Ʉmuunu ʉvɨ idoova sivi kwa Ngʉlʉve
4
1 Imbatsa ni ngʼaani itsilɨ pagati paanyie,
sigegwa nɨ kɨki?
Sigegwa nʉ vʉnogwe ʉvʉviivi ʉwʉ vʉlɨ mu nʼgati mwanyie ʉwʉ wiilwa nʉʉnye pakʉta muvombe imbiivi!
2 Isyʉ munogwa,
wʉ namukʉsivona,
mubudana.
Mwiva mwibitwe nɨ kɨvini kʉ sya vaanu.
Ikange wʉ mulemilwe ʉmwa kʉsikavɨla,
mutengʉla ʉkʉlwɨlanila,
nʉ kʉtovana.
Isyʉ munogwa,
namwikava,
ʉlwakʉva namudoova kwa Ngʉlʉve!
3 Nagʉ nsɨkɨ wʉ mukʉnʼdoova isyo,
namwikava ʉlwakʉva mukʉnʼdoova sivi.
Mudoova pakʉta galya ʉgwʉ mukavaga gakwɨle itsa vʉnogwe wiinyo.
4 Ʉnyie muhwaniine nda valigu!
Ndeeti,
namulʉmanyili ʉkʉta ʉkʉnogwa ʉkʉtaama ndʉwʉ vitaama avanyapanzi,
kwʉ kʉsʉʉlana nʉ Ngʉlʉve?
Lola,
ʉmuunu ʉvaveetsaga ʉvɨ inogwa ʉkʉvomba nda vatulanongwa va mu kɨlʉnga,
pwʉ ikɨpela ndʉgʉ va Ngʉlʉve.
5 Mwɨlekelwe ʉkʉta ʉVʉvɨge ʉVʉvalatse witsova vʉvʉle ʉpwʉ wiita,
“ɄNgʉlʉve inogwa ʉwe tʉve vaanu va jyʉjwa mwene,
manya ilemala siitso mu numbula tʉngaleke ʉkʉnʼgana jyʉjwa mwene.”a
6 Paninie naago,
ʉNgʉlʉve ikʉtwongeletsa ʉlʉhʉngʉ,
kyʉ mene jɨvɨgilwe mu Vʉvɨge ʉVʉvalatse,
ndee,
“ɄNgʉlʉve ikʉvasiga avikɨjɨmɨka,
apeene ikʉvapa ʉlʉhʉngʉ avikɨjisa.”b
7 Pwʉ mumwɨdɨke ʉNgʉlʉve ave Ntwa viinyo.
ɄSetano mupɨganage nave,
pwʉ ikʉvakɨmbɨlaga.
8 Muhegelelage kwa Ngʉlʉve,
pwʉ namwene ihegelelaga kwanyie.
Mwɨlekelwe ʉkʉvomba imbiivi ʉnyie nyɨ vatulanongwa,
manya muganaania ʉkʉnkonga ʉNgʉlʉve nʉ kʉkonga ʉvʉnogwe ʉvʉviivi wa mu kɨlʉnga,
muvalatse inumbula tsiinyo.
9 Musʉsʉvale,
mulɨle nʉ kwɨlʉmbʉsa pa mbiivi tsiinyo.
Ʉkʉheka kwinyo kʉhambuke kʉlɨla,
ʉlʉhekelo lwinyo lʉhambʉke lʉsʉsʉvalo.
10 Mwɨjisaage paasi pamiiho ga Ntwa ʉNgʉlʉve,
pwʉ ʉmwene ikʉvɨɨmɨkaga.
Avɨɨdɨki pavanogye valekage ʉkʉbedana
11 Vɨɨdɨkivajyango,
muleke ʉkʉtsovelanila ʉvʉviivi,
ʉlwakʉva ʉmuunu ʉvɨ ikʉntsova ʉnnine ʉvʉviivi,
evo ʉvikʉmmɨga ʉnnine,
ʉjwa amalile ʉkʉbeda indagɨlo tsa Ngʉlʉve nʉ kʉtsivona mbiivi.
Ʉnsɨkɨ ʉgwʉ vukʉtsivona mbiivi,
pwʉ nʉkaave ikange vukʉtsikonga,
apeene ʉve ʉmalile ʉkwɨvɨɨka immɨgi va tsyene.
12 ɄNgʉlʉve mwene vɨ ivɨɨka indagɨlo,
ikange vɨ mmɨgi.
Vɨ jyʉjwa mwene ʉvipoka,
iita nʉ kʉjatsa.
Lɨno,
ʉve ʉlɨ veeni vɨ vukʉmmɨga ʉnnino?c
Avamosu valeke ʉkʉlongotsa ʉvʉnogwe wa veene
13 Lɨno,
mummʉlɨhɨtse vʉnonu,
ʉnyie nyɨ mwita,
“Ɨleelo evo kɨlaavo,
jʉtwilʉta mu vʉtsenge ʉvʉtʉnga.
Ʉkwa tʉtsitaama ʉmwaka gwoni,
tugʉlaga nʉ kʉgʉtsa nʉ kʉkava ɨkyʉma.”
14 Namulʉmanyili naga gapya giivepwo kɨlaavo!
Ʉwʉʉmi wiinyo kyʉ kɨki?
Vʉhwaniine nʉ lwʉja ʉlwʉ luvoneka kʉ kavalɨlo kadebe,
ikange akasɨkɨ kaako lujaganika!
15 Panogye mukaale muteetsage,
“Ɨngave ʉNtwa ʉNgʉlʉve inogwa,
tʉpitsiga vʉʉmi,
tʉpivomba ɨkɨtʉnga nɨ kɨtʉnga.”
16 Apeene ʉnyie lɨno,
mukɨginihitsa tsilya itsʉ musaaga ʉkʉvomba.
Ʉnsɨkɨ gwoni ʉgwʉ mukɨginia ndavʉle,
ʉkwa kʉviivi.
17 Pwʉ ʉvaveetsaga ʉvɨ agamanyile amanonu ga kʉvomba,
lɨno nikʉgavomba,
iiva avombile ʉvʉtulanongwa.