Ɨkalata jya vɨɨlɨ jya Paulo
kʉ Vakolinto
Ʉlʉpembetso lwa Paulo
1
1 Ɨkalata ɨjɨ jɨhʉmile kwane ndɨ Paulo,
ndɨ ʉNgʉlʉve annyɨlangile kʉ vʉnogwe wa mwene ndɨve mpositili va Mesiya ʉYɨɨsʉ.
Ʉne nʉ mwɨdɨkinʼjiitu ʉTimoti tukʉvasaamusa ʉnyie nyɨ vampelela,
nyɨ mulɨ mu vʉtsenge wa Kolinto,
paninie na vɨɨdɨki vooni va Ngʉlʉve avalɨ mu mpandʉlʉ gwa Akaya.
2 Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu,
na kʉ Ntwa viitu ʉYɨɨsʉ Kɨlɨsiti,
siveetsage nʉʉnyie.
Ʉlʉtseeso lwa Ngʉlʉve mu vʉkʉvɨlwa
3 Aginiwaagwe ʉNgʉlʉve,
ʉDadaaje va Ntwa viitu ʉYɨɨsʉ Kɨlɨsiti,
ʉDaada ʉnya kɨsa,
ikange ʉvɨ ikʉtʉtseesa mu lʉsʉsʉvalo ʉlʉ nʉʉlʉ.
4 Ʉmwene ikʉtʉtseesa mu vʉkʉvɨlwa wooni,
pakʉta najyʉwe tʉvatseesaage avaanu avange avalɨ mu vʉkʉvɨlwa ʉvʉ nʉʉvʉ.
Pwʉ lɨno tukʉvatseesa ʉnyie ndʉwʉ ʉNgʉlʉve ikʉtʉtseesa ʉwe.
5 Wʉ ʉvʉkʉvɨlwa wiitu ʉwihʉma mu kʉndʉmbɨlɨla ʉKɨlɨsiti vukwongelela siitso,
vʉvʉle vʉle wʉ nalwene ʉlʉtseeso lukwongelela siitso kwawe ʉkʉgendela mwa Kɨlɨsiti.
6 Nʉpwʉ jɨngave tukʉvɨlwa,
tukʉvɨlwa pakʉta ʉnyie muve nʉ lʉtseeso nʉ vʉpoki.
Ikange,
ʉwe wʉ tutseesiwa,
jɨlweli tʉlavatseesa najyʉnyie.
Pwʉ najyʉnyie mwɨsaavʉle ʉkʉsipa ʉvʉkʉvɨlwa ʉvuweesa ʉkʉviitsila ndʉʉwe.
7 Ɨnyʉʉve jiitu kwanyie ndʉti,
ʉlwakʉva tʉlʉmanyile ʉkʉta wʉ mukʉvɨlwa ndʉʉwe,
pwʉ mutseesiwa ndʉʉwe.
8 Vɨɨdɨkivajiitu,
tunogwa mulʉmanye ʉmwʉ twakʉvɨliilwe wʉ tʉlɨ kʉ mpandʉlʉ gwa Asiya.
Ʉvʉkʉvɨlwa ʉwatʉweene waale vʉvaha siitso,
gwasue gʉkamala.
9 Tsa jɨlweli twale ʉta vaanu avahɨgilwe ʉkʉbudwa.
Ɨlyo lyahʉmye pakʉta tʉkʉleke ʉkʉhʉʉvɨla amaka giitu,
apeene tʉmmʉʉvɨlage ʉNgʉlʉve,
ʉvɨ itsʉʉsa avaswe.
10 Ʉmwene ʉjwa vɨ aatʉpokile wʉ tʉlɨ mu lʉjɨgajɨga lwa kʉbudwa,
ikange vɨ nalɨ lɨno igendelelaga ʉkʉtʉpoka.
Ʉwe tukʉmmʉʉvɨla ʉmwene ʉkʉta igendelelaga ʉkʉvomba ewo ʉnsɨkɨ gwoni,
11 ʉkʉkongana ni nyɨsajo tsiinyo kwa Ngʉlʉve itsʉ mukʉtʉdoovela ʉwe.
Ʉmwene ipʉlɨka inyɨsajo tsiinyo nʉ kʉtʉsaja ʉwe.
Pwʉ avaanu vongosu vikʉnsaanaga ʉNgʉlʉve kʉ nongwa jya lʉhʉngʉ lwa mwene kwawe.
ɄPaulo ikʉgaleka amasaago ga mwene ga kʉbɨha kʉ Kolinto
12 Lɨno ʉwe tukɨginia nʉ kwɨpʉlɨka mu numbula tsiitu ʉkʉta,
pa kɨlʉnga apa,
sitsosiitso pagati paanyie,
tʉtaamile mu vʉgolosu na mu wajɨlweli ʉkʉhʉma kwa Ngʉlʉve.
