Avapositili avange vɨɨdiike imanyiiso tsa Paulo
2
1 Ɨmyaka kɨtsigo na gɨnni (14) wʉ gɨlʉtɨngʼiinie,
ndɨkalʉta ikange kʉ Yelusalemu paninie nʉ Balinaba.
Ndyantoolile najyʉ Tito,
tʉkalʉtania ʉkʉ.
2 Ndyalʉtile pa nsɨkɨ ʉgwa ʉlwakʉva ʉNgʉlʉve aamboniitse ʉkʉta pannogye ndɨlʉte ʉkʉ.
Wʉ tʉtaamile twɨjyekye na valongotsi va mpelela,
ndɨkavavʉʉla ɨLivangɨli ɨlyʉ ndyalʉmbɨlɨlaga kʉ vaanu avatava Vayahudi.
Ndyavombile ndavʉle pa vʉsumbe wa kwɨdɨngʼana ʉne na veene,
pakʉta ɨmbombo jyango ɨjyʉ ndivomba jyɨdɨkiwe,
jɨleke ʉkʉjaga pavʉvʉle.
3 Ikange,
najyʉ jyango ʉTito,
ʉvɨ naale Nʼyahudi navamwʉmɨɨlɨtse ʉkʉtahiliwa,a
4 nʉpwʉ jɨngave vaalepwo avɨɨdɨki avange va vʉnuasi ʉwʉ vaanogwagwa ʉkʉta atahiliwe.
Avaanu avo vɨɨjingiitse kɨvʉsyovi kutandɨɨla ʉvʉvopolwa wiitu ʉwʉ tʉpeevilwe nʉ Mesiya ʉYɨɨsʉ.
Vaanogwagwa vatwingitse mu vʉvanda wa kʉkonga inyiiho tsa Kɨyahudi.
5 Avaanu avo natwɨdɨngʼane navo napadebe,
pakʉta ʉwajɨlweli wa Livangɨli vʉleke ʉkwandʉlwa.
Twanogilwe vʉgendelele ʉkʉloleelwa pakʉta najyʉnyie vʉvatangage.
6 Lɨno,
avaanu avitsowa ʉkʉta wʉ valongotsi vanzagɨla,
navaale ni siveetsaga isipya isya kʉmbʉʉla ʉne.
Jɨlweli kwane nandivɨɨkɨla ʉntɨma ʉkʉta vaale nʉ wɨɨmɨkiwa evo navaale nawo,
manya ʉNgʉlʉve nilola kʉmiiho pakʉta antengelele ʉmuunu.
7 Apeene vakalʉmanya ʉkʉta ʉNgʉlʉve ansuungʼile ʉne kuhɨlɨka ɨLivangɨli lya Yɨɨsʉ kʉ vaanu avatava Vayahudi,
ndʉwʉ ʉNgʉlʉve ansuungʼile ʉPetulo avahɨlɨkɨle aVayahudi.
8 ɄNgʉlʉve vɨ ivomba ɨmbombo ʉkʉgendela mwawe twɨ vooni.
Ikʉmpa amaka ʉPetulo ʉkʉvomba ɨmbombo jya vʉpositili kʉ Vayahudi,
najyʉne ikʉʉma amaka ga kʉvomba ɨmbombo kʉ vaanu avatava Vayahudi.
9 Ikange ʉYakobo,
ʉPetulo nʉ Yohana avivoneka wʉ valongotsi vanzagɨla,
valʉmanyile ʉkʉta ʉNgʉlʉve kʉ lʉhʉngʉ lwa mwene,
aamye ɨmbombo ɨjɨ.
Ɨkɨ kyʉ mene vaatwibiite isivoko ʉne nʉ Balinaba,
kɨve kɨmanyilo kya kʉta tʉlɨ mu vʉhange pa mbombo.
Twɨɨdɨngʼiine ʉkʉta ʉwe patʉnogye tʉvombage ɨmbombo kʉ vaanu avatava Vayahudi,
aveene vavombage kʉ Vayahudi.
10 Ɨkɨɨnu kɨpamato ɨkyʉ vaatʉdoovile,
vaatye patʉnogye tʉkʉmbʉkage ʉkʉvatanga avagatsu.
Ɨkɨɨnu ɨkyo kyʉ najyʉne ndikɨkupila ʉkʉvomba.
ɄPaulo ikʉntanila ʉPetulo
11 Lola,
kʉmbele ʉPetulo wʉ itsile kʉ Antiokiya kukʉtʉgendela,
ndyantanie pavʉvalasu ʉlwakʉva aavombile sivi.
12 Manya avaanu vaninie ʉkʉhʉma kwa Yakobo wʉ navasiiki,
ʉPetulo aalitsaga ɨkyakʉlya paninie na vaanu avatava Vayahudi.
