Ɨlivʉngʉ kʉ vamosu avasyovi
5
1 Lɨno,
ʉnyie nyɨ vamosu mummʉlɨhɨtse vʉnonu!
Mulɨle mwɨlʉmbʉse,
mulɨle mwoveele ʉlwakʉva mulɨ pa kwingila mu vʉpala ʉvʉvaha.
2 Isiinu sya vʉmosu wiinyo,
simalile ʉkʉvola,
nɨ misabwa giinyo,
gɨmalile ʉkʉlɨɨwa nʉ mehe.
3 Isahabu ni ndalama tsiinyo sigwe ɨngʼusu.
ɄNgʉlʉve alavavʉnga wʉ ajɨweene ɨngʼusu ɨjyo ɨjɨhʉmiine nʉ mwojo gwinyo.
Ʉlʉvʉngʉ ʉlwa lʉlananga ɨmihana giinyo ndʉwʉ gwigaha ʉmwoto.
Itsi tsilavombeka ewo ʉlwakʉva muvye mukɨlʉndamanihitsa isiinu mu sibaana siinyo mu sigono isi isya vʉsililo.
4 Pʉlɨhɨtsi,
avavombi viinyo wʉ vikuuta!
Aveene vamalile ʉkʉvomba ɨmbombo jya kʉbena mu silɨmɨla siinyo,
nʉʉnyie namuvahombili.
Ʉkʉleka ʉkʉhomba ʉkwa kukwɨlanga ʉvʉhɨgi wa Ngʉlʉve kwanyie.
Ikange ʉkʉkuuta kwa vavombi avo kʉpʉlɨkiike mu mbʉlʉkʉtʉ tsa Ntwa ʉNgʉlʉve ʉNyamaka Gooni.
5 Mu wʉʉmi wiinyo muvye vaanu va kwɨhovosa.
Muvombile itsa vʉnogwe wiinyo wʉ ʉNgʉlʉve ahegelye kukʉvahɨga.
6 Muvapelye avaanu avikonga indagɨlo tsa Ngʉlʉve vahɨgwe ipange vabudwe,
na vaanu avo navikʉvasiga kɨninie.
Ʉlwɨjʉmɨɨlɨtso mu vʉkʉvɨlwa
7 Vɨɨdɨkivajyango,
mwɨjʉmɨɨlɨtsaage,
ʉkʉsika ʉpwʉ ʉNtwa ʉYɨɨsʉ Kɨlɨsiti aliitsa.
Mulolage ʉlwɨjʉmɨɨlɨtso lwa muunu ʉndɨmi.
Ʉmwene ipʉlɨkɨla ɨkɨlɨmɨla kɨmetse nʉ kʉdʉlʉsa isiinu isyavyalile ʉkʉkongana nɨ sula ɨjɨnogelanie.
Isiinu isyo silɨ nʉ lʉvʉmbʉlɨlo kʉ mwene.
Ɨkyo kyʉ kipela ʉndɨmi ɨjʉmɨɨlɨtsaage siitso,
ʉkʉsika ʉpwʉ sidʉlʉka.
8 Vʉle vʉle najyʉnyie mwɨjʉmɨɨlɨtsaage,
mudʉlʉkage mu numbula tsiinyo,
ʉlwakʉva ʉkwitsa kwa Ntwa kʉmalile ʉkʉhegelela.
9 Vɨɨdɨkivajyango,
muleke ʉkʉngʼuulanila,
pakʉta mwitse muleke ʉkʉhɨgwa.
Muveetsage miiho!
ɄMmɨgi ahegelye alɨ pa ndyango!
10 Vɨɨdɨkivajyango,
mulolage avanyamalago va Ntwa ʉNgʉlʉve.
Aveene avo vaatsovaga ndʉwʉ ʉNgʉlʉve aavasuungʼile.
Vaakʉvɨlwagwa,
napeene navaatengejʉkage.
Lɨno najyʉnyie muvombage vʉle vʉle.
11 Ndʉwʉ mulʉmanyile,
tukʉvɨɨlanga ʉkʉta vagatalʉsu avaanu ʉwʉ vɨɨjʉmɨɨliitse.
