Ɨkalata jya vɨɨlɨ jya Paulo
kʉ Vakolinto
Ikulongwi itsilongola
Ɨkalata jya vɨɨlɨ kʉ Vakolinto jyavɨgilwe nʉ mpositili ʉPaulo mu mwaka inninie mu myaka ɨgya sitsigo sihaano na gɨhaano (55) ʉkʉsika kʉ sitsigo sihaano na ntanato (56) Waholilwe ʉYɨɨsʉ Kɨlɨsiti (1:1). Ɨjɨ kalata jya vɨɨlɨ mu kalata ivɨlɨ itsʉ tʉlɨ natso itsʉ ʉPaulo aavɨgile kʉ mpelela gwa kʉ Kolinto. Avɨmbi vikwɨdɨka ʉkʉta wʉ ʉPaulo navɨgili ɨkalata ɨjɨ, aatalile akavavɨgɨla aVakolinto ɨkalata ɨjyɨnge ɨjyale na mamenyu amakali. Ɨkalata ɨjyo jyajagile. Ʉvʉkali wa mamenyu agaale mu kalata ɨjyo vʉtsovilwe padebe mu kalata ɨjɨ (2:3-4). Ɨkalata jya vɨɨlɨ kʉ Vakolinto jivoneka jyavɨgilwe wʉ ʉPaulo alɨ mu kɨlʉnga kya Makedoniya (2:13).
Ʉmʉ ʉPaulo ivonia ʉlʉhekelo lwa mwene ʉlwahʉmiine na mamenyu amanonu ʉgwʉʉpɨlye ʉkʉhʉma kwa Tito agitsova ikulongwi tsa mpelela gwa kʉ Kolinto. Mu nʼgati mu kalata ɨjɨ, tukʉtsivona imanyiiso itsa nʼgati itsa kʉhʉmya isyavʉpe ʉkʉkongana nʉ lwɨdɨngʼano ʉlʉpya. Ɨkɨɨnu ɨkɨ ɨkya kʉhʉmya isyavʉpe kivoneka ʉmwʉ ʉPaulo ilagɨlɨla ɨnzɨla jya kʉlʉndamanihitsa indalama tsa kʉlʉta kukʉvatanga avɨɨdɨki avaale vagatsu kʉ Yelusalemu (8-9).
Ikange jivoneka ʉkʉta avaanu avange viitsile kʉ mpelela gwa kʉ Kolinto, ʉwʉ vaantsovaga isivi ʉPaulo nʉ kʉbeetsa ʉkʉta ʉPaulo aale mpositili. Ʉvʉsumbe wa veene waale ʉkʉvakwega aVakolinto vavɨɨdɨkɨle aveene nʉ kʉmʼbeela ʉPaulo. Vakavasonga avaanu vabeelage ʉkʉta ʉPaulo aale impositili. Pa kulongwi ɨjɨ, kʉ vʉmalɨlo wa 2 Vakolinto, ʉPaulo inywilitsa ʉkʉta ʉmwene impositili va Mesiya ʉYɨɨsʉ.