Lɨno,
avaanu avaahʉmile kwa Yakobo wʉ vasiike,
ʉPetulo akɨpaadʉla,
akɨlekelwa ʉkʉlya paninie na vaanu avatava Vayahudi.
Aadwadaga avaanu valya avaasimiilitsaaga ʉkʉta avɨɨdɨki vooni vatahiliwaagwe.
13 Pwʉ nava Vayahudi vaninie vakatengʉla ʉkʉvomba ndʉwʉ aavombile ʉPetulo,
nʉpwʉ jɨngave vaalʉmanyile ʉkʉta itsʉ vivomba tsa vʉsyovi.
ɄBalinaba namwene vakansonga,
akakonga ʉvʉsyovi wa veene.
14 Pwʉ wʉ ndɨweene navivomba ʉkʉkongana nʉ wajɨlweli wa Livangɨli,
ndɨkambʉʉla ʉPetulo pavʉvalasu pagati pa vaanu vooni ndɨkata,
“Jɨngave ʉve vɨ Nʼyahudi,
vukonga inyiiho tsa vaanu avatava Vayahudi,
jɨvye ndeeti vukʉvʉʉmɨɨlɨtsa avaanu avatava Vayahudi vakongage inyiiho tsa Vayahudi?”
Avaanu vivalɨlwa ʉvʉgolosu kʉ nzɨla jya kʉmwɨdɨka ʉKɨlɨsiti
15 Jɨlweli ʉwe twɨ tʉlɨ vaholwa va Kɨyahudi,
natʉlɨ vatulanongwa nda vaanu avatava Vayahudi.
16 Tʉlʉmanyile jɨlweli,
ʉkʉta ʉNgʉlʉve ikʉvavalɨla avaanu ʉvʉgolosu kʉ nzɨla jya kʉmwɨdɨka ʉMesiya ʉYɨɨsʉ kwene,
najiiva kʉ nzɨla jya kʉkonga indagɨlo tsa Moose.
Ʉwe tʉmwɨdiike ʉYɨɨsʉ Kɨlɨsiti pakʉta tʉvalɨlwe ʉvʉgolosu kʉ nzɨla jya galya ʉgwʉ aavombile ʉKɨlɨsiti,
nakwʉ kʉta kʉ nzɨla jya kʉtsikonga indagɨlo tsa Moose.
Jɨlweli,
kʉ nzɨla jya kʉtsikonga indagɨlo tsa Moose,
nakʉli ʉmuunu ʉvɨ ivalɨlwa ʉvʉgolosu.b
17 Lɨno,
ɨngave tulonda ʉkʉvalɨlwa ʉvʉgolosu kʉ nzɨla jya kʉmwɨdɨka ʉKɨlɨsiti kwene,
pwʉ avange avivona ʉkʉta ɨlyo nalɨkwɨliili,
viteetsaga tʉpitsiige tʉlɨ vatulanongwa manya tuvoneka kʉ veene tʉdeenyile ʉlʉlagɨlo lwa kʉtahili.
Ndeeti,
aga givonia ʉkʉta ʉKɨlɨsiti ikʉtʉvɨɨka tʉve vatulanongwa?
Baako!
18 Lola,
ndɨngave ndikilivukila ʉkʉtsenga palya ʉpwʉ ndyamamulaga,
c pwʉ jivonia ʉkʉta ʉne ndɨlɨ ntulanongwa.
19 Lola,
ʉne ʉpwʉ ndyakongaga indagɨlo tsa Moose tsyammelye ndɨve va kʉtaagwa kʉ vʉswe wa sikutsooni,
ʉwʉʉmi wango wa mu ndagɨlo waadugile.
Ʉwʉʉmi ʉwʉ ndɨlɨ nawo lɨno vʉvye wa kʉmbombela imbombo ʉNgʉlʉve.
20 Ʉne ndyabudilwe paninie nʉ Kɨlɨsiti pa kɨdamingʼanie,
lɨno ndɨlɨ mwʉmi.
Napeene nakwʉ kʉta ndɨlɨ mwʉmi ʉne,
apeene ʉKɨlɨsiti vɨ mwʉmi mu nʼgati mwane.
Ʉwʉʉmi ʉwʉ ndɨlɨ nawo lɨno,
ndɨlɨ nawo kʉ nzɨla jya lwɨdɨko.
Ʉlwɨdɨko lwa kʉmwɨdɨka ʉMwana va Ngʉlʉve ʉvɨ aanganile,
akɨhʉmya ʉwʉʉmi wa mwene,
akammoka.
21 Nandɨkalʉbeele ʉlʉhʉngʉ lwa Ngʉlʉve.
Lola,
ɨngave ʉmuunu iweesa ʉkʉvalɨlwa ʉvʉgolosu kʉ nzɨla jya kʉtsikonga indagɨlo tsa Moose,
pwʉ ʉKɨlɨsiti aasue pavʉvʉle!