Mumalile ʉkʉpʉlɨka nalwene ʉlwɨjʉmɨɨlɨtso lwa Ayubu,
nʉ mwʉ ʉNtwa ʉNgʉlʉve iitsile kukʉntanga kʉmbele.
ɄNtwa ʉNgʉlʉve adɨgile ɨkɨsa nʉ lʉhʉngʉ.
12 Vɨɨdɨkivajyango,
ʉkʉlʉtɨɨlɨla kʉ tsyoni,
mulɨjyɨgaga,
jɨve kʉ kɨɨnu ɨkɨveetsaga ɨkya kʉkyanya,
ɨkya mu kɨlʉnga,
pange ɨkɨnge ɨkɨveetsaga.
Ɨngave mukwɨdɨka ɨkɨɨnu muteetsage,
“Eena,”
vʉvʉle,
evo mungave mubeela muteetsage,
“Baako,”
vʉvʉle,
ʉkʉta mwitse muleke ʉkʉhɨgwa.a
Ʉkʉnʼdoova ʉNgʉlʉve mu lwɨdɨko
13 Ndeeti,
pagati paanyie mulɨ nʉ muunu ʉvikʉvɨlwa?
Anogye anʼdoove ʉNgʉlʉve.
Ndeeti,
mulɨ nʉ muunu ʉvihekela?
Anogye ɨɨmbage inyɨmbo tsa lʉginio.
14 Ndeeti,
mulɨ nʉ muunu ʉvivawa?
Anogye avɨɨlange avandyakoni va mpelela ʉkʉta viitse kukʉmʼbaka amafutab mu litaawa lya Ntwa ʉYɨɨsʉ Kɨlɨsiti,
nʉ kʉnʼdoovela kwa Ngʉlʉve.
15 Ʉnsɨkɨ ʉgwʉ vikʉnʼdoovela mu lwɨdɨko,
jiipona.
ɄNtwa jiikʉmwinamula ʉkʉhʉma pa vʉgono.
Nʉpwʉ ɨngave ʉvʉtamu wa mwene vʉhʉmiine ni mbiivi itsʉ atuliige,
jiisyɨkɨlwa.
16 Pwʉ lɨno wʉ mulɨ vatamu,
nʉ jyʉnge ɨlaatage kʉ nnine imbiivi tsa mwene,
ikange mudoovelanilage kwa Ngʉlʉve,
pwʉ muponaga ʉvʉtamu wiinyo.
Ʉmuunu ʉvɨ anogye pamiiho ga Ngʉlʉve,
inyɨsajo tsa mwene tsiiva na maka,
ikange tsivomba ɨmbombo.
17 Ʉnyamalago ʉEliya,
aale muunu ndʉʉwe.
Ʉnsɨkɨ ʉgwʉ aagimbile ʉkʉnʼdoova ʉNgʉlʉve ʉkʉta ɨsula jɨleke ʉkʉtima,
gyasilile ɨmyaka gɨdatu nɨ myetsi ntanato (6),
ɨsula kɨtsila kʉtima mu kɨlʉnga ɨkyo.
18 Kʉmbele,
akanʼdoova ʉNgʉlʉve ikange ʉkʉta ɨsula jɨtime.
Pwʉ ɨsula jɨkatima ʉkʉsika ʉpwʉ ɨkɨlʉnga kɨkametsa nʉ kʉdʉlʉsa isiinu ikange.c
19 Vɨɨdɨkivajyango,
ɨngave ʉmuunu mpamato mwanyie ijaga pa kʉjɨleka ɨlweli,
kʉmbele ʉnnine angankilivule ikange,
20 apo mulʉmanye vʉnonu ʉkʉta,
ʉmuunu ʉvaveetsaga ʉvikʉmmʉmya ʉntulanongwa mu vʉtulanongwa,
iiva ampokile ʉmuunu ʉjwa aleke ʉkwingila kʉ vʉswe wa sikutsooni.
Ikange jiikʉmbɨɨka ʉmuunu ʉjwa asyɨkɨlwe imbiivi tsa mwene itsʉ nyongosu.