Natʉvombili ɨlyo kʉ lʉhala lwitu,
apeene tʉvombile ɨlyo kʉ lʉhʉngʉ lwa Ngʉlʉve.
13-14 Ʉkʉkongana nɨɨlyo natukʉvavɨgɨla amamenyu amahenza,
apeene tukʉvavɨgɨla amamenyu ʉgwʉ muweesa ʉkwɨmba nʉ kʉkɨmanya vʉnonu ɨkyʉ gitsova.
Nʉpwʉ jɨngave ʉnsɨkɨ ʉgʉ mutʉmanyile padebe,
tuhʉʉvɨla ʉkʉta pambele mupikʉtʉmanya lwoni.
Pwʉ mu kɨgono ɨkyʉ alakilivuka ʉNtwa ʉYɨɨsʉ,
mulɨginihitsa ʉwe,
ndʉwʉ ʉwe tukɨginihitsa ʉnyie.
15 Lɨno ʉlwakʉva ndyalʉmanyile vʉnonu ʉwɨɨdɨhɨtsi nɨ nyʉʉve jiinyo kwane,
pwʉ ndyanogilwe ndiitse kwanyie kavɨlɨ.
Pa kwitsa kwane kwanyie kavɨlɨ ʉnyie mwale muvʉmbʉlɨla siitso.
16 Ndyalamwe ʉkʉgendela kwanyie wʉ ndɨlɨ mu nzɨla ʉkʉlʉta ʉkʉ kʉ Makedoniya,
pakʉta wʉ ndɨhʉmile kʉ Makedoniya,
ndɨkilivuke ikange kwanyie pakʉta muume ʉlʉtangɨlo wʉ ndibɨha kʉ Yuuda.
17 Ndeeti,
ʉpwʉ ndɨkalamwe ʉkʉgaleka amasaago gango ga kwitsa kwanyie,
musaaga mwita ndɨkaale nya mamɨndumɨndu?
Ipange musaaga mwita ʉne ndilongotswa nʉ vʉmuunu wango,
ʉkʉta ndɨte,
“Eena” pwʉ ikange ndɨte,
“Baako!”
18 Lɨno,
ndʉwʉ ʉNgʉlʉve ʉmwʉ aveelye va jɨlweli,
ʉgwʉ twavavʉʉlile ʉnyie,
nagaave ga kʉta,
“Eena” pwʉ ikange ga kʉta,
“Baako.”
19 Manya ʉYɨɨsʉ Kɨlɨsiti ʉMwana va Ngʉlʉve ʉvɨ ʉne,
ʉSilwani nʉ Timoti twalʉmbɨlye kwanyie,
naale muunu va mamɨndumɨndu.
Ʉmwene naateetsage,
“Eena,”
avuje ate,
“Baako,”
apeene ʉmwene ʉnsɨkɨ gwoni angate,
“Eena,”
kwʉ kʉta ʉgwʉ itsova ga jɨlweli.
20 Manya gooni ʉgwʉ ʉNgʉlʉve aatʉhʉʉviitse ʉkʉta alatʉpa kʉ nzɨla jya Kɨlɨsiti,
ga jɨlweli.
Ɨkɨ kyʉ mene mwa Yɨɨsʉ Kɨlɨsiti twita,
“Ameni,”
a kwʉ kʉta tsa jɨlweli,
kʉ vʉsumbe wa kʉnʼginia ʉNgʉlʉve.
21 ɄNgʉlʉve vɨ mwene ikʉtʉnywilitsa ʉwe nʉʉnyie,
ikange atʉhalile tʉve vɨɨdɨki va Kɨlɨsiti,
22 nʉ kʉtʉvɨɨka ɨkɨkolekelo tʉve vaanu va mwene,
nʉ kʉvɨɨka mu numbula tsiitu ʉMepo ʉMbalatse pakʉta lʉve lʉpɨngɨkɨlo lwa mwene kʉ siinu silya isyʉ aatʉhʉʉviitse ʉkʉtʉpa.
23 Nandyavuje ndiitse ikange ʉkwa kʉ Kolinto ʉlwakʉva nandyanogwe ʉkʉlematsa inumbula tsiinyo.
b Aga ʉgwʉ nditsova ga jɨlweli,
najyʉ Ngʉlʉve ikʉmmʉlɨka.
24 Nakwʉ kʉta ʉwe tunogwa ʉkʉvʉʉmɨɨlɨtsa ʉgwʉ munogye ʉkʉvomba mu lwɨdɨko,
manya ʉnyie mudʉlwike mu lwɨdɨko.
Ɨkyʉ kilondiwa kwawe,
kwʉ kʉvomba ɨmbombo paninie nʉʉnyie pakʉta muhovoke.