Imbombo tsa lʉlimi
3
1 Vɨɨdɨkivajyango,
valeke ʉkʉvepo avaanu vongosu mwanyie avinogwa ʉkʉva vamanyisi va limenyu lya Ngʉlʉve,
ʉlwakʉva mulʉmanyile ʉkʉta,
pa kɨgono kya vʉhɨgi,
ʉvʉhɨgi wiitu ʉwe twɨ vamanyisi vʉlaava wa kɨgelelo kya pakyanya.
2 Twɨ vooni twitula inongwa mu nzɨla itsilɨ pongosu.
Pangave poonu pwale ʉmuunu ʉvanitula inongwa kʉ galya ʉgwitsova,
ʉjwa iveetsaga atengamiine lwoni,
akʉmanyile ʉkwɨsiga kʉ mmana gwa mwene gwoni.
3 Lola,
ifalaasia tukʉtsyʉmɨɨlɨtsa tsitʉpʉlɨkage,
ʉkʉsika ʉpwʉ tulongotsa ɨmihana gya tsyene gyoni,
kʉ nzɨla jya kʉvɨɨka mu milomo gya tsyene ɨkyʉma ɨkɨdebe ɨkɨgujilwe.
4 Vʉle vʉle natsi ngalava,
ndatsive itsyene mbaha siitso,
tsikulugwa nɨ mepo ɨmbaha,
napeene tsilongotsiwa nʉ vʉsukaani ʉvʉdebe vʉvʉle ʉkʉlʉta ʉkʉveetsaga ʉkwʉ ʉndongotsi inogwa.
5 Vʉle vʉle nalʉ lʉlimi,
ndalʉve kyʉ kɨpagɨka ɨkɨdebe kya mmana,
napeene kʉ nzɨla jya lwene avaanu vikɨtsova itsa lwɨginio ʉlʉvaha.
Musaagage ʉkʉta naka kooto akadebe kiiva kimala ʉnsitu ʉmbaha.
6 Ʉlʉlimi nalwene lʉlɨngʼiine nʉ mwoto.
Ʉlʉ lʉdɨgile imbiivi tsa mu kɨlʉnga.
Ʉlwene kɨpagɨka kɨpamato mu sipagɨka syoni sya mmana,
ɨkyʉ kipela ʉmuunu ave mbiivi mu tsyoni itsʉ isaaga nʉ kʉvomba.
Ʉlwene maka ga vʉvejangi agipela ʉvʉlami wa mmana gwoni.
Ikange ʉlʉlimi lʉlɨ ndʉ mwoto ʉgukʉnnyianya ʉmuunu nʉ kʉnnanga mu wʉʉmi wa mwene wooni mu lʉlimbo ʉlwihʉma kʉ mwoto gwa sikutsooni.
7 Isipeliwa syoni sidɨɨmɨka.
Avaanu vaweesiitse ʉkʉdɨɨma ingʼanu,
isidege,
inzoka,
ni sya mu nyanza.
8 Napeene,
nakʉli ʉmuunu ʉviweesa ʉkʉdɨɨma ʉlʉlimi lʉleke ʉkʉtsova imbiivi.
Ʉlwene lʉlɨ nʉ vʉviivi ʉwʉ navusigika,
ikange lunanga avaanu ʉta sumu jya nzoka.
9 Kʉ nzɨla jya lʉlimi tukʉnʼginia ʉDaada,
ʉNtwa ʉNgʉlʉve viitu.
Kange kʉ nzɨla jya lʉlimi lʉʉlwa tukootola avaanu,
ʉwʉ ʉNgʉlʉve avapelile kʉ kɨhwani kya mwene.
10 Muumwa mu ndomo mpamato,
mwʉ gihʉma amamenyu ga kʉginia,
na ga kʉkootola.
Vɨɨdɨkivajyango,
ago naganogiili ʉkʉta gave ewo!
11 Lola,
nakɨkʉli ɨkɨdwivudwivu ɨkyʉ kihʉmya ʉmwa amagasi aginoga ikange kɨvuje kɨhʉmye ʉmwa amagasi agivava!
12 Vɨɨdɨkivajyango,
jisiita ʉkʉta ʉmʼbɨkɨ gwa likʉjʉ gʉhʉʉpe ʉmwa iseke tsa lizeituni.
b Ʉnʼzabibuc vʉle vʉle,
nagʉkahʉʉpe ʉmwa iseke tsa likʉjʉ.
Ɨkɨsima kya magasi ga mwinyo nakyene nakɨkahʉmye ʉmwa amagasi amanonu.
Ʉlʉhala nʉ vʉmanyi ʉvʉkwɨlanie
13 Veeni pagati paanyie,
ʉnya lʉhala nʉ kʉvʉmanya ʉvʉnogwe wa Ngʉlʉve?
Avonie ago,
mu kʉvomba imbombo inonu,
na pakʉva nʉ lwɨjiso ʉlwihʉma mu lʉhala lwa mwene.
14 Napeene,
ɨngave inumbula tsiinyo tsidɨgile ɨgiila ɨjɨhangile nʉ mwojo,
pwʉ muleke ʉkwɨginia ʉkʉta muvʉmanyile ʉvʉnogwe wa Ngʉlʉve.
Ikange muleke ʉkʉtsova ʉvʉnuasi pa wajɨlweli.
15 Ʉvʉmanyi ʉvʉlɨwo nawihʉma kwa Ngʉlʉve.
Ʉweene ʉwa wa mu kɨlʉnga,
ikange wa vʉnogwe ʉvʉviivi,
wihʉma kwa Setano jyʉmwene.
16 Lola,
apaveetsaga ʉpwʉ avaanu vapitsiige nɨ giila nʉ mwojo,
apo piiva nʉ kʉsambʉngʼana,
paninie nʉ kʉvomba imbiivi itsinge tsyoni.
17 Lɨno,
aviiva nʉ vʉmanyi ʉwihʉma kʉkyanya kwa Ngʉlʉve,
avo wʉ vagolosu,
avilonda ʉkʉva nʉ lʉnotsehetso na vaanu avange,
vadeke ikange vanya lwɨjiso.
Avo wʉ vanya kɨsa siitso,
ikange wʉ vivomba imbombo inonu.
Navivomba itsa kʉvatengelela avaanu vaninie,
ikange vatsila vʉsyovi.
18 Avaanu avipela ʉlʉnotsehetso pagati pa vaanu,
viiva ʉta vivyala ɨmbeju jya lʉnotsehetso,
kʉmbele vibenaga aganogelanie pamiiho ga Ngʉlʉve.