Ɨkalata jya Paulo
kʉ Vagalatiya
Ʉlʉpembetso lwa Paulo
1
1 Ɨkalata ɨjɨ jɨhʉmile kwane,
ʉne ndɨ Paulo,
ndɨ ndɨlɨ mpositili.
Ʉne nandyahalwe nɨ kɨpʉga kya vaanu evo ʉkʉsuungʼwa nʉ muunu ʉntʉnga.
Apeene ndyasuungʼilwe nʉ Yɨɨsʉ Kɨlɨsiti jyʉmwene,
nʉ Daada ʉNgʉlʉve ʉvɨ aantsʉʉsiitse ʉYɨɨsʉ ʉkʉhʉma kʉ vaswe.
2 Ʉne na vɨɨdɨkivajiitu vooni avalɨ paninie nʉʉne tukʉvavɨgɨla ʉnyie,
nyɨ va mipelela gya Ngʉlʉve gya mu mpandʉlʉ gwa Galatiya.
3 Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu,
na kʉ Ntwa ʉYɨɨsʉ Kɨlɨsiti,
siveetsage nʉʉnyie.
4 ɄKɨlɨsiti aahʉmiitse ʉwʉʉmi wa mwene,
kʉ nongwa jya kʉhetsa imbiivi tsiitu,
pakʉta atʉpoke ʉkʉhʉma mu mbiivi tsyoni itsa mu kɨlʉnga kya lɨno.
Aavombile ewo ʉlwakʉva ʉNgʉlʉve ʉDadajiitu aanogilwe lɨvombeke ɨlɨ.
5 Kʉ mwene ʉNgʉlʉve kwʉ lʉveetsage ʉlwɨmɨko sikutsooni.
Ameni.
ƗLivangɨli ɨlɨnge nalɨkʉli
6 Ndidega siitso ʉkʉta,
kʉ nsɨkɨ nsupi vʉvʉle ʉgʉlʉtɨngʼiinie,
ʉnyie mundekile ʉNgʉlʉve ʉvɨ aavɨɨlangile kʉ lʉhʉngʉ lwa Kɨlɨsiti.
Mutengwe ʉkʉkonga imanyiiso itsinge itsʉ avaanu avange viita lyʉ Livangɨli,
7 nʉpwʉ jɨngave naLivangɨli napadebe.
Lola kwʉvale avaanu vaninie ʉwʉ vikʉvajatsɨlɨngʼania ʉnyie,
vilonda ʉkʉjatsa ʉwajɨlweli wa Livangɨli lya Kɨlɨsiti.
8 Lɨno,
nʉpwʉ jɨngave weewe twɨ vapositili evo ʉnsuungʼwa ʉkʉhʉma kʉkyanya ikwitsa nʉ kʉvalʉmbɨlɨla ɨlivangɨli ɨlyʉ nalɨhwaniini na lɨlya ɨlyʉ twavalʉmbɨlye ʉnyie,
ʉjwa akootolwe!
9 Ndikʉvavʉʉla ʉnyie ikange ndʉwʉ twavavʉʉlile ʉnsɨkɨ gʉlyaa ʉkʉta,
ɨngave ʉmuunu ʉvaveetsaga ikʉvalʉmbɨlɨla ʉnyie ɨLivangɨli ɨlɨnge,
ɨlyʉ nalɨhwaniini na lɨlya ɨlyʉ mwʉpɨlye,
ʉjwa akootolwe!
10 Lɨno,
ndeeti musaaga ʉkʉta ʉne ndinogwa avaanu vangane?
Baako,
ʉne ndinogwa ʉkʉganwa nʉ Ngʉlʉve mwene!
Lola,
ndɨkaale ndɨve ndinogwa ʉkʉvahovosa avaanu,
apo nandɨkaale ndɨve mbombi va Yɨɨsʉ Kɨlɨsiti.
