Ɨkalata jya Paulo
kʉ Vagalatiya
Ikulongwi itsilongola
Ɨkalata jya Vagalatiya jyavɨgilwe nʉ mpositili ʉPaulo (1:1). Aagɨvɨgye ɨmipelela ɨgyale mu mpandʉlʉ gwa Galatiya. Ɨmipelela ɨgyo aatengʉliitse wʉ igenda mwoni mwoni mu kʉlʉmbɨlɨla ɨLivangɨli. Ʉmpandʉlʉ gwa Galatiya gwale mu lʉdeeva lwa Kɨlooma.
Avɨmbi vikwɨdɨngʼana ʉkʉta ʉPaulo aavɨgile ɨkalata ɨjɨ mu mwaka inninie mu myaka ɨgya sitsigo sinni na nnaana (48) ʉkʉsika kʉ sitsigo sihaano na lekelakʉpamato (57) Waholilwe ʉYɨɨsʉ Kɨlɨsiti. Aavɨgile wʉ alɨ mu vʉtsenge wa Efeso evo Kolinto. Aavɨgile ɨkalata ɨjɨ jɨkɨɨmbwe na Vakɨlɨsiti aVayahudi na vatava Vayahudi.
Kʉ mipelela ɨgyo vaahʉmye avamanyisi va vʉnuasi avɨjɨlangaga Vayuuda. Avaanu avo vaamanyiisaaga ʉkʉta ʉPaulo naale impositili, ikange vʉʉmɨɨlɨtsaaga avɨɨdɨki avatava Vayahudi vakongage indagɨlo tsa Moose, sitsosiitso vatahiliwaagwe pakʉta vave lweli vapokilwe nʉ Ngʉlʉve.
Wʉ ipʉlɨka itso, ʉPaulo akavɨga ɨkalata ɨjɨ kʉ vʉsumbe wa kʉvavʉʉla aVagalatiya ʉwajɨlweli ʉvʉlɨpwo. Pa kulongwi jya vʉpositili wa mwene ʉPaulo, ikɨtsova jyʉmwene iita ɨnyɨlango jya mwene jya kʉva mpositili najɨhʉmili kʉ vaanu, apeene jɨhʉmile kwa Yɨɨsʉ Kɨlɨsiti jyʉmwene (1:11–2:14). Na pa kulongwi tsa vʉpoki ʉwihʉma mu kʉtahiliwa nʉ kʉkonga indagɨlo tsa Moose, iita ʉvʉpoki vukʉtwitsila peene kʉ nzɨla jya kʉmwɨdɨka ʉYɨɨsʉ Kɨlɨsiti (2:16). Ikwongeletsa iita ʉvʉpoki ʉwa vuhʉmana nʉ lʉhʉngʉ lwa Ngʉlʉve ʉlwʉ aavavoniitse avaanu, nakwʉ kʉta vuhʉmana ni mbombo tsa veene.