni mbombo inonu.
Ʉmbonie ʉmwʉ ʉkaale wiiva nʉ lwɨdɨko kɨtsila kʉva ni mbombo inonu,
nʉʉne,
kʉ nzɨla jya mbombo inonu,
jʉndikʉkʉvonia ʉmwʉ ʉlwɨdɨko lwango lʉvye.”
19 Ndeeti,
ʉve vukwɨdɨka ʉkʉta kwale ʉNgʉlʉve mpamato mwene?
Lʉnonu!
Natsyene imepo imbiivi tsikwɨdɨka ago kʉnʉ tsijɨva mu lʉdwado.
20 Vɨ mpelwa ʉve!
Kɨki navunogwa ʉkʉlʉmanya?
Leka ndɨkʉvonie ʉkʉhʉma mu Vʉvɨge ʉVʉvalatse ʉkʉta ʉlwɨdɨko ʉlʉtsila mbombo inonu,
lʉtsila lʉvʉmbʉlɨlo!
21 ɄNgʉlʉve aambalye ʉdaada viitu ʉAbulahamu,
ʉkʉta anogye pamiiho ga mwene,
kʉ mbombo inonu itsʉ aavombile,
palya ʉpwʉ aahʉmiitse ʉmwana va mwene ʉIsaka,
ave neekelo jya kʉbudwa pa kɨteekelelo!d
22 Ndeeti,
nawilola ʉlwɨdɨko lwa Abulahamu kwa Ngʉlʉve ni mbombo tsa mwene ʉmwʉ syakongetsiinie,
ʉkʉsika ʉpwʉ ʉlwɨdɨko ʉlwa lʉkava lʉtengamiine kʉ nzɨla jya mbombo?
23 Itso tsyavombiike,
ndʉwʉ tsyavɨgilwe mu Vʉvɨge ʉVʉvalatse,
ʉkʉta,
“ɄAbulahamu aamwɨdiike ʉNgʉlʉve,
pwʉ ʉNgʉlʉve akambalɨla ʉvʉgolosu.”
e ɄAbulahamu namwene akava ikwɨlangwa ʉkʉta vɨ mmanyaani va Ngʉlʉve.
24 Pwʉ mumalile ʉkʉtsivona ʉkʉta jisiita kʉ nzɨla jya lwɨdɨko lwene ʉmuunu ʉkʉsikila ʉkʉnogelanila pamiiho ga Ngʉlʉve.
Apeene ʉmuunu inogelanila angave nʉ lwɨdɨko paninie ni mbombo inonu.
25 Vʉle vʉle na jʉlya ʉLahabu ʉndigu,
namwene aavalɨliilwe ʉkʉta anogye pamiiho ga Ngʉlʉve,
kʉ mbombo inonu itsʉ aavombile,
mu kʉvʉʉpɨlɨla kʉ mwene avatandɨɨli valya.
Kʉmbele,
akavanyemeeletsa,
nʉ kʉvagendetsa ɨnzɨla ɨjyɨnge pakʉta valeke ʉkwibatwa.f
26 Lɨno,
ʉmuunu angave nʉ lwɨdɨko,
aleke ʉkʉva ni mbombo inonu,
pwʉ ʉlwɨdɨko lwa mwene ʉlwa lwiva lʉsue.
Lʉhwaniine nʉ mmana ʉgʉtsila mwʉja,
nagwene gwiva gʉsue.