ɄPaulo aasuungʼilwe nʉ Ngʉlʉve kulʉmbɨlɨla ɨLivangɨli
11 Vɨɨdɨkivajyango,
ndinogwa mulʉmanye ʉkʉta,
ɨLivangɨli ɨlyʉ ndyavalʉmbɨlye ʉne nalyahʉme kʉ vaanu.
12 Nandyʉpɨlɨle ɨLivangɨli ɨlyo ʉkʉhʉma kʉ vaanu,
pange kʉmanyiisiwa nʉ muunu ʉvaveetsaga.
Apeene ʉYɨɨsʉ Kɨlɨsiti jyʉmwene,
vɨ aandɨndʉlye ndɨlɨmanye ɨlyo.
13 Ʉnyie mupʉliike ikulongwi tsa lʉgendo lwango lwa katale ʉpwʉ ndyakongaga ʉlwɨdɨko lwa Kɨyahudi.
Ʉne ndyagʉnyanyamikaga siitso nʉ kʉgʉpelela ʉvʉkʉvɨlwa ʉmpelela gwa Ngʉlʉve,
ndyanogwagwa ʉkʉgʉjatsa lwoni.
14 Pa kulongwi tsa kʉgwɨmɨla ʉmpelela gwa Kɨyahudi,
ʉne ndyale nyango siitso,
ndyavalʉtɨɨlye avajyango vongosu ʉwʉ twevelanilaga ɨmyaka gya kʉholwa.
Ndyɨkupilaga siitso ʉkwibata inyiiho tsa vadadajiitu.
15 Lɨno ʉNgʉlʉve kʉ lʉhʉngʉ lwa mwene aannyalile ʉne wʉ ndɨkaanale ʉkʉholwa,
aannyɨlangile ndɨmbombelage.
Wʉ gʉsiike ʉnsɨkɨ gwa peene,
16 akambonia ʉne ʉmwʉ aveelye ʉMwana va mwene,
pakʉta ndɨpʉlɨsaage ikulongwi tsa mwene kʉ vaanu avatava Vayahudi.
Nandyalʉte kʉ vaanu kudoova vandʉngɨkɨle ʉmwa kʉvombela ɨmbombo ɨjɨ,
17 ikange nandyalʉte taasi kʉ Yelusalemu kʉ valya avaandongwe ʉne ʉkʉva vapositili,
apeene ngʼaningʼaani ndɨkalʉta kʉ kɨlʉnga kya Alabiya.
Kʉmbele ndɨkakilivuka ikange mu Damesiki.
18 Ɨmyaka gɨdatu wʉ gɨlʉtɨngʼiinie,
ndɨkalʉta kʉ Yelusalemu kukwagana nʉ Petulo.
Ndɨkataama kʉ mwene isigono kɨtsigo na sihaano (15).
19 Nandyavavone avapositili avange,
apeene ʉYakobo ʉnnunaave va Ntwa ʉYɨɨsʉ.
20 ɄNgʉlʉve alʉmanyile ʉkʉta aga ʉgwʉ ndikʉvavɨgɨla ga jɨlweli,
nanditsova itsa vʉnuasi.
21 Pwʉ kʉmbele ndɨkalʉta mu mpandʉlʉ gwa Siliya nʉ gwa Kilikiya.
22 Ʉnsɨkɨ ʉgwa avɨɨdɨki va mipelela gya Yɨɨsʉ Kɨlɨsiti ɨgya mu mpandʉlʉ gwa kʉ Yuuda,
navaammanye ʉne.
23 Vaatsimanyile tsi kulongwi itsʉ vaatsipʉliike ʉkʉta,
“Ʉmuunu ʉvɨ aatʉpelelaga ʉvʉkʉvɨlwa pa vʉtengʉlɨlo,
lɨno ilʉmbɨlɨla ikulongwi tsa lwɨdɨko lʉʉlʉlya ʉlwʉ aagelaga ʉkʉlʉvejanga.”
24 Pwʉ vakanʼginia ʉNgʉlʉve kʉ nongwa jya galya ʉgwʉ gaavombiike kwane.